هو البيبي بييجي منين ؟؟
سؤال كان بييجي على بالنا كتير و احنا صغيرين , و بتتعدد و تختلف النظريات " العياليه " اللى بتفسر البيبي بييجي منين , منها مثلا :
الاب و الام بيحطو تحت السجاده سكر و تاني يوم يلاقو الطشفل الجميل
او بطن الام لما بتسمع الزغاريط و الاغاني فى الفرح بتعرف ان المعاد جه و تبقى حامل
او نظريه تانيه بتقول ان ربنا لما بيلاقى اتنين اتجوزو بيديهم هديه
و فى اوروبا و الدول المتقدمه بيقولو ان فى لقلق سحري هو اللى بيجيب لكل اتنين متجوزين ابنهم من ارض الاطفال ( حتى نظرياتهم معقده !! )
نظريات زي دي و غيرها كتير بنحطها احنا , لأن ببساطه لما نيجي نسأل حد وشو يحمر و يرتبك و يقولك نظريه من دول او ببساطه يقول :
- مش وقتو دوقتى , لما تكبر هاتعرف !
و للأسف إجابه زي دي بتخلى الطفل عايز يعرف اكتر , و ساعتها بيروح لصحابه او اى مصدر تاني ممكن جدا يجيب منه المعلومه غلط خالص و فى النهايه يكره الجواز و الخلفه !
فى مجتمعنا الشرقي , اتربى اهلنا و اهلهم على ان الكلام فى اى حاجه تخص الجواز و الخلفه و " البيبي بييجي ازاي " حاجه عيب و مايصحش نتكلم فيها كده , لازم يكون الاب و ابنه او الام و بنتها لوحدهم , و يكون فى مقدمات طويله عريضه مالهاش لزمه , مع شوية احراج و ارتباك و عرق و سكوت طويل فى النص ( الاهل بيريحو شويه من الضغط اللى عليهم ! ) , و يا سلام بقى على الحصص بتاعة العلوم اللى بيبقى فيها درس " التكاثر فى الأنسان " - اللى كل شويه ينقلوه من سنه لسنه , و يقسموه على حتت صغيره ! - و الاحراج اللى بيبقى المدرس فيه , و كم الكومينتات السخيفه اللى الواحد بيسمعها ساعتها , و يمكن المدرس لو المدرسه مشتركه يفصل الولاد عن البنات و يشرح الدرس مرتين !!
لكن فى العصر الحديث - بتاع النت و الدش ( مش اللى بنستحمى بيه اكيد ) - عين الواحد بتتفتح على حاجات كتير بدري بدري , و بالتالى النظريات و الخرافات دي مش هاتفيده بحاجه , و بقى لازم يكون في بديل لكل القعدات المحرجه الغريبه دي , بطريقه تانيه و بأسلوب تاني , و بالتالى بقى على الأهل انهم يطلعو ولادهم فى الجو اللى فيه الكلام عن الجواز و الخلفه مش عيب ولا حرام ولا حتى محرج , طالما فى وقته السليم و بالألفاظ المناسبه اللى تليق بينا كناس متحضره شرقيه
اترددت كتير بصراحه قبل ما اكتب البوست ده ...... و بعدين لقيت ان الحاجات المحرجه اللى فى حياة المراهقين محتاجه جمع معلومات و بحث و تنقيب - زي زاهي حواس كده - على شان الواحد يقدر يجيب المعلومات الصح و يقدهما بشكل صح , يمكن نقدر نجنب الأهل و المراهقين الاحراج ده ! , و حيث كده فإن البوست ده هايكون على 3 اقسام مهمه ........ يالا بقى كده , كله يخش برجله اليمين , و يفتح عينيه جاااامد ..... لا لا مش جامد كده لا تقع !
انا مراهق !
و احنا اطفال بنكون كلنا شبه بعض , ولاد و بنات مافيش فرق , كلنا عنينا واسعه , اكتافنا ضيقه , و شبه اجسام مسطحه بتجري فى الشارع و بتتدحرج فوق بعضها - و هما بيتخانقو ع الاوستيك اللى كسبان ! - , و " بيتدألج " الوقت هو كمان و ما بيفضلش الحال زي ما هو , الولاد اكتافهم مش بتبقى ضيقه , و البنات مش بتبقى مجرد اجسام مسطحه بتدحرج فى الشارع !
