Teen
و فاتت السنه

و فات الوقت

و جينا دلوقت

للوقت الذي لا يرحم

وقت ..... وقت ..... وقت ..... ( الظاهر الشريط سف !! ) .... وقت .... الأمتحااااناااااات


ناس كتير مننا بتكره الدراسه و المدارس و الجامعات عموما , و يمكن لو سألت عن السبب هتلاقي الاغلب بيقولك على شان الأمتحانات , و الباقي من حزب " اعطيني هذا اللحاف " اللى ما بيحبوش الصحيان بدري . و طبعا قبل الامتحانات بشهر او اتنين تلاقي بقى الاهل ابتدو يعملولك حظر تجول و تسمع كتير جمل زي : هي دي المذاكره ؟!! ..... قوم ذاكرلك كلمتين ينفعوك ..... مش ملاحظ ان الامتحانات قربت ( على اساس انك مش ملاحظ لوحدك يعني !! ) ..... .


و نبتدي بقى مع كل يوم بيفوت و الامتحانات بتقرب , نحس بخنقه من كل حاجه و توتر ( بيفرق من واحد للتاني ) .... و تبتدي " أرأضت " الضوافر و تقطيع الورق و الكتابه .... لحد ما تلاقيك خلصت صوابعك و داخل على الرقبه , و الورق خلص و كملت ع الحطان ! . و ده طبعا مع شويه كوابيس و احلام اننا لسه ما خلصناش امتحان و الوقت خلص و بنشد فى شعر المراقب على شان يسيبلنا الورقه .... او بنمتحن و قاعدين قدام الورقه مسبهلّين و مش عارفين نكتب كلمه ! .


مع كده لو بصينا للامتحانات بشكل مختلف هنلاقي انها مجرد حاجه عاديه جدا . بنختبر بيها بس اللى قاعدين نرغي فيه طول السنه , و ان الموضوع مش محتاج توتر ولا اي رعب و قلق و كوابيس و كل الكلام ده . يمكن صحيح الاهل بيساهمو بشكل كبير فى انهم يقلقونا , إلا اننا لو اتفاهمنا معاهم هانستريح و نريحهم . لأن فى النهايه ده امتحان مش تعذيب يعني , ولا هايكهربو اللى هايغلط فى اللجنه ! . و يا سلام بقى اول ما تفتح الكتاب و تقعد قدامه فجأه تبقى كل 5 دقايق عايز تخش الحمام , و يجيلك جفاف ( ولا بتوع اثيوبيا ) و تحتاج تشرب كل شويه ... ده طبعا مع الكائن العجيب اللى اسمه " ابو النويم " اللى بيخليك تنعس و عينيك تدمع و تدوخ و الكلام يزغلل و يخش فى بعض ... مع حبة همدان , و همسة جوع و نفحة سرحان مطوله !!!


طبعا سمعتو عن المعسكرات الامتحانيه اللي فـ .... هه !! ماسمعتوش ؟! ..... ما علينا .... بصو , المعسكر الامتحاني ده زي معسكرات الاهلى و الزمالك كده ..... لا لا مش رايحين فنادق ولا حاجه .... احنا رايحين على المكتب و بس ! . المعسكر الامتحاني هو معسكر الواحد مننا بيخشه قبل الامتحانات بشهر ع الاقل , و ينقطع فيه تماما بقى عن النت و الموبايل و كل واسئل الأتصال الحديثه اللى خلقها ربنا .... و بتبقى حياته بس اكل , حمام , نوم و مذاكره ... مع حبة فرفشه و نعنشه و دندشه كده من وقت للتاني .


ازاي يا واد يا تين نستعد للامتحانات ؟؟؟؟


فى البدايه زي ما قولت هانقطع علاقتنا بالنت و الكومبيوتر ( اعتبروه مايكروويف مثلا او وابور جاز اوروبي ) , يعني ممكن نعمل " دي أكتفايشن " لبروفايل الفايس على اساس انو يبقى كأننا ماعندناش " موقع " ع الفايس . و الموبايل عادي , بس لو انت من الناس اللى ما بيقدروش يسيبوه لحظه , شيل الشريحه و اديها لأهلك و خليه " ام بي ثري " و خلاص , و " التزيون " اعتبرو بقى بوتجاز ( اصلو اكبر ) و بكده تكون فصلت نفسك من الحياه الحديثه و دخلت مود المذاكره .


