تيك توك .... تيك توك
تكي تكي تكي تكي
تك .. تك .... تك
تكي تكي تكي تكي
تك .. تك .... تك
ت تك ت تك ت تك
لا .... انا لسه بكامل قواي العقليه ..... لكن اللى فوق ده , مجرد اصوات .... اصوات عقارب الساعه . عقرب صغير , و عقرب كبير .... بيجرو ورا بعض . كل الساعات اللى فى العالم كده تقريبا , عقربين ما بيقفوش , بيمشو فى ناحيه واحده بس . و معاهم بيعدي الوقت ... ساعات يبقى بطيييييئ جدا , و ساعات تانيه يبقى سريع قوي ( ممكن تلاقي نفسك بتنهج كده من غير سبب ! ) .
زمان و احنا صغيرين , كان الوقت فيه بركه غريبه .... يعني تقدر تقول انها بركه بزياده . كان اليوم الدراسي طويل جدا , لدرجة انك ممكن " تأيّلك " ساعتين تلاته , و تقوم تلاقيك فى نفس الحصه برضو ! . كانت " الأبله " تخش و تسأل على اللى فات , و تضرب اللى ما بيعرفوش يجاوبو بعد دش تهزيق محترم ( ده اكتر وقت لطشيف فى الحصه ) , و بعدين تشرح و تكتب ع " التخته " , و العيال تنقل . بعد كده بقى تشوف الواجب و تصححه و تضرب اللى م عملوش الواجب و تهزهقم ( غالبا بيبقو نفس الناس اللى اتهزقو من شويه ) . و يتبقى شوية وقت كدهون ( يعني قيمة نص ساعه كده ) , ممكن الابله تاكل فيهم , او تجيب فى سيرة الناس مع الابله اللى فى الفصل التاني او حتى تقرر انا تهزق العيال اللى ما اتهزقتش ! ( يعني تقعد زهقانه !, اهي تسلي نفسها برضك ) .
دوّقتي الوضع بقى مختلف تماما , كومبليتلي يعني ( ونبي بتكلم عنجليزي زي الفل ! ) . السنه كلها - ايّا كان نوعها بقى - بقت بتعدي بسرعة الكبريت ( دي حاجه كده اسرع من الضوء ) . يعني تلاقي مثلا اول يوم دراسه , و تاني يوم على طول امتحانات آخر السنه , و اليوم اللى بعده التخرج , و آخر الاسبوع تلاقيك متجوز و معاك عيلين بخدود ( محاسن و زياد ) .
و مع السرعه اللى الوقت بيعدي بيها , هتلاقي برضك فترات - طويله او صغنونه - بتحسها بطيئه جدا جدا , لدرجة انك ممكن تعمل دشليون حاجه و برضو اليوم ما يخلصش !!. زي مثلا لما تكون مستني حاجه هاتحصل آخر الاسبوع , او حد جايلك بعد بكره ..... تلاقي الوقت بيعدي براحه قوي ..... و فى نفس ذات الوقت , الحاجه دي او الواحد ده , الفتره اللى بيقعدها معاك بتعدي بسرعه جدا . زي كده لما تكون فى العياده , تلاقي كل واحد بيخش يقعد سنه جوه مع الدكتور ( تحسهم بيخترعو الدوا جوه ! ) و اول ما يجي دورك , تلاقيك ما قعدتش 5 دقايق على بعض !! . او لما يبقى عندك فرح , و تقعد بقى تجهز و تجيب بدله او تفصلي فستان , و تظبط و تعمل .... و تلاقي الساعتين ولّا التلاته بتوع الفرح عدو بسعرة الكبريت و فاتو كأنهم 10 دقايق !! .
طب يا واد يا تين , ده بيحصل لييييييه ؟؟؟؟
مممممم ...... بغض النظر عن الناحيه الدينيه , و اللى بتقول ان كل ما الزمن يمشي لقدام الوقت بيعدي اسرع . إلا ان لما بنكبر بيكون فى حياتنا هتمامات اكتر . و انت صغير حياتك عباره عن دراسه و لعب و تلفزيون و اكل و شرب مع زيارات متكرره للحمام . لما بتكبر صحيح لسه فى دراسه او شغل , لكنك بقى عندك اهتمامات اوسع بتقرا و بترسم و تتزلج ع النت ( اللى هو السيرفينج بالأنجلشّه ) . ده غير انك بقيت بتتكلم و تتناقش فى مواضيع مختلفه مع اغلب اللى حواليك .
