تأملات تينيه
Teen
الدنيا برد الدنيا برد ... و عم لؤي بيسقي الورد (عم خليل جاله عقد احتراف في السنغال)

الشتا جه اخيرا بعد طول انتظار  .... و ناس كتيره فى الواقع فرحانه و في قمة الانشكاح , و الضحكه من الودن للودن ترحيبا و احتفالا ب الشتا ..... ليه الناس بتحب الشتى كدزه ؟؟ ... غالبا لأن احساس الدفى بعد السقعه فى الشتا مافيش زيه اي حاجه فى العالم حتى احساس السقعه بعد الحر ... كمان لأن كل حاجه احنا محتاجينها فى حياتنا دافيه .... المشاعر .. صداقه , حب , اخوه , أمان , راحه ... كلها دافيه .الرغي مع الصحاب فى الساقعه ... دفى .كباية نسكافا فى الشتا مع اللى بنحبه ... دفى . حتى المواصلات ب زحمتها ... وسط الناس فى الشتا دافيه . الشتا انيق ,الشتا جميل ,الشتا دايما دفى.
 
يعني و بعد كل الرغي ده ... فين " التأملات التينيه " دي ب الظبط ؟؟
 
ولله البوست المره دي مختلف شويه عن باقى صفحات المذكرات .... لأنه مش بيتكلم عن حاجه معينه , و إنما مجموعة حاجات كده مختلفه ... تأملات بتيجي فى بال الواحد و هو بيسمع اغنيه , بيشوف فيلم , بيكلم حد , او حتى بيتريق على الدكتور فى المحاضره !
 
 
 

لما الواحد يبص كده على الناس اللى حواليه و على علاقته بيهم , ممكن بسهوله يصنفهم ... ده حبيبي , ده صاحبي , ده انتيمي , ده زميلي (ده عم فرغلي بتاع الكشك) ... لكن هتلاقي فى نوعين من البشر , صعب جدا انك تصنفهم ... لأن علاقتهم من نوع مختلف و غريب ... علاقه من نوع "الرف" او "الدبدوب".
 
الناس اللى علاقتك بيهم علاقة رف .... هتلاقيهم صحابك , و فى نفس الوقت لأ ... قريبين منك قوي , و فى نفس الوقت فى ناس ف حياتك اقرب منهم بكتير ليك !! . لما بتكون زعلان , متضايق , تعبان او قلقان .. هتلاقي الناس دي من اول الناس اللى بتسأل "مالك؟" .... يسمعوك كويس جدا و يدوك على دماغك يفوقوك ( زعلان مين يا حيليتهاااااااااا ) ... هايدولك النصيحه التمام , و بعدين يروحو لحال سبيلهم . اصحاب الرف , هما ناس مش معاك على طول , يعني مش بيكلموك كل يوم ولا بتشوفهم كل اسبوع ...
 
غالبا بيكلموك كل فتره , فى المناسبات و الأعياد الرسميه (عيد الشرطه مثلا) و  بتشوفهم كل سنه مره ... بس متابعينك من ع النت او من صحابك او ايا كانت الطريقه ... المهم انهم متابعينك و حاسين بيك طول الوقت . عاملين ب الظبط زي الحاجات المحطوطه ع الرف ... موجوده مكانها , ما بتتحركش , ولا انت بتمسكها و تشيلها من مكانها إلا كل سنه مره , و شويه و بترجعها مكانها زي ما كانت ب الظبط.
 
النوع التاني من العلاقات , هي علاقة الدبدوب ..... زي طبعا ما هو واضح من الاسم , العلاقه ب الظبط عامله زي علاقتك ب دبدوبك اللعبه ( او حمارك اللعبه , كل واحد و لعبته بقى!! ) . سايبه فى اوضتك طول اليوم , لما بتخش الاوضه , تحضنه و تبوسه ( و ساعات تشتمه و تعذبه ) و تحطه مكانه تاني . و لما تيجي تنام , لازم يكون فى حضنك على شان يحسسك ب الأمان . الناس الدباديب كده .... هما صحابك , بس مش قوي يعني ... هتلاقيكو بتشوفو بعض بتسلمو و "ايه الاخبار ؟" و كام كلمه على سؤالين تلاته , و تسيبهم و تروح لصحابك التانيين اللى بتقف معاهم على طول . مافيش مابينكو حوارات او موضايع مشتركه كتير , و مافيش اسرار اصلا او اي رغي , كله كلام عادي و طبيعي من اللى بتتكلمه مع اي حد .
 
طيب يعني ايه الفرق ؟؟ ....... الفرق فى ان الكلام معاهم ليه طعم مختلف , هتلاقيك بتحبهم جدا جدا جدا , و مافيش اي سبب محدد او مقنع على الاقل لده . لما بيغيبو , بتفتقدهم جدا , و بيبقو سايبين فرغ مكانهم , مش ممكن اي حد يملاه . هما كده الدباديب , مجرد وجودهم حواليك بيديك احساس ب الراحه . ناس بتبقى مستريح و هما حواليك حتى لو مش بيكلموك او واقفين معاك انت ! .و لما بتشوفهم بتبقى مبسوط قوي , و برضو من غير سبب ! .
 
لو كان فى فحياتك واحد على الرف او حد دبدوب
اوعى ابدا تسيبه ... لأن الأولانيين بيخافو عليك و تهمهم بجد
و التانيين هايحبوك قوي قوي , لدرجه مش ممكن تتخيلها
 
 
الحب انواع .... أخوي , ابوي , صداقه , او هب الهبيب لهبيبه (خواجه ستايل) . الحب كمان صور ... ورده , شوكالاتايه, كوفيه, جنيه مكتوب عليه (او ربع جنيه محفور عليه), كلمه تتقال, حركه بسيطه .... كلها صور مختلفه للتعبير عن الحب , بتختلف طبعا الصور دي من حيث قوتها , و من حيث احساس اللى عاملها او مقدمها .
لكن أكاد اجزم ان اقوى صور التعبير عن الحب , هي الصور اللى بيبقى فيها "تلامس جسدي" .... قبل ما تبرق و تتكسف و وشك يحمر ... مش ب الضروره يكون التلامس ده خالص ... ممكن قوي كون حضن , بوسه على الخد, كتف مسنود عليك , و غيرهم .
 
فى الطبيعي , أحنا ما بنقربش من حد , ولا بنخلى حد يقربلنا إلا فى حدود معينه ... يعني مش كل الناس اللى بتشوفها هنا و هناك بتحضنها و تبوسها ( اووووو عم عيسوي , خش فى لحم أخوك خش ) , و عمرك ما بتسند راسك على كتف اي حد قاعد جمبك كده , ولا انتي بتخلي اي بنت تقعد تلعبلك فى شعرك و تدمرلك الفورمه الشيك اللى انتي عاملاها ( فورمة عضة الكلب ) . يا ترى ده ليه ؟؟
 
لأنك كل ما يبقى فى شخص قريب منك , كل ما كنت بتحبه اكتر , و كل ما كان ممكن تقدمله صور اقوى من الحب . الحب لما تحط دماغك على رجل ماماتك و تسيبها تمشي ايديها براحه فى شعرك , الحب لما تعيطي فى حضن اختك و هي بتطبطب عليكي لحد ما تنامي فى حضنها من التعب , الحب لما تشوف صاحبك الانتيم و تحضنه قوي على شان هو واحشك جدا .
 
على شان كده , انت مش بتمشي فى الشارع تعمل تلامس جسدي مع اي حد و خلاص ( اول بوكس هايشيلك ) . على شان كده انت بتستنى تتجوز على شان تقدم اقوى صور تعبير عن الحب للي بتحبه . بغض النظر عن القيود الدينيه , بس لأن دي كمان اغلى و اقيم حاجه ممكن تقدمها ... و ب التالى مش اي حد يستاهل ده , و مش اي حد يستحق الصوره دي .
 
الوحيد اللى يستاهلها
اللى عرف عيوبك
و حبك و هي فيك
و رضي يكمل باقي عمره كله
معاك انت و بس
 
 
" انا فرحك , الم تعبك , انا ف كل اللى بتحسيه , حاسس بيكي ...... ما انا انتي "


اول ما طلعت الاغنيه دي كنت بحبها جدا . كل كوبليه , كل حرف , كل نوته .... لكن مع الوقت , و مع انها اغنيه رومانسيه صرف... إلا انها بقت ب النسبه ليا اغنيه حزينه . بتضايقنى و بتزعلني جدا لما بسمعها . و من أكتر الاغاني اللى بتنكد عليا و بتزود مود النكد !

