نرجع و نقول
الحاجات المحرجه لسه ما خلصتش
و لسه فى حاجتين مهمين كمان لازم نعرفهم
و احسن حاجه نجاوب ع السؤال اللى فى أول البوست اللى فات
البيبي بييجي ازاي ؟؟؟
زي ما قولنا المره اللى فاتت ان كل 28 يوم بتحصل الـ PMS و بعدين بتخرج الـ E. او اللى هي الـ Egg يعني " البويضه " فى رحله للرحم , و هي ماشيه كده بتعدي على حته اسمها " قناة فالوب " و هناك ( و هي بتتمشى فى القناه كده ) ممكن تقابل بالصدفه واحد من ملايين الـ Sp. او الـ Sperms " الحيوانات المنويه " , اللى بتعجب بيه و بيندمجو مع بعض لحد ما يبقو واحد , و يكملو الرحله اللطشيفه للرحم اللى بيكون مجهز الأستقبال الفاخر اللى بيقعدو فيه لمدة تسع شهور ( اقامه خمس نجوم , فول بورد ) بيكبرو فيها و بيكترو من اتنين بس ..... لملايين الخلايا اللى بتعمل البيبي , و اللى كنا فاكرينه سكر تحت السجاده !!
طويب يا واد يا تين ..... و الـ Sp. وصل للقناه ازاااااااي ؟؟
برضو سؤال وجيه و بيطرح نفسه , و كمان...... محرج !
زي ما احنا عارفين , ان ربنا خلق من كل كائن حي تقريبا الولاد و البنات , و اكيد يعني التنوع ده مش على شان شكلهم حلو !
انما على شان يقدرو يجيبو كائنات تانيه زيهم ( مش هديه ع الشامبو زي من " الهايبر " ! ) , و على شان يقدرو يجيبو الكائنات اللى زيهم دي بيحصل عمليه اسمها الـ L.M او الـ Love Making ( ليها كذا كلمه بنفس المعنى على فكره ) , و اللى بيطلق عليه بالعربي الفصحى " الجماع " , و العمليه دي بتختلف من نوع للتاني , و كمان بتحدها قوانين و تقاليد حسب المجتمع و الدين و الثقافه ( يعني اللى بيحصل هناك , اكيد اكيد ... مش بيحصل هنا ! ) , و الـ L.M هي طريقه من طرق اظهار الحب بين الزوجين , و يمكن تكون اقواهم , لأن لما تلمس حد ( زي انك تحضن باباك او تبوس ماماتك , او حتى تحط دماغك على رجلهم ) بيبقى نوع من انواع اظهار الحب او طلبه .
ام هند ( اللى هي المهم يعني للناس اللى ثقافتها غزل محلاوي ) , ان لما بيحصل الـ L.M بيحصل اتصال بين الطرفين و اللى بيخلى الـ Sp. ياخد طريقه للقناه و ياخد الـ E. من ايدها على الرحم , صحيح ساعات بتكون عينيها زايغه و بتاخد صاحبتها و بياخدو اتنين يوصلوهم - و هنا النتيجه بتكون توأم مش شبه بعضهم - او ساعات تانيه بتكون مجنونه و لما توصل بالسلامه تقسم نفسها اتنين - و هنا بتكون النتيجه توأم " مسخه طلق الأصل " - بس عامة العادي و المعروف انها بتكون عاقله و راسيه .
و بكده نكون خلصنا حته محرجه برضو , و اللى ( او هايكون ) لينا معاها ذكريات مذهله فى المدرسه فى حصص العلوم وسط الكومينتات اللطشيفه و الاحراج اللى المدرسين بيبقو فيه , و اللى رغينا فيهم قبل كده.
ســــــــــــــــــــريــــــــــــــــــــه !!
المراهقه , هي تاني اسرع فتره للنمو فى حياة الأنسان كلها , و كالعاده اللى فى الكرسي اللى ورا بيقول : امال انهي اسرع فتره ؟؟
اسرع فتره هي نمو الجنين فى بطن امه , لأن البيبي " الأمور " بيكون بعد الولاده اكبر 200 مليون مره من الشكل اللى كان عليه فى بداية تكوينه ! , يعني لو الواحد مننا بينمو بنفس السرعه دي كان ع " الخمشاشر " كده بقى فى طول الأمباير ستايت ( ده زي برج الشيماء هنا يعني , بس فى نيويورك و فيه اكتر من 100 دور ) .
