25/1 : 11/2
طبعا كلنا عارفين ايه الارقام دي ..... لا لا دي مش نتايج ماتشات !! .... دي تواريخ ..... ردح من الزمن ( مش الردح اللى في بالكو اكيد ) ..... ولكنه ردح من اهم " الردوح " اللى ممكن تعدي علينا .... ابتدى بالمظاهرات فى التحرير , و انتهى بتنحي الرئيس
فى الفتره دي حصل كم احداث مهول لدرجة ان الواحد وصل درجة انو ما بقاش بيستوعب , تنحي و حرايق و تأجيل هنا و هناك و ناس بتموت ده غير طبعا كم الأشاعات الغريب اللى طلعت - و اللى هانجيب في سيرتها بعدين - ده غير الظاهره الاهم .... اللجان الشِعبيه .
طبعا بعد حرق الاقسام و تدمير السجون و هروب المساجين , بقى فيه لبش فى المنطقه و الكل قرر ينزل يحمي بيته , فى الفتره دي الواحد كان بيحس انو مثلا فى العيد او رمضان او حاجه زي " كدهون " ,الشوارع مليانه ناس و كم اسلحه غريب ظهر , من كل شكل و لون , و يمكن فى مننا شافو شوية سيوف على شوية " حبشتكنات " ( ما حدش يسأل يعني ايه ) من اللى تحسهم طالعين من فيلم ملك الخواتم او حرب السبتيه ( ده الفيرجن المصري من حرب طرواده ) ...... ناس كتير نزلت و سهرت و وقفت فى البرد و يمكن المطر ساعات .... صحيح الاسباب مختلفه , يعني فى اللى نزل على شان يحمي فعلا , و فيه اللى نزل على شان زهق من القعده فى البيت , و فى اللى نزل على شان يهرب من وش مراته الفقري , او حتى نزل يقضي واجب و يقف مع صحابه شويه و ياكل كيك و " سفندي " من اللى الناس بتبعته من هنا او هناك .
فى اللجان الشعبيه و فى كل حته فى مصر تقريبا , الاشاعات بتتنقل بسرعه جدا ( سو موت يعني ) لدرجة انك تبقى لسه عارف الخبر من المصدر , و تروح على شان تبلغ الباقي , تلاقيهم عارفينه و مزودين عليه حته و ربع كمان ! . و " للأشف " اغلب الاشاعات دي ما بتبقاش حقيقيه , ده غير ان بيبقى ليها اثر سيء بعد كده , سواء بقى بتخوف الناس اكتر م هما خايفين زياده - زي : الحق ! فى 14 مسجون جايين عليكو من وادي النطرو و بيضربو فى اى حد قدامهم بالآلي ! - او بتخليهم يخدو فكره غلط عن واحد من البشر او عن الثوره و خلافه .
و على التوازي و التماشي مع الاشاعات , و مع انقطاع النت و السليلور ( المحمول يعني بس باللبناني ) , بقى المنفد الوحيد على العالم البرّاني هو التلفاز , اللى ادانا جرعه مكثفه من التوك شوهات , و الاخبار اللى 25 ساعه فى اليوم ! ..... ومع كم الاخبار و البرامج و القنوات , كتير مننا - و أنا أولهم - حس بحاله من التوهان و الزغلله و ما بقاش عارف يصدق مين ولا مين ولا مين ...... وائل ولا الريّس ولا الثوار ولا الكنتاكي ولا الفريدم هاوس ولا الجزيره ..... ولكن , و مع كل ده , برضو اغلب الناس كانت بتتكلم فى السياسه سواء فاهمه ولا مش فاهمه , او جالها حالة الزغلليشن ولا لأ !
ومع حالة التوهان , و الملل و الزهق اللى جت للواحد من كتر الاخبار و القعده فى البيت و البحلقه فى الحيطان سعات , كان عندنا وقت نعمل حاجات كتشير جدا , و نفكر فى حاجات كتشير , فى اللى فكر فى مستقبله الى بقى مش واضح قوي زي زمان , و فى اللى فكر فى انو يتعلمله حاجه جديده , و الل من كتر البحلقه نام و نسي يفكر اساسا !