فى الفتره ما بين 12 سنه كده لحد 14 - و لكل قاعده شواذ على فكره , فى قبل و فى بعد كده - بتبتدي فترة النمو السريع فى حياتنا , او زي ما بنسميها المراهقه , و فيها بنوصل للطول النهائي بتاعنا تقريبا , و كتير قوي نسمع جملة : يااااه , ده انت كبرت قوي !
اول علامه من علامات المراهقه هي انك تنام قصير تصحى تلاقى نفسك بقيت طويل فجأه , و هدومك كلها تبقى قصيره و ضيقه , و اهلك مش عارفين يودوك فين !! ..... كمان ممكن تلاقى نفسك بقيت رفيع قوي , او تخين ....... بس ما تقلقش لأن بعد كده بيرجع الجسم يتظبط تاني , و ساعات تلاقى انك بقيت جعااااان جدا , و ما بتشبعش ابدا , و ساعتها بتكون دخلت فى طور .... لا لا مش تور , بقول " طور " النمو !
و اكيد طبعا ما ننساش حاجه مهمه جدا , و رخمه جدا جدا , و هي ...... حب الشباب
فى فترة المراهقه العرق و الدهون اللى بيفرزها الجسم بتبقى اكتر من المعتاد , و حيث ان مسام الجلد صغنوووونه , فبتتسد على شكل نقط سوده ( اللى بنشوف البنت فى الاعلان بتقول : الروس السودا ...... ولله زمان يا شهر الصوم ! ) , و لو النقط دي ما اتعالجتش بتتطور و بتكون حبوب الشباااااب .... تاتاتاتاااااا تششششششششش !
و اكيد اكل الدهون و السكريات و شرب البيبسي و البيريل ( اللى بتخليك تسترجل !! ) بيزود الموضوع جمال و حلاوه !
طيب , نعالجها ازاي يا واد يا تيييييين ؟؟
ببساطه , نغسل وشنا كتيييير ( بالصابون ابو ريحه او الطبي ) , و نقلل من اكل الحاجات اللى بتزودها , و لو الحاله ما اتحسنتش - يعني لقيت نفسك بتقلب على شكل واحد تاني - يبقى لازم تروح لأقرب دكتور امراض جلديه ( او انف و اذن و حنجره , مافيش مشاكل يعني :) )
لحد هنا بتكون علامات المراهقه واحده عند الولد و البنت , بعدين بيروحو فى طريقين مختلفين ( زي فرعين دمياط و عبدالحميد كده ) و بتختلف علامات المراهقه من الولد و البنت , ف بالنوسبه للولاد :
بيبتدي صوتهم يتخن , و يعلى و يوطى فجأه لوحده ( الاحبال الصوتيه بتكون لسه ما أتظبطتش قوي يعني ) , و كتير يتقالهم : و طي صوتك اللى عامل زي صوت الدب ده ! , و بيتطلعلهم شنب و وراه الدقن اللى كتير منهم بيبقو فرحانين بيها و سايبينها علامه على انهم بقو رجاله , لحد ما أمن الدوله بيقبض عليهم فى الآخر !! , و بيبتدو التحول لكائن اشبه بأنسان الغابه .... فبيعرضو و يروحو الجيم ( على شان يعجبو البنات ! )
و اخيرا بتحصل ظاهره مرتبطه بالفتره دي و هي الـ W.D اللى هي الـ wet dreams او " الإحتلام " يعني , و هي خروج الـ semen ( السائل المنوي ) من المراهق و هو نايم , و دي ظاهره صحيه و طبيعيه جدا , لأنه بيتخزن فى مكان زي المخزن , و الطبيعي ان كل ما المخزن يتملى , لازم يفضى على شان يبقى فيه مكان للحاجات الجديده !