يمكن كلنا ما نعرفش ان الصينيين بيحسبو العمر من ساعة ما الواحد بيتكون فى بطن الست الوالده , يعني نزود 9 شهور على عمرنا و نلاقينا كبرنا سنه زياده تقريبا ( يا حالولي يا حالولي ) , و مع الزياده المهوله فى النمو و العمر دي , بييجي معاها طاقه كبيره و اغلبنا ما بيعرفش يوديها فين , و بييجي مع الطاقه دي نوع من الكبت , و اللى سببه - زي ما قولنا قبل كده - الفقاعه المحطوطه حوالين اى حاجه ليها علاقه بالجواز و الأطفال بييجو منين !! , و هنا بيبقى عندنا معادله حلوه كده ( ولا معادلات اينشتاين كده ) :
مراهق + كبت + طاقه ــــــــــ عوامل مساعده ـــــــ >> S.H !!
طبعا مش فاهمين حاجه ( عادي يعني , اذا كان انا مش فاهم !! )
فى سن المراهقه بنعرف حاجه جديده , من صحابنا او لوحدنا او من اي مكان تاني , بنعرف الـ S.H او الـ Secret Habit اللى هي " العادة السرية أو الأستمناء " و اسمها العلمي Masturbation .
و ايه هي الـ S.H دي يا واد يا تين ؟؟
هي تحريك او إثارة الـ Sexual Organs لحد ما يوصل لمرحله خروج الـ S. , و هي مجرد تقليد ( زي الحاجات الصيني كده ) للـ L.M
لما بتيجي سيرة الموضوع ده مع اى حد من الكبار - الاهل او الدكاتره مثلا اللى غالبا بيقولو امثله فيها عربيات و بنزين ! - تلاقي فيه نوع كبير من المبالغه الشديده جدا , و تلاقي الناس قاعده تحطلك ليها كم اضرار مهول ( عقم , دوالي , و ركب و حاجات عجيبه كده ! ) لحد ما الواحد بيبقى عايز يقوم ينط من الشباك ( زي بتوع الثانويه العامه ! ) و يخلص !
و حيث اننا بلوج مفيد ( اللى هايقول غير كده , عارف مصيرو كويس ) جبنالكو الحقيقه ..... لا لا , مش المره بتاعة حمزاوي ... دي الحقيقه الأكيده و هي ان الـ S.H فى حد ذاتها مش مضره , ولكن على رأي المثل : اللى بيزيد عن حده , بيتقلب على جمبه :)
بمعنى ان المضر هو الافراط , مش هي فى حد ذاتها , ولكن نيجي بقى للاضرار اللى بتيجي من الأفراط :
اولا : الواحد بيتعود عليها و بتبقى زي الأدمان , لأنها ببساطه اسهل بكتير من الـ L.M ( مش السجاير اكيد ) , لأنها مش بتحتاج تجهيزات , او استعدادات او حتى طرف تاني , انما فى اي وقت و اى مكان
ثانيا : بعد ما بتخلص , الواحد بيحس بأنو ارتكب جريمه , و احساس الذنب و تأنيب الضمير بيفضل معاه , و ده اللى بيسبب تشويش اكتر و الواحد بدل ما يبطل , بيزود اكتر و اكتر , و تحس كده انك داخل النار على طول , و عمر ما ربنا هايسمحك , و هنا نحب نقول ان السبب فى ده الشيطان اللى بيلاقيها فرصه كويسه انو يخليك تيأس و ترجعلها اكتر من الأول , و ان كل الافكار دي مش صح " ابتدا ابتدا "
طويب , اغلب الناس اللى بتعمل الـ S.H هي ناس مش عارفه تودي طاقتها فين , حيث ان الكبت موجود و المراهقه موجوده .... يبقى لازم نضيع الطاقه ! , فالمراهقين اللى بيحسو بالوحده و الحزن و الملل و الفراغ و ما ننساش الصحاب " الكخه " دول اللى بيقعو فى الفخ :) , على عكس الناس اللى ليها صحاب كتير محترمين , و شاغلين نفسهم بأنشطه كتيره ( رياضه و نادي و جيم و بلي ! ) , اللى ما بيلاقوش وقت اساسا انهم يفكرو فيها.
و نخلص من الـ S.H ازاي ؟؟
اكيد هانبعد عن اى حاجه ممكن تخلينا نفكر فيها ( اغنيه من بتوع الفيدشيو كرب مثلا ! ) و ما نستسلمش للأفكار دي , و نحاول نفكر فى اي حاجه تاني بسرعه ( ممكن تدندن بأغنيه بتحبها فى مخك مثلا , او تعد , او تتخيل واحد بتكرهه لابس لبس الباليه البينك :) " تنفع برضو و انت متعصب " )
و طبعا ما نحاولش نقعد لوحدنا فى البيت كتير , او فى اوضه مقفوله فيها جهاز " الحاسب الآلي " , لأن كل الظروف بتكون متهيأه و جاهزه !
