"مهند .... يقبر قلبي ولله"
جمله تركي محترمه اهه على شان تعرفو بس ان مثقف ( أيوه ده تركي , أمال هايكون ايه ؟ , لبناني مثلا ؟!! )
المسلسلات التركي , بقت حاجه منتشره جدا فى الفتره الأخيره ... و يمكن اول مره نسمع كلمة فيلم او مسلسل او اغنيه تركي , كانت ف فيلم " إشاعة حب " لما لوسي قرر يغنلهم تركي ( بطوخ بطوخ , أتنسيو أتنسيو ! ) . اما ب النسبه لينا أحنا ك عالم تينز , ف اول حاجه تركي اتكعبلنا فيها ف حياتنا كانت "مشلسل" نور .... و بعديه طلعلنا سنوات الضياع , عاصي , ميرنا و البخيل , العشق الممنوع . و غيرهم .
و مع كم المسلسلات التركي اللى ملت كل القنوات لدرجة انها خرجت من التلفزيون و غرقت كل اللى بيتفرجو ( أم اعتدال غطست , و لسه ما طلعتش لحد دلوقتي ! ) , الناس ابتدت تتأثر بيهم , و طبعا كان المراهقين هما اول ناس اتأثرو . سامع حد بيقول فى الكنبه اللى ورا : ليه المراهقين اتأثرو كدزه ؟؟ و ليه الرغي الكتير و الكلام ع المسلسلات دي ؟ , مع إنها طوييييييييله جدا , و المفروض ان الطويل ممل .... ده إحنا مسلسلاتنا 30 حلقه , و بتبقى ممله جدا , يا دوب تشوف اول حلقه و آخر حلقه على شان تكون لميت كل الأحداث المهمه ! .
لو بصينا و ركزنا و تابعنا و بحلقنا , هنلاقي ان المسلسلات التركي عل قد ما هي طويله , إلا انها فى نفس الوقت مش ممله أبدا .... أزاي يا واد يا تيييييين ؟؟ .... الموضوع بسيط , و هو إن فى خط درامي اشاسي , و خطوط تانيه فرعيه كتير ... يعني قصه اساسيه ماشيه طول المسلسل , و قصص و حوارات تانيه اصغر بتبتدي و تخلص طول ما هو شغال . و طبعا كده انت بتتشغل مع الألف قصه التانيين و ما بتزهقش من القصه الاساسيه , لأنك ما بتبقاش مركز معاها طول الألف و خمسميت حلقه ( يا دوب ! ) .
مش فاهمينك يا حج .... عايز يعني تقول ايه ؟!
طيب ناخد مثلا مسلسل يمكن من اكتر المسلسلات اللى الناس اتكلمت عليها , و حصل عليه خلافات كتير قوي .... العشق الممنوع ... مسلسل 165 حلقه بس ! ... و طبعا المسلسل من بطولة " توأمي " مهند ( ايه البصه دي ! , مالي ؟!! ) . المسلسل ب المختصر المفيد على شان اللى ما شافهوش , بيحكي عن عدنان , رجل الأعمال الارمل الل عنده نِهال و مراد . عدنان ساكن فى فيللا ( فى إشاعات بتقول ملعب ) , فيها خدم , و المربيه الفرنسيه لميس , و ابن صاحبه اللى مات و سابلهوله يربيه , اللى هو مهند . الحج عدنان , بيقرر يتجوز واحده اصغر منه بحبه كويسين , أسمها سمر ( بيرين ساعات ) .... و بعد حوارات كتير جدا , سمر و مهند بيحبو بعض , و بيبقى ده العشق الممنوع . و بعد حوارات اكتر .... المشلسل بيخلص على أنتحار سمر , و هرب مهند , و موت واحد من الخدم .
هي دي القصه , و هو ده المسلسل .... صحيح القصه , أو تحديدا حب مهند و سمر (اللى هي أكلينيكيا مرات عمه) حاجه متناقضه قوي مع مجتمعنا و تقاليدنا و كل الرغي اللى اتقال فى المجلات و الحاجات اللى اتكلمت عن المسلسل ... إلا ان ناس كتير تابعته ( او لسه بتتابعه على الست الاف قناه اللى بيعرضوه دوّقتي) و أتأثرت بيه جدا , سواء عاطفيا , او شكليا .
ليه المسلسل شد الناس ؟؟ ...... لو بصيت هتلاقي المسلسل فيه حاجات كتيره حلوه قوي , مختلفه جدا عن مسلسلاتنا المصريه العاديه . فى كل مشهد عينك بتقع على حاجه جميله ... فعلا ... الهدوم , الناس , الأكسسوارات , الشقق , العفش و العربيات. ده حتى اسطنبول ذات نفسها , الواحد بقى نفسه يسافرها جدا ... المخرج عرف كويس ازاي يخلي جمال تركيا يبان , و يخلي الناس يبقى نفسها تروح هناك . و الموسيقى , ف مش هانتلكم فيها . ده غير التطويل و المط اللى موجود بنسبه قليله قوي , مقارنة ب مسلسلاتنا اللى واخده جايزة "مطوط" الأقليميه .
