كلنا بنحلم ..... عادي
كلنا عندنا طموحات ..... برضو عادي
كلنا بنقابل مشاكل ...... عادي برضو ( مختلفه عن اللى فوق على فكره )
كلنا احلامنا بتتحقق ..... ده اللى مش عادي
اتكلمنا قبل كده عن الاحلام ...... و ازاي تحقق حلمك .... لكن م اتكلمناش عن الاحلام لما تتحطم على صخرة الواقع ... بام بام بااااام تشششششش ( موسيئى تصويريه , ايه ! ) ..... زي مثلا لما تكون فى الثانويه العامه و بعد سنتين من الدح و العذاب اللا متناهي ... تخش كليه مش عايزها مع انك جايب مجموع قوي جدا .... بس التنسيق حطك فى كليه تانيه مثلا او ان مجموعك اقل من الكليه بـ 0.1 !!! ( اصل الواحد من عشره ده معناه انك مش مؤهل كفايه انك تخش الكليه )
زي ما قولنا قبل كده , كلنا بنحلم و عندنا طموحات ..... صحيح مش كلنا بنشتغل على شان نحقق الاحلام دي ..... إلا انها بتبقى موجوده ( على ايدك اليمين و انت داخل كده ) ..... في مننا بقى اللى بيحقق احلامه بسهوله , و فى اللى بصعوبه , و فى اللى احلامه بوووووووووووووم , بتنفجر فى وشه و تغرق كل اللى حواليه ! . الاحلام بطبيعتها حاجات مش مضمونه , بس فى نفس الوقت كتير جدا .... صحيح ممكن تحلم , بس مش معنى كده ان احلامك هاتتحقق كلها فى نفس الوقت , او كلها بنفس السهوله .
يا ترى بنعمل ايه لما احلامنه بتنتهي ؟؟ ..... لما نلاقي طموحاتنا بتبعد عننا ( ساعات بتطلع لسانها لينا كمان ) .... شايفينها , و مش قادرين نوصلها ... بنتصرف ازاي لما الحلم اللى حلمناه طول عمرنا , فجأه يختفي ؟ .... و يبقى واحد من الحاجات المستحيله . لما نحس ان كل امنيه فى حياتنا اتكسر على دوشمة ( دي غير صخره ) الواقع و القوانين , و اللى ممكن و اللى م ممكنش ! .
رد الفعل الطبيعي لأغلب التينز و الناس و البشر ( فى اتنين على زحل بيعملو نفس الكلام على فكره ) هو الإكتئاب . و الامر م يسلمش طبعا من شوية عياط مع شلحة نرفزه و نفحة زعل و حزن . بعد م حلم من احلامنا بيضيع , الأغلب مش الكل نظرتهم بتبقى سوداويه شويه للحياه , و يخشو فى مود " انا عمري م شوفت يوم حلو " , و يبتدي جهاز الرؤيا يشوف بس الجوانب السودا من اي حاجه .... و ده طبعا مع شريط الذكريات المؤلمه اللى بيبقى شغال فى دماغنا ..... و على شان بقى مود النكد يكمل نحط البلاك بلاي ليست ( لستة اغاني نكد يعني للى ثقافتهم ساحل عاجي ) ع الجهاز و نعيش بقى .
عارفين .... بيبقى صعب لما نلاقي حلمنا ضاع مننا ( مش قولتلكو شاعر )
و بيبقى اصعب لما نشوفه من بعيد و مش قادرين نوصله
و اصعب و اصعب انك تلاقي حد عنده الحاجه اللى بتحلم بيها
و مش مقدر قيمتها
يعني ايه يا واد يا تين ..... فى احلام مستحيله ؟؟؟ يعني ما نحلمش يعني يعني يعني ؟؟؟؟؟؟؟
تؤ تؤ تؤ ..... الموضوع مش كده ..... و انما لازم نعرف ازاي نتصرف لما الاحلام تنفجر , لما الاماني تروح تتفسح و الطموحات تطلعلنا لسانها .....أأ ! , لأ طبعا ! .... اكيد مش هانطلع لسانا ليها احنا كمان ( ع السرايا الصفرا عدل ! ) .... انما لازم نعرف فى البدايه ليه الحركه دي بتحصل ؟؟ و ليه فى احلام م بتتحققش ؟؟؟ .
