غنيلهم تركي يا لوسي
Teen
"مهند .... يقبر قلبي ولله"
جمله تركي محترمه اهه على شان تعرفو بس ان مثقف ( أيوه ده تركي , أمال هايكون ايه ؟ , لبناني مثلا ؟!! )

المسلسلات التركي , بقت حاجه منتشره جدا فى الفتره الأخيره ... و يمكن اول مره نسمع كلمة فيلم او مسلسل او اغنيه تركي , كانت ف فيلم " إشاعة حب " لما لوسي قرر يغنلهم تركي ( بطوخ بطوخ , أتنسيو أتنسيو ! ) . اما ب النسبه لينا أحنا ك عالم تينز , ف اول حاجه تركي اتكعبلنا فيها ف حياتنا كانت "مشلسل" نور .... و بعديه طلعلنا سنوات الضياع , عاصي , ميرنا و البخيل , العشق الممنوع . و غيرهم .

و مع كم المسلسلات التركي اللى ملت كل القنوات لدرجة انها خرجت من التلفزيون و غرقت كل اللى بيتفرجو ( أم اعتدال غطست , و لسه ما طلعتش لحد دلوقتي ! ) , الناس ابتدت تتأثر بيهم , و طبعا كان المراهقين هما اول ناس اتأثرو . سامع حد بيقول فى الكنبه اللى ورا : ليه المراهقين اتأثرو كدزه ؟؟ و ليه الرغي الكتير و الكلام ع المسلسلات دي  ؟ , مع إنها طوييييييييله جدا , و المفروض ان الطويل ممل .... ده إحنا مسلسلاتنا 30 حلقه , و بتبقى ممله جدا , يا دوب تشوف اول حلقه و آخر حلقه على شان تكون لميت كل الأحداث المهمه ! .

لو بصينا و ركزنا و تابعنا و بحلقنا , هنلاقي ان المسلسلات التركي عل قد ما هي طويله , إلا انها فى نفس الوقت مش ممله أبدا .... أزاي يا واد يا تيييييين ؟؟ .... الموضوع بسيط , و هو إن فى خط درامي اشاسي , و خطوط تانيه فرعيه كتير ... يعني قصه اساسيه ماشيه طول المسلسل , و قصص و حوارات تانيه اصغر بتبتدي و تخلص طول ما هو شغال . و طبعا كده انت بتتشغل مع الألف قصه التانيين و ما بتزهقش من القصه الاساسيه , لأنك ما بتبقاش مركز معاها طول الألف و خمسميت حلقه ( يا دوب ! ) .

مش فاهمينك يا حج .... عايز يعني تقول ايه ؟!



طيب ناخد مثلا مسلسل يمكن من اكتر المسلسلات اللى الناس اتكلمت عليها , و حصل عليه خلافات كتير قوي .... العشق الممنوع ... مسلسل 165 حلقه بس ! ... و طبعا المسلسل من بطولة " توأمي " مهند ( ايه البصه دي ! , مالي ؟!! ) . المسلسل ب المختصر المفيد على شان اللى ما شافهوش , بيحكي عن عدنان , رجل الأعمال الارمل الل عنده نِهال و مراد . عدنان ساكن فى فيللا ( فى إشاعات بتقول ملعب ) , فيها خدم , و المربيه الفرنسيه لميس , و ابن صاحبه اللى مات و سابلهوله يربيه , اللى هو مهند . الحج عدنان , بيقرر يتجوز واحده اصغر منه بحبه كويسين , أسمها سمر ( بيرين ساعات ) .... و بعد حوارات كتير جدا , سمر و مهند بيحبو بعض , و بيبقى ده العشق الممنوع . و بعد حوارات اكتر .... المشلسل بيخلص على أنتحار سمر , و هرب مهند , و موت واحد من الخدم .

هي دي القصه , و هو ده المسلسل .... صحيح القصه , أو تحديدا حب مهند و سمر (اللى هي أكلينيكيا مرات عمه) حاجه متناقضه قوي مع مجتمعنا و تقاليدنا و كل الرغي اللى اتقال فى المجلات و الحاجات اللى اتكلمت عن المسلسل ... إلا ان ناس كتير تابعته ( او لسه بتتابعه على الست الاف قناه اللى بيعرضوه دوّقتي) و أتأثرت بيه جدا , سواء عاطفيا , او شكليا .

ليه المسلسل شد الناس ؟؟ ...... لو بصيت هتلاقي المسلسل فيه حاجات كتيره حلوه قوي , مختلفه جدا عن مسلسلاتنا المصريه العاديه . فى كل مشهد عينك بتقع على حاجه جميله ... فعلا ... الهدوم , الناس , الأكسسوارات , الشقق , العفش و العربيات. ده حتى اسطنبول ذات نفسها , الواحد بقى نفسه يسافرها جدا ... المخرج عرف كويس ازاي يخلي جمال تركيا يبان , و يخلي الناس يبقى نفسها تروح هناك . و الموسيقى , ف مش هانتلكم فيها . ده غير التطويل و المط اللى موجود بنسبه قليله قوي , مقارنة ب مسلسلاتنا اللى واخده جايزة "مطوط" الأقليميه .

نيجي بقى للحته العاطشيفيه و النفساويه , إننا فضلنا شايفين الشخصيات و عايشين معاها 165 حلقه , يعني تقريبا 165 ساعه .... و بمساعدة الآله الحاسبه ( صديقة الفلاح الجديده ) هنلاقي ان الساعات دي تقريبا , تساوي 7 أيام كاملين ... أسبوع , 24 ساعه عايش مع البشر دي . شايف بيتغيرو و بيكبرو ازاي , ف الطبيعي انك تتعلق ب الشخصيات دي قوي و تحس ب اللى هي حاسه بيه , و كمان تتأثر ب اللي بيحصلهم و بمشاكلهم . 

كل الكلام ده ممكن قوي ينطبق على كل البشر , المراهقين موقعهم ايه بقى ب الظبط من ده ؟


المراهق زي ما قولنا قبل كده , و زي ما قريتو فى كتاب علم النفس بتاع الثانويه العامه , ان المراهق فى بداية المراهقه ما بيبقاش مستقر عاطفيا , لأنه بيكتشف معاني كتير جديده , و فى نفس الوقت بيروح و بييجي فى ما بين حساسية الأطفال ( و على رأي المثل : يا صغنننننننن ) و تحكم الكبار . بنكبر شويه و بنستقر عاطفيا , لكن لسه بنكون بنستكشف صور الحب الجديده دي .

و فى المسلسل ده , كل واحد مننا بيشوف نفسه فى حد , لإن المسلسل مليان حالات ... أب , أخ , أخت , أم , حب من طرف واحد , نص الحاله , الحب من طرف تالت , الحب المستحيل .... و غيرهم . و ب التالى ممكن تشوف نفسك قوي فى حاله من دول , و تتأثر بيها قوي لأنك حاسس انها انت , و ده اللى بيبقى مش موجود فى اي "مشنلسل" مصري غالبا .

تاني حاجه , انك ممكن قوي دلوقتي تلاقي ولد عامل لوك مهند , لابس حاجه زيه ... أو بنت لابسه فستان من بتوع نِهال او سمر , او لابسه عقد من اللى كانو بيلمعو طول المسلسل . زي ما قولت , الحاجات فعلا كانت حلوه , و ب التالى كانت بتعجب الناس ... و المراهق بيبقى عايز الناس تعجب بيه على شان يكسب ثقه فى نفسه , او على شان " يزغلل " عنين النص التاني ... و ب التالى , تسريحة شعر هنا , ديرتي لوك هناك , بقت حاجه من وجهة النظر التينزيه مطلوبه .

المحور التالت , هو انه زي ما الولاد حبو نِهال و سمر و بقو فتيات احلامهم , و البنات حبو مهند و بقى فتى احلامهم .... بقى الولاد يكرهو مهند , و البنات يكرهو سمر و نِهال ... و يطلعو فيهم كل العيوب الصناعيه و الطبيعيه الموجوده و المش موجوده ! . بغض النظر عن ان فى جزء من الكره ده بسبب المنافسه , إلا ان الجزء لأكبر من غير سبب .... و هي دي البروبليمو ! .


