و اخيرااااااا , و بعد عدة خناقات حلزونيه و لولبيه مع الكتب و المراقبين و الامتحانات ........ اقدر اقول ان معظمنا خلص امتحاناته على خير و خد الأجازه . ما علينا بقى من ان اللى لسا بيمتحنو مقهورين , و مخنوقين من الحر و الامتحانات و الدنيا كلها ..... مع مجموعة من محاولات الانتحار البسيطه ( مليجي حاول ينتحر بقلم رصاص , بس المحاوله فشلت لأنه نسي يبري القلم )
اللى عدت من غير اصابات و
الحمد لله .
مممممم ...... الأجازه , كلمه جميله من اربـ..... ست ..... خمـ..... , ما علينا ! , هي كلمه جميله من مجموعة حروف مختلفه و خلاص . الأجازه جت و الصيف جه , و الشورتات و الكاتات ( جمع كت يعني للي ثقافتهم كلاكاتي ) و مجموعة نضارات الشمس المختلفه , اللى بتتلبس فى اي وقت و كل مكان ( حتى و انتو نايمين ) ..... و معاهم اكيد الكاسيت و الكمبيوتر و الأم بي ثريهات او حتى الراديوهات ام زمبلك دي , المهم انو كله شغال بأعلى صوت على اغاني الصيف القويه الجديده , تموره و عموره , و هيفا و نانسي و اليسيه ...... صحيح فى حالات طرش كتير حصلت ( انا اصنجيت يا رداله ! ) , و كلنا مش سامعين . بس مافيش مشاكل يعني , كل الناس فى الافلام الاجنبي بتعمل كده فى الصيف , اشمعنا احنا يعني .
الأجازه مفهومها بيختلف من واحد للتاني , و من وقت لل
تاني . يعني مثلا اصدقاءنا من جمعية " ضحايا الثانويه العامه " , خدو البكلوريا و الحياه بقت تركوازي قدامهم ( البمبي موضة الصيف اللى فات ! ) , و الناس اللى خلصت الجامعه , خدو الديبلون و ابتدت رحلة البنات فى البحث عن شغل او عريس او عن اى حاجه ياكلوها , و ابتدت رحلة الولاد مع دخول الجيش او الهرب منه, او مشاركة البنانيت فى البحث عن وظيفه .و الناس اللى شغاله , كده كده أجازتها خميس و جمعه , ف مش فارقه معاهم ..... و الناس العطلانه , اهي حياتهم كلها اجازه مفتوحة المده ! . ناس شايفه الأجازه بحر , و ناس شايفاها لعب , و ناس شايفاها فسح و خروجات ..... و ناس شايفها غيبوبه دائمه لحد ما تخلص !
الأجازه يعني بحر , و دقو الشماسي ع البلاج ( او الترعه , مفيش مشاكل ) دقو الشماسي . صحيح كلنا دقينا الشماسي , و صحيح حصل شوية اصابات بسيطه ( 4 حالات شلل كلي و 2 نصفي و 6 بيكشفو عليهم لسه ... بس ! ) من دق الشماسي من غير ما نبص بندقها فين ..... إلا ان مافيش احلى من البحر و البلبطه فى الميه . ما علينا ان الميه ساعات بتبقى مليانه طحالب و حاجات غريبه تانيه , و ساعات بتبقى مليانه قناديل و طول ما انت قاعد تسمع سيمفونية صويت و تأوهات الناس " المستمتعه " فى الميه , إلا ان الكل بيبلبط و بيعوم , و البحر على طول زحمه , حتى لو فارشين الملايه السوده ! ( اصل الرايه السوده طلعت صغيره و ماحدش بيشوفها ) .
و البحر , يعني المايوه الجديد ( ايّا كان عدد قطعه ) , و الجاروف و الجردل اللميّع , و عوامه كاوتش مدوره او مربعه , على شكل بطه او حمار .... المهم انها بتخليك تقب ع الوش و خلاص ! . البحر مش ميه و بس البحر كمان رمله بتزغزغ فى الرجلين , و تلاقي الواحد قاعد يضحك لوحده بصوت عالى , و الناس تفتكره اهبل على آخر اليوم . الرمله يعني حفر الناس تقع فيها , او تدّفن فيها ( فتكات دفنت حماتها المصيف اللى فات و مش لاقياها لحد دلوقتي ! ) او اشكال و تماثيل جامده ع الرمله للناس الفانانه او المش فنانه ........ اهو كله بيفن و بيطلع الطاقات المكبوته طول السنه ! . الرمله يعني فرسكا فرسكا ( باللحمه المفرومه , طعم الصيف الجديد ) , و ريحة البحر الغريبه اللى تحس انك عايز تاخد نفس كبير جدا لحد ما رئتينك يتفنّجرو و يغرقو اللى حواليك !!
