مختلف
أه ولله فعلا مختلف
ايه هو ده ؟!!

البوست ده طبعا ! .... مش قولنا كده المره اللى فاتت !!
مختلف ليه ؟!
لأني مش انا اللى كاتبه , و مالوش اي علاقه بالمراهقه اساسا
مين اللى كاتبه ؟ و عن ايه ؟
اللى كاتبه هانعرف هو مين فى الآخر ..... اما البوست فهو عن حاجات فى حياتنا , ظهرت جديده , او بقت غريبه جدا و منتشره " سو موت " يعني !
تقدرو تعتبروها بوستات صغيره تحت بعضيها كدهون , و اول موضوع اسمه .......

عبده العبيط ... !!

هو ليه ارتفع معدل الزهايمر فجأه فالبلد ..!!
مش فكل حاجه ..
بس فكل حته ..

التجمل اللى بقى نفاق عامل زى المكياج اللى بقى ماسك .. زاد عن حــــــده
!!!

******************************************************

كفي نفسك

من زمان مكتبتش بالاحمر .. لكنى تخليت عن فكره ان الاحمر للرومانسيه فقط
وده بعد اكتشافى ان فى حجات كتير حمرا لون الورد و الدم و الحب و مش رومانسيه ..
فى خطوط حمرا و حقايق حمرا و فى كمان العين الحمرا اللى عرفتها جديد

انا بفكر ابطل اتفاجىء ..
او كنت , لحد ما اكتشفت ان اللى بيبطل يتفاجىء واحد من اتنين :

يا واحد مات .. نقراله الفاتحه
يا واحد عرف كل حاجه .. وده مات برضه
يا واحد مبقاش فارق معاه حاجه .. و يبقى مات برضه

كده هتتفزلكو و تقولو انهم بقوا 3 .. تؤتؤ لا
كلهم واحد مات برضه
اذا لا مفر من انى اتفاجىء

سألت واحد بيخدم فالجيش .. قولتله : اتعلمت ايه ؟
كنت بعمل عليه دكتوره نفسيه اسم الله .. كنت متوقعه انه الجيش بيربى رجاله و اللكلوك الكتير اللى بتقوله الستات و اللى بيبقى نابع طبعا من خبرتهم الكبيره مع الجيش !!
قصر الكلام .. قاللى ان الجيش علمه ان محدش هيخاف عليه اكتر من خوفه على نفسه .. فالمفروض انه مبخافش على حد اكتر ما يخاف على نفسه !!
انا الحقيقه وقفت عند الجمله دى كتير اووووووووى ..

فاجئتنى بصراحه .. ايه ده ؟!
يعنى انا محدش هيخاف عليا فيوم من الايام !!!!!
و كل القصص و الاغانى و الاساطير اللى عن فارس الاحلام اللى هيجى على وسيله ما بيضه محيره العالم من الحصان للتوكتوك .. كل ده كان ولا حاجه !
يعنى المفروض انى اعيش و انا عارفه انى مش فارقه مع حد ولا المفروض حد يفرق معايا !

كنت و بلا فخر من الاشخاص الذين لا يشعرون ببهجه العيد دون العديه و الملابس الجديده و فيلم العيد
كان ذلك طبعا .. قبل منع لمس ارض الشارع طوال ايام العيد .. بسبب التحرشات
كنت قد اعتدت لصغر سنى ان اتلقى انا العيديه من كل افراد اسرتى و عائلتى الكبيره .. ولكن ان اعطى انا عيديه .. كان هذا هو الجديد !!

العام الماضى ذهبت ككل عام الى السينما
شباك التذاكر و الخطوات المعتاده من اختيار الفيلم للمقاعد ثم عد ثمن التذكره و اعطاءه للعامل
وهنا نظر اليه العامل بتعجب واستنكار .. جعلنى اعيد عد النقود فى يده لعلى اعطيته اقل من الثمن المطلوب
واذا به ينظر الى و على وجهه ابتسامه صفراء علمت سر صفارها فيما بعد و يقول ( كل سنه و حضرتك طيبه )
بسذاجه الاطفال فرحت بالمجامله و قولت له ( و حضرتك طيب ) ..

وبس !!