يعني لو سألت : ليه بتكره مهند ؟ .... يا إما الإجابه هاتكون : كدهوّن ! , أو : على شان هو مش راجل .... و لما تسأل ليه ... مش هتلاقي رد مقنع . الموضوع بس جه  تماشيا ( حلوه تماشيا دي ) مع الموضه , و ان مهند " ملون " و ب التالى مش راجل . و بكده نكتشف ان الألوان تتعارض مع الرجوله ... يعني لو كنت واحد من الملونين , عينيك صفرا ولا شعرك أخضر , يبقى معلش يا صديقي ... خرجت من دايرة الرجوله ... و ننصحك فى الحاله دي ب أُكسي البمبي بتاع الألوان .

الموضوع عمره ما بيتحسب كده , مهند ممثل زيه زي السقا و جورج كلوني ... يعني نحكم عليه ب تمثيله , مش ب هو مين فى الواقع , اللى اغلبنا ما يعرفش عنه حاجه (بوتاتاً!!) . ف لو كنت ملون , أو بتحب مهند ك ممثل , او حاطط صورته على الفيس بوك ... عادي جدا , و ما يهمكش ... لأنك ببساطه عادي , زيك زي اللى بيحب محمد رجب و حاطط صورته .

ايه ده !! ....... تؤ تؤ تؤ ... نيفر يعني .... سامع حد بيقول ان البوست معموله على شان خاطر سواد ( او زراق فى الحاله دي ) عيون مهند , و على شان المسلسل ... و انت بكده بتهاجم مسلسلاتنا , اللى مش كلها كده ولا أحنا كلنا كده . احب اقولك , كسبت معانا ربع جنيه مخروم .... البوست معمول على شان بس حاجه معينه بقت منتشره قوي , و الميس أندر ستانديج ( سوء الفهم للي ثقافتهم كلاكاتي ) اللى بينتشر فى كل مكان ده ... المسلسل و مهند مجرد مثال مش اكتر ... و أنا ما قولتش كلنا كده ولا كل مسلسلاتنا كده ,و إنما الأغلب يعني ... و الكلام لا يعبر عن وجهة نظر الإداره ب المره ( إدارة مين اصلا !! ) .

و بغض النظر عن ده
ف السنه خلاص , أخيرا
ب تلم كراكيبها و ماشيه
سنة 2011 اللي .....
وللا أقول .....
خلوها فى بوست آخر
D=

6 رأي الناس | | edit post
كتاب الوش
Teen
الجامعه
التحرير
الأنتخابات
و حاجات كتير قوي

أيييييييييييييييييييه ( ده انا بتنهد )
أحداث كتير قوي حصلت فى الفتره الاخيره , ليّا و لكل الناس ... و ب التالى , الدنيا كانت مكهربه ( مباهج شعرها لسه واقف م الكهربا لحد دلوقتي ! ) ... و الواحد ما عرفش يكتب اي حاجه من اي نوع . سواء بقى كان بسبب الزحمه , او حالة الجمود القويه جدا اللى كانت مسيطره ع الواحد ( مع شلحه خفيفه من الغباء كده ) .

مش هانتكلم عن الأحداث , و مش هانتكلم عن الأنتخابات , و ان صوتك امانه و لازم تنتخب و مش عارف ايه .... لأن كده كده خلاص , كل الناس المفروض بقى عندها و وعي و رايحه تنتخب ( كده كده هاينتخبو غصب عنهم على شان الغرامه ! ) .... المهم بس ان الواحد سعيد ب النسبه فى المرحله الاولى اللى كانت اعلى نسبه من ساعة الانتخابات بتاعة تحتمس الرابع ايام الفراعين ( أكيد مش قناة توفيق غباشه ) , ده غير ان كل الناس زهقت من السياسه و الكلام فيها .

طيب يا عم تين ... قاعد تهزي من الصبح .... هاتتكلم عن ايه ؟؟

عن كتاب الوش , او زي ما هو معروف فى الاوساط " الرائيه " ب الـ Face Book .... الفايس "بؤ" موقع من مواقع التواصل الأجتماعي  ( اللى هي المواقع اللى تلاقي فيها صحابك بتوع المدرسه و الناس اللى قطعت علاقتك بيهم ... بتضيف عليها صحابك و تقعد بقى تقولهم انت حاسس ب أيه و مِرتبط ولا لأ و كده ) . أم هند , ان الفايس بوك عقبال عندكو كده فتح فى 2004 و نقدر نقول انه ابتدى ينتشر فى مصر على 2007 ( عقبال بقى ما وصل من امريكا لحد هنا !! ) . 



و مع السنين , الفايس بوك ابتدى يتغلغل و يتوغل فى حياة الناس ( زي ما اريال بيتغلغل فى النسيج و يشيل البقع الصعبه كده ) , و بقيت تمشي فى كل مكان , تلاقي كل واحد ماسك موبايله ولا لابه و مركز قوي , و لما تقوله بتعمل ايه ... يقولك : بشوف فيس بوكي ! . ده غير انه بقى علامه اساسيه فى حياة كل واحد بيستعمل النت ... فعلا ... أول حاجه بتتعمل اول ما تلمس الجهاز انك تفتح فايس بوكك و تشوف ايه الجديد . ده غير انك كل كام ساعه كده تروح تفتح و تاخدلك لفه سلريعه , ده ان ماكنتش سبت الكِمبيوتر و رحت فتحته من " المحمول " !! .

 و يا سلام يا سلام ( الله يمسيكي ب الخير يا ست نانسي ) لما يكون ما عندكش فايس بوك .... بقت حاجه غريبه و مريبه ... كأنك ب الظبط ما عندكش مخ او هدوم او أكل ... و الناس تبتدي تبصلك بصه كده عجيبه و كأنك واحد من اناسين ( جمع انسان يعني للي ثقافتهم بابوغنياوي ) الكهف و جاي من قبل الميلاد . حتى بقى اول سؤال لما تتعرف على حد جديد , و هو بياخد رقم موبايلك كده : مايلك اللى ع الفايس ايه ؟؟ ( بيتكلم بثقه , كأنه مافيش اي احتمال انك ما عندكش فايس !! ) .

الفايس بوك يشبه قوي الشارع .... هتلاقي فيه كل انواع البشر اللى ممكن تتخيلها , اللى بيشتم , و المحترم , اللى بيشتغل , و اللى بيلعب , اللى بيصلي و اللي بيعاكس ... و غيرهم كتير . الفايس بوك بقى ليه 3 طرق مالهمش خامس ( ايوه خامس , في ايه !! ) ... يا اما تكون قاعد فى بيتكو ( يعني اوف لاين ) ... او تنزل الشارع على شان تروح الكافى ( او مركز الشباب تلعب كرة ماء ) ... او تنزل الشارع على شان تروح " مرّستك " او جامعتك او شغلك .اللى قاعدين فى بيتهم , مريحين دماغهم قوي . اما اللى بينزلو يروحو الشغل ف دول بيتعبو فعلا . 

ليه يا واد يا تيييييييييييييييييين ؟؟

الناس دي بتعتبر الفايس وسيلة دعايه مجانيه ... ببلاش ... و على رأي المثل : ابو بلاش كتر منه ..... بيعملو بقى بايدج و يحطو صور و عروض و حاجات , ده حتى يمكن تلاقي ناس شغلهم كله ع الفايس ... كل حااااااجه .... و هنا المشكله , ان الفايس ممكن قوي يقفل فى اي لحظه ( بنسبه كبيره على فكره ...  0.1 % كده ) ... و هنا , هايخسرو كل شغلهم و البيزنس اللى كانو عاملينه . ده غير انهم بقى محتاجين اول ما يعملو البايدج يشدو الناس ليها و كده , و طبعا ده محتاج عروض و حاجات قويه جدا . ناس تانيه مش بتشتغل , إنما بتكتب او بترسم او اي حاجه ( ممكن تلاقي فيديوهات رقص حلزوني ساعات ) ... و بيعتبرو الفايس " المرسح " اللى بيطلعو فيه مواهبهم الفذه للناس اللى بيسيبولهم كومنتات حلوه ساعات ... و ساعات تانيه وحشه قوي !