" كلام قلته , و صدقته , فرحت انا بيه و ريحيني ..... ولا بنساه , و عايشه معاه , كلامك فين بيوحشني "
 
للأسف , الناس ما بتفكرش قبل ما تبنى احلامها . قبل ما تحط خطط و توقعات و احلام للمستقبل .للأسف الناس ما بتفكرش و هي بتتكلم و تقول " هاعمل و هاعمل " , ان كلامها ده ممكن قوي بشر تتعلق بيه و تصدقه و ماتنساهوش ابدا و يبقى محور حياتها او على الاقل جزء منها عايش بيه و معاه و عليه .للأسف الناس ما بتفكرش ان ممكن خططها دي لما ما تتحققش ,هي تتعب , و غيرها يتعب , و يبقو حققو تعاستهم بأيديهم

" ما انا ليكي , بموت فيكي , و مش هاعيش غير ليكي ..... يا دوب حلمي , انا اني ,اشوف الضحكه فى عينيكي "

يا ريت نفكر ......قبل ما نبني احلام و نرجع نهدها فوق راسنا . قبل ما نقول احنا بنحس , و احنا ما بنحسش اصلا .قبل ما نقول احنا بنضحي , و الانانيه بتحرقنا . قبل ما نقول كلام ف مضمونه وعود , و نخلفها بعدين .قبل ما نتعلق بحاجه قوي , و تنسى انها ممكن تتغير فى لحظه . و قبل ما نطلب من غيرنا يحس بينا , و احنا ما بنحسش غير بنفسنا

فكر .... على شان ما تتعبش
لأن اللى بيروح ..... عمره ما بيرجع

 

علاقة الصداقه .... من اكتر العلاقات الهشه اللى ممكن تقابلها  .اكيد بتقول بثقه دلوقتي : تؤ تؤ تؤ ... ايه الكلام ده ؟! . بس ده حقيقي قوي ... يا ترى ليه ؟؟ . لأن علاقة الصداقه مافيهاش ضمانات حقيقيه...
 
مافيهاش صلة دم ... زي الأخوه و القرابه
مافيهاش شقه و شبكه ... زي الخطوبه
مافيهاش عيال و حياه .... زي الجواز

علاقة الصداقه مجرد اتنين عايزين يبقو مع بعض .اتنين محتاجين لبعض و عارفين قد ايه هما مهمين لبعض .ده بس اللى بيربطهم  .و عليه , الصداقه محتاجه مجهود اكبر بكتير من الباقي. مجهود على شان نحافظ عليها و نخليها مستمره طول العمر .محتاجه احترام متبادل , محتاجه إيثار رهيب , محتاجه تسامح كبير .محتاجه كمان تقدير و تفاهم و تعاون على شان تمشي .و محتاجه صبر و قدره على الاستمتاع بعيوب و اختلافات الطرفين

ليه ؟
لأن كل دي حاجات معنويه
مش محسوسه ولا ملموسه
ما يفهمهاش .... غير اللى عنده صاحب بجد
 

 
ساعات كده بنقابل ناس فى حياتنا .... بيبقوا علامة استفهام كبيره قوي
ليه يا ترى ؟؟

 هتلاقي انه بيضايقوك , و يزعلوك , و ممكن ينرفزوك . مع كده .... ما بتقدرش تبعد عنهم ولا حتى تضعف علاقتك بيهم  .ب العكس ! , بتقوى العلاقه مع الوقت !!...
و تلاقي اللى حواليك , مستغربين انت ازاي ساكت على ده . و ازاي لسه محافظ على علاقه زي دي !
 
الفكره هنا , انك شايف اللى غيرك مش شايفه . حتى و لو ماكنتش انت واعي ل ده
شايف ان الحجر اللى قدامك شوية صقل بسيط قوي , و يبقى ماسه تبهر كل الناس صحيح هاتطير الشظايا و تعورك فى وشك بس النهايه حلوه . شايف ان تحت التراب عقد دهب بيلمع .شايف وسط الشوك ورده قويه جدا .هاتتعور و تتبهدل , بس النتيجه رائعه
 
كنت دايما بستغرب , ليه فيلم " الجميله و الوحش " الناس بتموت فيه كده ؟! .لأن دي رسالته , و لأنه بيعالج النقطه دي .
 
مش كل حاجه حلوه .... جواها حلو فعلا
و مش كل حاجه وحشه ... جواها وحش بجد
الفكره فى اللى بيشوف كويس ..... جوه , قبل بره
 
 
من الواضح ان اغلب مشاكل البشر جزء كبير منها هو الحب.........
بنحب نفسنا زياده عن اللزوم
مش عارفين نحب نفسنا اصلا
مش عارفين نحبب اللى بنحبهم فينا
مش عارفين نحس بحب اللى حوالينا لينا
فاقدين الحب و بندور عليه
أو موجود قدامنا و مش عارفين نتعامل معاه

ما كدبش سيناريست "حب البنات " لما كتب سطرين شبه دول .لأن التعبير عن المشاعر و الأحاسيس , فى اغلب الاوقات صعب .الحاجات المحسوسه , الكلام بيفقدها مصداقيتها فى اغلب الوقت .الكلام ما بيبقاش على قد الشعور اللى بيوصفه , بيبقى باهت و مجوف قوي !

و هنا نقف حائرين بين قلوبنا و افواهنا .كيف نعبر ؟؟ كيف نصيغ ما لا يرى ولا يسمع ؟؟ .لينتهى بنا الأمر حاملين قلوبنا بين ايدينا و الترحال . ليبقى ما نشعر به حبيس سجنه الاحمر طيلة الحياه


 يتوق فقط إلى الخلاص ........
 
 
غريب , ازاي بنفضل طول حياتنا ندور على حاجات ... صحاب , حب , فلوس , شهره , حد يسمعنا , حد يفهمنا.... إلخ . غريب قوي , ازاي بنفضل نجري ورا حاجات مش بتاعتنا اصلا . كدب بيقتل الصراحه , ناس مسافتنا عندهم بعيده قوي ....

غريب اكتر , أزي فى لحظه من اللحظات بنكتشف ان كل اللى بنعمله غلط . بنكتشف ازاي كل اللى بندور عليه بين ايدينا من الاول و احنا مش شايفينه . بنكتشف ازاي كان كل اللى بندور عليه و اللى متعلقين بيه وهم . بنكتشف ازاي ان كل اللى فاكرينه صح و متأكدين منه ... كان مجرد غلطه كبيره جدا

اما اغرب حاجه , ف هي النص حاله اللى اغلب البشر عايشينها . نص للي يمكن , نص للى مستحيل .نص متأكدين منه , نص ما نعرفوش اصلا .نص نور و واضح , نص ضلمه و مالوش معالم

نص حاله مع الصديق
نص حاله مع الحبيب
نص حاله مع النفس
و تستمر انصاف الحالات ........

و انت رايح و جاي فى حياتك , ممكن لو كنت محظوظ .تتكعبل فى شخصيه من الشخصيات اللى هاتحس فى لحظتها ,ان عمرك ما قابلت زيها , ولا شوفت منها قبل كده ... ساعات بتحسدها , و بتقول : هما ازاي مختلفين كده ؟؟ يا ريتني كنت زيهم؟؟
 
يمكن , جاتلك الفكره دي قبل كده فى مره .لكن للأسف انت ما تعرفش ان الشخصيات دي -اللى انت فرحان قوي بيهم و نفسك تبقى زيهم -بيعانو جدا فى حياتهم .... بيعانو اكتر منك و مني و من غيرنا !!
 
بيقولو عليهم ساعات , الشخصيات الافلاطونيه .شخصيات مثاليه , حساسه , بتفكر , رقيقه , طيبه , ضميرهم صاحي ... إلخ . إلخ , من كل الصفات الحلوه اللى ممكن تتخيلها , اللى عندنا كلنا.

 طيب ايه الجديد يعني يا واد يا تييييييييين؟؟

الجديد , انهم بيحسو بنفسهم قبل غيره .فى عز المهم ... ما بيقولوش احنا تعبانين و مجروحين ,أحسن يجرحو حد تاني بكلامهم .بيتمنو الخير لنفسهم قبل غيرهم  .بيشوفو الحلو قبل الوحش .بيسامحو ب مجرد ابتسامه ... اللى ممكن قوي تكون مصطنعه
بيحبو قوي , لدرجة انهم ممكن يجرو يحققولك امانيك بعد ما تموت !