فى ناس بقى بتسهر , و ناس تانيه بتصحى بدري ..... لكن زي ما عرفنا من علماء الفلك و النفس و " الجيوميتافيزيقياء " ( مش عارف دي ايه !! ) ان الصحيان بدري - و خاصة وقت الفجر - احسن وقت المخ بيكون فايق فيه و مستعد انو يحفظ بسهوله و ياخد اكبر قدر منكن من المعلومات و الرغي اللى فى الكتب ده . و لو فكرت , هتلاقي ان ده احسن بكتير , بدل السهر , لأن ببساطه جسمك و مخك واخد ان ده وقت النوم و الأنتخه الجميله اللذيذه اللطيفه .... و تبص حواليك تلاقي كل البيت نايم و كل الشارع و " المنتكه " نايمين و انت قاعد تشرب فى جردل النسكافيه و تحقد عليهم و تتاوب كل 0.5 فمتو ثانيه !! , اهو بالمره ترحم نفسك من المنبهات ( مش اللى بترن اكيد !! ) لأنها متجيب فرقعه فى الدماغ مع تنميل بسيط فى الأطراف و الحواجب , و رعشه " ركيكه " فى الرموش ! . يعني ممكن مثلا تنام الساعه 10 و تصحى ع الساعه 3 او 4 مثلا و تقعد تذاكر لحد 12 مثلا و بعدين تفطر و تانملك حبه و تصحى الساعه 3 او 4 و تتغدى و تذاكر تاني و بعدين تتعشى و تنام الساعه 10 مثلا مثلا...... و افرض مثلا مثلا يعني اني خـ.... أحم.! ..... اهو نظام ما " يخرش " اي حاجه من اي نوع لأن الفجر كل الناس بقى بتبقى صاحيه , اللى بيصلي و اللى بيستعد للشغل , و الجو المنعش بقى فعلا بيفوق الواحد زي السفن اب كده .


طبعا كلنا بقى بنحب ناكلنا حاجه خفيفه كده ( طاجن باميه مثلا او نأزأزلنا حمامتين ع السريع ... مج شوربه خفيف ) اول ما نصحى على اساس نفوق بقى و نركز و الزغلله و الحول يروح .... لكن و للفجأه ان ده غلط يعني سو موت .... لما بتاكل , الدم ... هووووووب .... بيتسحب كله للمعده و يسيب المخ فاصل و قاطع ميه و نور و كله كله ... الأحسن انك تاكل بس حاجه بتتهضم بسرعه , مثلا شكولاتايه سنيكرز ولا مورو ( عم شندويلي بيعمل شكولاته جديده روعه ! ) مع مج نسكافيه او كفي ميكس او شاي بلبن .... " عسير " فرش . اوعى ابدا تاكل حاجه قويه و تذاكر ... اللى هايعمل كده زمبو على جمبو يا ابو جلامبو .


صحينا بدري و كلنا ... نذاكر بقى .... لكل واحد فينا طريقة مذاكره مختلفه زحل عن التاني , اللى بيحفظ بالحل و اللى بيحفظ بالكتابه , و اللى عندو ذاكره " فوتوغرافيه " بيحفظ من بصه واحده ..... إلا ان العلماء قالو ان احسن طريقه للمذاكره و الحفظ هي اللى بتشترك فيها اكتر من حاسه .... يعني نحسس ع الورق ولا ايه !! .... لا لا ... يعني تكتب " بأيدك " و تنطق بصوت مسموع " ببقك " و تسمع " بودانك " .... بالتالى طبق السلطه اللى فى دماغنا ده , هايخزن المعلومات اسرع . بعد الحفظ تطبق بالحل , لأنك هتلاقي الحاجه اللى بتغلط فيها هي اللى بتفتكرها اكتر حاجه , و كل ما تغلط تحفظ اكتر .


طبعا بنحب نذاكر بقى و احنا بنسمع اغاني على اساس انها بتدي طاقه و بتفتح نفسنا و كده ..... بس اوعى تحفظ و انت بتسمع اغاني ... ممكن تحل , لكن ساعة الحفظ ... لازم صمت تاااام . و ممكن بقى نعمل حبة خدع كده على شان نحفظ بسهوله ( عارفين كتب الوزاره فيها كلام كتشير كتشير كتشير ) .... مثلا لو عندك خمس عناصر تحفظهم ( حديد , المونيه , نحاس , أصدير و كالسَم ) ... احفظ الجمله دي : حد الموس ناشف و اصلب كالصخر ..... اول حرفين من كل كلمه هما عنصر , و بكده جمله عاديه ممكن تحفظ منها 5 عناصر .... او ممكن تحفظ الكلمه دي " حدالناصك " ادمج الخمس عناصر و اعمل منهم كلمه ...... غنيهم مثلا , مش ملاحظين اننا بنحفظ اي اغنيه بسهوله جدا ؟! ..... سهله كوكزي يعني .




