يبدأ سن المراهقه فى الفتره بين 12 : 16 سنه , و هنا يتغير تفكير الاولاد فيصبحون فتيان و البنات فيصبحون فتيات , و على هذا الـ......... !!
ايه الكلام ده ؟! , اقفل يابني الكتاب انت و هو و ركز معايا هنا
ناس كتير بتقول : هو المراهقين مظلومين ليه ؟ و مش واخدين حقهم ليه ؟ ماهم عايشين فى راحه و موراهومشي اى مسؤليات ؟
ناس كتير بتقول : هو المراهقين مظلومين ليه ؟ و مش واخدين حقهم ليه ؟ ماهم عايشين فى راحه و موراهومشي اى مسؤليات ؟
ما تقولنا يا واد يا تين ( اللى هو مراهق بس بالأنجليزي على شان تقولو عليا متثقف ! )
بالعكسسس , حياة المراهق صعبه لأنو ببساطه ما بيكونش عارف هو لسه طفل ولا هو بقى حد كبير
يعني بصو مثلا لو فى تجمع عائلى كبير مراهقين و شباب و اطفال , يجي المراهق بكل ثقه و يقف مع الشباب على شان يعيش الدور و يحس انو كبر , و يبص للعيال التانيه بأستحقار و هما بيلعبو مساكة الملك ! , يقوم الشباب قايلنله : ماتروح يا حبيبى تلعب مع ولاد خالتك !! , و للأسف ....يمشي و هو بيجر اذيال الخيبه وراه , و لما يروح يلعب مع العيال يعدي اي حد من الكبار و يقولوله بأندهاش و استنكار : انت مش كبرت ع الحاجات دي ولا ايه ؟!
تلاقى ساعات الأهل بيكلمو الولد او البنت على حاجات و يقولولو : ما تكبر بقى , ده انت بقيت قد شحط اهو ! , او يقولوا فى نفس الحوار : لا لا ..انت لسه صغير ع الحاجات دي !!!
و هنا للأسف المراهق لا بيلاقى نفسه مع الكبار ولا مع الصغار !
ناس بتقول و فيها ايه يعنى ؟ , ما يقف مع اى حد فى سنه و خلاص , ما البلد كلها مراهقين !!
طيب بلااااش دي , المراهق بيعاني و هو رايح يشترى هدوم سواء ولد او بنت ,
سواء بيشتريها للعيد - للمصيف - للأجازه - لرحله او حتى على شان يحضر بيها الحنه اللى فى شارعه بتاعة بنت الجيران اللى فى آخر الشارع اللى ورا (ماهو ده سابع جار و حته :) ) !يروح الولد يجيب من الاطفال كالعاده , يلاقى مافيش على مقاسو حاجه و البنطلونات عليه شبه بنطلونات شحرم !
يروح قسم الرجالى , يلاقى اصغر مقاس عليه كبييير ( ولا اجدع بلياتشو فى السيرك ) , و يرجع البيت بيجر اذيال الخيبه , و أيد ورا و أيد قدام .
اما البنات ف مشكلتهم اكبر , الهدوم على مقاسهم بس الستايل لأ ! , ممكن البنت تلبس من محل الاطفال , بس اللى رايح و اللى جاي فى الشارع هايفتكرها واحده من اللى بيعيشو طفولتهم المفقوده , و تلاقى اللى رايحه تقول للي جايه : يوه ! بصي ياختشي البت لابسه ايه , تكونشى فاكره نفسها اتسخطت !
و لو لبست من محل الكبار هايبقى الستايل اوفر , و كأنها واحده من اللى مش قادرين يستنو لحد ما يكبرو او انها لابسه هدوم مامتها كنوع من التوفير ! , و الرايحه تقول للي جايه : يوه ! بصي ياختشي البت عامله ازاي ! , تكونشي ست كبيره و اتسخطت ...دي حاجه مش لطشيفه خالص !
و برضو ترجع البنت تجر اذيال الخايبه ( دي غير ديول الخيبه على فكره ) بعد يوم شوبينج مرهق , و تنقع رجليها فى شوية ميه بملح و هي بتتفرج على " ميرنا و خليل " ع الـ mbc 4 !!
و برضو ترجع البنت تجر اذيال الخايبه ( دي غير ديول الخيبه على فكره ) بعد يوم شوبينج مرهق , و تنقع رجليها فى شوية ميه بملح و هي بتتفرج على " ميرنا و خليل " ع الـ mbc 4 !!
و يا سلام لو كانو توأم و طول عمرهم بيلبسو زي بعض , و ييجو لما يبقو مراهقين و يحاولو يبقى لكل واحد شخصيه مستأِله ..... واحد فيهم بيلاقي لبس على مزاجو و التاني لأ و فى النهايه بيجيبو زي بعض برضو !