وقفت صامته فى انتظار التذاكر و الرجل لازال ينظر الى .. ومن شده سذاجتى بدأ يوضح موقفه ويسألنى
( حاف كده ؟؟ من غير عيديه .. مش انتى خدتى عيديه !! )
وهنا توقفت عند الموقف لاتنهاء الفيلم و خروجى من القاعه و انا لازلت احاول ان افسر .. لماذا وجب على اعطائه عيديه و ليس هو وحده .. فعامل الكافتيريا و عامل النظافه والعامل الذى يرشدك اللى مقعدك فالقاعه .. كلهم يقفون امامك بنفس الابتسامه الصفراء العريضه والتى اصبحت بالنسبه لى كلافته كبيره مكتوب عليها ( منطقه خاليه من الدم و الكرامه ) .......

هذا الموقف دفعنى للنظر الى التذكره و قراءه فيما دفعت 20 جنيها لاجد نسبه مئويه من قيمه التذكره تذهب لصالح الخدمات التى يقدمها العمال ..
اذا لماذا عاملنى الجميع على انهم كريم ابن اختى وطالبونى بعيديه !!
كان هذا العام الماضى ..

فى هذا العام ..
قررت ان ادخل فيلما فى الايام العاديه و قبل قدوم رمضان .. وفى ارقى الاماكن بمصر ..
قمت بكل الخطوات المعتاده و لم اسمع احدا يقول لى ( كل سنه وانتى طيبه )
فقلت الحمد لله
حتى دخلت القاعه .. واذا بالعامل المسئول عن ارشادى لمقعدى يقول لى ( كل سنه وانتى طيبه )

كدت افقد عقلى ( هو عرف ان عيد ميلادى كان من اسبوع منين ؟؟ )
فالعيديه .. و رغم انها ليست من حقه
كنت اقول انها عيديه او شحاته مقنعه برداء العيديه لحفظ الكرامه
ولكن ..
هل اعتبر الشعب المصرى دخولك للسينما مناسبه قوميه تستحق ( كل سنه و انت طيب) و عيديه !!

فالعام الماضى .. كانت الشحاته فنظرى .. كلمة لله
و الان اصبحت الشحاته لله و كل سنه وانت طيب ..
فى عيد ميلادى القادم .. انا اللى هقول للناس كل سنه وانتو طيبين
و اللى هيقولهالى بعد كده .. هقوله معييش فكه !

حينها و بما انه لا يوجد دم ولا كرامه قد اجد من يقول لى ( افكلك ؟ )

******************************************************

عقلي أم برائتي ؟

لم احلم يوما ان اكبر قبل ميعادى ولو بساعه .. ولكنى دائما كنت احلم ان افهم و استوعب الدنيا قبل ميعادى بأكبر وقت ممكن .. و اليوم .. اكتشفت انه لا فرق بين الاثنين ..
فكبر السن .. يضعف الصحه .. و يزيد الامراض .. و يقلل القدره على الاسمتاع بالحياه .. و كذلك هو فهم الحياه

كنت كتيرا ما استغرب ان الاطفال وحدهم هم اسعد الناس و ابرعهم فى القيام بفعل الحياه ..
عندما كنت طفله كنت اراقب الكبار .. واكرههم .. معقدين الفكر .. شديدى الحسبان لكل خطوه و كلمه و فعل .. كنت اقول فى سرى لدميتى .. انا و انتى لن نصبح يوما مثلهم ..

لطالما احبت فىّ جدتى تطلعى للمزيد من المعلومات .. و لكنها قالت لى مره .. لن يعجبك كل ما تتطلعين لمعرفته ولكنه سيفيدك
ولكم كنت اتمنى لو لازلت حيه حتى اليوم لأسئلها بما افادنى ؟؟

لطالما عشت بعقل قال عنه الكثير اكبر من سنى .. و الحقيقه انى كنت اقتل برائتى بذلك العقل .. و اجبر غيرى على تحميلى مسئوليات ما كان ليفكر فى تحميلى اياها .. فى حين كان اقرانى لازالو يلعبون بالطين
أانا ربحت وقتا اضافيا اعيشه وانا اكثر فهما للدنيا و هم خسروا ذلك الوقت ؟؟
ام انا خسرت وقتا اضافيا ارى فيه الدنيا بلون ازهى .. وهم سرقوا منها تلك البسمات الصافيه !!

الان فقط زال العجب عن سعاده الاطفال .. فهم يعيشونها ابسط بكثير .. يشعرونها ولا يفكرون فى تفسير ما يقف امام برائتهم .. يلعبون بالدمى .. يلعبون بالدنيا .. وفور غيرتهم من كبر حجم الكبار .. و رغبتهم فى تقليدهم .. ظنا منهم ان من يستطيع ان يحضر اللعبه يلعب بها اكثر مِن مَن تُشترى له .. يبدأون فالتفكير ..

