فى بيت من بيوت المحروسه , قعدت ام حنكش و ام رشا ( لا لا , دي مش بتاعة " المولتي " ) فى البلكونه يشربو الشاي و يقزقزولهم جوزين حمام بعد ما خلصو الغدا , و دار ما بينهم الحوار ده :
ام رشا : اسكتشييييييي , مش راشا بنتشي عقبال امنتك كده نزلت اشتغلت خلاص , بس اسم النبي حارسه جوزها , مش سايبها محتاجه حاجه , و ايده بأيدها فى الشقه
ام حنكش : يوه ! و دي تشيجي !! ..... الست مكانها بيتها تروقه و تلمعه و تخليه على سنجة عشره , و الراجل ينزل يشتغل و يتعب و يرجع آخر النهار يتقوتله بلقمه كده تسنده و بعدين يأيله شويه كدشه ........ برضك الراجل راجل و الست ست , ايون ياختشي امال ايه ؟!
طبعا و حتمن ولزمن , يكون فيه ناس موافقه قوي على اللى ام حنكش بتقوله , و ناس تانيه بتقول : ايه السته الجاهله دي ! , و شايفين جوز " راشا " بيعمل الصح ....... على العموم ( السمك بيعوم , عارفين برضو ! ) مش هانقدر نقول مين الصح و مين الغلط , لأننا مختلفين و ثقافاتنا مختلفه , فجوز رشا مش هايقلل من رجولته مساعدته فى البيت , ولا رشا هايقلل من انثوتها نزلولها من بيتها و شغلها .
الواحد مننا بيستمد معظم ثقافته - ده ان ما كانش كلها - من اهله اولا و من جهاز " التشي في " ثانيا , و بالتالى مفهومنا عن الرجوله و الانوثه بيبقى زي مفهوم اهلنا ( اللى مفهومهم زي مفهوم اهلهم ) و اللى بيقولنا عليه الأستاذ تليفزيون , و للأسف في شوية عائلات بيبقى مفهوم الرجوله و الانوثه عندها غلط خالص , ده غير طبعا الطريقه الرائعه و المذهله اللي بيقدمهالنا التلفزيون - اللى بنشوفه كلنا و بيتأثر بيه اغلبنا - على شان نبقى رجاله و بنات تمام , و بالتالى بيطلع اغلب المراهقين فاهمين الرجوله و الانوثه غلط .
بالنوسبه للأهل فيمكن شويه حلوين منهم بيشجعو سياسة العنف و نظرية : اللى يضربك اضربو ياض ! , و ان الراجل مكانه الطبيعي الشغل و بس و هو فى البيت " سي السيد " اللي كلامه و رأيه بيمشو من غير نقاش ولا تفاهم , و لما يحرك حواجبه الكل يجري من الرعب , و طبعا ما ننساش ان الشنب هو عنوان الرجال و من غيره يبقى نقرى الفاتحه على الرجوله اللى بتتقلب فى تربتها ......... اما البنت فمكانها الطبيعي البيت , تسيق و تغسل و تطبخ و تفلي العيال , و لازم تكون " امينه " اللى ما بتقولش غير " حاضر " وبس . و بالتالي بيطلع عندنا جيل من المراهقين العنيفين , و المراهقات اللى شايفين عن اقتناع - و عايزين غالبا - ان آخرتهم هايقعدو فى البيت و يتجوزو !
اما التلفزيون , فحدث " يا فرج " ( ما حادش يقولي مين فرج ده !! ) , و يمكن اكتر حاجه بتدينا نصايح مهمه جدا على شان نكون رجاله هي ...... عارفينها طبعا ..... اعلانات بيريل اللى بتخليك تسترجل .... اوعو يا بنات تشربوها , احسن لسه " فاتينات " شرباها و لحد دلوقتى بتحاول تعالج صوتها اللى تخن بطريقه غريبه جدا ! .... و زي ما الاعلان بيقولنا :
على شان نبقى رجاله لازم تكون عربياتنا ريحتها وحشه و مش نضيفه , و لازم نتكرع - سوري فى اللفظ ده و فى اللى جاي بعده كمان ! - فى اى وقت و اى مكان و بصوت عالى لو امكن ... لأن ده بيساعد على الهضم و بيريح المعده , بس نخلى بالنا لأن البنات ماينفعش تعمل كده لأن ده للرجاله و بس , و على شان تكون راجل اوعى تعلق على شخصية حد و تقول انها حلوه و كويسه , و كمان لازم تكون زي الروبوت ما بتعيطش غير لما تشوف الكوره , و طبعا و انت بتشوف الكوره , بيريل هاتطلع الراجل اللى جواك و بدل ما تعيط هـ " تنعر " زي حيوان " الاسد " و مش هاتعيط اكيد !