شخصيات زي دي , بتبقى نقيه قوي  . بتتعب كل يوم لما بتنزل الشارع و تتعامل مع البشر .بتتعذب كل يوم لما تشوف صحاب بيبصو لبعض فى الخير .لما تشوف اخوات مش حاسين ببعض  . لما تشوف اتنين افترقوا على شان غلطه تافهه جدا  .لما الناس .بتتريق عليهم , و يشوفو انهم عالم هبله  .لما يعبرو عن شعور معين و يكون الرد بكل سذاجه :"يا طعم , يا نايتي , يا كيوت , قلب الست الوالده ... إلخ "
افلاطون كان عارف ده .كان عارف العذاب اللى هما فيه .على شان كده اخترعلهم مدينه ليهم بس .اليوتوبيا ...... المدينه الفاضله .اللى سكانها دول  ...الافلاطونيين ....النادرين .لو قابلت حد فيهم في يوم  ,اتمسك بيهم قوي .لأنهم هايدخلو حياتك و يخرجو منها زي الفراشه .لأنهم هايدوك دايما امل فى بكره .بس خليك عارف انهم بيتعبو كتير على شان يفضلو كده .انهم بيتصدمو كتير قوي فى حاجات و ناس اكتر .و النتيجه حاجه من تلاته :

إنتحار
إكتئاب
النقيض
 
 
حييييييييييييح ( ده انا بتنهد )
رغي كتير موتس , مش كدزه ؟؟
بس نقدر نعتبره تعويض عن الغياب الطويل
بوست محتاج هيرو على شان يقراه فى الواقع
الهيرو اللى ..... هانخليه لبوست آآآآآخر
اول جمعه فى الشهر الجاي
D=
 
6 رأي الناس | | edit post
حكاية ورقه
Teen
لو بصيت و بحلقت و برقت و تمعنت كويس قوي ..... لا لا , مش قوي كده يعني !! ..... لو بصيت كويس , هتلاقي ان حياتك من ساعة ما اتولدت , ممكن قوي تختصرها فى ورق , بتبتديها بورقه , و تنهيها بورقه , و بتجري طول عمرك ورا ورقه !!
 
 

كلام قدشيم (سو موت) , اتهرس فى سبعين برنامج , و الناس رغت كتير قوي عنه  و قالو و عادو يعني و كدزه . لكن يا ترى عمرك فكرت فيه ؟؟ , عدى على بالك على حين غره ؟! ...... غالبا لأ , لأننا ك مراهقين طبيعيين , حياتنا فى اغلب الوقت مشغوله و مزحومه و متكربسه ب حاجات تانيه , ما بتديناش الفرصه دي . دروس و ثانويه , جامعه و ملازم , خروجات و مصيف ... و الحياه بتعدي , بنعمل فيها اللى عايزينه وقت ما نحب ( نعطس فى اي مكان فى اي لحظه مثلا ), لحد ما بنلللللللللزق فى اول حيطه تقابلنا ليها علاقه ب الورق اللى لازم تعمله بأيدك .

بنتولد و معانا شهادة الميلاد , اللى مالناش اي دخل فيها ابدا , و ممكن قوي تكبر و تتصدم فى ان اسمك " شندويلي " .... و تلاقي اهلك فى قمة الفخر و الانشكاح و هما بيوروك الشهاده و بيستعيدو اللحظات المجيده وقت اختيارهم العبقري للأسم . وراها ورق التطعيم ( تخلف عقلي و سارس ) , و ورق المدرسه , و بعدين اول شهاده .......... اول شهاده دي , غالبا بتبقى مزينه بشتى انواع الكحك الفاخر و البسكوت المعتبر ..... و بتظهر معاها دايما المحاولات الفنيه الفذه فى تقليد توقيع الحج ابو العيال . و دايما بتنتهي اللوحه الفنيه ب علقه محترمه !! .
 
 

و تعدي سنين المدرسه , و كل سنه بشهاده ( و كيلو كحك ) , لحد ما نوصل للورقه اللي كل مراهق بيستناها بفارغ الصبر , من اول ما يبقى عنده 13 سنه , و يقعد يعد السنين و الشهور و الثواني ( و اجزاء الثواني ) لحد ما يوصل لعيد ميلاده الـ16 . البطاقه , اللى بتحسسك كده انك كبرت و بقى ليك رقم قومي و مركز فى المجتمع , و ممكن تخش بيها اي حته مهمه ( او اي فيلم للكبار فقط ) , و لو اتمسكت تحري فى الشارع .... تطلع البطاقه بكل فخر و توريها لكل الشارع ! . ما علينا من صورة البطاقه البديعه ( بديعه , مراهقه من اثيوبيا ) .... و البهدله اللى بتتبهدلها عقبال ما تطلعها ... إلا انه فتره , و بتبقى البطاقه زيها زي كارنيه الجامعه ( و كارنيه نادي الفتيات ) , كله زينه فى المحفظه .
 
و تعدي كام سنه كده , و تظهر فى حياتك مجموعة اوراق مختلفه "لوكشه" واحده . رقم جلوسك فى الثانويه العامه , ورقة الرغبات , و بعدين الشهاده ( اللي غالبا بتبقى مسيله للدموع ) , و بعديهم التنسيق . وقت التنسيق , بتبقى اللحظه المنتظره لكل طالب ثانويه عامه , لحظه فيها قلق و حيره و ربكه , و اختيارات كتشييييييير ,متنوعه موتس ( آداب القاهره , آداب حلوان , آداب عين شمس ... إلخ ) . و بعد ترتيب مهول للأفكار , و مجهود جبار فى رص الرغبات , و عمل خطه خمسيه قويه .... يجيلك معهد تدبير منزلي , و تخش فى دوامه جديده على شان تحول ..... و ده بيوضح ليه الست الشحروره كانت بتحب الدوامات , لأنها حولت لأكتر من كليه فى نفس السنه ! .
 
تعدي الجامعه , بورق تقديمها و كل حاجاتها . و البنات تبتدي تحضر فى السيفيهات ( او طقم الجيلي ) , و اغلب الشباب يحضرو استماره سته جند على شان الجيش . و بعد ايام ممتعه جدا فى الجيش , نبتدي نجهز ورق الشغل و الهجره لدول الخليج الشقيقه , مع مجموعة اوراق تانيه , زي اجازات مرضيه و حاجات على شان نروح المصيف .
 
و يعدي الوقت ..... فواتير , اجازات , توصيات , حسابات , عقود .... لحد ما تيجي شهادة الخبره و ورقة التقاعد . نتقاعد و نقعد فى بيتنا , و نقرف في عيالنا و احفادنا ... و نعذبهم شويه زي ما اتعذبنا زمان .... يجيبو ميه , منديل , يفتحو المروحه ( و يقفلوها تاني على شان الجو سقعه ) , يعلو الصوت على شان مش سامعين ..... شوية فواتير دوا و روشتات دكاتره , على كام كشف نظر ... لحد ما بتيجي آخر ورقه ... اسمنا فيها آه , لكن مش احنا اللى طلعناها , ولا احنا اللى كتبناها , ولا حتى فكرنا نجيبها , ولا كنا عارفين امته .
 


اول ورقه فى حياتك ما كانتش بمزاجك
زيها زي آخر ورقه ب الظبط
واحده قديمه و التانيه هاتقدم
اسم , تاريخ , مكان , عمر .... نفس الخانات
بس واحده حياه و التانيه وفاه
بدايه و نهايه
و زي ما ابتدت تخلص الحكايه
بعيون مقفوله و شوية عنايه

D=
4 رأي الناس | | edit post
الحبل
Teen
بتعدي ايامنا فى الدنيا دي بشكل لطيف جدا
ساعات سريعه قوي ( اسرع من سرعة الكبريت ) ....
ساعات بطيئه "سو موت " ( ابطأ من الجده بطه و هي بتلضم الابره )
ساعات فيها تجديد و الوان
و ساعات روتين و ممله .... اكل , شغل او دراسه , أكل , نوم , نوم , نوم , نوم ... و نوم !

لكن ايّا كان الشكل اللى الايام بتعدي بيه , ف الأكيد اننا فى كل يوم من دول بنقابل بشر و بني آدمين (و ساعات حيوانات ) نعرفهم من زمان , لسه عارفينهم , او لسه هانتعرف عليهم . و مع كل يوم بيعدي , شبكة علاقاتنا شكلها بيتغير , من المدرسه للجامعه للشغل . سامعك ياللى ورا يا منشكح انت ! ..... العلاقات مش معناها ابدا واحد و واحده بيحبو فى قصة حب ! .... العلاقات دي متنوعه و كتيره جدا , حب , صداقه , أخوّه , ابوّه , امومه ...إلخ .
 