ناخد الدوش فى السريع المريع , و ياسلام لو كان قبل المدرسه او الجامعه او اى معاد مهم ماينفعش تتأخر عليه
نقرب من ربنا اكتر , و نفتكر انو شايفنا فى كل وقت و كل مكان
ممكن كمان تتخيل اكتر حد عزيز عليك ( عكس نوعك طبعا ) واقف بيتفرج عليك كده !
نشغل وقتنا بأي حاجه , رسم , رياضه او حتى الألش !
نصوم ( مهما كانت الديانه و طريقة الصوم , مش هاتفرق )
نستعمل النت فى حاجات مفيده ( زي انك تقرى البلوج دي مثلا :) )
و اخيرا لازم نعرف رأي الدين فى الحكايه دي , لأن مثلا فى الاسلام الـ S.H حرام إلا فى 3 مواقف :
مش قادر تتجوز
خايف تقع فى حاجه اكبر
ان القصد بس انك تكسر الإثاره اللى جواك و مش المتعه
و فى ناس بيقولو لو مش قادر تصوم
و لحد هنا
خلصت تقريبا الحاجات المحرجه فى حياتنا
من تغييرات و حاجات جديده غريبه
و مع المراهقه بتييجي تغييرات تانيه مختلفه
تغييرات فى المشاعر و الاحاسيس و التفكير
و اللى لينا فيها
بوووست آآآخر
و فجأه جديده
D=
و حيث يعني اننا بلوج محترم
فإحنا برضو عملنا البوست ده و اللى فات من مراجع موثوق فيها
مش اي كلام و السلام
و هي :
كتاب : ما يجب على المراهق ان يعرفه , من سلسلة : دراسات سيكولوجيه
مجموعة فتاوى من دار الافتاء و خلافه
مجموعة توبيكات ع النت طبيه
و شكرا
ba7yek 3la 2slobk elmo7trm !!
we bgd i like all ur posts !
أدهم انا من ساعه ما انت نزلت البوست وانا بحاول ارد عليك :D
مهنج ع الاااااااااااااخر
------
بص مش عارفه ليه انا كنت بقرا بسرعه او انت كاتب بسرعه :D
مش عارفه مين السريع فينا بس ف حد بيجرى ف البوست ده :D
وبعدين الواحد كان بيحمد ربنا انه توقف انه يشوف احياء قدامه من اولى ثانوى وكمان مع الكلية الواحد نسى الموضوع ده اصلا ... كانت مادة رخمة اوى ع فكرة :D
وبعدين برده السؤال اللى بيطرح نفسه مين برج الشيماء :D
الواحد زهق بقى يا ادهم من كل مره يقولك جوووو اون :D
بس بجد انت ماشى ع خط كويس اوى حتى الان بجد انت دايما بتعلى فيه مش بتنزل عنه فربنا يووووووووفقك ان شاء الله :D
بجد باحييك على اسلوبك المناسب و اللى جامع كل حاجة بطريقة مبسطة :)
chapeau :)
مي
تسلم يا باشا ع الكلام الجميل
و كفايه بس انك بتنور على طول
بكومينت كده جميل
الف شكر يا باشا
:)
....................................
امل
فينك يا امل ؟؟
مختفيه من فتره كده يعني ؟
:))
المهم
واضح كده ان وش المذكرات مش لطشيف ع الجهاز بتاعك
عامة خير و بركه يعني
هاهاهااااااا
انا عايز اقولك انى تقريبا كده انا اللى كنت بكتب بسرعه.....جدا :)
و بعدين حرام عليكي
الاحياء جميله
دي اكتر ماده انا بحبها بصراحه
و نييجي للسؤال المهم
برج الشيماء ده بتاع محمد هنيدي فى فيلم وش اجرام
اصلى كنت هاكتب برج القاهره
بس لقيته عادي يعني
لووووول
و بجد بجد
مرسي جدا جدا على كلامك الجميل ده
احرجتى تواضعي يعني
:))
.........................
سمررررررر
منوره كالعاده يا سمر
و مرسي بجد على كلامك جامد جدا
بعدين انتى عارفه ان ثقافتى هندي
مش بهم شابوز و الحاجات دي
لووول
:))
اولا نايس بوست يا تين
و بهنيك على اسلوبك
صراحه مش لاقيه حاجة اقولهابس اهم حاجة
KEEP IT UP :D
هو انا مش عارف مين معايا
بس عامة
مرسي كتير ليكي على زوقك و كومينتك الجميل
و التشجيع الاجمل
و ياريت افضل دايما عند حسن ظنك
:)