حياتنا يا جماعه ماشيه بخطط .... خطط معقده " كوجزي " يعني ( دي زي معقده كوكب كده ) , الخطط دي غابا بتقى نهايتها بعيده على شان كده م بنحش ب قيمتها او المغزى منها دلوقتي . بمعنى , انك ممكن مثلا تبقى راكب اوتوبيس ( او سكوتر ) مع صاحبك , و فى الاسترحه البعيده جدا عن بيتكو .... بتقعدو ترغو و تنسو نفسكو لحد م الاوتوبيس يمشي و يسيبكو . طبعا بتتنرفزو و تقعدو تحسو ان فى " نِصِيبه " حصلتلكو و اسطوانة " ليه كده يا رب " تشتغل فى الخلفيه . يقوم ييجي واحد ابن حلال ياخدكو فى عربيته لأنه رايح نفس المكان .... و انتو معديين ع الطريق تلاقو ان الاوتوبيس ( اللى فاتكو ده , فاكرينه ؟ ) على جمب الطريق و مولع لدرجة ان الحديد بقى تقريبا بترول !
تفتكر لو كنت لحقت الاوتوبيس كان ايه اللى جرالك ؟؟ ..... صحيح حلمك م اتحققش فى انك تروح بسرعه و فى رحله عاديه ... إلا انك لو كنت حققت الحلم ده , كنت روحت اكيد ....بس ع المقابر , و ابقى بقى قابل عيلتك فى الآخره ! . دي خطه بسيطه من الخطط اللى فى حياتنا ..... الخطط التانيه بتبقى اطول , و معقده , بس فى نهايتها بتقول : يااااه , ده لو كان حصل كذا م كانش حصل كذا و كذا و كذا ..... و كذا :))
اما المثال الاشهر فى حياتنا ..... فهو انك تبقى نفسك تدرس حاجه معينه , و بعد الثانويه تخش حاجه تانيه خالص عمرها م جت فى بالك . موقف زي ده ليه طريقين .... يعني لو مثلا نفسك تبقى مترجم لكن مع الاشف ( الفزلين بيعمل شغل حلو على فكره ) دخلت تجاره .... عادي , م تتخلاش عن حلمك , و خليك عارف ان الكورسات م خليتش حد نفسه فى حاجه ( كورسات الطب نزله قريب ) , هاتحقق حلمك لكن من طريق اطول شويه ..... عادي , قابل الحياه ب ابتسامه قويه و واسعه ( بس مش قوي يعني ) .
اما بقى لو كان نفسك تبقى دكتور وللا مهندس و دخلت آداب اسيوط , صحيح بقى الحلم مستحيل تحقيقه ... لكن بص للجانب المشرق فى الموضوع , طب 7 سنين ده غير الماجستير , و هندسه 5 .... و كل واحده فيهم محتاجه خبره على شان تبقى معروف .... ده غير انك كان ممكن قوي تخشها و م تمشيش فى المواد , و تقضي باقي حياتك فيها , او يحصللك مشاكل انت فى غنى عنها . مش كده ؟؟ .... بعدين مالها الآداب , ممكن تبقى كاتب , او اعلامي , او مترجم او HR او حتى XZ ( دي شغلانه جديده انا مش عارفها ) .
الاحلام لو م اتحققتش ..... ف ممكن تتحقق بعدين
لو الاماني بقت مستحيله ..... ف الدنيا فيها اماني احسن بكتير
لو الطموحات انفجرت ..... ف طموحك ليه اكتر من طريق
الاهم انك تبقى عارف و متأكد
ان كل حاجه بتحصل لسبب فى الحياه دي
و زي ما كل حاجه بتحصل لسبب
ف برضو البوست اللي جاي هايتكتب لسبب
هايتكتب للباك تو سكولا
D=
ملحوظه كلبوظه : عارف ! , ملاحظاتنا كترت ...... بس دي ان شاء الله الأخيره ... حيث اننا مش عارفين نسترجع البايدج القديمه , عملنا واحده جديده , هتلاقوها على يمينكو هنا .... كمان استنو قريب قوي ان شاء الله المذكرات فى برنامج ع الراديو اللى ع الخط ( اون لاين يعني ) ... استنو البوستر بقى و الموعيد :)
|
بوست واحد ماشى
اتنين مفيش مشكلة
انما تلاااااتة يفوتونى مرة واحدة !! :O
انا كنت فى غيبوبة ولا ايه :D
انا افتكرت ان المذكرات شطبت (بعد الشر يعنى :D) بس طلعت بقى انا اللى مش متابعة xD
التلاتة احلى من بعض ^^
بس البوست دة عاجبنى اوى عشان بيدى امل كدة ^^
و مش معنى ان حاجة ضاعت يبقى كله ضاع...اكيد فى حاجات تانية عندنا مراحتش و موجودة :)
بس انا فى سؤال شاغلنى كدة بقاله كام يووم
بيقولوا لو فشلت مرة حاول تانى و تالت و عاشر
طب امتى اعرف اذا كانت انا مش نافعة فى احلاجة دى و اسيبنى منها و امتى اعرف انى لازم احاول تانى ؟؟
مش لاقياله اجابة بصراحة
و مستنية البوست اللى جااى جدااااا و لو مش هتقل عليك يعنى
يا ريت بقى كام نصيحة كدة للناس اللى رايحة مدارس جديدة ازاى تتعرف على الناس هناك بسرعة يعنى ^^
و بالتوووووفيق فى البرنامج :)
"الاحلام لو م اتحققتش ..... ف ممكن تتحقق بعدين
لو الاماني بقت مستحيله ..... ف الدنيا فيها اماني احسن بكتير
لو الطموحات انفجرت ..... ف طموحك ليه اكتر من طريق "
___
كلام جميل كالعادة، وطريقة ظريقة في الكتابة.