نيجي بقى للحته العاطشيفيه و النفساويه , إننا فضلنا شايفين الشخصيات و عايشين معاها 165 حلقه , يعني تقريبا 165 ساعه .... و بمساعدة الآله الحاسبه ( صديقة الفلاح الجديده ) هنلاقي ان الساعات دي تقريبا , تساوي 7 أيام كاملين ... أسبوع , 24 ساعه عايش مع البشر دي . شايف بيتغيرو و بيكبرو ازاي , ف الطبيعي انك تتعلق ب الشخصيات دي قوي و تحس ب اللى هي حاسه بيه , و كمان تتأثر ب اللي بيحصلهم و بمشاكلهم .
كل الكلام ده ممكن قوي ينطبق على كل البشر , المراهقين موقعهم ايه بقى ب الظبط من ده ؟
المراهق زي ما قولنا قبل كده , و زي ما قريتو فى كتاب علم النفس بتاع الثانويه العامه , ان المراهق فى بداية المراهقه ما بيبقاش مستقر عاطفيا , لأنه بيكتشف معاني كتير جديده , و فى نفس الوقت بيروح و بييجي فى ما بين حساسية الأطفال ( و على رأي المثل : يا صغنننننننن ) و تحكم الكبار . بنكبر شويه و بنستقر عاطفيا , لكن لسه بنكون بنستكشف صور الحب الجديده دي .
و فى المسلسل ده , كل واحد مننا بيشوف نفسه فى حد , لإن المسلسل مليان حالات ... أب , أخ , أخت , أم , حب من طرف واحد , نص الحاله , الحب من طرف تالت , الحب المستحيل .... و غيرهم . و ب التالى ممكن تشوف نفسك قوي فى حاله من دول , و تتأثر بيها قوي لأنك حاسس انها انت , و ده اللى بيبقى مش موجود فى اي "مشنلسل" مصري غالبا .
تاني حاجه , انك ممكن قوي دلوقتي تلاقي ولد عامل لوك مهند , لابس حاجه زيه ... أو بنت لابسه فستان من بتوع نِهال او سمر , او لابسه عقد من اللى كانو بيلمعو طول المسلسل . زي ما قولت , الحاجات فعلا كانت حلوه , و ب التالى كانت بتعجب الناس ... و المراهق بيبقى عايز الناس تعجب بيه على شان يكسب ثقه فى نفسه , او على شان " يزغلل " عنين النص التاني ... و ب التالى , تسريحة شعر هنا , ديرتي لوك هناك , بقت حاجه من وجهة النظر التينزيه مطلوبه .
المحور التالت , هو انه زي ما الولاد حبو نِهال و سمر و بقو فتيات احلامهم , و البنات حبو مهند و بقى فتى احلامهم .... بقى الولاد يكرهو مهند , و البنات يكرهو سمر و نِهال ... و يطلعو فيهم كل العيوب الصناعيه و الطبيعيه الموجوده و المش موجوده ! . بغض النظر عن ان فى جزء من الكره ده بسبب المنافسه , إلا ان الجزء لأكبر من غير سبب .... و هي دي البروبليمو ! .
يعني لو سألت : ليه بتكره مهند ؟ .... يا إما الإجابه هاتكون : كدهوّن ! , أو : على شان هو مش راجل .... و لما تسأل ليه ... مش هتلاقي رد مقنع . الموضوع بس جه تماشيا ( حلوه تماشيا دي ) مع الموضه , و ان مهند " ملون " و ب التالى مش راجل . و بكده نكتشف ان الألوان تتعارض مع الرجوله ... يعني لو كنت واحد من الملونين , عينيك صفرا ولا شعرك أخضر , يبقى معلش يا صديقي ... خرجت من دايرة الرجوله ... و ننصحك فى الحاله دي ب أُكسي البمبي بتاع الألوان .
الموضوع عمره ما بيتحسب كده , مهند ممثل زيه زي السقا و جورج كلوني ... يعني نحكم عليه ب تمثيله , مش ب هو مين فى الواقع , اللى اغلبنا ما يعرفش عنه حاجه (بوتاتاً!!) . ف لو كنت ملون , أو بتحب مهند ك ممثل , او حاطط صورته على الفيس بوك ... عادي جدا , و ما يهمكش ... لأنك ببساطه عادي , زيك زي اللى بيحب محمد رجب و حاطط صورته .
ايه ده !! ....... تؤ تؤ تؤ ... نيفر يعني .... سامع حد بيقول ان البوست معموله على شان خاطر سواد ( او زراق فى الحاله دي ) عيون مهند , و على شان المسلسل ... و انت بكده بتهاجم مسلسلاتنا , اللى مش كلها كده ولا أحنا كلنا كده . احب اقولك , كسبت معانا ربع جنيه مخروم .... البوست معمول على شان بس حاجه معينه بقت منتشره قوي , و الميس أندر ستانديج ( سوء الفهم للي ثقافتهم كلاكاتي ) اللى بينتشر فى كل مكان ده ... المسلسل و مهند مجرد مثال مش اكتر ... و أنا ما قولتش كلنا كده ولا كل مسلسلاتنا كده ,و إنما الأغلب يعني ... و الكلام لا يعبر عن وجهة نظر الإداره ب المره ( إدارة مين اصلا !! ) .