الطريق التاني هو اللعب ... ناس بقى بتحط صورها و ب تعمل شير طول النهار لفيديوهات و كليبات و كلام من الجروبات ... و يكتبو 100 ستاتس فى الساعه و الف و 500 كومينت فى الدقيقه ... ده غير اللعب طبعا ( بيزعو طماطشيم فى الفارم فيل ) .. و ما ننساش الريليشن ستاتس اللى كل شويه بتتغير ... معقده , سينجل , مرتبط , متجوز , بيفكر يتجوز ... كده يعني . الناس دي بقى صحيح ما بتتعبش , لكن ممكن قوي تتعب لو الفايس قفل . لأن حياتهم ببساطه مطلقه هاتتوقف ... و كل صحابهم بتوع الفايس ( اللى الفايس هو الطريقه الوحيده للتواصل معاهم ) هايروحو باي . مش هايلاقو حاجه يعملوها !



و زي ما الشارع فيه حاجات مستفزه , الفايس كمان بقى فيه حاجات مستفزه قوييييييييي , قويييييي , قوييي , قوي ( ده صدى صوت ) ..... زي مثلا انك تلاقي واحده اسمها مثلا Lma و بين قوسين (Miss Mody ) اللى هو صاحبها , او ممكن اسمه من غير ميسز اصلا ... ده غير طبعا موضوع In Relationship With , فى علاقه مع ابو العلى ! .... و يا حلاوه بقى لما تكون كومبليكايتد و صاحب الريليشن عنده 15 سنه ( الله يرحم ايام النحله ام فتله حمرا ! ) . من الحاجات المستفزه على الفايس برضو البروفايلات بتاعة الناس اللى ما تفهمش نوعهم ايه دول ... لولو الخطشير , فيفي الرومانسيه.... اللى بيحبو الحب , و حساسين و رقيقين ( و لذوذين و طعمين ! ) ... ما تفهمش هما عايزين يوصلّولك ايه ب الأسم و كم الإنفو اللى تجيب حول و شلل رعاش دي ! . 

من الحاجات المستفزه برضو القلوب , كم قلوب رهيب و بوس و " بحبك قوي "قلبين" موااااااااااه " . و كمان كم الستاتس المهول اللى الناس بتكتبها ... انا فى المكروباص و زهقان ... انا باكل .... انا زعلان .... انا عيان و مناخيري سايبه ... و الاغرب انك تلاقي مثلا واحد كاتب انه عيان ولا عنده حالة وفاه و ناس عملاله لايك !! (  يكونشي ده نوع من الشماته المخفيه ؟؟؟ ) .

بغض النظر عن الحاجات دي , إلا ان الفايس مفيد جدا فى حاجات تانيه ... لو بصيت فى لستة " الفرندس " اللى عندك , هتلاقي فى ناس كتير علاقتك بيهم فايس بوكيه بحته ... ممكن يكون بقى صحاب من ع النت او من المدرسه او اى حاجه ... ناس بس عندك ع الفايس , بتعرف اخبارهم من عليه و كل جديد , تقولهم كل سنه و هما طيبين فى عيد ميلادهم , و تسلم عليهم مره و 2000 لأ . كمان سهل قوي انك تبعت من عليه حاجات , تشارك الناس موهبتك , تتكلم و تتناقش , تلعب , او تعمل بيزنس معين . ده غير انك بقى ممكن تعمل ثوره من عليه , تظبط خروجه , تبقى على تواصل مع حد مشهور ... حاجات حلوه كتيشييييير .



ما عينا من كل ده ...... المهم صورة بروفايلك تكون حلوه ... يعني جمله من نعيم برذرز , أو صوره سوده خالص لما تكون حزين ( و تنكد علينا ) ... او تمشي مع التقاليع . وحده وطنيه , هلال و صليب ... ثوره , علم مصر ( اسد قصر النيل ابو عين واحده حاليا ) .... رأس السنه , بابا مجدي ( اصل نويل عيان ) ... و غيرهم . و لما بقى حد يلاقيك حاطط صورة ممثل تركي ..... تبقى سنتك سوده , و تبقى عيل توينكز و هوهوز و كمية شتايم مختلفه  ... كأن الممثل التركي ده مش زيه زي احمد السقا و شاروخان و برعي الروش ( ده وجه جديد ) ... ممثل عادي عاجبك تمثيله ! .

اللى لازم نكون عارفينه
ان المسلسلات التركي دي 
ليـ ...............
ولا اقولكو
لينا بووووووست آآآآآخر
D=


6 رأي الناس | | edit post
باك تو سكولا
Teen

الشتا قرب خلاص
و ابتدى كو الكآبه الدراسي
يرررررجع تاني
!

تفتكرو ليه اغلبنا بيكره الدراسه عامة ؟؟؟ .... سواء كانت مرّسه او يونيفرسا او حتى تعليم مفتوح ( بنص جنيه الحصه عند كوبري الخشب ) .... لأن الدراسه بتيجي ف الشتا .... أو المفروض يعني ( الشتا مزنوق ع المحور بقاله فتره ) ... الشتا , الليل فيه طويل .... الشتا , الدنيا فيه برد .... الشتا , الناس فيه قاعده ف بيوتها بياكلو شندوتشات مفتقه ! ..... بس بيستحمو بعدها يعني ( بمية نار تقريبا ) . و طبعا " بما إن " المعطيات اللى فوق .... ف " إذن " الشتا بيبقى الجو فيه كأيب .... و الكآبه ارتبتط ب الدراسه .



صحيح مع الوقت بناخد ع الدراسه ك روتين سنوي , إلا اننا برضك بنتخنق لما بتيجي , بعد الأجازه " المرحه " اللى اغلبنا قضاها ! . ايّا كان ... مع بدايات الدراسه ممكن قوي تكون ناس كتير فينا رايحه مدارس جديده , او رايحين على اول سنه ليهم فى الجامعه .... و مع المكان الجديد بييجي الخوف و القلق ( مع كركره بسيطه ف المعده ) من انك رايح مكان جديد فيه ناس جديده و جو مختلفه .. و بييجي نوع من اللخبطه و التوهان , و منكن بعد كده نخش على إكتئاب لو الحاجات دي طولت .... لكن لا تقلقو , و حطو فى بطنكو برتقان شتوي ( البطيخ ف الصيف بس ) , لأن الحلول الأكيده , و الحاجات المفيده تحت .

أيه هي يا واد يا تيييييييين ؟؟؟؟

الاول ..... أزاي نتعرف على ناس جديده ؟؟؟؟ ..... لو كنت من اللي راحو مدرسه جديده , ف الموضوع سهل قوي ب النسبه ليك . ب العكس قلبا و قالباَ يعني ... موضوع انك تكون الطالب الجديده ده بتبقى حاجه ممتعه قوي . ليه ؟ , لأن المدرسه غالبا بتبقى بنفس طلّابها كل سنه , ف لما بييجي حد جديد , بيبقى ملحوظ قوي , و كل الناس بتبقى عايزه تكلمه , و تعرف منه كل تفاصيل حياته ايّا كان نوعها .

 و مش بعيد كمان تقع فى واحد ( غالبا اللى بتبقى قاعد جمبه , او هو قاعد جمبك ) يديك جوله في المدرسه و يبقى هو التور جايد ( دليل اللفه يعني للأجانب ) بتاعك فى السكولا .... و مع الوقت بتتعرف على فصلك , و من صحاب فصلك , بتعرف صحابهم اللى ف الفصول التانيه , و من الفصول التانيه تعرف صحابهم من السنين التانيه .... و بكده تكون انتشرت انتشار قوي و تلقائي , مش محتاج فيه اي حاجه غييييييرررر ......

غير انك بس تسيب نفسك , و ترحب بأي حد يكلمك , و تتكلم و ترغي .... لأن الناس بتوع " الرد على قد الجواب " , بيفضلو لوحدهم لحد ما يتخرجو من الدنيا .... اتكلم و رد و ارغي , و واحده واحده , هوووووووب هاتحس انك فى مدرستك القديمه .


أما لو كنت فى الجامعه , ف الوضع مختلف قوي , و ده لأن كل الناس جديده , و م حدش بيلاحظ حد ! ..... طب تعمل يه ! .... زي المدرسه كده , لازم اول حاجه تكون شخصيه متكلمه , رغايه , ممله :) ..... ثانيا , اوعى تعمل متفوق و تقعد قدام فى الاول .....  قدام , البشر ما بتتكلمش اشاسا , اقعد ورا بس اول اسبوع , اتكلم مع اللي جمبك فى البنش فى اي حاجه .... الدنيا حر قوي ؟ , هو الدوك اتأخر ليه ؟ , أيه الزحمه دي ؟! .....