تحياتي ليك يا تيين وفي إنتظار البرنامج اللي ع الخط :D
سمر
منوره ولله العظيم
مختفيه فين كده ؟؟؟
شكل الاجازه كانت وخداكييييي
عامة
الحمد لله انك رجعتي
و الاهم قريتي
و شاركتينا برأيك طبعا
فى الاول طبعا مرسي لكلامك الجميل
ثانيا : امته اعرف اني ابطل احاول ؟؟
ابطل احاول فى حاجه لما كل السبل الممكنه و المش ممكنه تتسد ... انساها , و يمكن لو ربنا رايد , طريق لوحده كده هايتفتح .
ابطل احاول , لما القيني بعمل حاجه بقالى فتره , بس مش بتقدم فيها , زي ما ابتديت ... و على رأي المثل : و كأنك يا ابو زيدت .. ما عزيت !!
ساعتها اعرف اني مش ماشي فيها , مش مناسبه ليا ... و مش هاينفع اكمل .
غير كده , ف مفيش مانع اني احاول طول م في طريقه , و طول ما انا حابب الحاجه و حاسس اني بتقدم فيها و لو حتى حاجات بسيطه
و احب اقول
اخيراااااااااااا
اخيرا حد طلب حاجه و عايزنا نتكلم عنها
ان شاء الله البوست اللى جاي اكيد هايبقى فيه كده
و ياريت بقى تقوليلنا كام موضوع فى بالك حابه نتكلم فيهم :)
..............................
ع.سالم
تسلم يا باشا
ربنا يخليك بجد
و مواعيد البرنامج و الوبستر نزلو اهم
:)
مستنيك بقى هنااااك
:)
و بيبقى اصعب لما نشوفه من بعيد و مش قادرين نوصله
يااااااه بالظبط اللى انا بقوله XD
على فكرة الكلام اللى انت قلته ده عن اننا مش عارفين ربنا شايلنا ايه و انها اكيد حاجة حلوة سمعته من 100 شخصية بـ 100 طريقة مختلفة لكن و لا واحدة فيهم خلتنى اصدق الكلام اوى زى اللى فى البوست دى
كلام تحفة كالعادة
اصل انا بعيد عنك معقدة ثانوية عامة مع انى لسه مخلصتهاش بس عارفة يعنى ان الكلية اللى انا عايزاها عمرى ما هدخلها :D
عايزة ابقى مذيعة بقى و الاحلام الوهمية دى زى ما الناس بتقولى :P
يمكن عشان انا بحس ان انا اللى بقول الكلام اللى فى البلوج دى XD
مستنية البوست اللى جاية اكيد باك تو سكولا :D
نووووور
منورانا دياما و ابدا
و بجد , مرسي على كل كلمه قولتيها
و ربنا معاكي فى الثانوييييه
و ما تيأسيش ابدا
بصي
هاقولك تجربتي السخصيه
فى مدرستي , كنت ماسك الأذاعه , و عامل فيها برامج
و موسيقى تصويريه و حركات
ولا النجوم اف أم كده
و كنت هاموت و ابقى مذيع
و الكل كان متوقعلي اعلام
و ده حلمي الاوحد و الوحيد
ابقى زي مثلي الاعلى
اوبرا ونفريييييي
:)
جت الثانويه
و بعد احداث مؤسفه
دخلت آداب انجليزي
بس لسه انا ورا حلمي و ما يأستش
لأن آداب عنجليزي هاتدعم مجال الميديا
ده غير اني روحت كذا راديو اون لاين
و ناو اهو بقى ليا برنامج على راديو اليوم السابع
و منه ان شاء الله اروح حاجه احسن
و هكذا .... هي دي الحياه
طرقااات
:)
حلوة اوي ربنا يدي كل واحد البيتمناه .. بس اكيد الخيرة فيما اختاره الله و الانسان الناجح فعلا و المثابر هو المفقدش الامل حتى لو اتحط في اي مجال و بعدين فيها ايه لما نخلي احلامنا مرنة :)
عليك او عليكي نووووووووور
هو ده الكلام , و هي دي النقطه
اننا نخلي دايما احلامنا مرنه
و أكيد طبعا الخيره فى ما اختاره الله
معاك جدا فى كل كلمه بجد
:)