فى مجلات ميكي ..... او اي مجلات كوميكس تانيه ( اللى هي قصص مصوره يعني للي ثقافتهم هيروغليفي ) ... تلاقي لو الشخصيه متنرفزه قوي و بتشتم , يتكتب زي كده : *+&%$#@ !!
و ده طبعا على شان يحافظو على عقلية العيال الغضه ( مثقف انا مش كده ) من انهم يعرفو يعني ايه شتيمه
و يمر الزمن و يكبر الطفل فى جو من الاحترام و المحافظه , و بيكبر و هو عارف كويس ان الشتيمه عيب
هو صحيح دلوقتى الزمان اتغير , و بقى المربي الأول للأجيال هو التلفزيون اللى الطفل بيقعد قدامه بالساعات , و هو عمال يتغرق فيديو كليب و افلام و حاجات لطشيفه خالص ...... كل ده و الحاجه ام العيال فى المطبخ بتحشي ورق الكرمب اللى الحج ابو العيال بيحبو و بتقول فى " عقل بالها " ( اوعو حد يقول يعني ايه ! ) : أهو ياختشي ملهي قدام التلفزيون .
صحيح ام العيال استريحت , بس الطفل ما استريحش و بقى اول كلمه يقولها فى حياته ... لا لا مش بابا ولا ماما .... و إنما بيقول : تـ...تـ...تزيون !!
و بعد ما العلماء اكتشفو ان التلفزيون هو صديق الفلاح ( اصل ابو قردان كان مسافر على عبارة السلام و غرق ! ) , لقينا ان الاطفال بيتعلمو الشتيمه و الكلام الغريب من بدري جدا و تلاقي الولد من دول لما تقوله حاجه : يا حج فكك ....فاكش عليك !
او البنت لما تطلب منها طلب ما تقولك : من عنيا الاتنين و قلبى التالت يابا الحج !!
ام هند ( اللى هي المهم يعني , ماحدش يقول مين ام هند دي ! ) ..... بيكبر الواحد مننا و هو عارف ان الشتيمه عيب , و يخش برجليه اليمين من باب المراهقه ليفاجأ بأن الشتيمه اساسا بقت حاجه عاديه جدا , بل و بقت نوع من الترحيب او الهزار .... و الواحد اللى ما بيعرفش يشتم بيتقال عليه حاجات كتير زي مثلا : فرفور ...نايتي ( و ساعات توينكز ) .... و ابن الناس الكويسين !
و بيتصدم الواحد اكتر لما يفاجأ و هو راكب جمب الحج الوالد العربيه , و يلاقيه قام مطلع دماغو من الشباك و قال : ماشي يا راجل يا أبن الـ*&%$#+@ !و لما تسأل امال فين الكلام بتاع زمان ؟
بتكون الأجابه : هي البلد دي ما بتمشيش غير بكده !
و هنا - و كالعاده يعني - بنقع في حيره من امرنا , نشتم ولا لأ ؟؟
هل فعلا الشتيمه مهمه اليومين دول , ولا الطيب احسن ؟؟
الشتيمه يعني رجوله ؟ ولا لأ ؟؟
اشرب بيريل ولا لأ ؟!!
اسئله زي دي و اكتر بتدور فى مخ الواحد مننا
و فى اللى بياخد الطريق السهل و بيشتم و خلاص
و فى اللى بيختار الطريق الصعب ( الكيلو 270 فى الصحراوي ) و يستحمل
و طبعا اغلب البنات ما بتشتمش اساسا لأنو البنت عيب تشتم عامة
بس ....... بتظهر هنا حاجه ماسه للبنات انها تشتم و ده انطلاقا من مبدأ المساواه ( و نفتكر مع بعض اغنية : البنت زي الولد تشتم مهما كان العدد !! )
طيب : البنات بتشتم ازاي ؟؟
ببساطه , بيخترعو كلمه تحل محل كل الشتايم ( الحاجه مرات ابو الاختراع بقى ) و بيتفهم المعنى من الجمله
و طبعا اشهر مثال عندنا : تييييييييت !