 
 
فاكرين زمان ؟؟ .... العلاقات كانت ابسط ما يكون , ده صاحبي و دي اختي , ماما و بابا , بخاطرهم و ساندي بنات الجيران , و عم عيد البواب . لكن كل ما بنكبر , بنلاقي العلاقت تبقى معقده اكتر , بتزيد الحدود فيها و القواعد و اللى ينفع و ما ينفعش ( و المستنيل على عينه ) . ف هتلاقي مثلا ان مش كل الناس " صاحبي " و خلاص .... لأ , ابسليوتلي يعني .... ده في معارفي , زمايلى , صحابي , انتيمي .... درجات كتير فى علاقة الصداقه لوحدها . و بتفضل مع الوقت تكتشف ( و تتخرع ) ازاي العلاقات بقت معقده  و محتاجه تفكير ب الشكل ده ؟! .... لحد ما هاتكتشف فجأه انك بتواجه مشكله , اغلب التينز (و المش تينز) بيواجهوها .... أن أن أااااااان تششششششششششششش ( موسيقى تصويريه على شان الشاصبنس ) .
 
تحديد المسافات فى العلاقات البشريه ..... مشكله دخل فيها ناس كتير بدماغهم ( 5 حالات ارتجاج بسيط و اتنين حول )  . هي فين يعني المشكله ب الظبط يا واد يا تيييييييييييين ؟؟؟ ..... ممممم , على شان يبقى الموضوع واضح اكتر , خلينا نقول ان العلاقات البشريه عامله زي الحبل قوي , الحبل ده ماسكه من كل طرف واحد , و فى نص الحبل ب الظبط علامه , اللى هي اعلى مرتبه فى العلاقه ....... كل ما كنت قريب من النص , كل ما كان الشخص اللى على الطرف التاني قريب منك .
 
لكن هنا تظهر المشكله , لأنه ساعات تلاقي انك انت ماسك الحبل كويس جدا , و الطرف التاني لأ ..... فجأه , الطرف التاني يسيب الحبل , و هووووووووووووب! الحبل يرد فى وشك , يدألجك على الارض و يعورك فى وشك , و هايوجعك قوي . و ساعات تانيه , تلاقيك انت واقف و فى قمة الانشكاح , قريب من العلامه اللى فى النص  , و الطرف التاني واقف عند طرف الحبل و بيلعب بي أكس ( الجيل الجديد من البلاي "ستيشم" ) ..... الطبيعي انك هاتتعب من كتر ما انت بتحاول تشوفه و هو واقف بعيد , و عمال تدور عليه كل شويه , هاتحس انكو لوحدك قوي ! . و ساعات تالته , تكتشف انك عمال تشد الحبل بكل طاقتك على شان يفضل مشدود و مفرود و آخر "ألاجه " و الطرف التاني ماسك الحبل يا دوب بصوابعه ( غالبا عنده شلل ) .... ايديك هاتوجعك , و هاتفك منك , لأنك عمال تشد و تشد فى الحبل آلون ! .
العلاقات , زيها زي اي حاجه تانيه فى الدنيا , لازم تكون متوازنه ( زي ما كريستال عملت سمنتين كده ) .... يعني لازم تكونو على نفس المسافه من العلبه .... إحم, النص , لام تكونو ماسكين الحبل بنفس القوه و شادينه بنفس القوه .  غير كده ما ينفعش , و هاتتعبو قوي .
 


طيب احدد مسافاتي فى علاقاتي ازاي يا واد انت ؟؟

 الموضوع بسيط ....اقعد مع نفسك فى مره , و انت بتاخد دوش , او و انت نايم بليل ... اي وقت مناسب تفكر فيه يعني و تشغل مخك و هات كل البشر اللى تعرفهم واحد واحد. المفتاح " الأشاسي " لتحديد المسافه , هو انك تشوف انت عند اللى قدامك ايه . بمعنى , ان اغلب الناس لما تيجي تحدد مسافاتها بتقول : آه , انا بحكي لحنكش و بستريحله و بسأل عليه , يبقى هو انتيمي .... هيييييييه حددت مسافتى فى علاقتي . مبروك , كسبت معانا عربيه بحمارين ! , غلط ! .... زي ما انت شوفت حنكش ب النسبه ليك ايه , لازم تشوف انت ب النسبه ليه ايه ... يا ترى هو كمان بيحكيلك ؟  , هو كمان بيسأل عليك ؟ , هو بيستريحلك ؟؟ .... لو آه , ف يبقى انت انتيمه زي ما هو انتيمك و الدنيا بيس ... لكن لو لأ , ف ممكن قوي تطلع مجرد زميل ب النسبه لحنكش , او صديق ... و بكده العلاقه مش متوازنه و محتاجه تحديد للمسافات .
 
يا ترى ليه لازم نحدد مسافاتنا فى علاقاتنا و كدزه يعني ؟؟ .... لأنه ببساطه , كل شكل علاقه ليه حدود معينه , حاجات بيسمح بيها و حاجات لأ , حاجات لازم تتعمل و حاجات لأ , و توقعات تتبني لمستوى معين . يعني انا اتوقع من زميل الدراسه انه يسلم عليا الصبح و ممكن يقولى أخدنا ايه لما كنت غايب الترم الاولاني , لكن ما اتوقعش منه انه يسأل عليا , يكلمني على التليفون , يسمع مشاكلي و يحلهالي ... لأن التوقعات دي مش مفروضه عليه ابدا , دي مفروضه اكتر على الانتيم . زي ما قولت فوق , اني لو مش محدد مسافتي صح , ف هابقى معتبر حنكش انتيمي , و هاستنى منه انه يعمل الحاجات اللى بتفرضها عليه العلاقه , زي ما انا بعمل ب الظبط .... لكن انا ب النسبه لحنكش مجرد زميل , و هو ب التالى بيتعامل ب الحدود بتاعة الزماله ... ف لما ما يعملش اللى انا متوقعه منه , هاتعب نفسيا , و هازعل و هاتضايق و هاقول ليه كدزه ! . و هنا يا اما هاتبعد عنه لنفس مسافة الزماله , او هاتحاول تخليه يقربك منه .
 
و هنا لازم نعرف انواع العلاقات من الابعد للأقرب :
معرفه : دي ناس بتشوفها مره فى القرن و التواصل الوحيد مابينكو "سالفل , سالنور"
زميل : و غالبا الزماله بتبقى مرتبطه بمكان , شغل او دراسه , ده آخرك تسلم عليه و تسأله عن اخباره " عامل ايه  , الحمد لله " و انتهينا على كده .
صديق المكان : ده برضو مرتبط ب مكان الدراسه او الشغل او غيرهم , و بمجرد ما المكان يتلغى من حياتك , الصداقه بتنتهي و بتبقى مجرد فيس بوك و شات كل 3 شهور ! , لما تشوفه , هتلاقي انك بتسلم عليه , بترغو شويه فى حاجات عامه ( مش "سخصيه" قوي ) , و ممكن تتكلمو على التليفون مره كل شهر ولا حاجه , و تخرجو مره فى السنه .
الصاحب : ده بيبقى بني آدم بتستريحله , بتتكلم معاه فى حاجات عامه و شخصيه شويه , تحكيله مشكله و 4 لأ . تتكلمو على التليفون مره كل اسبوع او اسبوعين , و بتتقابلو فى نفس الحدود .
الأنتيم : بتحكيله اغلب مشاكلك , بتكلمه على التليفون فوق المرتين فى الاسبوع , و بتقابله فى نفس الحدود . بتستريحله , و هو بيفهم و يحس بيك من غير ما تتكلم . ممكن تكدب عليه ساعات ( مش هاياخد باله قوي ) , لكن الأكيد انه هايبقى مستعد يسمعك و هايبقى جمبك فى اي وقت . لما يكلمك على التليفون , عمره ما هايقولك ما بتسألش و بتاع ... لأنه بيتصل بيك لمجرد انك مهم فى حياته و هو عايز يتطمن عليك . مش مجرد بيردلك مكالمه انت كلمتهاله !
 
