ايه هو الحب ؟؟
السؤال ده مطلع اغنيه اجنبيه قديمه , و لكن مشهوره جدا فى اوروبا و الدول المتقدمه , و من فتره للتانيه ممكن تلاقي سواق توكتوك ولا حاجه مشغلها ..... و يمكن السبب فى كده انها بتسأل سؤال مهم جدا حير كل الناس فى مختلف الاعمر و بالأخص فى مرحلة " الناس التينز " !
الحب احساس بالود ناحية شخص معين سواء كان قريب او صديق او الاهل او حبيب
الحب هو انك تلاقي انسان فيه كل الصفات اللى بتحلم بيها
الحب هو انك استحاله تتخيل حياتك من غيراللى بتحبه
الحب هو ارقى و احسن شعور ربنا حطه فى الانسان
الحب بتاع الاهل و الصحاب .... و حتى بتاع الاكل معروف ايه هو , لكن الحب الحب , هو ده اللى كتير مننا مش فاهمين يعني ايه
لما بنحب حد بنحبه على شان صفات معينه فيه بتكملنا و بتضيف لحياتنى معنى معين مكانش موجود قبل كده , و من هنا بنحب اهلنا لأنهم " الحدوه " بتاعتنا , و بنحب صحابنا لأنهم بيكملونا و بيفهمو احنا عايزين ايه , يمكن حتى من غير ما نتكلم ..... و الحب بيجر وراه بقاي الصفات الكويسه , زي الرحمه و العطف و تحمل المسؤليه مثلا .
يمكن سمعنا كتير ناس بتقول : مافيش صداقه بمعناها الحقيقي بين ولد و بنت . و يمكن استغربنا و ما فهمناش ليه ..... صحيح الاسباب كتير ( هانبقى نقولهالكو فى بوست ضغنون لوحده ) , ولكن اللى يهمنا من الاسباب دي انو مع مرور الوقت بين الصديقين بتقوى ما بينهم الصداقه و بتتحول - غالبا - لحب .
كتير شفنا افلام عاطشفيه و رومانسيه , و شوفنا مسلسلات تركيه ( زي الحب المنقوع مثلا ) و اتأثرنا بقصص الحب و الهيام اللى من اول نظره , و سرحنا كتير مع روز و هي واقفه على " بوز " الفالوكه و جاك ماسك ايديها ( لحسن تنزل و ماتدفعش الاجره ) , و سرحنا اكتر مع الامير و هو بينقذ سنو وايت بمساعدة الاقزام السته ( فى واحد مات ) , و بنفضل سارحين , لحد ما هوووووب !! , بنخبط فى شجرة الحقيقه و هي ان الحب الاسطوري اللى من اول نظره ده مش موجود , لأن الحب مش بييجي زي الالهام كده من السما , او تحس ان فى صوت بيقولك : ايوه ياختشي هو ده المحروس اللى عليه العين , زي ما تكونو كدشه اتخلقتو لبعضشيكو .
فى الواقع ( البحر مليان قواقع , عارفين ! ) , الحب بييجي بين اتنين مع مرور الوقت , نتيجه للعشره و الصداقه اللى بتخلي الاتنين عارفين بعض كويس , و من هنا ممكن الواحد يلاقى الصفات و الحاجات اللى كان بيتمنى طول عمره انو يلاقيها , و على شان كده , يمكن تلاقى اغلب الجوازات اللى عن حب - مش جوازات الليفينج ( كلمة صالون اتلغت من القاموس خلاص ) - بتكون بين اتنين كانو صحاب او جيران او حتى معرفه و هما صغيرين .
اللامور ..... لا لا , مش أمور !! ..... بقول اللامور ..... اللامور بقى اللي مبني على الاعجب بالشكل - زي ما كلنا معجبين بشكل الشوارع مثلا ! - ده ما يعتبرش حب اساسا
و يا ترى ليه يا واد يا تييييييين ؟؟
لأنو بيروح بسرعه جدا جدا ( زي ما اريال بيودي البقع بسرعه كده ) , ده غير ان ارتباط زي ده مش ممكن يحقق السعاده ابدا لأي حد
انا سامعك على فكره ياللى بتقولى بكل ثقه : طبعا يا خويا , ماهو لازم يكون مبني على العاطشفه اولا و اخراً !!
