طبعا كلنا عارفين فيلم " اليس فى بلاد العجائب "
لا لا.... مش انيييييس !! , بقولـ...لأ..ولا عتريس برضو " مع انها بتمشي ساعات , لما انيس بيروح يسّوأ - يعمل شوبينج يعني للناس المثقفه - و يجيب عتريس ابن اخته الصغيره مكانه فى الفيلم عقبال ما يرجع "
انا بقول اليس ....اها....البنت اللى بتجري ورا الارنب " المسروع " ...الله ينور
انا بقول اليس ....اها....البنت اللى بتجري ورا الارنب " المسروع " ...الله ينور
فى ايام الطفوله - و احنا لسه اطفال لطشيفين - شوفنا الفيلم ده .... و قولنا بعدها : ياااه لو الواحد يعيش فى بلاد العجايب !
صحيح فى اطفال فضلت تجري ورا الفران و القطط فى الشارع على اساس انها الارنب ابو ساعه ...و كام طفل تانيين دخلو السرايا الموف - الصفرا بتاعة الكبار , الموف للعيال ! - بعد ما قعدو يكلمو فى الدود اللى ع الخضار و الفاكهه ....بس كل ده ما يمنعش ان اللى اتقالنا و اللى اقتنعنا بيه لما كبرنا شويه ان : مافيش حاجه اسمها بلاد العجايب !!
و يكبر الواحد و يخش عالم المراهقه و هنا بيكتشف ان بلاد العجايب بتاعة اليس موجوده فعلا على ارض الواقع
سامع حد فى بيقول : ازاي يعني يا تييييييين ؟؟
اديكو شوية امثله على شان تفهمو المغزى
الراجل بتاع الطواقي " تمشي برانيط برضو , اللى هي جمع برنييييطه ! "
الحج بتاع الطواقي ده كان فاتح كشك فى بلاد العجايب - الضرايب حجزت ع الكشك دلوقتى على فكره - و بيبيع فيه طواقى اكيد , مش حاجه تانيه يعني ! ..... المهم ن كل طاقيه تلبسها بتتقمص على طول شخصية الطاقيه ...سواء كان محقق - المفتش كرومبو مثلا , او المحقق كونان - او رائد فضاء او حتى بكار " ابو كف رقيق و صغير ".
فى ارض الواقع مافيش طواقي زي دي , بس المراهق بيكتشف ان فى بدالها اقنعه , و كل واحد عندو دسته تقريبا - اصل سعرها نزل بعد ظهور القناع الصيني ابو لمض - بيغير فيهم بقى حسب الموقف , قناع للصحاب , و قناع للشغل , و واحد تاني للناس الغريبه......ده غير بقى قناع المصلحه و قناع الحب .....المهم ان كل قناع بشخصيه , و كل قناع بطريقة كلام و اسلوب مختلف ....و حتى لو الواحد مش بيحب يلبس الاقنعه - بتكبس على نفسه مثلا - بيلاقى انو بيضطر انو يلبسها على شان يعرف يتعامل مع ده و ده .
الدوده الزرقا
طبعا عارفينها , الدوده اللى طول الفيلم بتشرب شيشه - المباحث لسه بتدور على مورد الشيشه لبلاد العجايب , اللى يشوفه يبعتلنا ونبي - و اللى فى نهاية الفيلم بتبقى فراشه جميله لونها ازرق برضو " بس المره دي بتشرب سجاير بقى , لأنها اخف " .
نفس الحكايه بتحصل على ارض الواقع , لما الطفل يكبر و يبقى مراهق , بيتحول بالظبط زي الدوده
طيب ازاااااي ؟؟
بالنوسبه للولاد بيلاقى انو الناس بقت تقولو يا " شحط " بدل من يا حبيبي و خلافه
بيبتدي صوته يتحول لصوت مش آدمي غالبا
و مقاسو بيزيد بسرعه كبيره
ده غير انو بيبتدي يتحول لغوريلا بشكل ما
اما البنات
فالناس بتقولها يا " مزمزيل "
ده غير صوتها اللى بيبقى بيتسمع بالعافيه غالبا
و مقاساتها بتختلف اكيد زي الولد
ده غير انها بتبقى عاطفيه و رومانسيه بشكل غريب
مش ده تحول برضو ولا ايييه ؟؟
و اخيرا ورق الكوتشينه
فاكرين ورق الكوتشينه اللى كان بيدهن الورد البلدى الابيض بدهان " بيقولو عليه بوهيه ساعات " احمر على شان ملكة القلوب ما تزعلش !
ده بيحصل بااالظبط فى كل مكان .
و المراهق فى المدرسه , غالبا بيبقى فيه زيارات من مدير المدرسه او من الموجهين ....و قبلها بحبه , تلاقى حد جاي بسرعه من المدرسين بيقول : الحقو المدير او الموجه جاي !! ......... و هووووووووب , الكشاكيل تطلع و السبوره تتملى كلام , و تلاقى فجأه كل الفصل متفوقين و بيجاوبو !
و يا سلام لو كان فيه حفله فى المدرسه بقى , الزرع يطلع و المفارش و الواجهة تتكنس و تدهن , حاجه يعني " آخر الاجه "
و طبعا ده مش بيحصل فى المدارس بس
ده بيحصل فى كل مكااان و كل حته
و فيه الناس بتدهن الحقيقه بحاجه تانيه على شان يرضو حد تاني مش اكتر
!!