اي سؤال او ملاحظه زي كده , الطبيعي اللى جمك ( لو مش سخصيه تنحه ) , هايرد عليك , و رد يجر رد و تقوم مادد ايدك .... تين ... هايمدي ايده و يسلم عليك و يقول : زُقليط .... خلاص , عرفنا الأسامي , نمشي مع بعض , لو ليه صحاب , هايصاحبك عليهم , و هما هايصاحبوك على صحابهم ... لحد ما هايبقى عندك جروب فى سنه اولى ( 20 واحد مثلا ) .... و بعد كده هايقعدو يتساقطو بقى لحد ما تتصفو على 10 مثلا او 5 , و هما دول هايبقو جروبك الأساسي ف سنينك الجامعيه كلها .

بس انا حاسس بتوهان و ضياع يا تين ........ اعمل ايه يا منيل ؟!

ما تقلقش , اي بدايه فى اي حته كده ..... فاكر و انت فى الحيضانه .... لما كنت طفل لطشيف , المدرسه كانت كبيره قوي ب النسبالك , و مع الوقت عرفت كل مكان فيها و عرفت كل البشر .... اولى جامعه , زي اولى حضانه .... هاتحس انها كبيره , و هاتّوه فى الأول  ..... محاضرات و سكاشن و جداول و ملازم و كتب ( و ماننساش الكافيتيريات ) .... ده غير كم بيبان الجامعه المهول .... الطبيعي انك تتعب فى الأول , لكن بعد اول شهر , خلاص .... هاتكون عرفت مكان كل حاجه تقريبا , محاضراتك و مدرجاتك و دكاترتك ... و النظام بتاع كل حاجه .... الفكره بس انك ما تكتأبش , أو تتخرع ( تنّخض يعني للى ثقافتهم كلاكوتّي ) ... و زي ما الراجل الحكيم قال : اصطُبر على الرز ... لحد ما يستوي ...... أكتب ورا الدوك لو ما بيكتبش , و ارجع بيض اللى كتبته ... يعني اكتبه تاني بخط نضشيف ... و بكده تكون عملت " مزلمه " لنفسك , تذاكر منها وقت ما تحب ( يوم الأمتحان الصبح يعني )


طب يا ياخويا - الله يستر طريقك - اذاكر ازاي و انا فى الثانويه ؟؟

كل واحد فينا ليه طريقه شكل فى المذاكره .... فى اللى بيذاكر ب الكتابه , و فى ب الحل , و فى ب القرايه , أو ما بيذاكرش خالص ! ... لكن الفكره هنا , أنك لازم تعمل لنفسك نظام تمشي عليه , لأن الثانويه مش بتاعة اذاكر قبل الامتحان بشهر ! . و زي ما انت عارف , المواد نوعين .... حفظ و حفظ و فهم ( مافيش فهم بس هنا )

عندك الرياضه و الفيزيا .... قوانينهم تتحفظ , و كل اللي يقع تحت ايديك , حله . لأنهم عباره عن قوانين و افكار مسائل , ف كل ما تحل اكتر , كل ما تعرف افكار اكتر . و الكيميا زيهم .... احفظ المعادلات و الحاجات ... و قوم حل يا افندي .

العربي .... ماده جواها الف و 500 فرع , بس ايّا كان .... كل اللى عليك برضو انك بعد ما تحفظ النص او الدرس او فصل القصه , تحل عليه , و تشوف الامتحانات و تحل السؤال بتاعه فيها , اوعى تستنى لآخر السنه على شان تحل امتحانات العربي لأنك مش هاتلحق تحلها .... و النحو , استحاله تحفظه او حتى تفهمه , غير لما تحل عليه ... , و ممكن قوي تسيب درس و فصل و نص فى آخر السنه على شان ما تذاكرش الكم المهول ده 

اللغات .... بسيطه , كلمات و جرامر .... حفظتهم و فهمتهم ... هاتقدر تحلهم .... ( مع تحيات الشاعر المبجل .... انا .... هيهيهييي ) .... و الستوري , اسئله تحفظها و كوتيشنز تعرفها , كله ب الحل هايبقى " اليسطى "

علم نفس بقى و جلوجيا و تاريخ .... احفظ , اعمل نقط , و أكتب ب أستفاضه ... ما تبخلش ب معلوماتك على شان تاخد درجاتك ... ( لسه مع الشاعر برضك )

أما الاحياء , نصها الاولاني حفظ .... و بعد كده فهم و حل .... اعمل زي ما قولنا فوق . و خلى بالك , ان مهما حسيت فى اي ماده انك كل ما تحفظ حاجه تنسى الباقي , ده عادي جدا , مع التكرار و الحل طول السنه , هتلاقيك لميت كل ده , و حافظ صم كمان 


و ما تنساش بقى تبقى تقضي وقتك كله على كتاب الوش
الفيس بوك ده ..... لينا فيه
بووووست آخر
D=
7 رأي الناس | | edit post
صخرة الوائع
Teen
كلنا بنحلم ..... عادي
كلنا عندنا طموحات ..... برضو عادي
كلنا بنقابل مشاكل ...... عادي برضو ( مختلفه عن اللى فوق على فكره )
كلنا احلامنا بتتحقق ..... ده اللى مش عادي 

اتكلمنا قبل كده عن الاحلام ...... و ازاي تحقق حلمك .... لكن م اتكلمناش عن الاحلام لما تتحطم على صخرة الواقع ... بام بام بااااام تشششششش ( موسيئى تصويريه , ايه ! ) ..... زي مثلا لما تكون فى الثانويه العامه و بعد سنتين من الدح و العذاب اللا متناهي ... تخش كليه مش عايزها مع انك جايب مجموع قوي جدا .... بس التنسيق حطك فى كليه تانيه مثلا او ان مجموعك اقل من الكليه بـ 0.1 !!! ( اصل الواحد من عشره ده معناه انك مش مؤهل كفايه انك تخش الكليه )


زي ما قولنا قبل كده , كلنا بنحلم و عندنا طموحات ..... صحيح مش كلنا بنشتغل على شان نحقق الاحلام دي ..... إلا انها بتبقى موجوده ( على ايدك اليمين و انت داخل كده ) ..... في مننا بقى اللى بيحقق احلامه بسهوله , و فى اللى بصعوبه , و فى اللى احلامه بوووووووووووووم , بتنفجر فى وشه و تغرق كل اللى حواليه ! . الاحلام بطبيعتها حاجات مش مضمونه , بس فى نفس الوقت كتير جدا .... صحيح ممكن تحلم , بس مش معنى كده ان احلامك هاتتحقق كلها فى نفس الوقت , او كلها بنفس السهوله .

يا ترى بنعمل ايه لما احلامنه بتنتهي ؟؟  ..... لما نلاقي طموحاتنا بتبعد عننا ( ساعات بتطلع لسانها لينا كمان ) .... شايفينها , و مش قادرين نوصلها ... بنتصرف ازاي لما الحلم اللى حلمناه طول عمرنا , فجأه يختفي ؟  .... و يبقى واحد من الحاجات المستحيله . لما نحس ان كل امنيه فى حياتنا اتكسر على دوشمة ( دي غير صخره ) الواقع و القوانين , و اللى ممكن و اللى م ممكنش ! .

رد الفعل الطبيعي لأغلب التينز و الناس و البشر ( فى اتنين على زحل بيعملو نفس الكلام على فكره ) هو الإكتئاب . و الامر م يسلمش طبعا من شوية عياط مع شلحة نرفزه و نفحة زعل و حزن . بعد م حلم من احلامنا بيضيع , الأغلب مش الكل نظرتهم بتبقى سوداويه شويه للحياه , و يخشو فى مود " انا عمري م شوفت يوم حلو " , و يبتدي جهاز الرؤيا يشوف بس الجوانب السودا من اي حاجه .... و ده طبعا مع شريط الذكريات المؤلمه اللى بيبقى شغال فى دماغنا ..... و على شان بقى مود النكد يكمل نحط البلاك بلاي ليست ( لستة اغاني نكد يعني للى ثقافتهم ساحل عاجي )  ع الجهاز و نعيش بقى . 