بتكسل عن المذاكره .... حطل لنفسك حاجه تعملها بعد ما تخلص الحته المعينه ... بعد ما تخلص دي , هاتسمع اغنيه ... بعد ما تخلص دي هاتقوم تكلم حد او تاكل " جيلاتي " .... و بكده هايكون فى دافع انك تخلص اسرع على شان تعمل الحاجه اللى بتحبها . و لو بتحل حاجه فيها اختيارات حاول تفكر فى الأجابه قبل ما تبص ع الاختيارات لأنها ممكن تلخبطك .... و خليك فاكر كلام حد حكيم ( اللى هوا انا ) : ان الاحساس الاول غالبا بيبقى صح .... بس مش معنى كده اي احساس اولاني يبقى صح و ترجعو تجيبو درجات مش قد كده و ترجعو تدعو عليا . و فى اسئلة الصح و الغلط الجمله الاطول غالبا بتبقى الصح ... و اللى فيها كلمتين " دائما " او " ابدا " او اي حاجه شبههم بقى بيبقو غالبا غلط ... و ركزو على كلمة غالبا دي , مش دايما ( ممكن تقربو شويه من الشاشه ... عادي ) .


و لو سؤال فى الرياضه ولا الفيزيا ولا اي حاجه عايزه خطوات و مش عارف الاجابه , اكتب اي خطوات تعرفها او شاكك فيها و مش مهم النتيجه , الخطوات اساسا عليها اغلب الدرجه و اهو درجتين من 3 احسن من صفر ! . و فى التاريخ , خلى قرايبك يحكولك عن اي احداث بتدرسها هما عاشوها او يعرفو عنها قصص , الواحد بيفتكر اكتر لما بيسمع او بيشوف الحاجه من حد ( جدو , ستو عم دسوقي بتاع العجل )


اوعى بقى تعيش دور المتفوق اللى بيخلص الامتحان الاول و يسلم الورقه اول واحد و ينزل يطمن امهات صحابه بقى و يغيظ العيال و هو خارج , استعمل كل الوقت و راجه اكتر من مره يمكن تلاقي حاجه مستخبيه كده ولا كده , و كل سؤال حليته , اعمل جمبه فى ورقة الامتحان علامه احسن تفوت سؤال و تقعد تعيط بعد كده لأنك دايما بتلاقيه سهل و انت عارف اجابته !! . و انت بتذاكر كل نص ساعه قوم و خدلك لفه و امشي حبه صغيرين ( مش ساعتين يعني و تقول بتمشى ) على شان ما تزهقش و تنعس .


بنحب السرير .... بس ما ينفعش اننا نذاكر عليه , لأننا هاننعس و يقعد معانا " ابو النويم " .... الاحسن نذاكر على مكتب و نخلي المخ يعرف ان ده مكان المذاكره على اساس اول ما نقعد يشتغل مود المذاكره على طول ...... ايه !! , كمان بتنعس ع المكتب !! ...... يا حلاوه بالبقلاوه .... بص يا حج , لو حسيت انك نعسان و انت بتذاكر زغزغ سقف بقك بلسانك , او اضغط بضوافرك فى كف ايدك .... مش بهزر ... ده هايفوقك اقسم . و ممكن لو فى النص نعست قوي , نام شويه ... بس اوعى تنام اكتر من ساعه , يا " أمتنّ " جسمك هايخش فى نوم عميق و سحيق و هاتبقى حالتك مش لطشيفه ابدا لما تصحى ! .


اوعى تتوتر قبل الامتحان , و نام بدري احسن على شان يبقى مخك فايق و قادر تستوعب , بدل ما تروح تنام فى اللجنه وللا حاجه . و اى منتجات البان بقى ( زبادي و آيس " كرين " ) بيقللو التوتر جاااامد و بيعملو حالة " ليراكس " قويه جدا . قبل ما تنام جهزل كل حاجتك , اقلام جاف نفس النوع ( على شان يبقى نفس الحبر و بدل ما تبقى علامه ) و رصاص و استيكه و برايه و آله حاسبه ( بدل ما تضيع الوقت و انت بتستلف من حد ) . و الصبح ياريت ما تراجعش ولا تتكلم مع حد عن الامتحان , لنك هاتنسى كل اللى ذاكرته قبل كده ... افصل نفسك من المود و خليه مود سعيد كده على شان تعرف تركز .



و اخيرا ننصحكو ( يا بتوع المدارس ) انكو قبل امتحاناتكو بحبه كده تجيبو " جرنال " الجمهوريه ( ماليش قرايب بيشتغلو فى الجرنان على فكره ), و تركزو على مراجعات ليلة الامتحان بالذات , بييجي فى الاغلب منها حاجات فى الامتحان و بالحرف , و لو ما جاش اهو اسمك حليت حاجه زياده . و ماتنسوش اسئلة كتب المدرسه و امتحانات دليل التقويم اللى فى الآخر .


و بكده نكون خلصنا

ماتنسوش بقى ان المعسكر مش كله مذاكره

ممكن فى مره نخرج , نشوف فيلم , نرسم ... نرقص

اي حاجات فرفشه و دندشه على شان ما نتختقش

و ماتنسوش النصائح الذهبيه .... لربة المنزل اللولبيه


من اراد العلى نام الليالي .... و شد اللحاف و قال : انا مالي !