على شان نبقى رجاله لازم نبقى اندال و نضرب صحابنا لو لاقيناهم بيتخانقو مع ناس كتير , و مافيش مشاكل لو ما اهتميناش بصحتنا و بوزننا , لأن الكرش ما يعيبش الراجل ( جيبه و بس ! ) .... و اما اختراع الفورشه , ف مالوش لازمه لو شعرك وحش لأنك هاتبقى شايله , و الكوستر كمان مالوش لازمه لأن الازايز بتتحط فى اي حته ...... اما الافراح , فدي حاجه رخمه و الراجل بيقعد مكشر فى اى فرح لأن مافيش فرح جبار ... و لازم تحط الانكل على الركبه و رجلك تبقى فى وش اللى جمبك ... و فى الاخر نفكركو بأن كل اللى اسمهم حسام رجاله , و ان الورد عيب الراجل يمسكه !
اما البنات , فلازم تكون عارفه 100 الف ولد , و بيكلموها و بتكلمهم فى اي وقت , و طبعا لازم يكون عندها بروفايل ع الفايس و هدومها ع الموضه ( اى كان نوعها ) , و يا سلام بقى لو عندها بنطلونين رش من اللى بيتباعو فى ازايز سبراي ( اصلهم من كتر ما هما ضيقين بيترشو ما بيتلبسوش ! ) , و اربع خمس بلوزات عليهم الأرنب اللطشيف ابو بابيونه , و يا سلام لو بقى شنطه و جازمه عليهم اسم الماركه بتاعتهم بالـ " بربرق " على شان كل الناس تعرف انها غنيه و بتجيب ماركات ( زي ماركة كويك " سرفر " المشهوره ) ... و بكده تكون بنت ستايل و متحرره عايش القرن الواحد و العشرين كما يجب !
زي ما الحكيم قال : العقل زينه فى الفترينه ( او البترينه , زي ما بيقولو ! ) , لو فكرنا شويه هنلاقي ان الكلام ده مش صح خالص و مالوش اى علاقه بالرجوله ولا بالأنوثه , و ان كل اللى فوق ده معناه ان الراجل المفروض يكون حيوان , دوشمه ( يعني صخره كبيره للي ثقافتهم فنزوللي ) , و كمان روبوت او آله بتضرب الاول و بعدين تفكر ( و يمكن ما تفكرش اساسا ) و قا موسها مافيهوش تفاهم او نقاش . و كمان الكلام ده معناه البنت يا اما تكون مالهاش شخصيه , او من مشجعي العوده للطبيعه و الأنسان البدائي اللى كان بيلبس ورقتين توت على ودانه و بس !!
الراجل يا جماعه انسان , كائن حي , بيحس و عنده مشاعر و احاسيس , من حقه يتألم , يحزن , يفرح ... و اكيد من حقه انو يعبر عن المشاعر دي سواء انو يقول : آه , او يعيط , او يقوم و يطنطط مثلا , ولكن حيث انو راجل فلازم تكون التعبيرات دي بالطريقه المناسبه لكونه " الجنس الخشن " , يعني آه عن آه تفرق .... لكن انو ما يعبرش عن مشاعره و يفقد اللى بيميزه كأنسان , اكيد لأ
و زي ماهو بيحس , برضو بيفكر و عندو مخ مش " شندوتش " كبده ! , يعني لما الاقي واحد عملاق بيتخانق مع صاحبي , اكيد ما ينفعش اروح و اضرب صاحبي , و برضو ما ينفعش اروح اضرب معاه .... لأني لو فكرت لثانيه , هايبقى من الاسهل اني اروح اشد صاحبي و اعرف ايه سبب المشكله و ارضيهم هما الاتنين , بدل ما اروح و العملاق يقعد فوقي يموتني ...... لازم العقل يكون الأول , افكر و الضرب ده فى الآخر لو مافيش حل تاني , و اوعى تفتكر انك بكده ماتكونش راجل , بالعكس ده كده انت راجل و تلت اربع , لأن بكده عمر ما شكلك هايبقى وحش فى اى حته ولا قدام اي حد و انت بتدضرب ولا بتتهزق !