لما بتخش مرحلة المراهقه , حاجات كتير قوي بتزيد فى حياتك ..... اهتماماتك , مسؤولياتك , مشاكلك , حريتك و احتياجاتك . يمكن اغلبنا حس فى فتره من الفترات ,و فى بداية المراهقه تحديدا , ان معاملة الناس اتغيرت و اختلفت معاه . بقو بيكلموه كتر , ممكن ياخدو رأيه فى حاجات , بيبعتوه مشاوير , ده حتى مكن يهزرو معاه و يسيبوه يهزر معاهم . فى كتير مننا بياخدو بالهم من التغيير ده , و م بيبقوش عارفين السبب . السبب هو اننا كبرنا , مخنا كبر , و بقينا قادرين ناخد قرارات لنفسنا , و نعمل اختياراتنا المميزه اللى بتميز كل واحد فينا , و بالتالى الناس بتعاملنا على هذا الاساس.
مشاكل المراهقه - و بصراحه مطلقه - كتيره" سو موت ". و يكن اتكلمنا فى كتير منها قبل كده .... زي الحب و الشكل و الفراغ و غيرهم . و لو كنت واحد من المصلحين الاجتماعيين فى الكليه او المدرسه , كل اتنيني متصاحبين وللا حد عنده مشكله هـ ييجي يقولهالك , و هـ تلاقي غير مشاكلك , مشاكل الناس شاغلاك ........ كمان , و انت صغير , كان لازم يبقى فى حد معاك , و ماينفعش تروح اي مكان لوحدك . لكن و انت مراهق .... الحريه اكبر , بتروح و بتيجي و بتخرج مع صحابك هنا و هناك ( ساعات حتى ممكن تهيم على وجهك لوحدك كده ) .
احتياجاتك كمان بتبقى اكتر .... و انت صغير يادوب : عايذ زيلي كولن يا ماما ! , و لو حد ادالك ربع جنيه فى العيد , بتبقى فى قمة السعاده و الانشكاح ... و بتبتدي تخطط هاتصرفه ازاي بحكمه . لكن دلوقتي , انت محتاج لبس , و كتب و مصروف اكتر .... و مش بعيد تكون محتاج عربيه او لاب توب او موبايل جديد لأن اللى معاك وقع منك و انفجر , او تكوني محتاجه مايك اب و كام طرحه جداد على جوزين جزم و شنطه ! .... ممممم ..... احلام و خطط و امنيات كتشير كتشير كتشير .
اكيد مع الكم الحاجات المهوله دي لازم الوقت يعدي بسرعه , لأنك ما بتحسش بيه اساسا . صحيح قولنا قبل كده ان المراهق بيعاني من حالة فراغ .... لكن غالبا الحاله دي بتبقى فى اول المراهقه , عقبال ما تاخد ع الوضع الجديد و تتأقلم معاه ..... يعني ع الجامعه كده , غالبا هتلاقي الفراغ ده كله انتهى .
لكن الاهم و المهم , ان الواحد لازم يبقى عارف القانون الفيزيودنياوي اللى بيقول , ان الاوقات الحلوه بتعدي بسرعه جدا , و الاوقات الوحشه الزمن بيجيله حالة شلل بسيطه و بيبقى بطئ " جدي " !! . و ده لأن الوقت عامة بيعمل عكس ما احنا عايزين ! .... حاجه عجيبه و عجيبه ... بس الطبيعي يعني .
اما الميول بتاعى الواحد فـ ........
وللا اقول
لنا فى هذا
بوووووست آآآآآآخر
D=
ملحوظه كلبوظه : اتاخرنا ليه فى البوست ؟؟ ..... رمضان بيعدي بسرعه قوي , و مافيش وقت فعلا انك تبص وراك ... آسف بجد .