و لو اردت ان تكون " هابي " ..... ارمي الكتب و صلى ع النبي !


ربنا مع كل الناس

ادعولى بقى سايق عليكو النبي

و يخليلكو عيالك و اهلكو

و يقعدلكو فى صحتكو و عافيتكو

و يبعد عنـ .....

قبل ما يقبل الموضوع شحاته بقى

اروح اجيب اليافطه :)

فتكم بعافيه

D=
Teen
مين فينا ما بيحلمش .... كلنا ..... يمكن فى حد احلامه بسيطه و حد تاني احلامه كبيييييره ..... حد احلامه قويه و التاني ضعيفه .... بس فى النهايه كلنا بنحلم .
و يمكن اول حلم بنحلمه فى حياتنا , هو حلم الطفوله المقدس .... " نفسي يبقى عندي .... " .... يبقى عندي الوان , عربيه , " مشدس " خرز, عروسه من اللى بتقول : ماما و بابا ... اي حاجه شوفنها هنا ولا هناك , بنقعد نحلم بيها و نحط خطط مهولة الحجم و التكوين , و نتخيل اذا جاتلنا هانلعب بيها ازاي , نكسرها ازاي . و سعاده غامره و احنا بنتخيل ولاد خالاتنا و هما متغاظين مننا , و طبعا على شان كل ده يتحقق بنستخدم السلاح الاقوى فى العالم .... الزنّ .

بنكبر و احلامنا بتكبر معانا , اللى عايز يدرس حاجه معينه و اللى عايز يشتغل و اللى عايز يخلص من الدنيا , و اللى عايزه تبقى شاكيرا او بتحوش على شان تسافر على تركيا و تقابل مهند ... كلها احلام شخصيه ... تخصنا احنا و بس .
فى ناس بتحلم لنفسها و بس , و فى اللى عنده حته فاضيه فى قلبه ( "زؤر" صغير كده ) , بيحلم فيها لغيره .... قرايبه , اهله , صحابه , او حتى بلده . نفسه الاهلى يكسب , نفسه فى تحرير القدس , نفسه فى تحرير ليبيا , نفسه فى أي تحرير و خلاص .... نفسه خاله يشتغل أو حتى ان حماته تسافر موزامبيق

فى مننا اللى بيقعد يحلم و خلاص , و يقضي حياته طول عمره و هو بيحلم , ماشي يحلم , نايم يحلم و حتى بيحلم و هو بيحلم !! .... لحد ما فجأه بيتلزق على قفاه و يعرف ان فى حاجه اسمها واقع . و على شان احلامنا تبقى حقيقه , لازم يكون ليها اساس فى الواقع .... و يمكن فاكرين كلنا قصة عقلة الاصبع بتاعة خامسه ابتدائي , لما أماني قالت لأسامه : بص يا أسامه يا خويا , على شان يبقى ليك قصور و فلل فى السما , لازم يبقى ليها كدشه اساسات متشينه فى الواقع ..... فاهم يا مَوّكس ؟!

صحيح أسامه سمع كلام أماني و بقى مهندس مدني على شان يعرف يبني الأساسات اللى قالتله عليها .... و أماني اتجوزت و جابت عيل و نص ( اصلها حامل فى الرابع دلوقتي ) .... إلا أن أماني ما قالتش بالظبط ازاي نبني الاساسات دي .

ببساطه , على شان نحقق احلامنا , لازم نقعد و نبتدي نشوف ممكن تتحقق ازاي من الصفر .... يعني مثلا انا نفسي ابقى مذيع ......يبقى لازم اخد الطريق الصح من اوله .... اختار الفرع المناسب لدماغي فى ثانويه عامه , اخش اعلام , احاول اشتغل فى اي راديو اون لاين , و اخد خبرات و دورات و خلافه و اكبر , لحد ما فى النهايه ابقى المذيع اللى حلمت بيه .