لما قالو : الرجوله أدب , مش هز كتاف , ضحكنا ! ..... و ما نعرفش ان الجمله دي صح جدا .....الراجل لازم يكون محترم , لسانه نضيف و ما بيشتمش , الراجل منظم و نضيف في بيته , في عربيته و فى نفسه .... الراجل شكله كويس و شعره متسرح بشكل مناسب لوشه , الراجل بيحافظ على جسمه و حتى على بشرته و ضوافره , ف مش على شان هو راجل , يبقى جسمه مش متناسق , او ضوافره مش مقصوصه و رجليه " مقشفه " و يقولك : اصل شكل الراجل مش مهم !! .... صدقني , الشكل مهم زي الشخصيه بالظبط ,لأنك لما تتجوز , هاتبقى اول واحد مراتك تشوفه الصبح و اخر واحد تشوفه بليل .
طب يا واد يا تين على شان ابقى راجل , يبقى ماليش كلمه فى البيت ؟
اكيد لأ , المفروض و الطبيعي ان كلمتك و رأيك هما اللى يمشو , لكن بعد مشوره و تفاهم و اخدان رأي اللي حواليك , و بعد كده اللى شايفه الاصح اعمله .... الحياه مشوره , مش عافيه و خلاص لأنك الراجل و المتحكم , و ساعتها ... هتلاقي اغلب قراراتك صح و ميه الميه ( زي فول الجمعيه :) ) , اما الافراح و المناسبات فهي دايما اوقات كويسه جدا للضحك و الهزار , و المجاملات على شخصيات الناس و لبسهم بتبقى هايله , لأنك ساعتها بتبقى راجل زووووق و جنتلمان ( او كولمان , بيس يعني ! ) ....
اما الورد , فده نبته عاديه اي حد ممكن يشيلها و يمشي بيها فى اى مكان من غير كسوف ( يعني لما بتشيل " لبشة " قصب بتتكسف ؟! ) , و الدباديب لو اشتريتها لحد فدي برضو حاجه عاديه لأنها مجرد لعبه و الطبيعي ان الناس هاييجي في بالها انك جايبها لحماده الصغير ! , و زي ما انت جينتل و بتجامل الناس , اكيد هايبقى مش كويس ابدا انك تحط الانكل على الركبه و تبقى رجلك فى وشهم , الاحسن انك تحط رجل على رجل عادي ( لو لازم يعني ) , من غير بقى ما تمسكهم بأيديك ( زي ما يكونو هايقجرو لوحده ! ) او كده .
و اخيرا لازم نعرف ان الاسامي و الألقاب عمرها ما بتعمل بني آدمين و احترام , لأنو ياما في ناس فشله اسمهم عتريس و حمزه و صلاح , و فى دكاتره محترمين اسمهم شيرين و امل ( امل على فكره صفه مذكره اساسا ) , و مهندسين جامدين اسمهم لؤي و تامر و ورد ( برضو الورد جمع مذكر ) , ده غير ان اساسا ما حدش فينا بيختار اسمه , و انما بنتزحلق ع الدنيا نلاقي اسامينا جاهزه ! , و مافيش مانع كمان لو رقصت .... لا لا , مش شرقي طبعا , اقصد فالس , تكنو , هيب هوب .... كلها فنون راقيه , ناس قليله بتعملها , و ناس اقل اللى بتقدرها . وعلى رأي الشاعره : الرجوله قلب و مواقف , و لزمن تبقى عارف !