لما نفكر كده شويه , هانشوف أد ايه احنا جيل محظوظ - الشباب عامة - عدى علينا فى حياتنا حاجات كتير قوي , ما بتحصلش غير كل فين و فين , زي الالفيه مثلا , و حبة ظواهر فلكيه على حبة حروب و حاجات , و آخرها الثوره دي .... الحاجات دي فعلا ما بتتكررش غير كل حين و مين ... و طبعا فى مننا اللى كبر الـ G و روق الـ D و فى اللى اهتم بأنو يوثق الثوره و انو شارك فيها بأي شكل من الاشكال , يتصور بقى جمب دبابه , واحد من الجيش , عربيه مصفحه , او حتى صخره من الناس اللى كانت بتضرب بيها ! ..... المهم انو يكون فى دليل مادي بس على شان لما ييجي يحكي فى المستقبل ( ايّا كان نوعه بقى , قريب ولا بعيد ) لولاده ولّا ولاد ام جملات اللى ع الناصيه يكون فى اثبات انو كان موجود ...... يمكن يكون فيه شوية كدب على حبة مبالغه و رشة بهارات على شان الموضوع يبقى فيه " شاصبنس " اكتر ( يعني يقول انو خد طلقتين فى دماغه مثلا و لحقهم بأديه قبل ما ييجو فيه) ... بس مافيش مشكل يعني , مادام الاحداث التاريخيه مش هاتتغير .
ساعة الثوره الناس كانت تلت تنصاص ( ايوه انصاص , فى ايه ؟! ) :
الأول : ثورة ايه يا عم ؟! ...... دول شوية عيال تعبانه مش فاهمين حاجه ... مبارك هو الأمااان و قائد الضربه الجويه الأولى كمان
التاني : ثوره !! ..... الله يقطعهم , فكسولنا الأجازه بس و ادينا قاعدين فى البيت , ما كانت الدنيا ماشيه و خلاص !التالت : شباب الثوره الطاهر ( الجمله الاساسيه فى بداية اي كلام عن الثوره ) , عملو انجاز عمره ما اتعمل فى تاريخ مصر كله , و حققو اللى كلنا كنا عايزينه , و عملو اول ثوره الكترونيه فى العالم ... آه ونبي يا خويا !
سواء كنت ضد الثوره , او معاها او حتى لا مع دول ولا مع دول ( مع جلاء الانجليز عن مصر مثلا ) , فلو اتزحلقت فى كرسيك شويه كده.... ايوووه , كده بالظبط , و غمضت عينك شويه ...... بتغمض ايه ؟؟ امال هاتقرى ازاي يعني ؟! , ما تغمضش دوّقتي ! ..... زي ما كنت بقول , لما تريح و تغمض هايجي فى بالك سؤال مهم : انا كمراهق او شب او حتى انسان عامة , استفدت ايه من الثوره ؟
بالصلاتو ع النبي كده , و " ينكن " دي اهم حاجه , ان دلوقتي المستقبل - و إن كان غامض المعالم - بقى مشرق , و بقى الواحد متأكد انو اكيد هياخد المكان اللى يستحقه سواء فى شغل او دراسه او مِنح , بعيد بقى عن الرشاوي (2 جنيه لعمكو برعي الفرّاش تكسبو فيه ثواب ) و الواسطه و المحسوبيه و الكوسه ( ام رز و صلصه , بموت فيها ) .
طبعا الثوره و اللجان الشعبيه بينت و كشفت معدن الناس الحقيقي , مين خوّاف و مين ندل و مين فعلا يستحق انك تتمسك بمعرفته , ده غير انها ورّتك ان الناس مهما حسيت ان ثقافتها متدنيه , إلا انها ممكن تتجمع و تعمل حاجه صح و مش بعيد تقدر تغير من نفسها , و ورّتك كمان قد ايه الكل بيخاف على بعضه و ن لسه فيه رجاله ( مش من بتوع بيريل اكيد ) فى مصر ....ما ماتوش فى الحرب او " الزنزال " زي ما كانو بيقولو .