عارفين .... بيبقى صعب لما نلاقي حلمنا ضاع مننا ( مش قولتلكو شاعر )

و بيبقى اصعب لما نشوفه من بعيد و مش قادرين نوصله
و اصعب و اصعب انك تلاقي حد عنده الحاجه اللى بتحلم بيها

و مش مقدر قيمتها 


يعني ايه يا واد يا تين ..... فى احلام مستحيله ؟؟؟ يعني ما نحلمش يعني يعني يعني ؟؟؟؟؟؟؟

تؤ تؤ تؤ ..... الموضوع مش كده ..... و انما لازم نعرف ازاي نتصرف لما الاحلام تنفجر , لما الاماني تروح تتفسح و الطموحات تطلعلنا لسانها .....أأ ! , لأ طبعا ! .... اكيد مش هانطلع لسانا ليها احنا كمان ( ع السرايا الصفرا عدل ! ) .... انما لازم نعرف فى البدايه ليه الحركه دي بتحصل ؟؟ و ليه فى احلام م بتتحققش ؟؟؟ .

حياتنا يا جماعه ماشيه بخطط .... خطط معقده " كوجزي " يعني ( دي زي معقده كوكب كده ) , الخطط دي غابا بتقى نهايتها بعيده على شان كده م بنحش ب قيمتها او المغزى منها دلوقتي . بمعنى , انك ممكن مثلا تبقى راكب اوتوبيس ( او سكوتر ) مع صاحبك , و فى الاسترحه البعيده جدا عن بيتكو .... بتقعدو ترغو و تنسو نفسكو لحد م الاوتوبيس يمشي و يسيبكو . طبعا بتتنرفزو و تقعدو تحسو ان فى " نِصِيبه " حصلتلكو و اسطوانة " ليه كده يا رب " تشتغل فى الخلفيه . يقوم ييجي واحد ابن حلال ياخدكو فى عربيته لأنه رايح نفس المكان .... و انتو معديين ع الطريق تلاقو ان الاوتوبيس ( اللى فاتكو ده , فاكرينه ؟ ) على جمب الطريق و مولع لدرجة ان الحديد بقى تقريبا بترول !

تفتكر لو كنت لحقت الاوتوبيس كان ايه اللى جرالك ؟؟ ..... صحيح حلمك م اتحققش فى انك تروح بسرعه و فى رحله عاديه ... إلا انك لو كنت حققت الحلم ده , كنت روحت اكيد ....بس ع المقابر , و ابقى بقى قابل عيلتك فى الآخره ! . دي خطه بسيطه من الخطط اللى فى حياتنا ..... الخطط التانيه بتبقى اطول , و معقده , بس فى نهايتها بتقول : يااااه , ده لو كان حصل كذا م كانش حصل كذا و كذا و كذا ..... و كذا :))

اما المثال الاشهر فى حياتنا ..... فهو انك تبقى نفسك تدرس حاجه معينه , و بعد الثانويه تخش حاجه تانيه خالص عمرها م جت فى بالك . موقف زي ده ليه طريقين .... يعني لو مثلا نفسك تبقى مترجم لكن مع الاشف ( الفزلين بيعمل شغل حلو على فكره ) دخلت تجاره .... عادي , م تتخلاش عن حلمك , و خليك عارف ان الكورسات م خليتش حد نفسه فى حاجه ( كورسات الطب نزله قريب ) , هاتحقق حلمك لكن من طريق اطول شويه ..... عادي , قابل الحياه ب ابتسامه قويه و واسعه ( بس مش قوي يعني ) .


اما بقى لو كان نفسك تبقى دكتور وللا مهندس و دخلت آداب اسيوط , صحيح بقى الحلم مستحيل تحقيقه ... لكن بص للجانب المشرق فى الموضوع , طب 7 سنين ده غير الماجستير , و هندسه 5 .... و كل واحده فيهم محتاجه خبره على شان تبقى معروف .... ده غير انك كان ممكن قوي تخشها و م تمشيش فى المواد , و تقضي باقي حياتك فيها , او يحصللك مشاكل انت فى غنى عنها . مش كده ؟؟ .... بعدين مالها الآداب , ممكن تبقى كاتب , او اعلامي , او مترجم او HR او حتى XZ ( دي شغلانه جديده انا مش عارفها ) .

الاحلام لو م اتحققتش .....  ف ممكن تتحقق بعدين
لو الاماني بقت مستحيله ..... ف الدنيا فيها اماني احسن بكتير
لو الطموحات انفجرت ..... ف طموحك ليه اكتر من طريق 


الاهم انك تبقى عارف و متأكد
 ان كل حاجه بتحصل لسبب فى الحياه دي 
و زي ما كل حاجه بتحصل لسبب
ف برضو البوست اللي جاي هايتكتب لسبب
هايتكتب للباك تو سكولا
D=

ملحوظه كلبوظه : عارف ! , ملاحظاتنا كترت ...... بس دي ان شاء الله الأخيره ... حيث اننا مش عارفين نسترجع البايدج القديمه , عملنا واحده جديده , هتلاقوها على يمينكو هنا .... كمان استنو قريب قوي ان شاء الله المذكرات فى برنامج ع الراديو اللى ع الخط ( اون لاين يعني ) ... استنو البوستر بقى و الموعيد :)
7 رأي الناس | | edit post
و انا ميال ميال
Teen
الميول ...... كلمه ليها تعريفات و معاني كتيره جدا . و يمكن من ابسط المعاني و اهمها , ميول الانسان ...... سواء كان عدواني , طيب , مؤذي , مسالم ...... او كان الانسان ده رياضي , او ممثل , او مغني , او أديب ..... او حتى كانت رقاصه فى كوبري قصر النيل ( شارع الهرم اتقفل ) .

لو بصيت حواليك و انت صغير ايام الابتدائي و الزمزميات و الضفاير , هتلاقي ان ميول كل العيال واحده ...... كلهم بيحبو يلعبو و يصرخو و يعملو دوشه لحد ما يفقدو الوعي فى الآخر . بعد كده بنكبر شويه و بنبتدي فى الاعدادي تبقى ميولنا نصين تقريبا , الولاد بيحبو الكوره , و الخناقات و التتنيح ع البنات . و البنات بيحبو احمد عز و مهند , و بيبتدو يتفرجو على فاشون تي في و يقعدو فى حصة الالعاب م يلعبوش , و طبعا بيعشقو البص للولاد بقرف  .

و نخش ع الثانويه و ميولنا تبتدي تتغير تاني تغييرات بسيطه برضو , و بنتقسم شوية اقسام اكتر, كنا اتكلمنا عليهم فى بوست قبل كده . لكن هتلاقي ان المشترك بين اغلب الاقسام دي , ان الولاد بيبقو عنيفين اكتر , و اغلب كلامهم عن الكوره و الجيم و البنات . و البنات بيبقو رقيقين اكتر ( فلورا .... ناعمه و قويه , و كلها حنيه ) , و اغلب كلامهم عن الموضه و الولاد و الممثلين .

ساعات بقى بيطلع ناس فى النص , ميولها مختلفه , يعني مثلا بيكره الكوره , م بيحبش يتكلم عن البنات , بتكره الكلام عن الممثلين او الموضه و الميك اب , و شايفه ان دي سطحيه و الحياه فيها حاجات اهم  نتكلم عنها . اكيد طبعا مش هاتروح بقى و تقف لوحدك على فى اي زؤر , و تستنى الفرج ( ممكن الدنيا تمطر مثلا او حد يجيبلك حاجه حلوه ) لأن كلام الناس او ميولهم مش عاجباك . 



اول حاجه لازم تفهمها , ان لو ميولك مختلفه فده مش عيب ولا حرام , ب العكس , دي حاجه عاديه جدا ..... مش كل الناس زي بعض ( ده حتى صوابع رجليك مش زي بعضها .... حتى بص عليهم كده ) . يعني تعمل ايه لو انت م لكش فى الرياضه  ؟؟ , بتكره الكوره زي عينيك و شايف انها اساسا حاجه متخلفه , و انها مجرد 22 واحد بيجرو ورا حاجه مدوره . او م بتحبش تتكلم عن البنات لأنك شايف ان ده هبل . و كنت بتحب الفلك و الفضاء , او الحيوانات و الطبيعه , او الكمبيوتر و التكنولوبيا , او حتى بتحب القرايه و الكتابه .... او بتشجع السلام العالمي و استعمال العقل الاول , م بتحبش الخناقات و الضرب و الشغل ده .