ده غير ان للأشف , فايس بوكي طار ! , و البايدج بقت مع حد تاني انا مش عارف هو مين .... فأدعولى بقى استرجعها , و اعرف اصطاد فايس بوكي على خييييير :))
ده غير ان للأشف , فايس بوكي طار ! , و البايدج بقت مع حد تاني انا مش عارف هو مين .... فأدعولى بقى استرجعها , و اعرف اصطاد فايس بوكي على خييييير :))
|
كلام جميل... وحقيقي.. (للأسف الشديد) !
ورمضان كريم :)
صدقت اخي في كل ماكتبت الله يعين الجميع
ورمضان كريم
معااك حق زمان كنا بنعمل خمستلاف حاجة في اليوم ونلاقينا لسة العصر
دلوقتي مجرد مشوار واحد او حاجة واحدة بتضيع اليوم كله
..
حد يقولك تعالى اخرج معايا بكرة
تقوله معلش والله انا بكرة هوضب الاوضة بتاعتي
دا فعلا؟ طول اليوم !
ههههه لا طبعا طول اليوم ايه
انا هكمل بعد بكرة عشان مش هلحق اخلص الاوضة D:
مش عارفة بقا هل المشكلة في الاوضة ولا في اليوم القصير ولا فيك انت ؟ وممكن تكون في صاحبك اصلا
معلش انا نفسي مش فاهمة انا بقول ايه
بوست جميل
^_^
فعلا زي ما بيقولوا الاوقات الحلوة بتعدي بسرعة :)
بس انا ملاحظتش حكاية التغير دي :D
.. بس سؤال رفيع نفهم من كده ان البايدج متهكر عليها اصل حساها مش مظبوطة !!
ع.سالم , هند و سمسمه
مرسي بجد على كلامكو الجميل
و اهتمامكو
و الاهم , مشاركتكو معانا
و يا رب المذكرات تبقى دايما
منوره بكومينتاتكووووو
:)
............................
هدير
مرسي بجد ليكي
و زي ما قولت .... او ما قولتش
مش فاكر ولله
ان فى ناس بتفضل محافظه على تقاليدها و تفاصيلها اللى بتحسسها بالحاجات
و ب التالى ما بتحسش بالتغيير
نيجي للسؤال
انا فيس بوكي فجأه كده باظ
قام السيستم اوتوماتيك
حول البايدج مني لحد تاني مجهول الهويه
هي م حصلهاش تاج
ولكن حد تاني خدها
و حاليا بحاول استرجعها
انا عملت أكونت جديد أخيرا
و هاكتب بوست كده
و ربنا يسهل
:)
الله يا ادهم البوست حلو سو مووووووووووت
فعلا الوقت بيعدي بسرعه موت والايام اللي تلاقي نفسك فيها مزنوق وعندك طاقة تعمل فيها مليون حاجة وبتبقي مش عارف هي ايام الامتحانات ببقي نفسي اقوم ارسم والعب واعمل حاجات بالقص واللزق وكل يوم انزل فيلم اتفرج عليه بلاقي متسع رهيب من الوقت بس بخاف اعمل حاجات دي عشان الحق اذاكر ولما بتجي الاجازة بلاقي مفيش نفس اعمل حاجة واليوم بقي قصير جدي
الله يا ادهم البوست حلو سو مووووووووووت
فعلا الوقت بيعدي بسرعه موت والايام اللي تلاقي نفسك فيها مزنوق وعندك طاقة تعمل فيها مليون حاجة وبتبقي مش عارف هي ايام الامتحانات ببقي نفسي اقوم ارسم والعب واعمل حاجات بالقص واللزق وكل يوم انزل فيلم اتفرج عليه بلاقي متسع رهيب من الوقت بس بخاف اعمل حاجات دي عشان الحق اذاكر ولما بتجي الاجازة بلاقي مفيش نفس اعمل حاجة واليوم بقي قصير جدي
عارفه
تحسيه نوع من قوانين الطبيعه السخيفه
انا كمان بيحصللي زي ده ب الظظظظبط
!!!!
:))