نفسي ابقى غني و رجل اعمال .... على طول , تجاره انجليش , بيزنس , و منها ابتدي اشتغل هنا ولا هناك , و برضو اخد خبرات و اكبر و احوش و اعمل مشروع صغير و وراه واحد اكبر و واحد اكبر لحد ما ابقى نجيب ساويرس الجديد .
نفسي ابقى كاتب , مغني ، ممثل , ديزاينر , مخرج ..... القاعده الاساسيه على شان تحقق كل ده , انك ما تعلقش خيبتك على شماعة " الظروف " و تقول : اصلي مش لاقي فرصتي , و مش لاقي حد يكتشفني و ما عنديش واسطه ! .... الشماعات دي انتهت ..... قدم شغلك ببلاش دلوقتي , على شان الناس تاخده منك بفلوس بعدين , يعني ما ان تخافش شغلك يتسرق و الكلام ده .
يعني ازاي يعني يا واد يا تين يعني ؟؟
لو بتكتب اي حاجه من اي نوع , اعمل بلوج و انشرها فى كل مكان , و اعمل للبلوج فان بايدج و كده , على شان ناس اكتر تعرفها و تقرا كتاباتك.
لو بتصمم او بتصور , الدفيانت آرت عندك , او الفليكر .... صمم و حط و ماتنساش التوقيع و العلامه المائيه ( حبة ميه و ادلقهم ع الشاشه ) و طبعا الفان بايدج و نفس القصه .
بتمثل او بتخرِج .... صور فيلم قصير , مثّل حاجه بسيطه .... حطها ع اليوتيوب ... و سيبها .... او اعمل فيديو بلو و حط عليه كل شغلك ... و برضك فان بيادج و إلى آخره
بتغني و صوتك بيجلجل فى الحمام تحت الدوش ؟؟؟ ..... الناس بتجري فى كل مكان اول ما تغني ؟؟؟ .... يبقى ع اي استوديو عدل ... دلوقتى على شان تأجر استوديو تغني فيه م باقتش معضله , و م بقاش غالى .... شوف حد يلحنلك , و غني و سجل ..... و انشر فى كل مكان بقى ... يو تيوب , منتديات , فايس ... اعمل سيديهات و احدفها ع الناس فى الشارع .... اي حاجه .
اهم حاجه الدعايه الكويسه , يعني انك تنشرها فى كل حته بقدر الأمكان ...... و انك ما تبخلش على الناس انها تشوف شغلك ببلاش .... و ابسط مثال عندك الراجل بتاع فيديو " الذبابه " اهو ق هوجي بيغني فى قهوه .... اتصور فيديو , اتبعت " سنه زرقه " ( بلو توث يعني للمثقفين ) , اتحط ع الفايس , و بقى على كل كمبيوتر و كل موبايل ..... و فى النهايه طلع فى مسلسل فى التلفزيون .
لما تنشر لنفسك ... او زي ما بيقول " تفرش لنفسك " ( افرشو اي حاجه و خلاص .... مش ناقصين غلبه ) ...... كأنك ماسك يافطه و بتقول : يا بشر انا اهوه .... و مش بعيد حد يكون معدي و يتكعبل فى حاجه من بتوعك و يديك الفرصه اللى بتدور عليها ... و اهي فرصه تسمع كومينتات الناس , تشجعك ...... و نقدهم يعلمك .
و طبعا عندك مسابقات فى كل حته ( ساقية الصاوي هاتنفجر من كتر المسابقات ) ........ و لو فشلت , حاول تاني و تالت و رابع , و خليك ورا حلمك ..... اوعى تسيبه ابدا ابدا , حتى لو ادالك بوكسين كسّرو سنانك .... عادى , طقم جديد هايحل المشكله ... بس اوعى تسيب حلمك .

أيه !! ..... ما عندكش حلم ! و مش عارف عايز تكون ايه ؟
مين قال ؟؟
غمض عينيك ..... شايف نفسك ايه بعد عشر سنين ؟
قاعد على مكتب و فى قدامك ورق و رسومات و اقلام و حاجات
ممكن قوي تكون مهندس ... مهندس ديكور ... ديزاينر محترف
شوف انهي حابه اكتر و امشي فى طريقه .

كل واحد و اهله بيحلموله حلم معين ( قولنا الكلام ده قبل كده , عارف ) فى اللى بيضغطو على ولادهم على شان يحققو الحلم اللى حلموه ليهم و فى اللى بيسيبوهم على راحتهم ....... سواء كده و كده , حتمن و لزمن تختار احلامك بنفسك , و يبقى عندك شخصيتك المستقله على شان تعرف تعيش قدام لوحدك و تعتمد على نفسك و تاخد قراراتك بنفسك لنفسك ( ايه كم نفسك ده !! ) .

الأنسان مش ممكن يعيش من غير حلم
الحلم هو الطاقه اللى بتخليك تتحرك و تشتغل
هو اللى بيديك أمل لبكره على شان تعيش
مش يمكن يتحقق حلمك بكره او بعده او ....
سواء كنت بتحلم ولا لأ
سواء كانت احلام قويه ولا لأ
سواء كنت طموح او لأ
بتحلم و انت صاحي أو نايم
فلازم تحلم على شان تعرف تعيش
و نهدي كل واحد " اوبيرتة " الحلم العربي و اتنين كيلو بتشينجان ( اهو نعمل بيهم حلة محشي صغيره كده ) :)
سامع حد بيقول ان الامتحانات قربت و مافيش وقت للبتنجان
ما تقلقش و حط فى بطنك بتنجانـ..... احم .... بطيخه صيفي
البوست الجاي هو آخر بوست لينا قبل الأمتحانات
هانديكو أجازه من المذكرات لمدة شهرين ( 5 و 6 ... اديني يا عم حته )
تذاكرو و تمتحنو ( و كمان انا اذاكر , مش اجازه لوجه الله يعني ! )
و نرجع فى الأجازه ببوستس جديده جميله كوكب
و اكيد البوست الجاي عن الأمتحانااااااااااااتوس
D=
Teen
ياللا حالا بالا بالا بالا ..... بالا