و بغض النظر عن ده
ف السنه خلاص , أخيرا
ب تلم كراكيبها و ماشيه
سنة 2011 اللي .....
وللا أقول .....
خلوها فى بوست آخر
D=
ب تلم كراكيبها و ماشيه
سنة 2011 اللي .....
وللا أقول .....
خلوها فى بوست آخر
D=
|
المسلسل ده بقا خنيق لدرجة خنيقة جدا في اخر المسلسل و اخر حلقة كانت اخر نكد .. متفكرنيش :D
حاليا فعلا بقا اي حد عايز يغير استايله يتبع المسلسلات التركية البقت زي الرز :D
هو انا بصراحة بعد نور معرفتش اتابع اى حاجة تركى تانى :D
انا اصلا بزهق من المسلسلات ال30 حلقة فعووضت كـــــل المسلسلات اللى مشوفتهاش مع نور و بعدين زهقت :D
بس انا كان عندى مشكلة فظييعة مع العشق الممنوع و خلانى اكرهه
كان عندى اتنين صحابى بيعشقوا حاجة اسمها العشق الممنوع
فكل يوم
ييجوا يتناقشوا فى احداث الحلقة
و اسم البطلة اللى مع مهند "سمر"
كانوا عاملنلى روووووشة
كل شوية "سمر" و انا افتكر حد بينده
و مبتعلمش !!
لحد ما المسلسل خلص و انا فى الحوسة دى !!
اما عن حكم انلاس عن مهند
فعاادى
هم بيحكموا على اى حد و اى حاجة
يعنى جت على مهند !! :)
مستنية جديييدك يا تيين ^^
بوست ساخر تقيـــــــل أوي كعادتك يا مستر تيين... سعيد جدًا بعودتك دي، بس بالرغم من كل الكلام الجميل اللي إنتا كاتبه ده، عايزك تشد حيلك في المذاكرة بقه :D
وكل سنة وإنتا طيب... هابي نيو يير :D :D
انت عارف انا مش تابعت ولا مسلسل تركى غير العشق الممنوع !! حتى مسلسلى " نور :D " مشوفتوش !
بس مش عشان زرقان عيون مهند :D
عشان كان صحابى فى المدرسة بييجو كل يوم يحكو قصة حياة المسلسل و مهند لما عيط و سمر لما نكشت شعرها و كلام كده غريب و انا الوحيدة اللى مش فاهمة حاجة
فعملت وقفة ! و قلت اشمعنى انا ... انا لازم اعرف العيال دى بتتكلم على ايه :]
بس فعلا زى ما انت قلت كده
انت بتركز فى 4000 قصة بتحصل و 580 شخصية بتظهر فى المسلسل ده غير الــ 900 طقم و الــ 1500 ميك اب اللى شوفناهم
و المناظر الطبيعية اللى طلعت فى المسلسل دى السبب الرئيسى ان نص الناس اللى اتجوزت قريب راحت عملت شهر العسل فى تركيا ^_^
المعم مستنيين الحلقة الجديدة بقى
متتأخرش علينا ! Happy New Year ;)
تين ده انا قعدت ادور على الـ{Blogger} بتاعت انت
كتييير علشان نسيت اسمها وكمان عدت فتره كبيره مش دخلت فيها عندك
بجد بوستاتاتك كلها جميله وده ضحكني اوي
تسلم ايدك ويجعلو عااامر اقصد يعني متقطعش كتير كلامك حلو
وعجبتني كمان طريقتك في الحكم عـ مهند لان الناس
وبذات الشباب يعني
بقى يهجموه على اي حاجه مع انو زي ماانت قلت ممثل زي باقي الممثلين
معلش طولت عليك
متطولش ومستنيه البوست الجدبد
هدير
لوووووووووووووول
عليكي نور
بقت اكتر من الرز و العدس و كله كله ولله
و ادينا بنتابع
لحد ما نلاقي حاجه عدله :))
.................................
سمر
عايز اقولك يا سمر
ان اغلب الناس ولله
حصللها نفس الموضوع
لقت مصر كلها بتتفرج على حاجه
و بتتكلم عنها
ف ك نوع من المشاركه الوجدانيه
بقو بيعملو كده !!
:))
............................
ع. سالم
هابي نيو يييير يا سالم باشا
ثانكس قوي بجد
و صدقني شديته على الآخر
بس لما نشوف آخرتها بقى
انت عملت ايه فى امتحاناتك ؟؟
:)
......................
نور
لوووووووول
نفس اللى حصللي , و حصل لسمر اهو
كنت لسه كاتبلها فوق :)
انا كمان على فكره ما شوفتش غير العشق الممنوع بس
بصره
:)
..................
غير معرف
بغض النظر اني مش عارف مين معايا
لكن ثانكس قوي على الكلام ده
بجد ولله سعيد بيه جدا
و معلش لو تعبناك/ي معانا
و لا تطويل ولا حاجه
تنورنا/ينا فى اي وقت ولله
:)