يتوقفون عن اللعب .. فيكبروا
وبعد ان كانت الدنيا هى الدميه .. يصبحون هم الدمى .. و الدنيا هى الطفل المجنون الطاقه .. جامح الخيال .. الذى لا تعرف ما قد يخطر له ان يفعل بالعابه .. فبعضهم يكسرها .. وبعضهم يقذفها في الهواء لتعلو ثم تقع في الطين .. و بعضهم .. لا يمكن التنبؤ بافعاله

و ان كان فهم الدنيا لن يسعدنا فيها .. و ان كانت لا تساوى عند الله جناج بعوضه .. اذن فيم اضعت احلى ايام طفولتى ؟ وانا فى يدى لعبه وفى اذنى كلام الكبار و فى عقلى الف سؤال .. لازلت ابحث عن اجاباتها .. اعثر على واحده لتقودنى لسؤال اصعب .. حتى وصلت بالاجابات ان اطفأت كل الوان الحياه

كلماتى اليوم تذكرنى بأول جمله كتبتها على صفحتى .. فهى اصدق تعبير عن ما سبق
الخبره .. هى المشط الذى تهديك اياه الحياه بعد ان تفقد شعرك

ترى هل كان من مصلحتى ان افقد الثقه و البرائه مبكرا ؟؟
ام انى قد فقدت و قبل ان ابدأ كل ما كان يزين طريقى لقبرى ؟
و ها انا كالعاده اكتب ما عرفت ولا استفيد به و انهى كلماتى بأسئله جديده !

********************************************************

بوست طويل حبتين .... مش كده ؟

معلش , بس اعتقد انو يستاهل , ولا ايه ؟؟؟

طبعا " دوقتّشي " كلو عايز يعرف مين اللى كاتب الكلام ده

لما بنيجي ع الدنيا دي , اول اتنين بنقابلهم فى حياتنا الام و الـ.... لا لا مش الدكتور طبعا !! .... الأب ...... بنلاقي اتنين بيحبونا من غير شروط ولا مصالح , اتنين بيعملولنا كل حاجه تقريبا في بداية حياتنا , الأتنين الوحيدين اللى فى الكواكب السبعه ( فى اتنين فرقعو ! ) اللى بيبقو نفسهم بجد اننا نبقى احسن منهم , اتنين هما الدفا و الحنيه و الرأي السليم فى اي وقت و طبعا طبعا .... المصروف :)

و مع الوقت بنكبر و و بيبقى لينا احلام و خطط و طموحات و افكار , و ساعة التنفيذ .... تلاقي الاهل واقفينلك و بيقولو بقوه : نفر يعني نفر , انتهى ! ..... و طبعا بنرجع زعلانين و مخنوقين منهم جدا , و مش بعيد يبقى جوانا رغبه قويه جدا اننا نسيب البيت و نهرب , و على الاقل نتمنى ان يجيلهم هما الاتنين عقد عمل فى الخليج لمدة قرن !

و احنا صغيرين خالص : الاهل كل حاجه فى حياتي

لما نكبر شويه : انا بحبهم قوي , و بحس اني مطمن و انا معاهم , مش عايزهم يروحو فى حته ابدا

بالنوسبه للأهل فيمكن شويه حلوين منهم بيشجعو سياسة العنف و نظرية : اللى يضربك اضربو ياض ! , و ان الراجل مكانه الطبيعي الشغل و بس و هو فى البيت " سي السيد " اللي كلامه و رأيه بيمشو من غير نقاش ولا تفاهم , و لما يحرك حواجبه الكل يجري من الرعب , و طبعا ما ننساش ان الشنب هو عنوان الرجال و من غيره يبقى نقرى الفاتحه على الرجوله اللى بتتقلب فى تربتها ......... اما البنت فمكانها الطبيعي البيت , تسيق و تغسل و تطبخ و تفلي العيال , و لازم تكون " امينه " اللى ما بتقولش غير " حاضر " وبس . و بالتالي بيطلع عندنا جيل من المراهقين العنيفين , و المراهقات اللى شايفين عن اقتناع - و عايزين غالبا - ان آخرتهم هايقعدو فى البيت و يتجوزو !