و احب اقولك : مبروك , كسبتي معانا بانيو بدورين ! ....... طبعا الكلام ده مش بيس خالص , لأن العاطفه متقلبه , و اللى بحبه النهارده ممكن قوي ماحبوش بكره !
و احب اقولك : مبروك , كسبتي معانا بانيو بدورين ! ....... طبعا الكلام ده مش بيس خالص , لأن العاطفه متقلبه , و اللى بحبه النهارده ممكن قوي ماحبوش بكره !
لكن الحب السليم , فى الجسم السليـ ......أحم ! ...... اقصد ان الحب السليم اللى ممكن ينجح و ينتهي بجوازه محترمه ( من اللى بيكيدو العوازل ) هو اللى مبني على 4 محاور :
و اولهم طبعا العاطفه اللى لازم تكون موجوده على شان يكون فى حب اساسا
بعدين المحور العقلى , و هو اللى بيدينا اسباب مقنعه لـ"ليه بنحب السخص ده ؟ " , و ايه لزمته فى حياتي ؟ , و ليه هو مهم ؟
و وراهم المحور الاخلاقي الصرف , و هو اللى بيخليك ممكن تضحي بسعادتك على شان حبيبك , و تضحي علشانه بأي حاجه .... و كمان تقبل عيوبه و تكون جمبه فى مشاكله جمب افراحه
اما المحور الاخير , فهو اللى ممكن تروح منه ع كارفو و " تتبضع " من هناك :))
و احنا لسه اطفال , بيبقى نفسنا قوي نكبر على شان ننزل نلعب مع " الناس المتوسخين " اللى فى الشارع , و بعدين بيبقى نفسنا نكبر اكتر على شان نروح مع " الناس المستحميين " المدرسه , و بعدين يبقى نفسنا نخش الجامعه و بعدها الشغل و بعده الجواز و بعدين العيال و اخيرا بنيجي لمرحله , يا بيبقى نفسنا نموت فيها بقى و نتكل هوبا ياللا , او بيبقى نفسنا قوي نصغر و نرجع لأيام الناس المستحميين بتوع المدرسه .
و خلال كل ده , اكيد بنحب و بنتحب و بنخش و بنخرج من ريليشنز , و كتير مننا ما بيبقوش عارفين ازاي يعملو ريليشن قويه ممكن تستمر على طول و تنتهي الريليش بجواز و تبتدي ريليشن تانيه اقوى و امتن , و كمان كتير مننا ما بيبقوش عارفين ازاي يبعدو بالريليشن عن انها تتحول لمصاحبه و السلام .
و كالعاده , و حيث ان المذكرات شمعه بتحترق من اجل " ربيع " - و خلى بالك لا تتلسع - جبنالكو شوية حاجات لازم تخلو بالكو منها على شان تحافظو ع رليشنكو ...... كلو يبحلق و يركز معايا بقى كده ..... يا ماما !! مش قوي كده , ايه الرعب ده !!
اللى بيحب حد مش هايسمح ابدا انو اي حد يتكلم عليه اي كلمه , او حتى يشك فيه , و بالتالى مش هايبقى فيه مسك ايدين , ولا مسدجات حب و غرام , و التليفوانت اللى مالهاش لازمه , و عمال على بطال بعد نص الليل .... ده غير طبعا الوقفه و الخروجات لوحدهم
اللى بيحب حد اكيد مش هايحب انو يكون كداب او انو يتهزق كده ولا كده .... زي ما بتكون بتكلمك و بعدين مامتها تقول : بتكلمي مين يا بت ؟؟ ...... - يا ماما , دي امنيه صحبتي بتسأل ع الفستان الجديد !! . ...... , او تتصل بيك و موبايلك يرن , يقوم اخوك قايلك : عبد المتجلي بيتصل !