الأجازه لعب .... لعب كوره , لعب بالكلام , لعب بالناس .... كل واحد و شطارته و امكنياه فى الملعب بقى . و زي ما قال الأستاذ عبده الحمولي : ضحك و لعب و جد و شُب ( يقصد شب " عسير " يعني ) .... فحتمن ولازمن ان الأجازه نضحك فيها لحد ما نتخنق ( و نموت قبل ما نلحق نعيش الأجازه ! ) , و نلعب و نتكلم فى شوية حاجات جد كده , يعني هنسافر المصيف فين , و رمضان فى انهو خيمه السنادي و المسلسلات . و اكيد نشرب شُبّات عصير لحد ما يطلع العصير من ودنّا ! . ده غير طبعا السهر لحد الفجر و بعد الفجر بيجي ست سبع تمن ساعات كده , رغي و شات بقى , و شوية افلام ع الكمبيوتر , على كام حلقه من العشق الممنوع فايتينك فتتفرج عليهم ..... كل الناس بتسهر لحد ما عينيها بتبظ منها مع شوية هالات سوده بسيطه , و بيبقى الواحد على آخر الأجازه شبه الباندا ! ( و قال بيقولك الباندا بتنقرض !! ) .
مع الأجازه و الصيف بيجي طبعا ضيف لطشيف و خفيف و ظريف ..... حيوان الهاموش . الهاموش من الكائنات المستفزه الخنيقه اللى بتخش فى كل حته و كل مكان , و تبتدي تجيبلك حالة هرش و جرب فظيعه جدا , و يمكن ساعات تبقى جايب حاجه هاتموت و تاكلها او تشربها , و تلاقي كام هاموشه بيعومو فى الكبايه و بيطلعولك لسانهم ! . ما علينا من الرش و الكريمات و كل طرق المكافحه القويه , إلا ان فى اوبشم جديد نازل السنادي .... الضفاضع , حل فعال ضد الهاموش .... بس يمكن تحتاج انك ترفعها فوق شويه .
ده غير طبعا الحراره الشنيعه و المريعه , اللى اغلبنا بيشغل التكيف ( فى بلاد بره بيقولو عليه آير كومبينيشان على فكره ! ) و يغمى عليه لحد بليل ..... و فى اللى بيقضيها بسين و بحر . او ممكن طبعا شوية حلول بقى من المبتكره و الذكيه , زي انك تفتح التلاجه و تقف قدامها و تحط دماغك فى الفريزر . ده غير ان التلج برضو بيعمل شغل على فكره لما تحطه جوه هدومك ,بس العلماء بيدورو على حل لمشكلة الميه اللى بتغرق الدنيا . او ممكن برضو تحط التلج فى هدوم حد تاني و تتفرج عليه و هو بيتنطط - غالبا زي القرد - على شان يشيلها ! , و اهو تنسى الحر و انت بتضحك ع الناس .
الاجازه بتيجي بعد فتره غالبا من الكبت و القهر , حيث انك تلاقي كل القنوات فجأه قررت انها تجيب كل الأفلام الجامده و الجديده اول ما تقعد ع المكتب و تقول يا هادي ! . كأنها عامله تحالف ضد الناس اللى بتمتحن , و تلاقي الحفلات و الافلام فى السينما و الدوري و الكاس و الماتشات المحليه و اللى مش محليه , و كل الخروجات الجامده و الخطط و حاجات اللى انت عايزها او كنت عايزها تحصل بتحصل او متوقفه على انك تخلص على شان تحصل !! . و اول ما تمسك الكتاب تلاقي فجأه حاله من الجفاف الرهيب و تحس انك عايز وصله من الحنفيه جمبك ! , ده غير طبعا كل شويه زيارات للحمام , و ماتفهمش ليه ! . و اول ما تيجي الأجازه , الافلام تكون خلصت , و التلفزيون يبقى شليل و عليل , و كل الناس فجأه تلاقيها اتكسّحت و مش قادره تنزل ..... و الخطط الخمسيه و العشريه كلها بتنفجر فى وشك و ولا حاجه بتتحقق , و كل تفكيرك و تخطيطاتك للأجازه بتتغير على حين غره !!
