ساعات كتير بنزعل
ساعات كتير بنتعب
ساعات كتير بنحزن
ساعات كتيره بنحس ان ماحدش فاهمنا
ساعات كتير بنتعب
ساعات كتير بنحزن
ساعات كتيره بنحس ان ماحدش فاهمنا
و ساعات اكتر بنكتأب
لو رجعتو بشريط الذاكره حبه , هتلاقو ان و احنا مراهين اكتأبنا و بنكتأب ( و هانكتأب اكيد يعني ) كتييييير جدا . ساعات بيبقى لسبب واضح و صريح , و ساعات تانيه بيبقى كده .... رخامه ... من غير سبب و خلاص , عايزين نكتأب يا جماعه , ده حقنا الشرعي برضك ! .
لو رجعتو بشريط الذاكره حبه , هتلاقو ان و احنا مراهين اكتأبنا و بنكتأب ( و هانكتأب اكيد يعني ) كتييييير جدا . ساعات بيبقى لسبب واضح و صريح , و ساعات تانيه بيبقى كده .... رخامه ... من غير سبب و خلاص , عايزين نكتأب يا جماعه , ده حقنا الشرعي برضك ! .
و زي كل حاجه فى الحياه .... الإكتئاب ليه طقوس معينه ..... البدايه بتكون مع حاله من الصمت و السرحان و التبليم ( حاجه زي السرحان كده ) , و طبعا معاهم السؤال الطبيعي : انت مالك ؟؟ فيك ايه ؟؟ ..... و نرد - كالعاده برضو - : هيييييييه ( تنهيده طويله لزوم الإكتئاب ) مافيش حاجه . و تبتدي الاسطوانه الطويله العريضه من : هو فى ايه و مافيش ... و هو فى ايه و مافيش !! , لحد ما نقر و نعترف , او التاني يقوم تافف علينا و ماشي بعد ما يسمعنا كلمتين حلوين و قصيده شعرف فى : اد ايه احنا رخمين و تنحين ! . على قد ما و احنا مكتابين , بنحب ان الناس تسيبنا فى حالنا و ماحدش يقعد يزن و يقول : مالكو مالكو مالكو , إلا اننا فى نفس الوقت , بنزعل قوي لما محدش يعبرنا و يسألنا عن حالنا و احنا مكتأبين ( تصدق ان احنا رخمين بجد !! ) . علماء التينولوجي بيقولو ان دي مجرد حاجه فى نفسوياتنا من جوه , يعني نحب الناس تسألنا , على شان نحس بمدى اهتمامهم بينا ..... لكن فى نفس الوقت هي مره او مرتين و يسكتو ... من غير زن ..... و يستنو لحد ما نحب احنا نحكي لوحدنا ! .
بعد مرحلة الإكتئاب , بتيجي مرحلة الإنعزال و الازورار ..... اللى فيه " بنتزور " لوحدنا و نفكنا من العالم اللى حوالينا و نقعد لوحدنا , و غالبا القعده دي بتكون فى اوضتنا ... نقفل بابنا علينا و نقعد بقى تحت الغطى , حاضنين مخداتنا , بنعيط , بناكل فى ربع فرخه ... اي حاجه و السلام . و طبعا على شان كوكتيل الإكتئاب يكمل , لازم نضيف مجموعة اغاني كأيبه على شان نعيش الحاله اكتر .... ايام فى بعدنا فاتو , حالة ملل , مش عايزه اتعذب تاني , نص حاله , فى حاجات ( و محتاجات ونبي ياختشي ) ... و مافيش مانع لو احنا مثقفين نسمع كام اغنيه اجنبي نكد .... Leaving , My Immortal , White Flag .... و لما تيجي الأغنيه اللى ع الجرح , نقعد نعيد و نزيد فيها , و مش بعيد دمعتين يفرو و يهرّو كده ولا كدهون ! .