 
بعدين نيجي للأشكال النادره :
مرحلة الراحه : دي المرحله اللى بعد الانتمه على طول , الشخص اللى بتوصل للمرحله دي انت و هو , بتبقى مستريح جدا جدا و انت معاه , كأنك قاعد مع نفسك ب الظبط , ما بتفكرش كتير و انت بتتكلم ولا و انت بتتصرف , بتحكيله كل حاجه و اي حاجه . بيفهمك و يحس بيك جدا و بيبقى عارف كمان امته بتكدب ! (لو عندك من ده , أقطع علاقتك بيه احسن :)) )
2×1 : و دي أعلى مرتبه فى العلاقات , المرتبه اللى فوق العلامه اللى فى نص الحبل ب الظبط ..... المرتبه دي , نادر قوي لما تلاقي اتنين بيوصلولها , و ده لأن الوصول ليها صعب , و كمان الناس بكلامهم و حسدهم بيموتوها بدري . المرحله دي هي مرحلة الروح الواحده فى جسمين .... بيبقى فيها نوع من التفاهم و الاحساس ب اللى قدامه رهيب ... كل الفروق بتدوب , سواء كانت فلوس او غيرها ... فلوسنا واحده , مشاكلنا واحده , و موجودين دايما لبعض . هتلاقي الاتنين بيكملو كلام بعض , و بيعملو حاجات كتير جدا زي بعض ب الظبط ... بيشوفو بعض كل يوم تقريبا , و بيتكلمو فى نفس الحدود ... بيبقو على اكتر من راحتهم لأنهم واثقين انهم عمرهم ما هايفهمو بعض غلط , عارفين ان اسرارهم و نقط ضعفهم فى آمان , و عارفين انهم بيتمنو لبعض يكونو احسن من بعض , بيتعبو لبعض و عمرهم ما بيستنو ماقبل من بعض .
 
لو حددت مسافاتك فى علاقاتك , عمرك ما هاتتعب ابدا او تتصدم فى حد .عمرك ما هاتستنى من حد أكتر من اللى هايقدمه ,و عمرك ما هاتدي حد أكتر من اللى يستاهله . صحيح هاتتصدم كتير بعد ما تعمل ده , في كم الناس اللى كنت فاكر انك قريب منهم و علاقتكو قويه , لكن بعد كده هاتبقى مبسوط جدا . و طبعا لازم تحط فى حسابك , ان الناس بتتغير ... يعني ممكن اللى قريب منك النهارده , بكره يبقى بعيد ... و البعيد يبقى قريب ... يعني بمعنى أدق , مش تقييم واحد للمسافات للعمر , بيبقى اكتر من وحد , كل فتره كده . ده غير ان اللى لازم يبقى أكيد , اننا ك بشر , أحنا اللى بنتحكم فى العلاقات , مش هي اللى بتتحكم فيها ... طول ما الطرفين عايزين العلاقه هاتكمل و هاتفضل مهما كانت الظروف ... لكن لو كان واحد بس , ف العلاقه هاتتضعف و تموت فى الآخر !
 
مش كل علاقات الحب ابطالها سِندعرّه و البرنس أشارمينج
و مش كل علاقات الصداقه ابطالها بيلا و جايكوب ( بتوع فيلم الجميله و "مشّاص" الدماء و السلعوه )
الحياه اوقع و اكبر , الحياه فيها ورق
ورق ايه ؟؟
لينا في ده بووووست آآآآخر
D=
5 رأي الناس | | edit post
سنه تانيه مذكرات
Teen
في اليوم التالت من الشهر السابع فى كل سنه
بتيجي مناسبه حلوه قوي
صحيح بنخلص امتحانات و بناخد الأجازه
بس مش دي برضو ......
ده عيد ميلاد ...... مين ؟؟
عد ميلاد المذكرات اللى بتقراها دي
:)




صحيح عدى 15 يوم على العيد ميلاد , بس بقى كان فى ناس لسه بتمتحن و ناس مستنيه نتيجتها ف قولنا ننضف و "نسيق" المكان عقبال ما كل البشر تبقى فاضيه . طبعا مبروك لكل اللى نجحو , و لكل اللى نتيجتهم طلعت اصلا ..... لو كنت فى تالته فى اخيرا خلصت الثانويه , و رايح مرحله جديده قويه جدا فى حياتك ... لو كنت فى تانيه , ف هانت خلاص , كلها سنه و تروح انت كمان المرحله القويه ...... صحيح هاتندم بعدين , لكن مافيش مانع انك تجرب بنفسيتك .

أم هند .... زي ما كنت بقول , بقالنا سنتين معاكو .... بنرغي , فى كل حاجه و كل موضوع ليه علاقه ب المراهقه من قريب و من بعيد , صحيح المواضيع قربت تخلص .... لكن الحياه ما بتخلصش , و لسه فى  حاجات كتشير موتس هانتكلم فيها . عدت علينا سنه جديده اهه .... الأبلتين لدع ف دهاليزها , لعبنا فيها ب الساعات و الكتب و صخور الواقع .... قولنا عيب عليك , و غنينا تركي و ميال .... شوفنا الفاشونيستا و رجعنا للسكولا مع بعضيشنا .... شوفنا الفالنتاين , و عدينا ع الدين ...... لونّا ب اللون الأسود و أحنا بنقول كلاكيت لتاني مره !

سنه جديده عملنا فيها انتخابات شعب و شورى
سنه جديده عملنا فيها انتخابات رئيس
سنه جديده خسرنا فيها صحابنا و اهلنا و ناس بنحبهم
سنه جديده عملنا فاين بايدج و راحت
سنه جديده عملنا فيها فان جديده و بقى عندنا فانز
سنه جديده جالنا فيها متابعين جداد و صحاب اجدد
سنه جديده .... قرينا , عملنا لايك ( أو ديسلايك )
سنه جديده رغينا و اتكلمنا و اتناقشنا .... ك العاده



يا رب تكون السنه دي احسن من اللى قبلها
و يا رب تكون المذكرات قدرت تفيدكو او تساعدكو
فى انكو تعدو من حاجه صعبه او جديده قدامكو
و عقبال سنين كتيره يا مذكراتنااااااااااا
كل سنه و انتي طيييييييييييبه
:)

و زي ما سألنا السنه اللى فاتت


تحبو تقولو ايه للمذكرات فى عيد ميلادها ؟
ايه اكتر حاجه اتكتبت فيها عجبتكو ؟
و ايه اكتر حاجه اتكتبت زهقتكو فى عيشتكو ؟؟
ايه اكتر جمله المذكرات قالتهالكو و ضحكتو عليها ؟؟
ازاي ممكن المذكرات تغير من نفسها و تكون احسن ؟
حابين تشوفو فيها ايه قدام ؟.... حابينها تكلمكو عن ايه ؟ و ايه لأ ؟
سنه حلوه يا جميل
سنه حلوه يا جمييييييل
سنه حلوه يا مذكراتنا
سنه حلوه يا جميييييل
سنه جديده سعيده ان شاء الله
ملحوظه كلبوظه : الاوبل بوفيه لسه على ايدكو الشمين من السنه اللى فاتت
  :))

5 رأي الناس | | edit post
الفاشونيستا
Teen
أولا اميجوس
كى تال ؟؟؟
بيقول ان الـ .... أيه ؟! , مش فاهمين ؟؟ .... آآآآه ... ده اسباني ( باخد كورس بقى و بعمل بيه شغل ) ... الترجمه : مرحبا اصدقائي , كيف الحال ؟؟ .... و ده بمناسبة طبعا " الفاشونيستا " ( اي حاجه آخرها " إستا " تبقى اسباني على فكره ) اللى بقت محاصرانا من كل حته و مكان ! .

لو جيت تقرى اي حاجه بتتكلم عن اللبس و كده , غالبا هتلاقيها مليانه نصايح معروفه و محفوظه عند اغلب الناس , زي مثلا انك لو تخين او قصير لازم تلبس حاجه مخططه ب الطول مش ب العرض على شان تبينك ارفع و اطول , و لو انت رفيع ف تلبس المخطط ب العرض على شان هايبينك اتخن .... اما لو كنت لا ده ولا ده ف إلبس حاجه مخططه ب " الورب " ( او كاروهات ) .

نصيحه تانيه فى مكان تاني , هاتقولك لو تخين ما تلبسش حاجات فاتحه قوي و لو رفيع البس فواتح . لو انت ابيض او بشرتك فاتحه, ف هاتليق عليك الألوان الزاهيه زي الحمر و البنفسجي ( و البمبي المسخسخ ) . و لو اسمر , ف خليك مع الألوان الغير صريحه , زي اللبني و الكحلي او الاصفر الفاتح ( و المبمبي اللى مش مسخسخ ) . 

و ينزل الواحد و يشترى اللى قراه و هو فى قمة الأنشاكح بقى لأنه اخيرا بقى شيك و ستايل ..... و على حين غره ! يلاقي واحد واقف جمبه فى المحل , اسمر , و لابس "تيشيرته " حمره لايقه عليه جدا !! . و يبقى مصير المجله الأليم فى الحاله دي , هو السفره تحت الأكل , و بعدين هوبا يالا ع الزباله عدل ! ( نستفاد بيها بعدين نرميها ).