اما البنت , فمن حقك اكيد انك يبقى ليكي رأي و " سخصيه " مستقله , و من حقك انك تشتغلي و يبقى ليكي طموح , طول ما الحاجات دي مش هاتأثر على افعالك و تصرفاتك اللى المفروض انها رقيقه و محترمه ليها حدودها و بتحافظي عليها مع اي كان , مافيش مانع انها تكلم ولاد , و كمان تكلمهم ع الفون , بس برضو لكل حاجه وقتها و حدودها فى الهزار و الكلام و كله كله .......... كمان من حقك تلبسي اللى انتي عايزاه طول ما هو مناسب ليكي و لشكلك و لثقافة المكان اللى انتي عايشه فيه , طول ماهو مش بيخليكي زي اللى حاطين يافطه كبيره بتنور على راسهم بتقول : بصو عليا و على جمال رجليا ! , و نرجع فى الاخر نقول نسبة المعاكسات زادت ليه !!! .... و برضو لازم نكون فاهمين ان التحرر اللى باللبس و الشكل ده حاجه مش دايمه , انما تحرر الفكر و تفتحه حاجه كويسه جدا ( أد ايه جميله :) ) بس برضو طول ما التحرر ده فى حدوده الطبيعيه و العاديه
رغينا كتير
صح ؟؟
و يمكن البوست يكون ممل اساسا
بس كان لازم نوضح الكلام ده
صح ؟؟
و على شان كده يبقى كفايه لحد هنا بقى
صح ؟؟
و نقول استنونا
مع البوست الصغنون اللى وعدناكو بيه
فى البوست اللى فات
و
فتكم بعافيه
D=
اولا الرغى الكتير مش وحش ولا ممل طالما فى حاجات مفيده
ثانيا البوست بيناقش موضوع حلوو اووى ومهم كمان
انا مكنتش شوفت اعلانات بيريل اول ما اتذاعت واللى وريتهالى واحده صاحبتى وساعتها سالت نفسى سؤال لو ده معنى الرجوله اللى بيزرعوه فى اولادنا وشبابنا من دلووقتى رجاله مصر كمان 20 سنه هيبقوا عاملين ازاى صدقنى انا بمجرد ما سرحت لثانيتين فى السؤال ده والاعلان ده لقيت نتيجه مخيفه وبشعه ومتمنهاش لاى حد ابدآ
وكنت عايزه اعرف مين الشاعره اللى على رايها : الرجوله قلب و مواقف , و لزمن تبقى عارف !:D:D:DD:D
استمررررررررررر ربنا معااااااااك ومستنيه البوست اللى جاااااااااااى :)
حط الانكل ع الركبة تبقى اجمد من دروجبة :D
وبعدين يا ادهم انت كرهتنى ف اسمى خلاص ( صفة لمذكر ) هما اللى سمونى كده اعمل ايه بقى يعنى :D
اخليه ( أمله ) ويبقى مؤنث ؟؟ بس كده قلب ع حاجة تانية خالص :D
بوست جامد كالعاده يا أدهم والفكرة كلها زى درك ف البوست اللى فات فكرة توازن برده ,, ونأمل( مش الصفه اللى للمذكر) ان احنا نوصلها
بجد البوست جااامد جدا جدا
و فعلا عندك حق ف كل كلمه قولتها
و اهى اعلانات بريل هى اللى هتودينا ف داهيه فعلا
هو انا اه مش عايشه ف مصر بس عايزه اقولك ان شباب مصر بحالهم ده احسن من نااس كتير انا بشوف شباب استايل لبسهم قريب من ستايل البنات و دى موضه ماشيه ف البلد كلها ليك انت تتخيل هما هيبقوا عاملين ازاى
و البوست مش ممل ولا حاجة بالعكس ده مهم اووى اووى
انا يمكن بقالى كتير مش برد بس بقرأ البوستات اول باول و بجد كلها جامده جدا و ليها هدف
بس عايزه اقولك استمر و بجد انت اسلوبك ف الكتابه حلو اووى
Keep it up :)
جــــــامد جــــدااا يا ادهم
وزي عوايدك " فـوف الممـتـاز " :)
وبجد يا ادهم انا نــفسي تطبع البـــوست فــ ورقــه كبـــيــــــره وتعلقـــها عندنا فـ حوش المدرسه :) وف كل فصل :)