كمان اللى بيحب حد مش هايخنقه ... بمعنى , رايحه فين و جايه منين و كلمي ده و ده لأ , و ماتهزريش مع حد و اللبس ده آه و ده لأ ..... حد يقولى : امال ما اغيرش عليها يا مان ؟؟ ..... نرجع و نقول , ان الغيره بتقتل الحب , بتموته و بتدوس عليه بتريللا " بمبي مسخسخ " ... دي مش اسمها غيره اساسا , ده مجرد حب تملك , كأنك اشتريت كرسي بلاستيك من بتوع " صنع فى بنجلاديش " !!
الفكره هنا , انك لما حبيت الأنسان ده , حبيته زي ما هو , بجميع الملحقات و الكمليات ..... بتصرفاته و لبسه و صحابه و الناس اللى بيكلمها , يبقى ازاي اغير الحاجات اللى بتميزه عن غيره و خلتني احبه , فى الآخر هايقولك : يالا يا حبيبي , اورفوار .... و يروح لحد تاني مش " خنيق " !
و اخيرا اللى بيحب ده , المفروض انو يتشجع و يشتغل او يدرس اكتر و يخطط لمستقبله كويس ( مع معمار المرشدي , حياتك احلى :) ) , على شان يكون فعلا يستحقه و يقدر يكون معاه دايما فى اسرع وقت , مش ياخدها حجه و يسقط او يفشل فى حياته و يقولك : الحب يا معلم !!!
طبعا كتير مننا عارفين ان الحب بتاع المراهقه ده , غالبا بيبقى سد فراغ مش اكتر و بيبقى نوع من التجربه و يمكن ساعات اللعب , و بالتالى معظم حب المراهقه ما بيدومش و ما بيتحولش لريليشن بجد ....... طب فرضا بقى يعني كده .... ها ! فرضا يعني .... اني بحب واحده و احنا لسه فى المدرسه او الجامعه اعمل ايه ؟
ممكن طبعا - و ده الاحسن - انك تخلى مشاعرك جواك و تحاول انكو تبقو اصدقاء مقربين جدا و على اتصال على طول - و ده ما بقاش مستحيل بعد اختراع " كتاب الوش " - و لما تبقى جاهز , تصرح بمشاعرك و لو اتقبلت تخش حالا بالا حيو ابو الفصاد من الباب و يبقى ارتباط رسمي
او بقى , لو كنت خايف تخسرها , فممكن ساعتها تصرح بمشاعرك , بس هنا و اللى لازم يتعمل لو عايز تكمل للآخر , هو انك مجرد ما عرفت انها بتحبك و هي عرفت انك بتحبها , خلاص .... بترجعو صحاب تاني , بس قريبين من بعض قوي , من غير مسدجات ولا مكالمات ولا تركب جمبها فى دريم بارك , انتو مجرد بس بتحجزو بعض مش اكتر , و بتشجعو بعض على شان تكبرو مع بعض و تبقو حاجه كويسه , و ياريت لو محدش يعرف اساسا بالتصريح ده غير لو امكن الاهل و بس
و قبل ما البلوج يبقى " صفحات من مذكرات اسامه منير "
استنو البوست اللى جاي
و اللى عنوانه
استرجل !!
D=
|
تقريبا كل اللى الواحد كان بيتكلم معاك فيه هناك ف البوست اللى فات انت جايبة هنا :D
حـــــــلو اوى انك شابف الدنيا كده ,, ده اللى بقول عليه ان الواحد مستصعب انه يكونه ف الوقت الحالى انى اجمع ما بين ثبات ع قيم وف نفس الوقت عايشة حياتى صح
وبعدين انت كده رجعت الحمد لله اسامه منير راح لحالة ف البوست ده :D
مش اسامة منير اللى يقول الكلام ده لا :D
استرجل !! البوست الجاى للولاد بس ولا ايه :D
وحتى لو كده بقى مجيش المره الجاية الاقى ع باب البلوج ازايز بيريل :]
دوووووووومى :)
عجبنى تعريفك للحب جدا وازاى انت شايفه انه ممكن يكون مكسب للواحد مش خساره له زى ما ناس كتير بتتخيل انه بيعطل وبيضيع مستقبل البنى آدم صدقنى لو كلنا اتعاملنا مع الحب من المنطلق ده هتلاقى حاجات كتير اتغيرت للاحسن والافضل
goooooooooooooo aheeeeeeeeeeeeeeead Doooooooooooooomy ;)
Nicee Dommy,,,Bgd Anta Hail Hail Hail
و بـجد كل كلامـــك ده صـــح....