من مشاكل المراهق الأزليه , اللبس ...... تاتاتاتاااااااااااااااااااااااااان دوم تك تشششششش ( بقالنا فتره ما عملناش موسيقى تصويريه ) ... زي ما قولنا فى أول بوست فى المذكرات دي خالص , من سنتين تقريبا .... ان فى بدايات المراهقه , المراهق ما بيلاقيش لبس على قده , لو الوسط مزبوط , الرجلين قصيره , و لو العكس ... تبقى الرجلين طويله !! , لو الكم طويل , الطول مزبوط , لو العكس ... الكم يطلع قصير ! . و زي بتوع الأنابيب و العيش و الرقص الشرقي ... روحنا نطالب بخط هدوم للمراهقين , يكون مناسب لأبعادهم ... ادونا كوبونات و روحونا !! .

يعدي الوقت , و يتوغل المراهق اكتر فى المراهقه , لحد ما ابعاده بتكون اتزبطت تاني .... هنا بيواجه مشكله تانيه , و هي الزوق , او الستايل اللى لايق عليه و على شكله . لأنو زي ما احنا عارفين , ان اغلب المراهقين فى سن المراهقه بيبقو وحشين , و ده لأنهم بيبقو فى مرحلة نموسريع بقى و بتاع .... لكن بعد المراهقه بيحلوو تاني ( ساعات لأ ) .... و من هنا طبعا نحب نقول "هارد لك" للي بيبقو حلوين فى المراهقه , لأنهم هايوحشو بعد كده :)) . المراهق بيحاول على قد ما يقدر انه يكون حلو , و شيك و لطيف , على شان يثق فى نفسه و على شان يجذب انتباه اللى حواليه ( الجنس الآخر بمعنى ادق ) .

و هنا بتظهر الفاشونيستا بقى .... فى كل مكان و كل حته , لكنها بتكون فى واقع الامر ملحوظه قوي فى الجامعه , لأن ده اكبر تجمع للمراهقين اللى بيلبسو فيه اللى ع الحبل و هما نازلين ( فى ناس بتلبس الحبل نفسه , عادي ) . ب النسبه للبنات , ف في اللى هتلاقيها واخده ستايل النجفه ( ماضيه عقد احتراف مع توشيبا ) , كل نانو متر فيها بيلمع و " بيبّرق " بشكل غير طبيعي .... دي تحت الشمس , بتعمل زغلله بسيطه , مع صداع خفيف , و كثرة التعرض لها قد تصيبك ب العمى او الحول المبكر مع فقدان فى الإدرلك .

ممكن كمان تلاقي فى وشك ستايل التلفزيون الملون , و ده شديد الخطوره على القرنيه ..... تكني كلر فظيع , فوشيا على اخضر و سكارف تركواز بينور لوحده , مع كوتشي اصفر مريب .... ده بيجيب هلاوس بصريه , مع فقدان مؤقت فى النطق . و فيه اللى تلاقيه لابس بدله فى الجامعه , و اللى تلاقيه لابس حمالات على بنتاكور و قميص كاروهات احمر و صندل جلد بني ( شوياااااكه ) . و ده طبعا على شويه من الفرسان العرب الاصيلين اللى ملزقين شعرهم ب الجيل ( جيل "الجيل" الكيس بربع جنيه ) ..... مع "شنسله " و قميص ستان ( ينفع مفرش شفره على ضهره) و بنطلون قطيفه ديرتي رائع .... و كل دول مالهومش آثار جانبيه ( صرع خفيف بس ) .



هنا , مش بتكلم طبعا عن نوعية اللبس او جودته من عدمها ..... لأن مش كل الناس معاها الإمكانيات اللى تساعدها انها تجيب حاجه ماركه ولا انها تطقّم ..... لكن , بتكلم على حاجه موجوده عند كل الناس ( او المفروض يعني ) و ببلاش كمان ... أقسم .... اللى هي , الزوق .

الزوق حاجه عاديه , مش مرتبطه بفقر او غنى .... لكنها مرتبطه اكتر ب الأحساس و  الفكر . بحيث انك تعرف ايه يتلبس مع ايه و امتى ... بسيطه . يعني لازم تكون عارف ان الألوان : سخن و بارد و محايد .... و ان مش كل الألوان اللى بتمشي مع بعض فى الطبيعه , هاتبقى ماشيه فى اللبس .... او قاعده فيه ( بكره الألش ! ) .. يعني الورده الحمره ليها غصن اخضر , و شكلها جميل جدا .... لكن فى اللبس , ما ينفعش تلبسلي تيشيرت احمر و بنطلون اخضر و تقولى ورده ( و نفتكر قول الشاعره : وردة مين يا حيليتهاااااااااا ) .


لازم تبقى عارف ان ماينفعش لبسك كله يكون منقوش ( عليه نقشه يعني للى ثقافتهم اوزباكستناي ) , يعني لو البلوزه منقوشه , الطرحه لازم تكون ساده .... او " الجونله " ساده . لو لابس قميص مخطط مثلا , ما ينفعش تلبس تحتيه تي شيرت مخطط برضو او عليه رسمه ! . البِدل و الفساتين للمناسبات و الرسميات لا تمشي فى جامعه ولا خروجه طبيعيه للنادي وللا السينما ... ولا حتى شللات الفيوم ! . القميص المدور من تحت , ده اللى بيطلع بره البنطلون , اللي كله حته واحده , ده كلاسيك قوي بيخش جوه .




طالما عندك زوق , و عرفت تطبقه صح , عمرك ما هاتتعب ولا تقلد حد , و يكون ليك ستايلك المميز اللى لايق عليك ... طالما بتبص فى المرايه الصبح قبل ما تنزل , و تبقى مقتنع تماما ب لبسك , ف بيس جدا . هو صحيح الجمال جمال الروح على رأي الست بياض التلج ( " سنو هوايت "يعني ) , إلا ان الشكل مهم برضو , لأن اللى قدامك , بيشوفك قبل ما بيكلمك .

الحياه بقت كلها فاشونيستا
مش فى اللبس بس , ولا الشكل
كمان السياسه و رياضه و كله
لكن ده .... مش موضوعنا اللى جاي
اللى جاي .... مفاجأهD=
2 رأي الناس | | edit post
مراهق + دين = ؟!؟
Teen
- أنت سايب الصلاه و قاعد ع المحروق ده !
- أأ ..........
- أنت كمان فيك عين ترد ! , مش عارف أن اللي بيفوت الصلاه بـيـ.......

و هنا , بيبدأ الموشّح قصير ( يعني حوالي 3 ساعات و دقيقتين ) عن عقاب اللى ما بيصليش , و العذاب اللى مستنيك فى الآخره , و  الأمر ما يسلمش من شوية تهزيق , و ينتهي الموشّح بـ : إنت حر .... انا عملت اللى عليّا ! .... و يسيبك اهلك فى حاله من الذهول , و العند و الفصلان اللا متناهي .... و يمشو ! .



هو ده غالبا اللى بيحصل , لما ييجي الموضوع للصلاه او الصوم او اي حاجه ليها علاقه ب الدين . لو بصينا على اغلب الديانات - أيّا كانت بقى - هنلاقي ان فى حاجات معينه كده لازم تعملها على شان تخش الجنه او الفردوس و تنقذ نفسك من النار المولعه اللى هتاكل كل اللى ما بيعملوش الحاجات دي , زي مثلا انك تصلى عدد من الصلوات بشكل معين , و تصوم و بكده يكون كله " أليسطى " و تخش الجنه .

غالبا هنلاقي ان علاقة تينز كتير ب الدين علاقه متوتره شويه ( زي علاقتهم بأهلهم كده ) , و اللى حواليهم بيبصولهم على انهم عالم فاسده , و بيدعولهم ب الهدايه ليل نهار . و بغض النظر ده , ف هتلاقي كده فى " فحره " موجوده مابين الدين و التين . و لو فكرت فى موضوع الدين و المراهقه يمكن تحس ب شوية لخبطه , و تحس ان الموضوع ليه حتت كتير قوي و كل واحده فى ناحيه ( يعني شبه مجلس الشعب ) .

يا ترى ايه الحتت دي يا واد يا تيييييييييييين ؟؟

على شان اللخبطه ( و الحول ) احنا ناخد الموضوع واحده واحده ..... و يمكن احسن حد نبتدي بيه هما الأهل , اللى بيعرَّفونا اصلا يعني ايه دين . الاهل فى الموضوع ده انواع كتير , منهم المهتم و منهم اللى منفض و منهم اللى بيحسسك ان مافيش غير جهنم اللى هاتروحلها بالمترو على طول ( من غير ما يقف فى اشارات و زحمه ) . المهتمين و الطبيعيين ف دول مافيش مشاكل عندهم , إنما المكبرين دماغهم ف ب التالى لو لقيت ماحدش بيقولك اعمل و ما تعملش , هاتعيش حياتك طبيعي و عادي جدا , لإن الأوبشن اللى بيعرّفك على الدين فى حياتك مش موجود اصلا . و من دول و دول , هنلاقي النوع التالت المتشدد , و دول ببساطه جدا , بيحسسوك ان الموضوع صعب و معقد قوي , لدرجة انك بتقفل منه و مخك بيرفض حتى انه يستوعبه ! .