اما التلفزيون , فحدث " يا فرج " ( ما حادش يقولي مين فرج ده !! ) , و يمكن اكتر حاجه بتدينا نصايح مهمه جدا على شان نكون رجاله هي ...... عارفينها طبعا ..... اعلانات بيريل اللى بتخليك تسترجل .... اوعو يا بنات تشربوها , احسن لسه " فاتينات " شرباها و لحد دلوقتى بتحاول تعالج صوتها اللى تخن بطريقه غريبه جدا ! .... و زي ما الاعلان بيقولنا :

على شان نبقى رجاله لازم تكون عربياتنا ريحتها وحشه و مش نضيفه , و لازم نتكرع - سوري فى اللفظ ده و فى اللى جاي بعده كمان ! - فى اى وقت و اى مكان و بصوت عالى لو امكن ... لأن ده بيساعد على الهضم و بيريح المعده , بس نخلى بالنا لأن البنات ماينفعش تعمل كده لأن ده للرجاله و بس , و على شان تكون راجل اوعى تعلق على شخصية حد و تقول انها حلوه و كويسه , و كمان لازم تكون زي الروبوت ما بتعيطش غير لما تشوف الكوره , و طبعا و انت بتشوف الكوره , بيريل هاتطلع الراجل اللى جواك و بدل ما تعيط هـ " تنعر " زي حيوان " الاسد " و مش هاتعيط اكيد !

على شان نبقى رجاله لازم نبقى اندال و نضرب صحابنا لو لاقيناهم بيتخانقو مع ناس كتير , و مافيش مشاكل لو ما اهتميناش بصحتنا و بوزننا , لأن الكرش ما يعيبش الراجل ( جيبه و بس ! ) .... و اما اختراع الفورشه , ف مالوش لازمه لو شعرك وحش لأنك هاتبقى شايله , و الكوستر كمان مالوش لازمه لأن الازايز بتتحط فى اي حته ...... اما الافراح , فدي حاجه رخمه و الراجل بيقعد مكشر فى اى فرح لأن مافيش فرح جبار ... و لازم تحط الانكل على الركبه و رجلك تبقى فى وش اللى جمبك ... و فى الاخر نفكركو بأن كل اللى اسمهم حسام رجاله , و ان الورد عيب الراجل يمسكه !

اما البنات , فلازم تكون عارفه 100 الف ولد , و بيكلموها و بتكلمهم فى اي وقت , و طبعا لازم يكون عندها بروفايل ع الفايس و هدومها ع الموضه ( اى كان نوعها ) , و يا سلام بقى لو عندها بنطلونين رش من اللى بيتباعو فى ازايز سبراي ( اصلهم من كتر ما هما ضيقين بيترشو ما بيتلبسوش ! ) , و اربع خمس بلوزات عليهم الأرنب اللطشيف ابو بابيونه , و يا سلام لو بقى شنطه و جازمه عليهم اسم الماركه بتاعتهم بالـ " بربرق " على شان كل الناس تعرف انها غنيه و بتجيب ماركات ( زي ماركة كويك " سرفر " المشهوره ) ... و بكده تكون بنت ستايل و متحرره عايش القرن الواحد و العشرين كما يجب !

زي ما الحكيم قال : العقل زينه فى الفترينه ( او البترينه , زي ما بيقولو ! ) , لو فكرنا شويه هنلاقي ان الكلام ده مش صح خالص و مالوش اى علاقه بالرجوله ولا بالأنوثه , و ان كل اللى فوق ده معناه ان الراجل المفروض يكون حيوان , دوشمه ( يعني صخره كبيره للي ثقافتهم فنزوللي ) , و كمان روبوت او آله بتضرب الاول و بعدين تفكر ( و يمكن ما تفكرش اساسا ) و قا موسها مافيهوش تفاهم او نقاش . و كمان الكلام ده معناه البنت يا اما تكون مالهاش شخصيه , او من مشجعي العوده للطبيعه و الأنسان البدائي اللى كان بيلبس ورقتين توت على ودانه و بس !!

