نظرتنا للمدرسه بتختلف من مرحله لمرحله
يعني مثلا

فى اول اسبوعين حضانه : عايز ماماااااااااااا , عاااااااااااا !!
باقى السنتين : لعب و تلوين , اكل من الكنتين و أكيد عيد الطفوله
فى ابتدائي : المدرسه حلوه شويه بس البيت احلى اكيد ........ هو اتنين فى تلاته بكام ؟؟؟
فى أعدادي : المدرسه حلوه على شان فيها صحابي و بس ..... امته الحصه تخلص بقى ؟
فى اولى ثانوي : المدرسه دي حاجه مستفزه جدا , بس المدرسين بقو صحابي و هزار للصبح بقى
فى ثانويه عامه : يا ربييييي , امته اخلص من الهم ده و اخش الجامعه

يمكن اللى فات ده ملخص بصيت لنظرة اغلب الناس للمدرسه , و اللى بتتحول من مكان مستفز و احنا صغيرين , لمكان جامد جدا كلو هزار و ضحك و احنا فى ثانوي , و فى ناس كتير على فكره بتعتبر مرواح المدرسه فسحه و خروجه ( ولا القناطر الخيريه كده ) و خاصة ايام الثانويه العامه على شان يهربو من الدروس و المذاكره , بس ده مايمنعش ان كلنا بنحب الأجازه و بنستناها من اول ما تخلص ..... و آخر يوم فى الأجازه أد ايه بيكون يوم رخم و الواحد بيبقى شايل همه و حاسس كده بأحساس غريب ( زي ما يكون فى طوبه فى بطنو !! )

آآآآآآه .... الثااانويه العامه
بعد الآهه الطويله دي احب أأكد ان الثانويه العامه , هي مرحله محوريه فى حياة اي مراهق
لأنو لما بيخشها بيلاقى تقريبا عالم مختلف , و مفاهيم مختلفه للمدرسين و المواد و الناس ذات نفسها
و يمكن ساعات تجيلو حالات توهان و بيبقى محتاج دليل كده زي بتوع التليفونات على شان يعرف هو داخل على ايه
و حيث اني شجره تحترق من اجل الجميع ( آه شجره .... على شان كبيره ! )
قررت اني اساعد كل واحد وقع و ماحدش سمى عليه فى الثانويه العامه
و اديلو الكلام المفيد

فى البدايه الناس فى الثانوي بتنقسم إلى :

المتفوقين : دي مجموعه من الناس الشاطره جدا , اللى بيحبو يقعدو فى الأول و يرفعو ايدهم فى كل سؤال , المدرسين بيحبوهم قوي قوي , و اكيد بيكونو حافظين اسمهم .... فى منهم المغرورين , و فى منهم اللى التفوق بيزيد عن حده و بيقلب لـ ....

القفل : القفل حد متفوق لأبعد الحدود , بيحفظ و غالبا ما بيفهمش , كائن منطوي اجتماعيا لأن قدرات التواصل عنده شبه معدومه .... لو اتكلمت معاه هتلاقي كلامه بيتمحور حوالين الدراسه و الكمبيوتر و النت و بس !

المشهورين : دي مجموعه من الناس المشهوره فى المدرسه , سواء لخفة دمهم , شخصيتهم , او حتى قلة ادبهم , و بتلاقيهم دايما مجموعات مع بعض من نفس النوع ( نوع الشهره يعني ) .... و أكيد بتلاقى كل الناس هاتموت و تكلمهم و تتصاحب عليهم ... و نصيحه يعني , اوعى تعمل زي باقى الناس و تحدف نفسك عليهم لأنهم ساعتها ولا هايكلموك اساسا , حاول تبقى مشهور انت كمان , او خلى الصدف تخلق ما بينكو حوار , قلم وقع , بتسأل عن الجدول ... و انت و ذكاوتك يا " حدوقه :) "

المغمورين : دول العكس اكيد , غامضين و صامتين ....... مش شاطرين ولا ضايعين , بييجو المدرسه و بيمشو و ماحدش بيحس بيهم , غالبا مالهومش صحاب اساسا , و بيقفو لوحدهم فى الفسحه !