و بعد البيت تيجي المدرسه , و كتاب الدين ب الحصه بتاعته ..... الدين طبعا ما بيتضافش على المجموع , و حصة الدين بتبقى نوع من الفسحه لأن الفصل ممكن يفضى شويه , او المستر يتأخر او يقعد يحكيلنا فى قصص مالهاش علاقه ب المنهج ..... ده طبعا غير المنهج اللى تحسه كده شوية مقالات من كام كتاب و كام حاجه من القرآن او الإنجيل و انتهينا ! . حيث كده , و مع الوقت بينمو و يتفشّى و يتوغل و يتغلغل فى نفسيتك إهمال لحصة الدين و الكتاب , لدرجة انك بتفاجئ و تذهل لما تعرف ان فى إمتحان دين فى الثانويه العامه !! . و جزء من الإهمال للكتاب و الحصه , بيطول كمان الماده ذات نفسها .... لإنك بتحس من و انت صغير ان الدين مش مهم فى المدرسه ( اللى بتقضي فيها 14 سنه من عمرك !! ) .


 
بعد كده نيجي للنص التالت ( يوه ! مش كل مره هاقول انه نص !! ) اللى هو أ.ن.ت ......... تاتاتاتاااااااااااااااااااا دووووووووووووم !! ..... فعلا انت نص من انصاص القصه و الموضوع المترامي الاطراف ده ( حلوه دي ) , سواء بقى كان عندك الإستعداد اصلا انك تقرب من الدين و تعمل اللى عليك , أو لأ ..... سواء كنت شخصيه كسوله و بتقتل ضميرها عادي , ولا ضميرك صاحي و بيكهرب فيك كل ما تعمل ابسط غلطه ! ..... سواء كنت شخصيه عناديه و مش هاتصلى على شان بيقولولك , أو لأ .... و الأهم , الحته و المكان اللى بتبص منه على الدين .

سامعك ياللى ورا ! ..... و شايفك و انت قاعد تهرش فى دماغك .... مش فاهم ايه ؟؟ .... آخر سطر ؟؟

مع الوقت . و لما بنكبر , بيتاخد عننا لما نخش المراهقه , إننا متمردين و إننا ما بنسمعش الكلام و إن دماغنا ناشفه ...... بغض النظر ان السبب الأساسي فى الكلام ده هو الـ20 سنه فرق ( و أكتر و أكتر ) فى ما بين كل جيل من المراهقين و اهله , و اللى بيترتب عليهم اختلاف الدنيا و الافكار و الثقافه .... ده غير محاولاتنا فى اننا نبني شخصيتنا المستقله ( ايديك معانا يا حج , نطلع ب الرابع ) . إلا ان الأهل بيشوفو انه عند و نوع من التناحه و خلاص يعني , و ب التالى بيقررو ان محاولاتهم اننا نقرب من الدين تكون هي كمان رخمه ( ك نوع من المواجهه و العمليات المضاده ) !! . و هتلاقيهم بيستعملو الأسلايب القديمه اللى بتتنوع فى ما بين الزعيق و الشتيمه , الحرمان من المصروف مع تكتيك المباغته و قفل التلفزيون فجأه او الكبيوتر و انت مندمج فى نصل المشلسل !! .

و الحركات دي كلها نتيجتها واحده , انك بتقوم تصلى غصب عنك و بعدين لما يسألوك بعد كده عن اي صلاه , تقول صليت على شان تريح دماغك .... و تكمل المسلسل ! . و بكده تكون الحفره اتحفرت و بقينا احنا فى ناحيه و الدين فى ناحيه , خايفين نمشي لا نقع . و مش عارفين نعمل ايه .... من ناحيه اهلنا بيزقونا , و من ناحيه تانيه الناس فى التلفزيون و الجوامع او الكنايس ماسكين من ايدين و بيشدو برضو !! .



من الواضح كده انك حليتهالنا .... مش حاسس !!

بغض النظر عن المؤامره المجتمعيه غير المقصوده دي , إلا ان اللى فى ايده الحل هو أحنا ( أماااااال ) . ده حقيقي, لإننا ببساطه أحنا اللى بنعند, نكسل, نستصعب, .... و إلخ إلخ إلخ . سامع نفس السخص اللى كان بيهرش من شويه بيقول الهدايه من عند ربنا و لما يعوزنا نقرب من الدين هانقرب !! . مافيش مشاكل من ده , و ده حقيقي , لكن لما ربنا يحس الأول انك عايزه ده أو ع الاقل بتحاول . يعني عمرك ما هتحاول تعلم حد السباحه و هو اصلا بيكره الميه او مش بيحبها او مش فارقه معاه يكون بيعوم او لأ , على عكس واحد تاني بيحاول , و يمكن تلاقيه بيغرق , اكيد هاتمدله ايدك و تساعده .

الأهم من كده , أننا نحاول نغير المكان اللى بنبص منه ع الدين ( بص من "الفرانده" ) , ما تبصش انك لسه هاتقوم و تصلي ولا هاتقعد تصوم شهر ولا اتنين .... بص اكتر ع النتيجه اللى بعد كده .... مش هاقول الجنه , لكن بص على انك هاتحس انك مستريح , مافيش وراك حاجه انت سايبها . ايا كان شكل الصلاه , ف غالبا بيكون فيها سجود فى وقت من الأوقات .... ما تبصش عليه كأنه حاجه رياضيه مهوله و ضخمه , ماتبصش عليه انه نزول و طلوع من ع الأرض , إنما بص عليه كأنه نزوووووووووووول لكل حاجه مضايقاك , و إنت تحت غمض عينيك و خد نفس عميق , بعدين قوم , سيب كل اللى مضايقك ع الأرض ....  و تخيل ان كل حاجه حلوه و فرح فى حياتك بيترفع لفووووق و انت بتقوم .... و بكده تكون بصيت للسجود بشكل مختلف جدا .

اما لو كنت من الناس اللى بتحب القرايه , و مقطعين نفسهم صرخة الرعب و رجل المستحيل ( أدهم حمدي , بيتكلم الفين و 700 لغه بس ! ) , امسك المصحف او الأنجيل , هتلاقي فيه قصص حلوه جدا , و حكايات مذهله عمرك ما هتلاقيها بره .... صحيح كلامها ممكن يكون معقد شويه لكن اعتبره تحسين للغه برضو .

البوست ده مش بيقولك قوم صلي
أحسن تخش النار .... ولا عشان تخش الجنه
ب العكس تماما , بيقولك خليك قاعد مكانك
و اوعى تتحرك او تفكر تقوم تصلي
طالما انت مش حابب ده و مش عايزه من قلبك
طالما انت بتعمله ب الغصب و على شان ترضي اهلك
او على شان تريح دماغك من الزن اللا متناهي
خليك زي ما انت , و اعمل اللى أنت حاسه
ده لإن ........
ولا خلو ده
فى بووووست آخرD=
2 رأي الناس | | edit post
قالك فالنتاين
Teen
فى كل سنه بتعدي عليك , هتلاقي ايام معينه كده ليها الوان
يوم اصفر ( ده تراب ) , يوم اسود ( نكد اكيد ) , يوم أزرق ( برد , مش محتاجه فكاكه )
و طبعا طبعا يوم أحمر ..... اللى بيقولو عليه " الفالنتاين "
يوم 14 من شهر " فأراير" من كل سنه , هتلاقيه يوم احمر فى احمر , دباديب حمرا , ورد أحمر , علب حمرا , هدايا حمرا , ناس حمرا , و حتى الأهلي بيلبس احمر فى اليوم ده !! . و لازم على الأقل تشوف 5 بني آدمين فى اليوم ده شايلين بوكيهات ورد او هدايا ( حمرا برضو ) و ماشيين بيها فى الشارع و على وشهم نظرة كسوف قويه جدا , او نظرة انشكاح تانيه مغزاها : ياترى هايجيلي ايه النهارده ؟؟ .... ما علينا من كل ده , المهم قوي فى اللحظه دي , اننا نعرف مين فالنتاين اللي احنا بنحتفل بيه ده !