الراجل يا جماعه انسان , كائن حي , بيحس و عنده مشاعر و احاسيس , من حقه يتألم , يحزن , يفرح ... و اكيد من حقه انو يعبر عن المشاعر دي سواء انو يقول : آه , او يعيط , او يقوم و يطنطط مثلا , ولكن حيث انو راجل فلازم تكون التعبيرات دي بالطريقه المناسبه لكونه " الجنس الخشن " , يعني آه عن آه تفرق .... لكن انو ما يعبرش عن مشاعره و يفقد اللى بيميزه كأنسان , اكيد لأ

اكيد لأ , المفروض و الطبيعي ان كلمتك و رأيك هما اللى يمشو , لكن بعد مشوره و تفاهم و اخدان رأي اللي حواليك , و بعد كده اللى شايفه الاصح اعمله .... الحياه مشوره , مش عافيه و خلاص لأنك الراجل و المتحكم , و ساعتها ... هتلاقي اغلب قراراتك صح و ميه الميه ( زي فول الجمعيه :) ) , اما الافراح و المناسبات فهي دايما اوقات كويسه جدا للضحك و الهزار , و المجاملات على شخصيات الناس و لبسهم بتبقى هايله , لأنك ساعتها بتبقى راجل زووووق و جنتلمان ( او كولمان , بيس يعني ! ) ....

فى حاجات تتحس ........ و ما تتقلش
توجع فى القلب ........ و ما بتبانش
و افضل على طول حيرانه مابين
طب اقولللللللللللك ولا ما اقولكش ؟!

يا سلام يا سلام ع الكلام الجميل , الله يرحمك يا ست نانسي ( ونبي بتعجرم الجو برضو) ...... المهم , زي ما نانسي بتحس حاجات و ما بتقولهاش , برضو المراهقين عندهم حاجات كتشير كتشير كتشير تتحس و غالبا ما بتتقالش !!

و احنا صغيرين ايام ابتدائي كده , كنا دايما بنحب ان صحابنا يبقو من نفس النوعنا , و اكيد الانتشيم و الشله كذلك .... و تلاقى شلل الولاد و شلل البنات فى صراع مستمر و مظاهرات قوميه عنيفه اللى طبعا كان شعارها : البنات صراصير البلاعات .... لمونه لمونه , الولاد مجنونه ! , و اد ايه كنا بنلاقى سعاده غريبه و احنا بنتريق على بعض , او لما ولد يجيب عنكبوت بلاستيك و يجري بيه ورا البنات , و هما يصرخو و يصوتو ! , و دايما البنات يكونو واخدين فكره عن الولاد انهم كائنات مش مؤدبه , و متخلفه , و يانبعد عنهم يا نتريق عليهم ! .

غالبا شلل الواد بيبقى اتجاهها رياضي ( و الرياضي ده معناه الكوره و بس طبعا ) و خناقات و وقوف فى الشارع و الفرجه على افلام اميتاب " بشناب " , اما شلل البنات فبتبقى مختلفه جدا , عرايس و لعب بينك فى بينك , و طبعا حفلات الشاي و طقم المطبخ السعيد ( اللى بيعلم البنت ازاي تطبخ الهوا و الميه بطرق مختلفه و لذيذه !! ) , و اكيد الشلل دي بيبقى كلها لعب و ضحك و اسرار , و اكيد رغي و رغي ورغي ...... و رغي !
ونكبر , و تكبر مشاعرنا معانا ...... بنتغير , و مشاعرنا بتتغير معنا , و نخش مرحلة المراهقه ..... و الغريب جدا , ان مشاعرنا بتخش معانا برضو !!

زي ما احنا عارفين , اننا بنوصل لمرحلة المراهقه فى اوقات مختلفه , يعني مش كل اللى فى نفس السن بيبقو مراهقين فى وقت واحد , و هنا الصحوبيه و الأنتمه اللى بتبقى مابينا و احنا صغيرين بتختفي فى معظم الاوقات , فمثلا نلاقى ولدين او بنتين صحاب قوي و انتيم لدرجه غريبه , و فجأه يبعدو ع بعض , و هما مش فاهمين ليه ولا اللى حواليهم فاهمين ليه !