الثوره خلتنا نهتم بالسياسه ( اللى اغلبنا كان بقه بيلزق فى قفاه من كتر ما بيتّاوب لو بيشوف حاجه سياسيه هنا ولا هناك ) , و نتكلم فيها و نركز مع اللى بيحصل فى ليبيا و تونس و اليمن و امريكا و غيرهم , و يبقى لينا رأي فى السياسه كمان .
و مع الوقت , بقينا متطمنين اننا ممكن نعبر عن نفسنا بحريه ( طبعا الحريه مش معناها اننا نقل أدبنا ع الناس و نقول حريه ) , و نمشي فى الشارع و احنا متطمنين و واثقين ان مافيش حد هاييجي ياخدنا من قفانا ع السجن و يكهربونا مثلا ! . من الآخر ... بيقنا بنتنفس حريه جميله , و مع حملة تنضيف الفساد من مصر , و تنضيف الشوارع , لازم كمان كل واحد يعمل حملة تنضيف لنفسه ...... غسيل كده و تلميع محترم من جوه و من بره و كل المداخل و المخارج و الزوايا و الاركان , بالديتول ( او الفنيك ... كلهم بيعقمو و خلاص ) و الجلانس و الميه و الصابون مع حبة اريال ... هايبقى الواحد كده سخصيه جديده لايقه بالحريه اللى جتلنا دي , و لايقه بمصر فعلا .
طب يا واد يا تين , الحج لسه ما قبضش و مافيش فلوس نجيب " اريام " ولا حتى " ديتون " , نعمل ايه ؟؟
ابتسامه لطشيفه في وش اي حد
ما تعليش صوتك او صوت اي حاجه تانيه و تضايق اللى حواليك
و لو قولت : من فضلك , لو سمحت , متشكر , آسف .... لأي حد مهما كان نوعه او مهنته , هاتبقى فله , شمعه , منوره :)
ساعد المحتاجين , مش المحتالين .... يعني اتبرع لجمعيه او اتبرع بدمك , مش اي حد فى الشارع و السلام
ماترميش زباله ع الأرض
لو لقيت زباله ما ترميش فوقها و تقول : ماهي كلها زباله , و هاتتشال , يعني جت على اللى في ايدي ده ؟! ..... لأن اللى قبلك عمل كده و اللى قبلو لحد ما المكان اتملى زباله و ماحدش هايشيلها فى الآخر !
و لو شوفت حاجه غلط حاول تصلحها بشكل حضري و ماتسكتش .... اظن شوفت آخرة السكوت 30 سنه !
ما تكسرش اشاره او تمشي عكس اتجاه الطريق
ماتسوقش بسرعه و التزم بالسرعه اللى الناس كاتبينهالك
و مفيش مشاكل لو التزمت بقواعد المرور
و لو حبيت تعدي شارع , الاحسن تعدي من ماكن عبور المشاه
و اكيد هاتشتكي اي حد او وِجهه هاتقصر فى شغلها
و قبل ما تشتكيهم , تكون انت بتشتغل بضمير
عيش حياتك من غير كدب ولا شتيمه ولا ظلم او شهادة زور ايّاً كان الوقف
عاتب بأدب , اختلف بأخلاق و احترم الكبار و اعطف ع الصغيرين ( باكو لبان بالفراروره هايقضي الغرض برضو )
ما تقولش : و انا مالي يا عم ! .... تؤ تؤ , ده كله بقى مالك دلوقتي
و بالتالي مش هاتبقى سلبي و تشارك فى الأنتخابات
و تقول رأيك بصراحه من غير خوف ... بس بشكل كويس برضو ( مش نحدف دبش يعني , للي ثقافتهم فنزولّي )
و تعامل كل الناس بالطريقه اللى تحب انهم يعاملوك بيها
يعني الفرّاش و الكنّاس و الزبّال , شايلين عنك كتير
لو احترمتهم و قولتلهم : من فضلك , شكرا .... مش هاتنقص حته اكيد !