اصــل المشــكله يا ادهم ان 3/4 الناس الى بتقري البوست ده عارفين معنى كلامك كويس وبينــفذوه لوحدهم...لكن الفئه الى انت بتتكلم عنهاا ديه قليل قوي لما تنتبه لحاجه زى كده :))
وعلى فكــره الثانويه العامشه عاملها معاك شغلها..وبالذات "علم النفس":)
زي
"الواحد مننا بيستمد معظم ثقافته - ده ان ما كانش كلها - من اهله اولا و من جهاز " التشي في ""
لووووووووووووول عجبتنى قووىىىى...حسيت انى قاعد مع م.محمد السيد ف حصه عـلم نفس P:P:P:
Nice Ya Adham,,,,Go On ((^_^))
to7fa kal3ada ya adham w bgd klamk kolo s7 fe nas kter awi fahmen elrogola w elaonosa 3`lt w aked b3d kda hen2lo elfakra el3`lt de l wladhom
ربا
مرسي على كلامك بجد
و بعدين لو فكرنا كده
هما جنود 76 كانو بيشربو بيريل
و يا ترى الرجوله متوقفه على الشرب ؟؟
حاجه غريبه فعلا
و اكيد النتيجه مخيفه زي ما قولتى
سواء من بيريل او غيرها من اللى بنشوفه
عامة
ربنا يسترررررررررر
:)
.........................
امل
سوريييييييي بجد ولله
ما جاش فى بالي خالص و انا بكتب فعلا
بس عامة ولا يهمك يعني
المهم السخصيه برضو
هيهيهيهييي
و انا أأمل معاكي اننا نوصلها
:)
...........................
دندشه
اولا
منوره بعد غيبه كومينتاتك الطويله
و مرسي جدا على متابعتك
دي حاجه اتشرف بيها بجد
المهم
عايز اقولك
ان موضوع اللبس ده بقى فى كل مكان
و تقريبا الفوارق اللى بين لبس الولاد و البنات قربت تتلغي
و هايبقى قسم واحد لكل الناس تشتري منه
!!
بنقلد تقليد اعمى و خلاص
على شان نبقى فانكي و روشين و ع الموضه
و صدقيني , انا متصور قوييييييي
بس عامة
شكرا جدا على كلامك
و تشجيعك القوي
و خليكي متااابعه
:)
........................
اسلام
تسلم يا باشا على كلامك
و عايز اقولك
اطبع ده لمين و ليه ؟
تفتكر فى حد هايقرى ؟؟
اللى هايقرى هو اللى اساسا ملتزم
!!
و فعلا فعلا
انا بحب علم النفس
بس صدقني
دي معلومات عامه يعني اي حد عارفها
مش ضروري يكون دارس
و مرسي بكوووز يا خويا
:)
............................
رشا
مرسي ليكي بجد
و البلوج منور بالكومينت بتاعك بجد
و فعلا معاكي حق
الغلط هايفضل يتنقل من جيل لجيل و احنا مش حاسين
لحد ما نلاقي الغلط بقى اكتر من الصح
و عامة
اعتقد اننا لازم نبتدي بنفسنا و بعدين باللي حولينا بالتدريج
و نقول رأينا بصراحه و من غير ما نخاف
مين عالم مين ممكن يقتنع بيه ؟ صح ؟؟
و شكرا جدا بجد
:)
يا سلاااااااااااام بقى لو البووست دة يتحط كدة فى واحدة من اليفط الكتيير اللى عالمحوور دى
بجد فيه كلااام المفروووض يتعرف او يتفهم لأن الناس عارفاه و مستهبلين فيها
انا فعلا اول ما شفت اعلانات بريل دى مفهوومى عن الرجالة بقى زى ما انت قلت حيوان و الة بتضرب الاول و بعدين تفكر
دة غير حالة القرف اللى بيسببها
لسة مفيش ناس كتير فهمت ان الرجولة او الانوثة مش بتظهر من برة بالعكس هى اساها بتظهر من تصرفاتنا اللى من جوانا :)
و طبعا بووووست مهم جدااااااااا و مفيد جداااا و حلو جداااااا :)