وعحبتنى قوى ( لما حبيت الأنسان ده , حبيته زي ما هو , بجميع الملحقات و الكمليات ..... بتصرفاته و لبسه و صحابه و الناس اللى بيكلمها , يبقى ازاي اغير الحاجات اللى بتميزه عن غيره و خلتني احبه )
وهوه ده الى مفــروض يــحصل فعلا...بس للأسف..لا حياه لمن تنادى..و 3/4 الى ف ريلشنز واخدينها بمـــنطق الانانيه :( :(
Bas a7iek Ya Adham.,w Post Foo2 el momtaz :)
ياااااه دة انا فاتنى كتييير اوووى
اتنين بوستز مرة واحدة :D
بجد بجد الكلام اللى فى البووست دة تحفففففة
و يا ريت الناس تفهم
تصدق بقى ان البنى ادمين دول غريبين اوووى
كله عااارف ان الحب اللى فى مرحلة المراهقة دة سد فرااغ زى ما قلت
ومع ذلك
اكتر فترة بنحب فيها هى فترة المراهقة :D :D
و كلامك بقى عن الغيرة و عن تعريف الحب
اتمنى انه يتفهم و نالاس تعرف
و يعرفوا الفرق بين الحب الحقيقى و حب الامتلاك
مستنية البووست اللى جاى :)
املللللللللللل
الحمد لله اني قدرت اجاوبلك
فى بوووسست كامل عن اللى انتي عايزاه
و الحمد لله ان اس اس روح بيتهم بالسلامه
هيهيهيهييي
و بعدين صدقيني
انتى ممكن تعيشي كويس قوي
و تتمسكي بقيمك برضو كويس
بس الشاطر اللى يوازن
و ما يبقاش محبكها و ما يبقاش بيس ع الآخر
زي ما قولت فى البوست
اما الوست اللى جاي
ده للولاد و البنات اكيد
ما عندناش عنصريه هنا
هاهاهاااا
بعدين ما تقلقيش
مافيش مكان لالبيريل هنا ابداااا
شاي و قهوه و شويبس جولد بس
لووول
......................
ربا
مرسي جدا فى الاول
و كالعاده موجوده و بتشجعي بذمه
:))
عايز اقولك
ان للأسف مش كل الناس هاتبص من المنطق ده
لأنه ساعتها يبقى مش هايحققو اللى عايزينه من اللى بيسموه حب
و برضو للأسف ناس كتير فاكره جملة
الحب بيقوي ما بيضعفش
جملة بتاعة اسامه منير و الافلام
مايعرفوش ان الحب الصح
هو فعلا اللى بيقوي ما بيضعفش
و بجد
مرسييييي يكوووز
:)
...................................
إسلاااااااااام
منووور
بقالك كتير مختفي عن هووون
عامة
مرسي على كلامك الجامد اكيد
و بعدين زي ما قولت
لا حياة لمن تاندي
لأن الاغلب واخدها لعب
او فاكر ان اللى بيحصل ده اسمو غيره
!!
و منور على طووول
..............................
سمررررررررررر
ولا يهمك
ما فاتكيش قوي يعني
بس على شان تعرفي اننا شغاااالين يونيفرسال
:))
و عايز اقولك
آه بنبقى عارفين
بس الاحساس بالحب ما بنتحكمش فيه
و انما بنتحكم فى اننا نظهره او لأ
و هنا الفرق بين الناس اللى فاهمه و الناس السطحيه اللى عايزه تعيش
و زي ما قولتي
يا رب الكل يفهم
و مرسي جدا جدا بجد ع الكومييينتس
:)