اما بالنسبه للخروج و الفسح , فحدث ولا حرج ....... يبقى الواد عايز يخرج و يسهر و يروح هنا و هناك , يلاقى الاب بيقول : الساعه دوقتى ( ايوه , هى كده مكتوبه صح ! ) 5 الاقيك فى البيت الساعه 7 و ماتروحش فى حته ابعد من المنطقه اللى احنا ساكنين فيها , انتهى النقاش !!
و البنت اساسا ما بتخرجش غير للدروس او تروح عند صاحبتها , او تخرج مع مامتها و صحابها , لكن غير كده و طموحات و احلام بمبي - من اللى بيخلى الهدوم تتنفس - فدي مش موجوده !
فترة المراهقه يا جماعه عباره عن صرااااع
صراع المراهق مع العالم الخارجي و مع نفسه قبل العالم
لانو يكون شخصيه مستقله و ينتقل من مرحلة الطفوله للشباب
زي الدوده لما بتبقى شرنقه قبل ما تكون فراشه , عمركش شفت دوده بقت فراشه على طول !
او زي الدقيق المدعم - ابو مسامير - لما يبقى رغيف عيش من بتوع الجمعيات العموميه , اللى الناس بتقف عليه طوابير بالشهر و الشهرين !
المراهق بيحصلو كونفليكس فى المشاعر
اه ولله كونفليكس , لا لا .... مش كورن فليكس ...بقول كونفففلللليكس , يعنى تداخل و تضارب فى المشاعير و الأحاسيس
ولكن لينا فى الموضوع ده
بوست آخر
D=
|
=))=))
مووتنى من الضحك بس فعلا كلامك كله حقيقى مستنيه البوست اللى جاى بفارغ الصبر
استمـــــــــــــــر للامام دائما
هييييييييييييه
اخيرا بقى فيه متابع للبوس
لووول
مرسي بجد
و انتظري البوست الجديد
:)
بماانى للاسف بمر بالمرحلة دى
احب اقولك ان "الكورن فليكس :D" اللى قلت عليه صح بس دة بيبدأ مع بدايات سن المراهقة و بعدين بتلاقى نفسك خلاص لقيت نفسك مع الكبار و مشكلة الهدوم بتتحل بعد تعب سنتين او تلاتة.
المشكلة بقى ان مجتمعنا احنا المجتمع الشرقة يعنى واخدين موضوع المراهقة دة حاجة عيب مثلا
ما هو زيه زى الطفولة و زى سن اليأس و الحاجات الكبيرة الغريبة اللى بنسمعها دى الفرق اننا بنكتشف نفسنا فيها و بنلاقى شخصيتنا اللى بتتكون من المرحلة دى و بتفضل معانا لحد ما نموت.
مرحلة بتعدى فى حياتنا زى اى مرحلة
و اللى يغيظ انهم كـــلهم عاشوا المرحلة دى و عارفين هى ايه و عارفين انها عادية
زينا زى الطفل الصغير
البيبى لما يبقى عنده ست شهور لحد اما يبقى عنده اربع سنين يبقى عايز يخرج و يكتشف العالم حواليه فبيوسخ هدومه و بيتعور
بس فى امهات بيكبتوهم و مش بيبقوا عايزنهم يكتشفوا
احنا كدة
هم عايزننا قاعدين كدة لأنهم حاسينها مرحلة خطر اه ممكن تبقى خطر شوية عشان فيها شوية تهور و الدماغ بتبقى ناشفة اكتر ما هى ناشفة اصلا بس سيبنا نكتشف العالم اللى احنا هندخله بعد المرحلة دى و مبقولش يسبونا بس راقب من بعيد و متححسوناش اننا هنغلط هنغلط
بالعكس لو الاب وا لام مسكوا ابنهم اوى دةاللى هيخليه يغلط
بس يتهيئلى بدأ يبقى فى وعى شوية فى مصر عن المرحلة دى و يا رب يزيد
و بجد اسلوبك دمه خفيف و صح بيناقش حاجة و فى نفسالوقت بطريقة متزهقش :))
و اسفة عالاطالة
سمرررررر
اولا منوره البلوج
ثانيا طولي براحتك
هنا مافيش قيووود
انا كمان بحب الرغي اساسا
ده غير ان كلامك صح و فى محلو فعلا
المراهق بيبقى عايز حد يسمعو دايما
و يجاوب على تساؤلاته
بس للأسف كلو بيتكلم و ماحدش بيسمع
يا اما بتكون الاجابه الدائمه و الابديه
كده !!!
هو بقى فى وعي حبتين
بس لسه برضو , لسه مافيش الوعي الكافي
و بجد مرسي على كلامك الجميل
:)