زي ما قولت من شلحه بسيطه , ان ساعات بنبقى عارفين ايه سبب الكآبان اللى عندنا ده .... و ساعات لأ . العالم " خرموش المرووش " ( ده واحد كده لقيناه فى الشارع ) بيقول ان حالات الزعل او الإكتئاب اللى بتصيب الواحد مننا ( الشر بره و بعيد يا خويا انت و هو ) .... بيبقى سببها , حاجه بسيطه جدا , دايقتنا من فتره , بس ما اديناهاش اهتمام , و قعدت تكبر جوانا , لحد ما بقت لوكشه كبيره كأبتنا من غير سبب واضح ! .
طيب يا واد يا رغاي انت .... ليه بنكتأب كتير قوي فى مرحلة المراهقه ؟؟؟
فى مجموعه مختلفه و متنوعه من الأسـ ..... ايه ده !! , ركزي يا بت ياللى بتلعبي فى شعرك انتي , و بعدين ايه اللى بيسرح على الارض ده !! قمل ده ولا ايه ؟! .... ما علينا ( اصلنا كده كده هانكهربها بعد شويه ) .... زي ما كنت بقول , فى لبشة اسباب مختلفه بتخلينا نكتأب فى الوقت ده اكتر من وقت تاني فى حياتنا كلها على بعضها .و احنا لسه داخلين من باب المراهقه بالصلاتو ع النبي كده ..... بيبقى لسه فينه همسه من الطفوله , و بالتالى ساعات نتحكم فى اعصابنا زي الكبار , و ساعات تانيه نتنرفز زي العيال .... و مش بعيد نتقمص بقى و الشغل ده. و ده بيزعلنا من نفسنا بعد كده ... اللى هو : ازاي احنا لسه هبل و عبط كده , بعد ما كنا من لحظه فرحانين بنفسنا على شان بنتصرف زي الكبار !! .
ده غير اننا اغلب الوقت ما بنحسش ان فى حد فاهمنا ..... و ده لأن المراهق عامة بيبقى لسه بيّكون فى شخصيته , يعني مالوش شخصيه واضحة المعالم , فغالبا ما بيلاقيش حد زيه قوي يعني , و بالتالى بيحس انه لوحده ... ده غير - و ده الاهم - ان اغلب الاهل , ما بيبقوش عارفين ازاي يتعاملو مع المراهقين .... فتلاقي دايما فى خناقات قويه و عنيفه مع الاهل , بتقلب على اكتئاب حاد فى النهايه .اغلب الأهل , بيبقو فاهمين اننا مجرد متمردين و خلاص , عايزين نعمل اللى فى دماغانا حتى لو ده هما مش موافقين عليه ... او لمجرد اننا نغيظه و نعاندهم و خلاص . و احنا شايفين انهم ناس قديمه و مش فاهمين الدنيا الجديده و بنبقى مقتنعين قوي اننا صح .... و لما يمنعونا عن حاجه بنزعل جدا و نحس بكبت لحرياتنا .... و مايمنعش من شوية شتيمه فى الاهل مع وصله بسيطه من الدعا بقى بالخلاص و حبة اماني بالهرب او ان اهلك يجيلهم اعاره الخليج او اعاره لتنزانيا ! .
فى الحقيقه .... و مع الأشف .... احنا غلط , و كمان هما غلط !! .اي اهل , لما بيبقو فاهمين الموضوع من كل جوانبه .... بيبقى غالبا ( دي اللى معناها دايما ) كلامهم صح , و ده لأنهم كانو مراهقين و شباب و ناس زينا , و عندهم خبره فى اغلب المواقف اللى بتحصللنا , لأنها حصلتلهم قبل كده . و معارضتهم او غيره بتبقى من منطلق انهم مش عايزينا نعيش نفس المأساه اللى عاشوها قبل كده ..... و عامة احنا اتكلمنا فى ده قبل كده فى بوست " مابا " .
