الأنتيم ...... كلمه سمعناها كتير , و في مننا اللى قدر يلاقيها فى الحقيقه , و في مننا اللى لسه ..... فيه اللى بيدور , و فيه اللى فقد الامل خلاص ... فيه اللى شايف ان الانتيم لازم يكون من نفس النوع , و في اللى شايف انو لأ ..... و اللى شايف ان مافيش حاجه اسمها انتيم اساسا , و اللى شايف انو موجود فى كل مكان ....
الانتيم , هو شخص عدى مرحلة الزماله , و الصداقه , و الصحوبيه ( لا , الصحوبيه اللى كده , مش اللى كده ! ) , و يمكن ساعات الاخوه كمان , هو حد بيبقى فاهمك لدرجه كبيره قوي , عارف عنك كل حاجه , و معاه اسرارك كلها , لما بتزعل بتشكيله , و لما بتفرح بيكون جمبك
اللى فوق ده , هو تعريف الانتيم من المجلد زي ما بيقولو ( آه المجلد , احنا برضو مش اي اي ولا زي زي ) , و طبعا كلنا عارفين الكلام ده و كلنا موافقين عليه ( زي ما كلنا بنتفق فى اي مشكله كده ) , لكن اللى بنختلف عليه هو : يا ترى ... يا هل ترى , فى انتيم ولد و بنت ؟؟
سامع ناس بتهز راسها و بتقول : ايون يا تين , و واحده ورا بتصرخ و بتقول : لأاااااااا ! ....... يمكن سمعنا ناس كتير - و ساعات متخصصين - بيقولو : لأ - زي البنت اللى بتصرخ دي - , و ما فهمناش ليه ؟؟ ايه المشكله ؟؟ و فيها ايه يعني !؟ ... و كانت الاجابه ببساطه : ان دول ناس متخلفه , لسه عايشين فى الالفيه الاربعين قبل الميلاد !
على شان نكون صريحين معاكو , و بأمانه شديده و مطلقه ... ان ان ان ااااااان , تش ( بتاع الموسيقى التصويريه رجع م الحجاز عقبالكو كده ) ..... الناس دي صح و لأسباب كتير هانقولكو اهما ( او اللى انا فاكرهم يعني ) , لكن نحب نقول الاول ان اكيد فى صداقه بين ولد و بنت , لكن للأسف و مع الندم بتوصل لحد معين و بتقف و ان عدت مرحلة الصداقه و بقت " انتمه " , بتاخد مخالفه و بيكهربوها تلت ايام و ربع !
يا ترى ليه يا واد يا تين ؟؟
بين الولد و البنت ما بيتحققش المفهوم الكامل للصداقه القويه ( المشهوره فى الاوساط الشبابيه بالصداقه الصدوقه ) , فصاحبي لازم وقت ما احتاجه يكون جمبي , فى اي وقت ..... و بالتلى لو حصلتلي مشكله خطشيره الساعه 4 الفجر مثلا تفتكرو ممكن الاقي انتيمتي جمبي ؟؟ , اكيد لأ .... و انا اكيد مش هاينفع اكون جمبها لو هي اللى عندها المشكله .
فى حاجات الولد مش هاينفع يحكيها للبنت , ولا البنت هاتنفع تحكيها للولد , زي مثلا حاجات ليها علاقه بالصحه و الميك اب و الحاجات اللى هي بيبقى محطوط عليا ستيكر ( فى ناس بيقولو عليا " الاستشيكر " برضو يعني ) كبييييير : بويز اونلي او جيرلّز اونلي .