او انتي تعملي ايه لو شايفه ان الكلام ع الممثلين طول النهار, و المغنيين طول الليل حاجه تافهه و مستفزه . و الميك اب و الموضه و الاكسسوارات دي حاجات اساسا متخلفه , و كل واحد و ليه حاجات بتليق عليه من غير اي موضه . تعملي ايه لو كنتي بتحبي تعملي خير, تساعدي الناس . بتقري , و بتكتبي . او بتحبي الرياضه و متابعه جيده للكوره و السباحه ( و مصارعة السومو) . و شايفه ان اللون البمبي مستفز و بيتعب الاعصاب ؟

طب اعمل ايه يا واد يا تييييييييييييييين ؟؟؟


قبل ما تعرف تعمل ايه ..... لازم تعرف ده من ايه ؟؟ ( ونبي شاعر من يومي ) , السبب فى اختلاف الميول , حاجه واحده .....الاولانيه , هي التربيه ..... تربيتك ذات نفسها بتأثر فى ميولك , طفولتك و بيتك بيأثرو بشكل كبير عليها ... يعني لو طلعت فى بيت مالوش فى الكوره , غالبا , انت كمان مش هايبقى ليك فى الكوره .... و هكذا .

اما الحاجه التانيه , فهي ان عقلك يكون سابق سنك . و دي بتبقى بقى حاجات وراثيه حبتين . لكن الفكره ان عقل الانسان بينضج و يبقى واعي فى مراحل معينه . فى ناس بقى بتبقى سابقه المراحل دي , و ناس تانيه متأخرين عنها ( ناس عايشه الوهم بعيد عنكو ) .... ف هتلاقي ان تفكيرك بقى انضج قبل باقي الناس , و بالتالى الاهتمامات مختلفه . بعدين هما يحصّلّوك , يكون تفكيرك بقى اكبر منهم , و بتفكر فى مستقبلك و حياتك , و هما لسه بيفكرو فى رحلة دريم بارك بتاعة المدرسه .

لو انت من الناس اللى ميولها مختلفه , ف هتلاقيك غالبا حاسس ب الوحده على طول , و ده لأن م فيش حد يفهمك . و يمكن تحس ب جزء كده فى قلبك بارد و متجمد دايما و ده لأن م فيش حد يحس بيك او ب اللى جواك . اسرارك غالبا هاتبقى لنفسك , و هتلاقيك - لو انت من اللى عقلهم سابق سنهم - حلال المشاكل ( الميكانيكي الاجتماعي يعني ) , و كل واحد يجي يقولك مشاكله , لكن انت م بتلاقيش حد تحكيله مشاكلك !! ..... بتسمع كل الناس , لكن م حدش بيسمعك .

 و هاتحس ان كل اللى حواليك بيتغيرو و انت ثابت مكانك , لكن الحقيقه انك اتغيرت قبلهم , و لسه بتتغير بس بمعدل ابطأ . و كونك م بتتغيرش , ده مش معناه انك غلط او مش صح او مش طبيعي . التغير ده بيتوئف على حاجات كتير جدا , منها تربيتك , و العادات و التقاليد ..... و الاهم , مبادءك ودرجة تمسكك بيها . 

  طب يا ترى الحل هو انك تسيب نفسك تتقوقز على نفسها التقوقز التقوقزي المتقوقز ده ؟؟ ( م حدش يسأل يعني ايه ! )

اكيد لأ, انما لازم انك تتاقلم ع الحياه و ع الناس و على كل الشخصيات ...... يعني لازم تبقى فليكسابول .... ايون , فليكسابول ( زي شاكيرا كده , ملكة جمال الفليكسابول فى العالم  ) . يعني مش ضروري تصاحب الناس اللى زيك , لأنك نادرا لما هتلاقيهم .... الناس مختلفين , صاحب ناس مختلفه عنك , اتكلم مع كل الناس , كل البشر .... و كل مجموعه و ليها اسلوب و مواضيع تتكلم فيها . بمعنى اصح و زي ما بيقولو فى المناطق الشِعبِيه : جاري الجو , دنيتك تحلو . لكن فى نفس الوقت ما تبقاش اوفر او مش على طبيعتك .


و اتبع دايما مبدأ الانتشار , م تقيدش نفسك بمجموعه معينه و بس بتقف معاهم , اقف مع دول و دولن و دولم , لحد م فى النهايه هتلاقي جروب بتستريح و انت معاهم , و بتحب تقف معاهم اكتر من اي حد . و شويه شويه , هتلاقي منهم اللى بقى انتيمك و صديقك الصدوق ..... و لو مش عارف تعمل كده , ف بنقدملكو الحل الوحيد و المفيد ( مع اللؤلؤه تيلي شوب ) , هو انك تشغل نفسك و وقت فراغك ب اي حاجه من الحاجات اللى كنا قولناها قبل كده على شان م تديش فرصه لنفسك او لمخك انه يركز مع حالة الفراغ او الاحساس اللى ب الوحده اللى جواك .

و خليك دايما سخصيه مِتفائله و مشرئه ( اوبتشيمستشيك يعني ) .... و بص للنص المليان من الكبايه .... هتلاقي عندك عيله بتحبك , او ع الاقل اب و ام , اكيد مستعدين يسمعوك فى اي وقت , و يحسو بيك و بمشاكلك و يساعدوك , و يمكن كمان يفهموك .... تصور ! , بس لو انت اديتهم الفرصه .

يعني عارف لما حلم من احلامك يضيع مثلا
او امنيه من الاماني تتحطم على صخرة الواقع
عارفهم ..... دول لينا فيهم
بووووووست آآآآآخر
D=
9 رأي الناس | | edit post
تيك توك !!!
Teen
تيك توك .... تيك توك
تكي تكي تكي تكي
تك .. تك .... تك
ت تك ت تك ت تك

لا .... انا لسه بكامل قواي العقليه ..... لكن اللى فوق ده , مجرد اصوات .... اصوات عقارب الساعه . عقرب صغير , و عقرب كبير .... بيجرو ورا بعض . كل الساعات اللى فى العالم كده تقريبا , عقربين ما بيقفوش , بيمشو فى ناحيه واحده بس . و معاهم بيعدي الوقت ... ساعات يبقى بطيييييئ جدا , و ساعات تانيه يبقى سريع قوي ( ممكن تلاقي نفسك بتنهج كده من غير سبب ! ) .


زمان و احنا صغيرين , كان الوقت فيه بركه غريبه .... يعني تقدر تقول انها بركه بزياده . كان اليوم الدراسي طويل جدا , لدرجة انك ممكن " تأيّلك " ساعتين تلاته , و تقوم تلاقيك فى نفس الحصه برضو ! . كانت " الأبله " تخش و تسأل على اللى فات , و تضرب اللى ما بيعرفوش يجاوبو بعد دش تهزيق محترم ( ده اكتر وقت لطشيف فى الحصه ) , و بعدين تشرح و تكتب ع " التخته " , و العيال تنقل . بعد كده بقى تشوف الواجب و تصححه و تضرب اللى م عملوش الواجب و تهزهقم ( غالبا بيبقو نفس الناس اللى اتهزقو من شويه ) . و يتبقى شوية وقت كدهون ( يعني قيمة نص ساعه كده ) , ممكن الابله تاكل فيهم , او تجيب فى سيرة الناس مع الابله اللى فى الفصل التاني او حتى تقرر انا تهزق العيال اللى ما اتهزقتش ! ( يعني تقعد زهقانه !, اهي تسلي نفسها برضك ) .

دوّقتي الوضع بقى مختلف تماما , كومبليتلي يعني ( ونبي بتكلم عنجليزي زي الفل ! ) . السنه كلها - ايّا كان نوعها بقى - بقت بتعدي بسرعة الكبريت ( دي حاجه كده اسرع من الضوء ) . يعني تلاقي مثلا اول يوم دراسه , و تاني يوم على طول امتحانات آخر السنه , و اليوم اللى بعده التخرج , و آخر الاسبوع تلاقيك متجوز و معاك عيلين بخدود ( محاسن و زياد ) .