الضايعين : او زي ما علماء " التينولوجي " ( علم المراهقه يعني ) سموهم " شِلل الأنس " او زي ما بنشوف فى ترجمة الأفلام بتاعة بلاد بره " المتنمرين " , و دول مجموعه من الناس الفاشله دراسيا و المنتشرين اجتماعيا , غالبا و ان ما كانش دايما قلالاة الأدب و صايعين , و فى منهم اللى بيشربو اى حاجه ممكن تتشرب ( ابعد عنهم احسن لك ! ) ..... و هما صغيرين كانو بياخدو من العيال اكلهم , و لما بيكبرو بيكتفو بالتريقه على خلق الله و خلاص

العاديين : ناس عاديه بقى , لا شاطرين ولا فاشلين , ولا مشهورين ولا مغمورين , ناس عاديه تماما , بس السمه الغالبه عليهم انهم محترمين و بيقفو مع بعض فى الفسحه فى جروبات مش كبيره

المضطهدين : دول اللى شلل الانس بتاخدهم تسليتها و بيتريقو عليهم على طول , و ده بيكون بسبب حاجه فيهم , سواء ضعف شخصيتهم , ما بيعرفوش يردو أو محترمين قوي .... و ده بيكون السبب فى ان شخصيتهم بتطلع مهزوزه بعد كده

المميزين : زي ماهو واضح بيكون حد مميز فى حاجه , رياضي , بيرسم كويس , محترم قوي و فى نفس الوقت منتشر اجتماعيا , دمو خفيف , شبه مهند و كل البنات عايزه تكلمه ( حد " امور " يعني :) ) .... و دول بيبقو منطلقين مع كذا مجموعه من اللى فوق و مش بيحدو نفسهم بمجموعه معينه يلتزمو بيها .

فاكرين و احنا صغيرين كان نفسنا نطلع ايه ؟ , اغلب الولاد كانو عايزين يطلعو : مهندس , طيار او ظابط و البنات عايزين يطلعو كلهم دكاتره و مضيفات !
بنكبر , و احلامنا بتتغير .... لكن احلام الأهل بتفضل زي ماهي...... ظباط و دكاتره و مهندسين
فى بقى اهل بيضغطو على ولادهم ( لحد ما يجيلهم كبت و ينتحرو ) , و فى اللى بيسيبولهم حرية الاختيار
و على شان نسهلها عليك نقولك ممكن تختار ايه و انت فى الثانويه العامه

الأدبي : 3 مواد ادبي ( منهم التاريخ اجباري ) + ماده علمي
و بنرشحلك الاقتصاد و الأحصا و علم النفس , لأنهم اسهل مادتين ادبي , و اكيد الجولوجيا لأنها اسهل ماده علمي
و ننصحك تاخد التاريخ فى تانيه على شان تلخص منه بدري بدري

علمي علوم : كيميا + فيزيا + احياء + ماده أدبي
علمى رياضه : كيميا + فيزيا + رياضه 2 " ميكانيكا و استاتيكا " + ماده أدبي

بنرشحلك الاقتصاد و الاحصا او علم النفس لأنهم اسهل مادتين أدبي
الأقتصاد و الأحصا منهجهم صغير و سهلين بس الامتحانات مش دايما سهله
علم النفس كبير شويه و سهل , بس امتحاناته على طول بتيجي سهله
و بننصح كل المستمعين انهم ياخدو الكيميا فى تانيه على شان يخلصو منها

طيب , سؤال بيطرح نفسو

لو انا بكره التاريخ و الحفظ , و فى نفس الوقت بكره الرياضه , اعمل ايه ؟؟

جبنالك الحل الاكيد ( على فكره الكلام ده مش ببلاش !! , كلو يطلع بالمعلوم , يا اما البوست هاينفجر لوحدو ! )

ممكن تاخد

كيميا + احياء + جولوجيا + ماده ادبي

حد بيقول : ايه ده ؟؟؟

كده انت علمى , بس لا علوم ولا رياضه , ناس كتير بتسميه علمى متأدب ... بس هو مش كده يعني لأن العلمي 3 مواد علمي و ماده ادبي و هو ده اللى حاصل !

و ده بيدخلك كل كليات الأدبي و الكليات الفنيه ( زي كلية الفنون الحلوه و المطبقه كده ) بس تنسيقك بيقى زي تنسيق العلمي , يعني عالى

و كدا بقى معاك الدليل العصري لكل تين مصري

خش و انت مطمن بقى و ادعيلنا ( بنقبل اي تبرعات اياً كان نوعها على فكره )

قبل الثانويه العامه الناس بتحسسك انك داخل على حرب , و جملة " شد حيلك " بتتكرر كتير لحد ما الحيل بيتقطع من كتر الشد ! , و اللى رايح و اللى جاي يقعد يديك فى نصايح عن طرق المذاكره , و الامتحانات و الكتب و المدرسين .... كل واحد بكلام غير التاني لحد ما الواحد دماغو بتكبر و بيتزنق و هو داخل من الباب !!


ساعات كده نفتكر مواقف كنا بنعملها و احنا صغيرين

و نقول : يااااااااه ! , اد ايه كان الواحد عبيط !

بتبقى مواقف تحس فيها كم غباء مجهول الملامح