14/2 فى الاصل كان عباره عن ذكرى لموت اتنين من القساوسه اسمهم فالنتاين , الاتنين كانو عايشين فى عصور اضطهاد المسيحيه ! , المهم فى كل ده ان حياة الاتنين مافيهاش ولا شلحة رومانسيه وحده !! . امال كم الرومانسيكيه دي جه منين !!! . الموضوع كله طلع لما جه راجل افتكس اسطوره , و الاسطوره قعد كل واحد يزود فيها حته و يظبط فيها حته , لحد ما انتهت على انه زمان الامبراطور قرر يمنع الجواز على شان كان شايف ان الجنود المتجوزين بيبقو جنود " نايتي" , ف جه القديس فالنتاين و بقى يجوز الناس من ورا الراجل . و لما الامبراطور (ابو جيش) عرف , سجنه ..... فى الفتره دي فالنتاين حب بنت الراجل اللى كان واقف يحرس الزنزانه , و يوم 14/2 فالنتاين اتعدم بطريقه شنيعه جدا ( بتجيب تعاطف اكبر ) , بعد ما ساب اول كارت "لامور" فى العالم لبنت السجّان بيقولها فيها انه بيحبها .... و طبعا ما ننساش الأمضه الشهيره : المخلص " فالنتاين " .
و بكده الست ام فالنتاين , بقت ام الشهيد ( شهيد الحب ) , و خدتلها شقه فى المساكن الامبراطوريه الجديده , و الفين حتة دهب و جاموسه صغيره , عملت بيها مشروع  " البان ام فالنتاين " . بغض النظر ان المشروع نجح و الحاجه ام فيلو (دلع فالنتاين) فتحت اكتر من فرع و بقت غنيه , إلا ان اليوم بقى يوم الرومانسيه العالمي فى كل مكان تقريبا . و بقى اللون الاحمر رمز للرومانسيه , مع انه فى نفس ذات الوقت رمز للدم و الغضب و النازيّه و حاجات كتير حمرا فى الحياه فى الحقيقه ( انت و وجهة نظرك بقى ) .
و احنا صغيرين , ما كناش واخدين بالنا من اليوم ده , كان يوم عادي , احمر شويه , بس عادي ( حصبه او حملات تبرع ب الدم كتيره ) . و خاصة ان اليوم ده كان دايما بيبقى موقعه فى اول اسبوع من الدراسه فى التيرم التاني , ف كان يعني يوم غلس فى اسبوع اغلس ! . لكن بنكبر و بنخش المراهقه و بنكتشف انها مش حملات تبرع ب الدم , ولا حتى حصبه .... إنما ده عيد لحاجه اسمها حب ... و كمان عيد ناس مختلفه عليه .
الناس كانت مقسومه 4 انصاص ( آه , انصاص ... أقسم) ..... نص شايف انه مش عيدنا و مش بتاعنا و انه عيد الناس "النايتي" . و دول زي الامبراطور كده , رابطين حاجتين مالهمش اي علاقه ببعض .... رابطين بين تبلد المشاعر و الرجوله او الصلابه او ايّا كان و بين الفالنتاين . و غالبا لو اتكلمت مع حد فيهم , هتلاقيه شايف انه عيب انك تعبر عن مشاعرك , أو انك تجيب دبدوب او تشيل بوكيه ورد .
اما النص التاني , ف هما النص بتاع " Sorry Valentin's .... I am Muslem/a " . و دول برضو تبع الامبراطور , لأنهم رجعو تانى ربطو بين حاجتين بعاد عن بعض جدا , لو دورت مش هاتقدر تلاقي هي علاقه حقيقيه بين الدباديب و الورد و الإسلام او ايّا كانت الديانه ! . و كأن الناس يوم الفالنتاين بتروح تسكر و بعدين ترتكب " الفحشاء " ..... و بعدين يدو لبعض الدباديب و الورد و ياكلو شكولاته محشيه مخدرات !! .

النص التالت هما اللى بيحتفلو ب الفالنتاين , و بيستعدو لليوم من السنه للسنه , و لازم يلبسو فيه احمر , و ياكلو فيه شوكالاته  ( او بطاطا ..... و ياتجيبلي الشوكالاته يا بالاش يا ولا , روح رجع البطاطا يا بلاش يا ولا .... كده فاكس بطاطا , مماكن دره ! ) . بيستعدو ب الزرافه الحمرا ( الدبدوب موضة السنه اللى فاتت ) , و بوكيه ورد " الزنبق قاني الحمره " .... و البنات بيلبسو حلق احمر او شريطه حمرا او طرحه حمرا , او حتى لكلوك احمر ... اي حاجه و خلاص تحسسهم ب اليوم و ب جو الفالنتاين . و حتى لو كانو سينجل , ف لازم "يفلتنو" ( يعملو فالنتاين يعني للى ثقافتهم هندوسي ) و ينزلو يتمشو و يشوفو محلات الورد و الناس و يجيبو شوكالاته و ايس كريم ب الفراوله ( عم شندويلي عامل ايس كريم جديد ب اللحمه يجنن ) و يرجعو يكتبو انهم سينجل و براود و هابي سينجلز داي .
اما النص الرابع و الاخير , ف هو النص اللى ببساطه شايف اننا مش محتاجين يوم او وقت معين على شان نحتفل بحبنا , او اننا نعبر عنه بأي شكل ... مش محتاجين يوم مخصوص نجيب فيه ورده او شوكالاتيه كورونه ( حلوه و رخيصه ) للشخص اللى بنحبه .... يعني بمعنى ادق مش لازم ييجي عيد على شان نجيب حاجه "بالقهر" و ب العافيه . النص الرابع شايف ببساطه ان الهديه او التعبير عن الحب من غير مناسبه , و بـ"محض الإراده الحره " حتى و لو كان بجمجمه او حزمة جرجير ملفوفه بشريطه حمرا , بيبقى معبر اكتر و تأثيره اقوى بكتير . لأننا قادرين نخلي كل السنه فيها حب , بدل ما نحصره فى يوم واحد بس .
مع الوقت , و مع تأثير الاهل و البيئه اللى حواليك , هتاخد نص من دول , و تتعامل بيه فى حياتك . فى كل الاحوال , انت مش غلط , لأن ده رأيك الشخصي و انت حر فيه , أهم حاجه تخليه رأيك فعلا مش رأي غيرك , و أنك ماتسمحش لحد ابدا مهما اتريق عليك او حسسك بمدى تخلف رأيك ده , أنك تغيره لمجرد انه عايزك تغيره ! .
سؤال بيطرح نفسه بقى , احتفل ب الفالنتاين ازاي ؟؟ ..... اول ما بتيجي السيره اصلا , هتلاقي حد بيقولك ان مش ضروري تحب فى قصة حب على شان تحتفل ب الفالنتاين , ممكن قوي تحتفل بيه مع حد بتحبه حب من نوع تاني , حب اخوي , ابوي , امي , صداقه ... ايا كان نوع الحب بقى , كلام سمعناه كتير , و ما فيش اي مشاكل فى ده , لكن يفضل قدامنا السؤال : نحتفل ب الفالنتاين هااااااااااو ؟؟



ازاي يا واد يا تيييييييييييييييين ؟؟؟
لازم نركز على الأختلاف .... نخرج بره الصندوق كده ( بس تقلّو احسن يجيلكو نزله شعبيه ) و نبعد بقى عن الورد و الدباديب و كل الحاجات دي . ممكن قوي تعمل حاجه بأيديك , مهما كانت بسيطه او شكلها مش لطشيف , لكن خليك واثق ان تأثيرها فى اللي قدامك هايبقى مذهل و قوي جدا . و ده لأنك انت اللى عاملها بأيديك , تعبت فيها , و كل ما يبصلها هيلاقي فيها لمستك و روحك ( او ريحتك ! ) . ممكن كمان تعمل الكبل تي شيرت ... اللى هما تيشيرتين عليهم رسمتين او جملتين بيكملو بعض ( بحبك جوي جوي جوي .... يوه ! و اني قومان ) , ممكن تبقى خروجه فى مكان مختلف , او عشى فى مكان محترم , اي حاجه تكون مختلفه , او يكون اللى قدامك محتاجها فعلا , مش علبة شكاليطه هايخلصها فى لحظه . يعني ممكن قوي نحوش احنا الاتنين و بحق الهديه نجيب كاميرا ديجيتال محترمه .. اهو نتصور بيها بدل ما نقعد نشحت من الناس ! .
هو ده بأختصار الفالنتاين
و هما دول الناس و نظرتهم للفالنتاين
فى اللى احتفل بيه
و فى اللى ما احتفلش السنه دي
حزنا او احتراما او تقديرا للشهداء
و الاسر اللى الفتره دي بقى لونها اسود بالنسبالهم
و ناس تانيه قالتلك لأ ده حرام
و ده اللى هايودينا على البوووووست الجديدD=
9 رأي الناس | | edit post