اما البنات :
ف بتبتدي معالم الأنوثه تظهر فى البنت , و تظهر معالمها و " تضاريسها " و اكيد صوتها بيبقى ارق من الاول و ارفع ( فى بنات بترفع صوتها " الرفيع اساسا " و هي بتكلم اسامه منير , عادي برضو)
و تبتدي البنت تعمل فورم فى شعرها و تسرح بقى ( بعد سنين اللعب و الدحرجه فى الشارع ) و تهتم بنفسها و تقف قدام المرايه كتير ..... جدا
و اخيرا برضو بتحصل ظاهره بتبدأ مع سن المراهقه و بتنتهي عند سن الخمسين تقريبا , و هي الـ PMS اللى هي الـ premenstrual syndrome او " الدوره الشهريه " يعني , و هي ببساطه خروج البويضات للرحم كل 28 يوم اللى بيستعد لأستقبالها استقبال فاخر و مذهل ( ولا استقبال المنتخب كده و هو راجع من كاس الأمم ) و بيوفرلها دم اكتر , اللى بيبقى فيه الأكل و الهوا و الميه و النور و كله كله , و إذا البويضه ما لقيتش اللى يأنس وحدتها هناك تزهق و تدوب و تسيب وراها الأستقبال بتاع الرحم اللى بيفضل هناك من 10 لـ 14 يوم تقريبا ( يمكن تغير رأيها وللا حاجه ) و بعدين يزهق و يمشي هو كمان و يسيب الجسم كله , و هنا بتحصل الـ PMS و بتستمر من 3 لـ 6 ايام تقريبا , بس الاهم و اللى لازم نعرفو ان كمية الدم اللى بتسيب الجسم و تهرب دي بتبقى قليله جدا جدا
كمان اللى بيبقو لسه جداد فى فترة المراهقه الموضوع ما بيكونش منتظم عندهم قوي و ممكن الـ PMS تحصل كل 6 او 8 شهور مثلا ( البويضه بتوه فى السكه ساعات ! ) و بعد كده الحكاية بتتنظم و بتبقى مره واحده بس كل شهر
لحد هنا و علامات المراهقه بتخلص
فى مننا كتير بيتكسفو من التغييرات اللى بتحصلهم , و فى اللى بيحاول يخبيها كمان - يحلق دقنو او يلبس حاجات واسعه او طويله - و هنا بنقول ان الموضوع ما يكسفش ولا حاجه , لأنو مش عليك لوحدك , مش انت اللى لوحدك بتتحول و فى طريقك انك تبقى شاب او شابه , بص حوليك .... كل اللى فى سنك بيحصلهم نفس الحاجات و يمكن اكتر كمان
لازم ما تتكسفش , و تكون واثق من نفسك جدا جدا
و من حقك انك تتناقش فى التغيرات دي مع اهلك او حد تكون واثق فيه و في رأيه و خبرته
و لو الحوار بيبقى مخجل , ممكن تستعمل الاختصارات اللى مكتوبه فوق دي
صدقنى , الموضوع هايبقى اسهل بكتير جدا , لأن الالفاظ عامة اللى بنحس انها مخجله , باللغات التانيه بيبقى وقعها عادي جدا
و بكده خلص اول جزء فى البوست ده
استنو بقى البوست الجاي و فيه الجزئين التانيين
و لو مش حابين عامة اني اكمل فى الموضوع ده قولو
فاكس علييييييييييك
( انا اللى راسم الصوره دي على فكره )
D=
|
بووست مهم جداااااااااا
ولو انت كمراهق متكلمتش مين اللى هيتكلم
مستنيه البوست اللى جاااااااااى
برااافو ادهم اسلوب محترم ومعلومات علميه مكتوبه بدقه:)
good job !!
elpost 7elw ya adham
keep going
waitin for the second post !!:D
u rock !
ربا
احرجتى تواضعي ولله
هيهيهيهييي
مرسي جدا جدا
ع الكلام الجمييييل
...................
مييييي
مرسي قوي
بجد الف شكر ع التشجيع ده
انت اللى رافع روحي المعنويه ولله
:)
خليك متابع بقى
:)