و مع السرعه اللى الوقت بيعدي بيها , هتلاقي برضك فترات - طويله او صغنونه - بتحسها بطيئه جدا جدا , لدرجة انك ممكن تعمل دشليون حاجه و برضو اليوم ما يخلصش !!. زي مثلا لما تكون مستني حاجه هاتحصل آخر الاسبوع , او حد جايلك بعد بكره ..... تلاقي الوقت بيعدي براحه قوي ..... و فى نفس ذات الوقت , الحاجه دي او الواحد ده , الفتره اللى بيقعدها معاك بتعدي بسرعه جدا . زي كده لما تكون فى العياده , تلاقي كل واحد بيخش يقعد سنه جوه مع الدكتور ( تحسهم بيخترعو الدوا جوه ! ) و اول ما يجي دورك , تلاقيك ما قعدتش 5 دقايق على بعض !! . او لما يبقى عندك فرح , و تقعد بقى تجهز و تجيب بدله او تفصلي فستان , و تظبط و تعمل .... و تلاقي الساعتين ولّا التلاته بتوع الفرح عدو بسعرة الكبريت و فاتو كأنهم 10 دقايق !! .



طب يا واد يا تين , ده بيحصل لييييييه ؟؟؟؟

مممممم ...... بغض النظر عن الناحيه الدينيه , و اللى بتقول ان كل ما الزمن يمشي لقدام الوقت بيعدي اسرع . إلا ان لما بنكبر بيكون فى حياتنا هتمامات اكتر . و انت صغير حياتك عباره عن دراسه و لعب و تلفزيون و اكل و شرب مع زيارات متكرره للحمام . لما بتكبر صحيح لسه فى دراسه او شغل , لكنك بقى عندك اهتمامات اوسع بتقرا و بترسم و تتزلج ع النت ( اللى هو السيرفينج بالأنجلشّه ) . ده غير انك بقيت بتتكلم و تتناقش فى مواضيع مختلفه مع اغلب اللى حواليك .

لما بتخش مرحلة المراهقه , حاجات كتير قوي بتزيد فى حياتك ..... اهتماماتك , مسؤولياتك , مشاكلك , حريتك و احتياجاتك . يمكن اغلبنا حس فى فتره من الفترات ,و فى بداية المراهقه تحديدا , ان معاملة الناس اتغيرت و اختلفت معاه . بقو بيكلموه كتر , ممكن ياخدو رأيه فى حاجات , بيبعتوه مشاوير , ده حتى مكن يهزرو معاه و يسيبوه يهزر معاهم . فى كتير مننا بياخدو بالهم من التغيير ده , و م بيبقوش عارفين السبب . السبب هو اننا كبرنا , مخنا كبر , و بقينا قادرين ناخد قرارات لنفسنا , و نعمل اختياراتنا المميزه اللى بتميز كل واحد فينا , و بالتالى الناس بتعاملنا على هذا الاساس.

مشاكل المراهقه - و بصراحه مطلقه - كتيره" سو موت ". و يكن اتكلمنا فى كتير منها قبل كده .... زي الحب و الشكل و الفراغ و غيرهم . و لو كنت واحد من المصلحين الاجتماعيين فى الكليه او المدرسه , كل اتنيني متصاحبين وللا حد عنده مشكله هـ ييجي يقولهالك , و هـ تلاقي غير مشاكلك , مشاكل الناس شاغلاك ........ كمان , و انت صغير , كان لازم يبقى فى حد معاك , و ماينفعش تروح اي مكان لوحدك . لكن و انت مراهق .... الحريه اكبر , بتروح و بتيجي و بتخرج مع صحابك هنا و هناك ( ساعات حتى ممكن تهيم على وجهك لوحدك كده ) .



احتياجاتك كمان بتبقى اكتر .... و انت صغير يادوب : عايذ زيلي كولن يا ماما ! , و لو حد ادالك ربع جنيه فى العيد , بتبقى فى قمة السعاده و الانشكاح ... و بتبتدي تخطط هاتصرفه ازاي بحكمه  . لكن دلوقتي , انت محتاج لبس , و كتب و مصروف اكتر .... و مش بعيد تكون محتاج عربيه او لاب توب او موبايل جديد لأن اللى معاك وقع منك و انفجر , او تكوني محتاجه مايك اب و كام طرحه جداد على جوزين جزم و شنطه ! .... ممممم ..... احلام و خطط و امنيات كتشير كتشير كتشير .

اكيد مع الكم الحاجات المهوله دي لازم الوقت يعدي بسرعه , لأنك ما بتحسش بيه اساسا . صحيح قولنا قبل كده ان المراهق بيعاني من حالة فراغ .... لكن غالبا الحاله دي بتبقى فى اول المراهقه , عقبال ما تاخد ع الوضع الجديد و تتأقلم معاه ..... يعني ع الجامعه كده , غالبا هتلاقي الفراغ ده كله انتهى .

لكن الاهم و المهم , ان الواحد لازم يبقى عارف القانون الفيزيودنياوي اللى بيقول , ان الاوقات الحلوه بتعدي بسرعه جدا , و الاوقات الوحشه الزمن بيجيله حالة شلل بسيطه و بيبقى بطئ " جدي " !! . و ده لأن الوقت عامة بيعمل عكس ما احنا عايزين ! .... حاجه عجيبه و عجيبه ... بس الطبيعي يعني .


اما الميول بتاعى الواحد فـ ........
وللا اقول
لنا فى هذا
بوووووست آآآآآآخر
D=






ملحوظه كلبوظه : اتاخرنا ليه فى البوست ؟؟ ..... رمضان بيعدي بسرعه قوي , و مافيش وقت فعلا انك تبص وراك ... آسف بجد .
ده غير ان للأشف , فايس بوكي طار ! , و البايدج بقت مع حد تاني انا مش عارف هو مين .... فأدعولى بقى استرجعها , و اعرف اصطاد فايس بوكي على خييييير :))
8 رأي الناس | | edit post
عيب عليك
Teen








عيب ! .... انت مش كبرت على كده ؟!

بجمله زي دي , حاجات حلوه كتير بتنتهي فى حياتنا ...... احنا دلوقتى فى رمضان ( كل سنه و انتو طيبين و بالصحه و السلامه ) , يا ترى حسيتو بيه و هو جاي ؟؟ ..... كنتو فرحانين زي كل سنه ؟؟ ..... اعتقد ان اغلبنا ما حسش اساسا ان رمضان قرب , ولا انه دلوقتى عايش فى رمضان ! . فاكرين ايام زمان ؟؟؟

لما كان الفانوس ده حاجه اساسيه ( زي ما يكون رمضان ما بيجيش من غيره ) لازم تتجاب قبل رمضان بكام يوم , وتقعد بقى تحلم بشكل الفانوس و تخطط للونه اللى لازم يكون مميز و مختلف عن باقي العيال , ده غير طبعا ( بعد م الفانوس بقى " سيني " ) الدقه فى اختيار الاغنيه .... رمضان جانا , وحوي يا وحوي , حلّو يا حلّو ..... ما علينا بقى بعد كده ان الفانوس اتطور و بقى بيطلع دخان و ميه و حاجات عجيبه .... إلا ان الفانوس كان فعلا حاجه مهمه , و يوم الرؤيه تلاقينا ملمومين حولين التلفزيون و مستنيين الراجل على شان يقول رمضان بكره , و ننزل جري نلعب بالفوانيس فى الشارع , و تلاقي كل واحد ماسك فانوسه و قاعد يلفه من غير مناسبه و تسمع " سيمفوليه " من اغاني رمضان المختلفه اللى كلها شغاله فى نفس الوقت ! .

ده غير طبعا كورس تنضيف الشقق و تعليق الزينه و الفوانيس فيها على شان نستقبل رمضان بقى .... و تلاقي الاغاني شغاله ع التلفزيون , و الناس عماله تشتري كم حاجات مهول , تقريبا ما بيستعملوش ربعه ! . لكن مع الوقت بتلاقي اغلب الحاجات دي بتنتهي , لا فانوس ولا زينه ... و يادوب هو كورس النضافه , و كام حاجه ع القد بنشتريهم ( الحاجات بقت غاليه بقى ) . و لو جيت تبص , هتلاقي ان اغلب الحاجات الى بنبطل نعملها - و اللى كانت بتحسسنا برمضان - بتبقى بحجة انو عيب و اننا كبرنا .




يعني نجيب فانوس و نجري فى الشارع يا تين !