فى مرحلة المراهقه الميول بتختلف و بتتغير و التفكير ذات نفسه بيبتدي ياخد طريقه ( ايوه , ع الدائري ) فى انو يبقى تفكير منظم , مش مجرد تفكير طفولى و خلاص , و شلل الصحاب الحزبيه بتتفك و بتتكون شلل جديده فيها ولاد و بنات , فممكن قوي بنت تبقى مهتمه بالأشاعات و كل الاخبار الجديده ( هوايه منتشره عند البنات على فكره ) و بهدومها و الميك اب ( بيسمعو اغنية : ما تزوقيني يا ماما كتير جدا فى الوقت ده على فكره ) , و نجوم السينما و الطرب الاصيل :) , و صاحبتها الانتيم لسه بتلعب بالعروسه " الحربي " و شايفه ان نجوم السينما مكانهم الطبيعي التلفزيون و الجرنان و بس

و ممكن كمان نلاقي ولد ابتدى يسّرح ( و يستحمى ساعات ) و يظبط شكله و هدومه و يلمع " كاوتشه " و يبتدي يهتم بالبنات و يحاول يكون لطشيف معاهم , و يا سلام سلم بقى لو بنت احتاجته فى حاجه ولا اتكلمو مع بعض لمده طويله شويه , بيبقى فى قمة السعاده و الانشكاح ....... و برضو تلاقى صاحبه الانتيم لسه مهتم بالكوره و المصارعه و بس !

طبعا اختلاف ده بيخلى الاتنين يبعدو عن بعض , لأنهم بيبتدو يدورو على ناس جديده زيهم فى التفكير و الميول لحد ما الاتنين بيستقرو فى مرحلة المراهقه , و يا اما بيرجعو انتيم تاني , يا اما بيكونو لقو ناس متوافقين معاهم اكتر , و هنا الانتيم بيبقو صحاب عاديين و خلاص , حتى لو دخلو من باب المراهقه مع بعض , ساعات كتير برضو بيختلفو و ممكن ما يفضلوش انتيم !

حاجه زي كده ممكن تعملنا حيره جامده , و سؤال ييجي فى بالنا كتير : هو احنا ليه بعدنا عن بعض ؟؟؟ و نفتكر ايام زمان لما كنا ما بنبعدش عن بعض غير وقت النوم ( و ده بعد " عكشه " كبيره مع الاهل ) , احساس بيبقى غريب و رخم جدا لما اقرب الناس ليك يبقى مجرد حد عادي زيه زي اي حد تاني , و ممكن ساعات تشوفه اساسا و ماتسلمش عليه ... مش كده ؟

و كتير انفعالاتنا بتتغير بسرعه , يعني ممكن تحس بسعاده كبيره , لما تكون مع صحابك او فى لمه كبيره جميله , و فجأه تحس ان قلبك مقبوض و زعلان , و حاسس انك نفسك تقعد لوحدك ........ او ساعات تحس انك بتفكر و بتتصرف كأنك حد عاقل و كبير , و اللحظه اللى بعدها تتنرفز و تجنن زي العيال ( و يمكن يبقى نفسك فى مصاصه او جيلي كولا على شان تهدى ! ) .

غالبا ما بنعرفش ليه اللى بيحصل ده , و ليه فى وسط الفرحه نزعل او نتنرفز و نكتأب فجأه ........ اللى مانعرفوش ان معظم التينز بيحصلهم التقلبات " الموديه " دي , لأن ماحدش مشاعره بتتحول من الطفوله للنضج فى لحظه واحده , و هو ذات نفسه ما بيتحولش من مراهق لحد كبير فى " شلحه " من الزمن , فساعات نلاقي المواضيع ماشيه " بيرفكس " و ساعات تانيه كلو يخش فى بعضه و بتبقى لخبطه كبيره لطشيفه جدا ( زي لما تكون معدي من قدام ناس تعرفهم و هوووووووووب ! , تتكعبل و تتقلب على وشك زي الفطيره الحزينه )

و اكيد اكيد بنحس فى اوقات كتيره ان مافيش حد فاهمنا , و نحس بالوحده المطلقه و انو مكتوب علينا اننا نفضل كده وحيدين و ماحدش فاهمنا طول عمرنا , و لكن اللى مانعرفوش ان زي ما في ناس كتير فى نفس سننا بيمرو بنفس الاحساس ده , فى كمان وقت و هايعدي و التفكير و الاحاسيس هاتبقى مظبوطه و تمام جدا .