حيو ابو الفصاد

هيكون عيد ميلاده الليله اسعد الاعياد

فليحيا ابو الفصاد

سؤال بيطرح نفسيته اول ما بنسمع " السونجايه " دي ..... مين هو ابو الفصاد ؟؟ ..... بعد بحث و تنقيب اكتشفنا ان الحج ابو الفصاد , كان ليه فلوس عند مؤلف الأغنيه .... و بعد مداولات , قرر المؤلف انو يكتب لـ " الفصاد " اغنيه , بالفلوس اللى عليه ... اللي ابوه بعد كده اخدها و خلاها بأسمه " ابو الفصاد " !

ما علينا من " الفصاد " و المؤلف ..... إلا ان الاغنيه دي بتشير لحاجه مهمه فى حياة كل واحد فينا ..... لأ و الأغرب و الأعجب بقى انها بتحصل كل سنه فى نفس المعاد ... آه ولله , فى حاجه بتحصل كل سنه فى معادها بالظبط ! .... ايه هي ؟؟! ..... عيد الميلاد

سواء كنت كبير او صغير ... طويل او قصير... ألا ان لازم يكون ليك عيد ميلاد .... اليوم اللى شرفت فيه للدنيا , ممكن يكون مع مناسبه معينه ( مع يوم الكبده الاسكندراني العالمي مثلا ) او ممكن يكون يوم عادي من بقيت ايام ربنا .... لو بصيت هتلاقي ان اللى عيد ميلادهم فى يوم فيه مناسبه , صحيح الناس كلها بتبقى بتحتفل باليوم ده ( بياكلو كبده ) , و كل الناس بتبقى فاكره التاريخ بالظبط , لكن ساعات بيحتفلو بالمناسبه و بينسو صاحب العيد ميلاد اساسا .... اما اللى عيد ميلادهم فى يوم عادي , صحيح ما حدش بيبقى عارف عيد ميلادهم غير لما هما بقى يقولو و يلمّحو قبلها ... إلا ان اللى بيحبوهم بيبقو فاكرين اليوم اكيد , و بيبقى يومهم هما ... ليهم لوحده و بس .

عيد الميلاد بييجي و بيجبلنا معاه حاجه كلنا بنحب انها تجيلنا .... و ما بنحبش نجيبها ... الهدايا .

ناس هاتقولى : يا واد يا تين , الهديه مش مهمه , المهم انو افتكرنا اساسا و فكر فينا و فكر يجيبلنا ايه ...... مافيش مشاكل يا جماعه ابدا , و فعلا هو ده الصح , لأن لما بتيجي الساعه 12 بنبقى متوقعين التليفون ينفجر ف وشنا من كم الرسايل و المكالمات , و wall الفايس يقع علينا من كتر ما الناس كاتبه عليه .... لكن , تلاقي رساله و مكالمه و اتنين plz call me ! , و واحد باعتلك بقره فى الفارم فيل بمناسبة عيد ميلادك و سايبلك نوت بيها ع الفايس ! .

صحيح بنتصدم لما ده يحصل , بالذات لو بنفتكر كل واحد فى عيد ميلاده بقى و كده .... و العكس بيحصل لما بيحصل العكس ( فاهمينّى ؟! ) , يعني بنفرح جدا جدا لما حد يكلمنا فى عيد ميلادنا ولا يكتبلنا حاجه ع الفايس او يجيبلنا فيديو " الفصاد " من ع الـ "انت خرطوم " ( ده اليو تيوب بس بالعربي ) .... و تعدي الليله و ننام و احنا مش قادرين نستنى عقبال ما نصحى و نروح المدرسه او الجامعه او الحته اللى رايحينها على شان نشوف الناس جايبالنا ايه .

كل واحد فينا بيبقى نفسو فى حاجات , فلاشه , هيدفون , كوتشي " كانفورس " .... او حتى وجبه هابي ميل من ماك . المهم , اننا بنفضل نلمح للحاجه اللى احنا عايزينها قبل عيد ميلادنا بفتره , و نلقح بالكلام , و نرمي كلمه هنا و كلمه هناك ( ام عنزروت اتكعبلت فى كلمه من دول امبارح , و اضطرو يجبسّولها رموشها ! ) .... يااااه شوفت البيس الجديده , هاموت و اجيبها ..... سوري مش هاقدر آجي معاكو , اصلى بحوش الفلوس على شان اجيب بدله جديده بدل اللى مراتي كلتها . نقول و نستنى , و نحس بحركه غريبه فى البيت حوالينا , الناس بتتكلم فى موضوع و اول ما نيجي يسكتو او يغيروه فجأه ... او تلاقي الحجه ام العيال قررت فجأه تتفرج ع التلفيزيون و هي فى ايديها " جرنال " الجمعه ! ..... و طبعا احنا بنشغل جهاز " عبده العبيط " و ما نرضاش نبوظ الفجأه اللى بيعملوهالنا مع اننا عارفين ( او فاكرين نفسنا ) ايه هي .