و بفرض ان الصداقه دي فضلت مستمره على طول , اكيد هاييجي على البنت يوم و تتخطب و تتجوز , و ساعتها اكيد يا اما الصداقه يا اما الجوازه ( و لو جت الجوازه , الصاحب مالوش عازه ! ) ......و نفس الحاله مع الولد برضو , لأننا عايشين فى مجتمع شرقي , ليه تقاليد و اصول ( اللى عم زاهي بيلاقي منهم حاجات مدفونه فى الارض ساعات )
و نيجي بقى لأهم نقطه , ان غالبا , الصداقه القويه دي بين الولد و البنت -اللى بتخليهم عارفين كل حاجه عن بعض - بتتقلب فى الاغلب لحب يا اما من الطرفين و هنا مفيش مشاكل , يا اما من طرف واحد , و هنا بتنتهي الصداقه , لأن لو مثلا الولد هو اللى بيحب البنت و البنت مش بتحبه , و هاييجي يقولها , مش هاتوافق ..... و مع الوقت , هاتحس انو تعامله معاها تعامل حبيب لحبيبته , و بالتالى هاتبقى مضايقه و هاتبعد واحده واحده و تنتهي الصداقه نهايه مش الطشيفه نوهائيا
طب يا واد ياتين , يعني مافيش امل ؟؟
طب يا واد ياتين , يعني مافيش امل ؟؟
غالبا لأ , بس ده ما يمنعش ان في ساعات انتيم ولد و بنت , و بيفضلو انتيم على طول و يمكن لحد ما يموتو و يتحللو كمان , بس دي بتبقى حالات نادره كده .... نقدر يعني نسميها فلتات
و لحد هنا , بنكون قفلنا آخر صفحه فى موضوع الصداقه و الحب , و لكن قبل ما نقفل ( اوعى لا نقفل على صباعك ) , عايزين نفهمكو ان الصداقه مش حد يقولك اسراره و تقولة اسرارك , موضوع الاسرار ده اساسا غلط , و مش المفروض ان صاحبك الانتيم يعرف عنك كل حاجه , ولا يعرف ضعفك فين , لانك مش عارف الظروف ... الناس بطبيعتهم متقلبين و متغيرين , يعني ممكن فى يوم من الايام اسرارك دي تستعمل ضدك ... سلاح ذو تلت حدود ( اصلو صيني ! ) , الصداقه اكبر من الاسرار بكتشييير
الوحيدين اللى ممكن تأتمنهم على سر هما ....
ولا اقول ....
خلوها فى بوست آآآآخر
D=
|
اقنعتنى يا ادهم ولا انى مش مقتنع ^_^ (افهمها براحتك بقى :P )
بص يا ادهم..الصداقه الحقيقه بتمتد معــانا ان شاء الله لحد اخر العمر..ده ان ماحصلش لا قدر الله خناقات كبـيره تبوظ الموضوع...و بص حواليـــك كده ودور مامتك وباباك مثلا..ليهم اصحــاب من ايام ما هما كانوا فى الكامعه :)..بيكلموا بعض متواصل وبيشوفوا بعض على الاقل يوم او يومين عالاسبـوع :)
اسرارهم مع بعض وبرضو بيكونوا مــتجوزين.. وكلوا متــعرف على كله...عشان ساعتها ماحدش هيبص على حد لأن كله عنده بيته وعيــاله
و ميــن اصلا الى لو احتاجته 4 الفجـر هايجيلي ؟؟ ((^_^)) كلهم هايقولوا سواء ولاد او بنات
"انت مجـــــنووون ولا ايــــــــه" xD
- انا عـــرفـــت مين الوحيدين اللى ممكن تأتمنهم على سر :) " بـ،ـ،ـ،ــاباك و مـ،ـ،ـ،ــامتك :P
ههيهيهيهيهي حرقتهالك xD :P
Nice Post ya adhaam :D
للأسف الشديد اللى قلته كله صح
بناءآ على خبره طويله عريضه وسنين كتير عشتها مع اصحاب ولاد وبنات وكان عندى انتيم من الاولاد فعلا الموضوع بيتقلب 360 درجه وبنخسر بعض للابد
مستنيه البوست اللى جاى متتاخرش عليا :)
كلامك صح جدا
بجد البوست جامد جدا
بس بردوا انا شايفه ان ممكن يكون فى اتنين صحاب ولد و بنت عشان اصلا البنات دلوقتى مش يتصاحبوا خالص
مستنيه البوست الجديد مش تتأخر علينا بقى
اسلام
يا هلا بيك دايما يا حج
زي ما انت عرفت وجهة نظري
ان اللى بتقول عليه ده ما بيحصلش
غير فى حالات نادره جدا جدا
زي لما يكون الزوج و الزوجه صحاب من الجامعه وليهم شله معينه من ايام الجامعه لسه بيكلموهم
و برضو بتبقى العلاقه بين الزوجه و صديقها من ايام الجامعه مش صداقه اوي و تليفونات بقى و كده يعني
بتبقى مجرد زماله
لأننا فى مجتمع شرقي , انت فى مصر :))
و كمان
في صحاب ممكن يبقو عندك الساعه 6 الصبح لو احتجتهم ولله
دي الصداقه الحقيقيه النادره
و مااااشي على الحرقه الجميله دي
لوووول
:))
.......................
ربا
مرسي على كلامك بجد
و معلش بقى
هو ده الواقع الاليم
!!
.......................
ايوشه
مرسي يا ايوشه
و الحمد لله ان الكلام عجبك
و خليكي متابعه معانا بقى
:)
..............
دندشه
الف شكره يا دندشه
هو صحيح الناس ما بقتش زي الاول
بس , الصحاب اللى من نفس النوع اللى بجد
موجودين بس نادرين
و يا بخت اللى يلاقيهم
:)