و بعدين الـ...... يوه ! , مين اللى رافع ايده هناك ده ؟! .......... بتقول ايه ؟؟ ........... اااااااااه , ونبي سؤال برضو بيفرض نفسيته كده اللى هو : يا ترى ممكن احب و اتحب ؟؟

كتير جدا بنبص فى المرايه و بنتمنى ( او بنتخض ساعات , عادي يعني ) حاجات كتير : ياه لو كانت مناخيري اصغر , شعري لونه اصفر ( زي مهند كده ) , عيني كانت اوسع او بشرتى اصفى ( و ممكن برضو الرموش تبقى اطول ... يعني هي جت عليها !! )
الامنيات دي بيبقى بس الهدف منها انك تبقى - من وجهة نظرك - احلى , على شان اللى حواليك ( و خاصة اللى عكس نوعك ) يعجبو بيك و يحبوك , و تعرف تكلم اى حد فى اى وقت بكل ثقه

امنيات كتير فى حياتنا , لو و لو و لو .....

زي ما قولنا المره اللى فاتت ان كل 28 يوم بتحصل الـ PMS و بعدين بتخرج الـ E. او اللى هي الـ Egg يعني " البويضه " فى رحله للرحم , و هي ماشيه كده بتعدي على حته اسمها " قناة فالوب " و هناك ( و هي بتتمشى فى القناه كده ) ممكن تقابل بالصدفه واحد من ملايين الـ Sp. او الـ Sperms " الحيوانات المنويه " , اللى بتعجب بيه و بيندمجو مع بعض لحد ما يبقو واحد , و يكملو الرحله اللطشيفه للرحم اللى بيكون مجهز الأستقبال الفاخر اللى بيقعدو فيه لمدة تسع شهور ( اقامه خمس نجوم , فول بورد ) بيكبرو فيها و بيكترو من اتنين بس ..... لملايين الخلايا اللى بتعمل البيبي , و اللى كنا فاكرينه سكر تحت السجاده !!

طويب يا واد يا تين ..... و الـ Sp. وصل للقناه ازاااااااي ؟؟

برضو سؤال وجيه و بيطرح نفسه , و كمان...... محرج !

زي ما احنا عارفين , ان ربنا خلق من كل كائن حي تقريبا الولاد و البنات , و اكيد يعني التنوع ده مش على شان شكلهم حلو !

انما على شان يقدرو يجيبو كائنات تانيه زيهم ( مش هديه ع الشامبو زي من " الهايبر " ! ) , و على شان يقدرو يجيبو الكائنات اللى زيهم دي بيحصل عمليه اسمها الـ L.M او الـ Love Making ( ليها كذا كلمه بنفس المعنى على فكره ) , و اللى بيطلق عليه بالعربي الفصحى " الجماع " , و العمليه دي بتختلف من نوع للتاني , و كمان بتحدها قوانين و تقاليد حسب المجتمع و الدين و الثقافه ( يعني اللى بيحصل هناك , اكيد اكيد ... مش بيحصل هنا ! ) , و الـ L.M هي طريقه من طرق اظهار الحب بين الزوجين , و يمكن تكون اقواهم , لأن لما تلمس حد ( زي انك تحضن باباك او تبوس ماماتك , او حتى تحط دماغك على رجلهم ) بيبقى نوع من انواع اظهار الحب او طلبه .

ام هند ( اللى هي المهم يعني للناس اللى ثقافتها غزل محلاوي ) , ان لما بيحصل الـ L.M بيحصل اتصال بين الطرفين و اللى بيخلى الـ Sp. ياخد طريقه للقناه و ياخد الـ E. من ايدها على الرحم , صحيح ساعات بتكون عينيها زايغه و بتاخد صاحبتها و بياخدو اتنين يوصلوهم - و هنا النتيجه بتكون توأم مش شبه بعضهم - او ساعات تانيه بتكون مجنونه و لما توصل بالسلامه تقسم نفسها اتنين - و هنا بتكون النتيجه توأم " مسخه طلق الأصل " - بس عامة العادي و المعروف انها بتكون عاقله و راسيه .

و بكده نكون خلصنا حته محرجه برضو , و اللى ( او هايكون ) لينا معاها ذكريات مذهله فى المدرسه فى حصص العلوم وسط الكومينتات اللطشيفه و الاحراج اللى المدرسين بيبقو فيه , و اللى رغينا فيهم قبل كده.

ســــــــــــــــــــريــــــــــــــــــــه !!

D=

و حيث يعني اننا بلوج محترم

فإحنا برضو عملنا البوست ده و اللى فات من مراجع موثوق فيها

مش اي كلام و السلام

و هي :

كتاب : ما يجب على المراهق ان يعرفه , من سلسلة : دراسات سيكولوجيه

مجموعة فتاوى من دار الافتاء و خلافه

مجموعة توبيكات ع النت طبيه

و شكرا