و ييجي عيد ميلادك و تاخد حبه من " كل سنه و انت طيب " على شويه من " هابي بس بس توتو " على حتتين جاتون و كباية بيسي كبيره ... و اخيرا تيجي اللحظه المنتظره و يدوك الهديه ... طبعا قلبك بيزغرط من الفرحه و انت فى مخك بتقول و انت بتفتحها : يا حالولي يا حالولي ... الفلا.... يه !!

و يا " حيني " تلاقي بدل الفلاشه الكينج ستون ام 8 جيجه اللى مستنيها , فلّايه 8 سن معتبره من عند ابو اتنين و نص ! .... و بالتالى ما بتديش الري أكشن اللى متوقع انك تديه و اللى بيجيبلك الهديه كان متخيله فى مخه و هو بيجيبها ... و بالتالى هو بيزعل و انت بتزعل و بيبقى عيد ميلاد فقري على دماغ كل اللى حضروه !


الهديه هي رمز الأهتمام و التقدير .... لأنها بتبقى جايه بعد ما سعادتك فكرت فى اللى هاتجيبهاله , افتكرت عيد ميلاده , و بذلت مجهود فى انك تنزل و تنقي و تلف , و دفعت فلوس فيها , و شغلت بالك بتخيل منظره و هو بيفتحها و الأنشكاح اللى هايبقى على وشه , و كم عبارات الشكر اللى هاتسمعها ..... إلخ . يمكن الهديه مجرد رمز و اهو اسمو جاب احسن من ما جابش , و الكلام ده . بس حيث انك قررت تجيب فلازم حاجه هو عايزها , مش تجيبله اللى انت عايزه ! .

كمراهقين , بنبقى لسه خارجين من مرحلة الطفوله و جوانا بقايا من ان احنا مركز الكون , الكل بيهتم بينا , و بيجيب و بيعمل اللى احنا عايزينه .... لكن الموضوع بيتغير بعد كده و بنكتشف ان مركز الكون فى مكان تاني خلاص غير الكره الأرضيه ... و بنعرف ازاي نفكر فى اللى حوالينا اكتر من نفسنا , فى مننا بقى اللى خلاص بيتأقلم , و في مننا اللى بتفضل جواه لسه البقايا دي .

اكيد سمعت فى مره هو نفسه فى ايه .... هاتهوله . و لو غالي , ممكن قوي تشترك انت و باقي صحابه و تجيبوه , بدل ما كل واحد فيكو يروح يجيب حاجه رائعه من عند ابو 3.5 ( ده اغلى شويه ) , مصيرها فى الآخر الدولاب او الدرج ! . مافيش مشاكل ابدا ابدا انك تسأل اللى قدامك هو عايز ايه فى عيد ميلاده , هو كده كده عارف انك هاتجيبله حاجه فى عيد ميلاده , فعادي انك تسأله يعني ..... و لو مكسوف و كده فى الف طريقه تعرف هو عايز بيها ايه , تسأل بقى اهله , اخواته , تشوف هو ناقصه ايه و خلافه .... مش يمكن يكون عايز حاجه ارخص بكتير من اللى كنت ناوي تجيبه .

طب يا واد يا تين ازاي اجيب هديه ؟؟

و احنا صغيرين ايام الحضانه و الأبتدائي كان اي حد بيعمل عيد ميلاده , بنجيبله اي هديه و السلام , و نغني و نهيص و ناكل و نرقص , و خلصنا ... نخش ع مرحلة الناس التينز , نلاقي الوضع بيختلف تماما .... للولاد هدايا و للبنات هدايا .... لأصدقائنا هدايا و للناس اللى احنا مصاحبينهم هدايا .... و بنكتشف ان مش عيد الميلاد بس اللى بييجي فيه هدايا !

القاعده الأولى و الاساسيه : زي ما قولنا انك تعرف اللى قدامك عايز ايه على شان تكون هديه مفيده

القاعده التانيه : للولاد هدايا معينه , و للبنات هدايا تانيه ..... و فى هدايا تمش ع " الونجين "

القاعده التالته : شوف شخصية اللى قدامك و هات على اساسها الهديه , يعني الدباديب تمشي قوي مع البنات الرومانسيه و اللى عايشين دور الطفوله الأمومه .... اما الدباديب مش هاتمشي خالص مع البنات الواقعيين اللى ليهم اهتماما تانيه غير ويني " الددوب ".