اكيد لأ طبعا ! .... مع انه هايبقى مشهد كوميدي جدا , إلا انو ما ينفعش , لكن ليه مثلا ما تشتريش ماديليه فانوس صغيره و تحطها فى مفاتيحك , او تديها لناس بتحبهم ؟ ..... ليه ما تشغلش كام اغنيه من بتوع رمضان ع الكبيوتر و تعلي الصوت شويه ؟ .... ممكن تشتري فانوس كبير و تحطه قدام باب البيت ( بس ابقى اربطه بأي حاجه لا يتسرق ) , ممكن تغير ثيم موبايلك لثيم رمضاني , او تحط نغمه رمضانيه .... كلها حاجات بيسطه و هايفه جدا , لكن كانت بتحسسنا برمضان قوي و احنا صغيرين .




طيب فاكرين العيد زمان ؟؟؟ ..... كان ليه مجموعة طقوس و تجهيزات كتير جدا . طبعا و اولا , اللبس الجديد , م فيش عيد من غير طقم جديد ع الاقل و طبعا شراب جديد و جزمه جديده ( و شنطه العيد بتاعة الفلوس للبنات ) و مفيش مانع لو نضاره بلاستيك جديده و حزام جديد ... و كل ده يكون مكوي و متلمع و مرصوص جمب السرير قبل ما تنام . صحيح م كناش بنعمل كحك و كده , لكن كنا بنقف نتفرج , و مفيش مشاكل لو مسكنا واحده و حطينا عليها لمستنا الفنيه قبل ما تتخبز .... لكن وظيفتنا الاساسيه هي الاكل . و كالعاده , م كانش فى مفر من حُمّاية العيد , بعد حلقة العيد او قبل ما البنات تقعد بقى تعمل شعرها و تظبطه , ده غير السهر ... على شان نشيل زينة رمضان و نحط زينة و بلالين العيد .






لكن .... كبرنا , و الدنيا بقت زحمه , و الهدوم الجديده ممكن تيجي فى اي وقت , ليه ننزل فى زحمة العيد !! . و ممكن نستحمى بعد ما نرجع من الصلاه احسن . اما الزينه و البلالين .... فكده كده , احنا مافيناش حيل نعمل حاجه , لأننا طول الليل يوم الوقفه كنا بره مع صحابنا . الكحك فرن " الجهاد " بيعمله هايل , و العبد بيعمل غريبه هايله . و واحده واحده ... تلاقي روح العيد هربت منك , و م بقيتش تحس بيه , بقى زيه زي اي تلت او اربع ايام فى السنه . كم الطقوس المهول ده , بيروح يتفسح مع باقى الطقوس بتاعة المناسبات التانيه .... حتى لو خرجت فيهم , ف هتلاقي الخروجه مش زي بتاعة زمان برضو . و بعد ما كنت بتبص للكبار و تستغرب ازاي ما بيجيبوش هدوم جديده فى العيد ! و تحلف انك لازم هاتفضل تجيب هدوم على طول ... تكبر و تبقى مسخه طلق الاصل منهم .




ايه المشكله انك تجيب لبس العيد , الهدوم دي عامة مجرد رمز لحياه جديده بعد العيد و رمضان .... ايه المشكله انك تحط الزينه و البلالين و بعدين تنزل تخرج ! .... مش ضروري نعمل كميات كحك مهوله , لكن حتى لو عملنا نص كيلو اي حاجه , نحس بس ان احنا اللى عملناها ... بيبقى طعمها مختلف جدا ( ساعات بيبقى اوحش من الجاهز ) . ممكن تخلى اول يوم فى العيد لأهلك , تتلمو مع بعض و تخرجو مع بعض زي زمان .... برضو هتلاقيها حاجات بسيطه و صغيره جدا , لكنها بتعمل تأثير كبير قوي .




لكل سن طريقه .... يفرح بيها , يزعل بيها , يتخض بيها , و ينشكح بيها .... يعني أكيد لما الواحد مننا بيزعل من حاجه ما بيقعدش يعيط و يرفص فى الارض زي زمان , ده كانت نص عماير مصر وقعت !! . و نفس الموضوع مع العيب و اللى مش عيب ... و احنا صغيرين , عادي اننا نعلي صوتنا فى الشارع و نضحك بصوت عالى لحد ما بتوع زحل يحدفونا بحاجه على شان نسكت . لكن لما نكبر , ماينفعش اكيد طبعا تبقى ماشي , و نص مصر عارفه انت بتقول ايه ! . مع كده .... ساعات تلاقينا بنحبكها قوي و بنقول على حاجات كتير عيب و مش مناسبه لسننا و مش عارف ايه .






نادرا لما تلاقي واحد دلوقتي راكب عجله غير فى المصيف . و يقولك : اصلى كبرت عليها ! .... مش عارف ايه العيب فى العجله تحديدا ! , و بعدين هو انت بترجع تصغر فى المصيف تاني يعني !! . صحيح كل شوارع مصر مش مناسبه انك تركب فيها عجله , ولا سكوتر حتى , لكن مافيش مشاكل يعني لو تجرب .... مع انك هاترجع عندك اختناق , و مش بعيد عامل حادثه .... لكنك اكيد هاتستمتع قوي .




طيب تفتكر لو واحد من صحابك شافوك و انت بتشوف كارتون ولا بتقرى مجلة ميكي ؟؟؟ ..... او حتى شمّو خبر انك بتعمل كده ..... هايكون رد فعلهم ايه ؟؟؟؟؟ .... حاجه بسييييييطه قوي , مجرد وصله قصيره ( مدتها 4 شهور تقريبا ) من التريقه عليك و هما بيفكروك انك كبرت على الكلام ده و دي حاجات عيال , و عيب عليك ... ده انت كبرت . الكارتون فى حد ذاته مش عيب .... لكن العيب انك تتصرف زي الكارتون . الكارتون هو المخرج الوحيد تقريبا من الحياه الواقعيه بكل همومها و احزانها . مش عيب انك تشوف كارتون و تكون متابعه كمان , كلها نص ساعه فى اليوم تخرج فيها من المود و ترجع لأيام زمان . مش عيب انك تقرا ميكي و تحب بطوط و عصابة القناع ..... ميكي فيها معلومات ممكن قوي متلاقيهاش فى حته تانيه , او ع الاقل ممكن جدا انك تلاقي ناس كتيره مش عارفاها . الكارتون ما بقاش دلوقتى للأطفال بس زي زمان ..... يعني مين فينا ما اتأثرش لما ابو سمبا مات ؟ او فرح لما وودي و بظ ضربو سيد على قفاه ؟؟ او ضحك على بطوط و هو متنرفز ؟؟ .... ما اعتقد ان في حد ما حصلوش كده .




فى حاجات فعلا عيب , لكن اهمها و المنتشر جدا , انك تلاقي كام شاب كل واحد منهم قد ضرفة الباب , و ماشيين يتخانقو فى الشارع و يزقو بعض و مش بعيد ينطو على بعض و يدألجو سوا !! . حركات الاطفال دي عجيبه قوي بصراحه , و ما تنفعش ابدا ... يا فلان ده قاللى كذا , يا علّان ده عمللي كذا . خلاص , ده المفروض انو انتهى بصراحه !




الحياه عباره عن لوحه .... ليها تفاصيل عريضه ( دي اللى ممكن تشوفها من بعيد ) , و ليها تفاصيل تانيه صغيره , لازم تقرب على شان تشوفها , من غير التفاصيل العريضه , مفيش حياه اساسا ...... مفيش حياه من غير اكل او شرب او اهل . اما الرتوش البسيطه اللى لازم تقرب على شان تشوفها , هي الحاجات اللى مافيش حلاوه من غيرها ..... زي البهارات بالظبط . على قد ما البهار مجرد بودره , لكن الأكل ما يتاكلش من غيره . و الحياه ما تتعشش من غير التفاصيل البسيطه دي .... كارتون , وصله من الضحك القوي , ركوبة عجل طويله , ماتش كوره مع الصحاب , فانوس , طقم جديد او حتى وجبه هديه من كونتاكي . من غيرها , هتلاقيك بقيت عامل زي القرد بتاع لا ارى لا اسمع لا اتحدث العربيه .






معلش بقى اتأخرنا
بس قولنا نديكو وقت تاخدو على رمضان
بمناسبة الوقت صحيح .....


ولا اقول .... لنا عن الوقت


بوووووست آآآخر
D=




5 رأي الناس | | edit post