و طبعا التلت امثله دول
اثبتو و بجداره اننا عايشين فعلا فى بلاد العجايب بتاعة اليس
و غالبا بيبقى المراهق حاسس بنوع من التوهان و الحيره و سط كل ده
لأنها حاجات جديده عليه غالبا ....... ما بيسمعش عنها كتير
المراهق بيبقى محتاج حد يسمعه , اكتر ماهو محتاج حد بيتكلم
و للأسف فى مجتمعنا , كله بيتكلم و ماحدش بيسمع
و تلاقى كل فتره كده الأب - لو كان المراهق ولد - او الأم - لو كانت المراهقه بنت - ياخدو ابنهم و يقعدو معاه قعده يكلموه عن حاجه من الجداد دول , و غالبا القعده كلها بتبقى توتر , مع شوية عرق و نفحه من التهتهه , و شلحه من الصمت و المقدمات الطويله و الموضوع ما بيسملش من شوية امثله توضيحيه غريبه , بتكون غالبا عن عربيات او حاجات زي كده !.
و يا عيني , بيقوم المراهق - من غير ما ينطق اساسا - زي ما قعد بالظبط , لانو مش بيكون فى معظم الاوقات مقتنع ب اللى اتقاله ده .
و هنا بتحصل اخطر حاجه - اخطر حتى من الدب اللى فى اعلان جبنه باندا - ...... ان المراهق يروح و يسأل حد من صحابه على الحاجات الجديده دي , و يا سلام بقى لو صحابه ده حد من الناس اللى بتفتي - و دول منتشرين بغزاره فى انحاء الجمهوريه - او واحد مش كويس .
طبعا المعلومه بتوصل غلط و بيفضل المراهق مقتنع بيها كده , لأنو لاقى اللى يسمعو , ده غير طبعا انو زي ما قولنا فى اول بوست خالص لو فاكرين , ان الاهل بيحسسوك المراهقه او اى حاجه ليها علاقه بيها عيب و عيب نتكلم عنها او نجيب فى سيرتها !!
و عشان كده , و من الصفحه دي فى المذكرات " دهين " , بناشد كل الأهالى " ولا مرتضى منصور فى المحكمه " انهم يسمعو التييينز و يسيبونا نتكلم براحتنا و يعرفو ان الزمن اتغير و طريقة تفكيرنا ذات نفسها مختلفه و مشوشه ساعات , لازم يفهمونا.....احنا يا جماعه محتاجين حد يدينا المعلومه المفيده على طول , من غير مقدمات ولا لف و دوران .....احنا يا جماعه محتاجين اللى يسمعنا
كل البرامج اللى فى التلفزيون اللى بتتكلم عن المراهقه - اللى مش موجوده اساسا , لأنها بتكون مجرد فقره بس - تلاقى اللى بيتكلم ده , يا اما حد كبير - عالم او دكتور - بيتكلم كلام علمي , يا اما تلاقي مجموعه من الاهل او الامهات بيرغو مع بعض !
طيب بزمتكو كده , نقعد نسمع الكلام اللى مش فاهمينه , ولا نسمع الاهل اللى بيتكلمو بلغة و افكار الالفيه اللى فاتت !!
تلاقى الواحده منهم بتقول : يوه ! هو انا عارفه ياختشي ايه ده ......آل بيقولو نروح الكافيه مع صحابنا ...فين ايام المشربيات و الوابور الجاز .
و ترد عليها صاحبتها : اه ولله يا حبيبتشي , ده انا ماعرفتش يعني ايه ولاد غير لما ابو محمد جه اتقدملي .....و لحد دوقتشي " دلوقتى يعني " ما روحتش الكوفي شوب دكهه اللى بيقولو عليه !
طبعا مافيش احسن من اننا نقول فى الموقف ده : عجبي !!
.....................................................
طبعا ناس بتقول : ليه البوست ده اتأخر يا واد يا تين ؟؟
اقولكو فى الأول
رمضان كرييييممم
و كل سنه و انتو طيبين
بس بعيد عنكو التين اليوم ملغبط معاه خالص
و مش لاقى وقت حتى انو يعطس ( حد معاه منديل ؟ )
نعتذرلكو بقى عن التشأخير
و نوعدكو ان ده مش هايحصل تاني ان شاء الله
و نحب نقول .....
وحوي يا وحوي ايه ؟؟
لااااااااااا
ده لينا فيه بووست آخر
D=
|
جامدة اوي البوست دى يا تييين :)
يا رب نشوق البوست اللى جاية اسرع ان شاء الله :)
ربنا يخليكي يا نورهان
يا رافعه روحي المعنويه انتي
و البوست الجديد جه اخيرا اهو
:)
مررررررررحب شهر الصوم مرحب :D
هو اى نعم رمضان هيخلص اه خلاص بس مش مشكلة :D
-----
بوست جامد كالعادة بجد
والواحد بجد لسه ف مرحلة التشويش دى
ومش عارف هتخلص امتى
نأمل انه ييكون قريب :D
gooooo on ;)