و لو ابتسمت في وش عسكري المرور اللى ملطوع فى الشمس ده طول النهار , و أديته أزازة ميه ساقعه ... حاجه جميله " برضك "
حب لكل الناس اللى تحبه لنفسك
ساعد العواجيز و الكبار و العيانين و العاجزين لو عايزين يعدو ولا شايلين شنط تقيله ( جايبين التومين مثلا )
شيل اي حاجه مؤذيه من الطريق
و سلم و صبح و مسي على كل اللي تعرفهم و اللى ماتعرفهمش
و ما تدخنش فى اي مكان عام ... ريحة السجاير مش لطشيفه ابدا ابدا
و حتمن و لازمن تطلع المترو من باب الطلوع و تنزل من باب النزول , بلاش نبقى شبه القطيع اللى داخل و طالع فى نفس الوقت و من نفس المكان و ناس بتداس تحت , بتبقى حاجه عجيبه قوي
و بالنوسبه للرشوه , فدي ممنوعه نوهااااائي , لأننا اساسا السبب ان حياتنا كانت ماشيه بيها
لأننا اللى ادينا الفرصه للمرتشي انو يطلب بكل ثقه و احنا نديله من غير نقاش على شان " نخلص " !
احنا اللى خلينا فرعون يتفرعن تفرعناً متفرعن !
و تخلى بالك من الفواتير , لازم فاتوره على شان تضمن حقك , على شان ماترجعش و تعمل خناقه كبيره بعدين !
و اخيرا و يمكن ده من اهم الحاجات
ما تعاكسش اي بنت فى الشارع
الفكره هنا انك كيد لو شوفت ولد بيعاكس اختك ولا قريبتك اكيد مش هاتسيبه
يبقى ليه انت تعاكس ؟؟ ....... الأجابه اللى بتتقال : هما اهلها سايبينها كده , و هي راضيه على نفسها كده .
بذمتك انت مقتنع بالإجابه الغريبه دي !! ..... عامة اللى لازم تعرفه ان الدنيا دي سلف و دين
يعني اللى بتعمله هايتعمل فيك في يوم من الايام .... فخلى بالك بقى و حرّص على نفسيتك , و قد انزر من اعزر يعني
كلام كتير مش كده ؟
بس كلها حاجات سهله و بسيطه .... لأن لو كل واحد ما قالش : و هي جت عليا انا ؟ انا اللى هاغير مصر يعني ؟ هانتغير كلنا .... على شان اخلاق الفتره اللى قبل الثوره الجميله دي ما تفضلش عايشه جوانا اكتر من كده .
بمناسبة الفتره اللى فاتت
احنا وعدناكو السنه اللى فاتت تحديدا ان البوست اللى جاي
عن التقاليع , بس الظروف فرضت نفسها و اتكلمنا عن الثوره
و بالتالي , لينا فى التقاليع بوووست آآآآخر
D=
ملحوظه : لازم اوضح موقفى من الثوره على شان بس تكونو على الخط معايا
فى الاول , انا كنت اساسا مش مصدق انو ممكن يحصل حاجه , و قولت : اهو اعتصام زي اي اعتصام و السلام
بعدين , جت جمعة الغضب و ظهرت المطالب , اللى كنت معاها جدا
و بعديها , جه خطاب الرئيس اللى اتأثرت بيه و قولت : لازم بقى يرجعو و يدوله فرصه ينفذ ... حكمو عقلكوا شويه بقى !
و وراها , موقعة الجمل .... اللى خلتني اقول : لا لا , كده لازم يمشي فعلا .... اوعو حد يتّحتح من مكانوووووو
و اخيرا , الريّس تنحى و فرحت زي كل الناس بس كنت ضد إهانته و تجريحه و الكلام عنه بالأسلوب المستفز ده ... ببساطه مطلقه مش هاقول انجازات الريّس و كل الرغي ده , بس : العفو عند المقدره من شيم العظماء .
و شكراً