القاعده الرابعه : لصحابك العاديين هدايا ... و للي بتحبه هدايا . يعني اوعى تجيب بوكيه ورد او حاجه دهب او فضه لبنت هي بالنسبالك صديقه - مهما كنتو انتيم - و انتي اوعي تجيبي لولد هدوم ( الهدوم الهدوم , مش سكرافات و حزامات ) , هاتتفهمو غلط على طول , حتى لو هي او هو ما فهموكوش غلط اللى حواليكو هايفهموكو غلط .

القاعده الخامسه : سعر الهديه و الماركه , مش مهمين خالص , لأن ممكن تكون حاجه رخيصه بس شيك و تهبل اللى يشوفها على طول ... لو فعلا اللى قدامك بيحبك ( اي نوع من الحب ) مش هايبص على سعر او ماركة الهديه ابدا .

القاعده السادسه : اللفه كل ما كانت بسيطه كانت احسن , يعني الجليتر ( فى ناس بيسموه برونز او بروبروء ! ) الكتير ده انتهى , و بصراحه ... بيبقى خنيق قوي على شان بيبهدل الأرض و بيلزق فى الشعر و الايدين و الوش و كل حته و ما بيطلعش إلا بالطبل البلدي !

القاعدة السابعه : ما تنساش تشيل سعر الهديه من عليها :)

بالنسبه للولاد : فالواحد عندو شوية اختيارات حلوين : فالساعات و المحافظ و الكارافاتات و شنط اللاب توب او الشنط العاديه شغاله .... لو بيشرب ساجاير يبقى ولاعه محترمه و فيها شوية حركات او طفايه روشه هاتكون برضو حلوه ... لو ليه فى الأكسسوارات يبقى مجموعة حظاظات نضيفه او " شنسله " بتلمع برضو هايبقو كويسين ..... و لو قريبين من بعض قوي فممكن نخش ع الهدوم و كده .

بالنسبه للبنات : فطبعا الورد اكتر حاجه كل البنات بتحبها ( و بعديه على طول عربيه جديده بمفتاحها ) , و عندك بقى الدباديب و الابجورات بتاعة الكومودينو اللى عليها ورد و قلوب , او الاكسسوارات او الشنط الكروس .... او ممكن طرحتين جامدين او شنطة ميك اب و مافيش مانع لو فيها الميك اب كمان ( بدل ما تبقى فاضيه يعني ) و برضو الشوكولاته بتعمل شغل او جزمه و شنطه جداد من عند كلب آلدو .

فى هدايا بتمشي بقى مع اي حد , يعنى لو عيد الميلاد فى الشتا , السكارفات ( الكوفيات يعني للي ثقافتهم هونج كونجي ) بتبقى هديه هايله و يفضل تكون الوانها جوكر ( ابيض , رمادي , اسود او بيج ) على شان بتمشي على اي هدوم .ممكن كمان الحاجات الإلكترونيه , زي الفلاشات و الهيد فونز و الماوسات و الكي بوردز و كده .... تبقى كويسه لو هايبقى ليهم نفع . و طبعا ما ننساش البرفيوم , و يفضل فى الحاله دي ان تكون ريحته هاديه و نبعد عن الروايح القويه , لو مش عارفين زوق اللى بنجيبله , على اساس ان ماحدش يعني بيكره ريحة البرفان الهاديه ! .


و ما ننساش اباجورات المكاتب و بللورات التلج و الابجورات بتاعة الكومودينو العاديه اللى تنفع ولاد و بنات , و طبعا ما ننساش الكتب للناس بتوع الكتاب صديقي . و لو صاحب الهديه عندو حيوان اليف , ممكن تجيب حاجه للحيوان بدل صاحبك ! . كمان , الهديه ممكن تكون رحله لمكان , عزومه على حته , فسحه جامده او فوتو سيشن مثلا .


ملحوظه كلبوظه : البراويز الفاضيه بقت موضه قديمه , إلا لو جايب برواز و حاطط فيه صوره حلوه ليكو مع بعض او بورتريه ليه مثلا , و ما ننساش نجيب الهديه على اللون اللى صاحبها بيحبه , و يا سلام لو كان البوكس او اللفه من نفس اللون كمان هاتبقى حاجه هايله .

سواء كنت من الناس اللى شايفه ان الهدايا مالهاش لازمه بين الصحاب

او كنت بتحب يجيلك فلوس بدل الهديه

او من رابطة هاديني ولا تعشيني

ف هايفضل للهدايا سحرها

و الجوا الجامد اللى بتعملها و هي مقفوله قدامانا

و هانموت على شان عرف فيها ايه

البوست اللى جاي فيه ايه ؟؟

لا لا ده هديـ.... اقصد ... سر

D=

ملحوظه كلبوظه تانيه : حتت من البوست ده مقتبسه من نوت إنجليش ع الفايس لـ "مروه فرج" بنفس العنوان ( بس بالأنجليزي طبعا )