من الحاجات كمان اللى بتجيب اكتئاب للمراهق انو بيبقى سهل قوي انو يحبط فى اغلب الاوقات ..... مجموع وحش فى الثانويه , م دخلش الكليه اللى هو عايزها , خناقه هنا او هناك , علاقه فاشله , حد بنحبه قوي و عاملنا وحش قوي قوي , نفسنا نستحمى بس عندنا حساسيه من الميه و الصابون ... اي حاجه !
لما بنكتأب , غالبا بنشوف الدنيا سوده , يعني بنشوف الجمب الوحش بس لأي حاجه فى الحياه ... و نفتكر بس الذكريات الوحشه اللى فى حياتنا . و بنحس بقى ان عمرنا ما عشنا يوم واحد حلو فى حياتنا و ان الهم مكتوب علينا طول عمرنا , و ان عمر ما حد فهمنا و هانعيش طول عمرنا لوحدنا , مع نفحات من افكار سوداويه زي الهرب و الانتحار و الامنيه الخالده ان ربنا ياخدنا ...... و حاجات بقى حلوه من دي ! . ده غير ان لما بنكتأب , بنعمل اكتر حاجه بنحبها , او احنا شاطرين فيها ..... بس للأسف بتبقى برضو حجات سواد زي اللى احنا بنبقى عايشينه فى الوقت ده .... بنرسم رسمه مرعبه , نعزف مقطوعه تقطع القلب ( و الكبد وحياتكو ) , او نطبخ طبخه ملحها دموعنا و زينتها آهاتنا ( حلوه الحته الدراماتشيكيه دي !! ) .
طيب .... فى المزنق ده . في سؤال بيطرح نفسيته فى القعده .... ازاي نخرج من حالة إكتئاب ؟؟
المفتاح الأشاسي فى الحكي و الرغي ..... الكلام من الحاجات اللى بتريح جدا على فكره .... ليه ؟ , لأنك مجرد ما بتحكي , غالبا بتعيط و العياط برضو بيريح قوي . و لما بتحكي , اللى قدامك دايما بيساعدك و بيديك رأيه , و بتحس بأهتمام الناس بيك , و بتبعد فكرة الوحده تماما اللى هي اساس الأكتئاب . و حتى لو ما نصحكش و سابك كده ..... بس مجرد انك بتحكي , بتحس انك تخلصت من هم و حمل تقيل قوي عليك ! . المشاركه عامة مريحه .
بغض النظر عن الرغي , فنحاول نبعد عن طقوس الإكتئاب .... يعني بلاش كوكتيل اغاني النكد , بلانش نقعد لوحدنا .... على شان نخلص من الخنقه ... مش ده المطلوب .... ممكن تنزل تتمشى , ممكن تشوف فيلم كوميدي بتحبه , ممكن حتى تقرا المذكرات ( أيه !؟ بنفرش لنفسنا ) .... حاول تبعد عامة عن اي حاجه بتساعد ع النكد .
حاول تغير نظامك , اعمل حاجه مجنونه , غير نظام اوضتك , حاول تغير الروتين و النظام اليومي اللى بيساعد بشده ع الإكتئاب .... نظام حياة البشر عامة , غالبا بيبقى روتيني قوي , و بالذات الاهل اللى بيرجعو من الشغل , ياكلو , يصحو , يستلمولك المسلماني و عسل و الشاذلي و الابراشي و محمود سعد و معتز .... اللى بيجيبولنا واقع البلد الجميل قوي و اللى بيساعد بشده على الأنشكاح و الانفتاح ع الحياه !! .
ده غير ان رمضان ع الابواب اهّوّ
نو الموضوع مش محتاج اكتئاب من ايتها نوع
يالا بقى كل واحد يشتريله فنوس و يعلق الزينـ ....
ايه ؟؟ ... عيب !! ... على شان كبرنا !
لا لا .... ده لينا فيه بوووست آآآخر
و عنداً فيك بقى هانعلق زينا هنا كمان
كل سنه و انتم طيبين
و رمضان كريم يا بشر
D=
* : الأبلتين لدع فى دهاليز الحياه = الدنيا خربانه .