الأجازه كمان يعن كورسات و حاجات مفيده , كله ما بيصدق يخلص و تلاقيه طار ع الكورسات , صيني و ياباني و انجليزي , ICDL و شبكات و جرافيكس ..... مع شوية كورسات ترفيهيه بقى من بتوع الرسم و الموسيقى و التريكو , و كورس الطبخ مع الشيف شربيني , و فى النهايه , مستشفى ابو الريش مليانه حالات تسمم و إغماءات خطشيره !! . اهو مافيش برضك مانع من التغيير و عمايل الحاجات اللى كانت متأخره طول السنه ...... غير شكل اوضتك , ادهن الحيطه , اعمل نيو لوك لنفسك او لأي حاجه , روح هنا او هناك .... مافيش مشاكل يعني طول ما انت بس مش قاعد فى البيت زهقان و عمال تنفخ و تروح و تيجي زي الوطواط !
و أخيرا الأجازه يعني حبة ذكريات حلوين ..... مصيف و خطوبه و فرحين , موقف و عيد ميلاد , خناقه تاخدلك فيها بوكسين . اهي كلها حاجات بنفتكرها ( و بنحسها ساعات ) سواء بصوره او كومينت ع الفايس او حتى مجرد اننا بنبقى احنا بس اللى فاكرينها فى قلوبنا .
صحيح , على سيرة أعياد الميلاد
فى عيد ميلاد كده خير اللهم اجعله خير فات و عدى
ولا حد هدّى و قال كل سنه و انتو طيبين
عيد ميلاد مين ؟!!
لا لا , ده لينا فيه
بوووووووست آآآآآآآخر
D=
|
حمد لله عالسلااااامة :)
عودة قوية و البوست حلو اوى
بس هو موضوع الضفادع دة بجد ولا بتهزر ؟؟ :D
وصل بينا اليأس لدرجة الضفادع !! xD
احساس أصيل بالاجازة من واحد شكله كان متبهدل فى الدراسة...زينا كلنا....
"الاجازه بتيجي بعد فتره غالبا من الكبت و القهر , حيث انك تلاقي كل القنوات فجأه قررت انها تجيب كل الأفلام الجامده و الجديده اول ما تقعد ع المكتب و تقول يا هادي ! . كأنها عامله تحالف ضد الناس اللى بتمتحن , و تلاقي الحفلات و الافلام فى السينما و الدوري ".....
الحتة دى أد ايه صح....الواحد يبقى هيموت على الاجازة و لما تيجى يبقى نقص يقولهم مش هى دى اللى أنا كنت عايزاها..
سمررررررررر
مرسي جدا ليكي
بعدين بصراحه بالنسبالى مع الضفادع
فعلا اليأس وصل بيا لكده فعلا
لووووول
..........................
روزي
منوره المذكرات كلها
و بعدين ما بتجيش دايما ليه ؟؟؟
معاكي حق فعلا
انا لسه مخلص ثانويه عامه
و اتبهدلت فعلا التلت او الاربع شهور اللى فاتو
و عانيت زي باقى البشر !
و معاكي حق جدا , اول ماتيجي الأجازه
خدوها مش عايزينها
!!!
سمررررررررر
مرسي جدا ليكي
بعدين بصراحه بالنسبالى مع الضفادع
فعلا اليأس وصل بيا لكده فعلا
لووووول
..........................
روزي
منوره المذكرات كلها
و بعدين ما بتجيش دايما ليه ؟؟؟
معاكي حق فعلا
انا لسه مخلص ثانويه عامه
و اتبهدلت فعلا التلت او الاربع شهور اللى فاتو
و عانيت زي باقى البشر !
و معاكي حق جدا , اول ماتيجي الأجازه
خدوها مش عايزينها
!!!
الف حمد الله ع السلامة
افتكرتك والله اول ما النتيجة بانت قولت اجى اطل عليك وبالمرة اشوف اللى فايتنى :D
ايه الاخبار يارب تكون رفعت راسنا
مرسي يا امل بجد
انا الحمد لله نجحت
و تقدري تقولى رفعت راسكو
و مستني التنسيق
:)
بتغيبي ليه بقى عننا ..؟؟
ما تتأخريش بعد كده
:)