و دي مقتبسه من محطات التلفزيون , لما تجيب حد و يشتم ( و ده بقى العادي مهما كان مستوى الضيف ) , فالصوت يتقطع و تلاقي صفاره " تييييييت "
و تلاقى البنت مثلا تقول : ده يوم ابن تيت , و انا هاعرف اوري البنت التيت دي هي و الواد التيت التاني شغلهم , تيت يا ناس !!
و بتختلف الكلمات و بتتنوع حسب الثقافه و المستوى الفكرى و الاجتماعي و البيئه المحيطه
و ممكن تلاقى كلمات غريبه زي : شاش ( لو الوالد دكتور ) , beeb ( لو البنت مثقفه بقى او فى حد ميكانيكي فى العيله ) , يا اهلا بالأسباني ( دي بنت حريصه و بتعمل تمويه كتير ) .... إلخ إلخ
و طبعا سؤال بيطرح نفسه هنا : هي خلاص , وصلت بينا الحاجه اننا نشم لحد كده ؟؟ اننا نخترع و نألف كلام جديد ؟؟الأجابه هاتختلف من حد للتاني اكيد
فى اللى هايقول : اكيد على شان نعرف نعيش
و فى اللى هايقول : و ليه يا عم !! , ربنا يسامح الجميع !
و نرجع و نقول ان الزمان اتغير قوي عن ايام الابيض و الاسود و البنطلون الشارلستون
مش مصدقين ؟؟
بصو كده الحوار ده فى المدرسه
زمان
- سيبي المقلمه بتاعتي
- انا بس عايزه اخد قلم منها
- آآآه , وقعتيني يا حما......
الميس : ايه اللى انت كنت هاتقولو ده يا ولد , فصل تلت ايام مع ساتدعاء ولي امرك !!
دلوقتى
- ما تسيبي الـmp3 بتاعي
- فاكس عليك ! انا عايزه اسمع اغنيه
- سيبيه يا بت يا بايره انتي
الميس : ايه اللى بتقولو ده يا ولد
- الواد التيت ده بيقول عليا بايره يا ميس
الميس :هيهيييييييي ( بتضحك ) , يخيبك يا واد ...اتلم !!
اكيد الموضوع مش محتاج نقاش
و انما الموضوع محتاج قاموس كبير
على شان نفهم ايه اللى بيتقالنا
و ازاي نبقى شباب كده و نرد
و نستعمل لغة النت - اللى مخترعها خد جايزت هوبل للوئام العالمي ! - اللى ظهرت من مده
آه صحيح .... مش تفكروني !!
كنت هانسى اقولكم بون ماشرووم عيد (آه , جايبها من جوجل ترانسليت )
او عيد فطر سعيد عليكو كلكوووووو
ياااه
بلالين و بموب و صواريخ
و لبس جديد و كحك و بسكوت
و بيتي فايف ( الفور بقى مضر بالصحه )
اييييييييه ( تنهيده طويله !! )
ذكريات الطفوله المشرده
الذكريات دي كانت لـ......
ولا اقول
كفايه كده احسن عايز انام و عنيا وقعت مني ع الكي بورد
اللى يلاقيها يبعتها ونبي احسن بحتاجها ساعات يعني
و استنو مفاجأتنا فى البوست اللى جاي
D=
ويلكم باك ادهم :)
-----
مشكلة سخيفة شوية موضوع الشتيمة ده ... احيانا كتير اوى الواحد بيكون ف الكلية وبيسمع حد بيشتم التانى ع سبيل الهزار ف اغلب الاحيان يعنى بشتايم تحس انك لو اكتر مكان لوكال ع سطح الارض ممكن متسمعهاش ومتهيئلى مبقتش تفرق من بنت او ولد ع قد ما بتفرق انها طبقات مش قصدى بطبقات غنى او فقير اقصد بيها طبقات مستوى فكرى .
----
وبوست جامد كالعاده واسيبك انا بقى ورايا مدونة تانية اسمها آيســـل عايزانى اقراها :D
وانا لقيت عين ع الكيبورد هنا مش عارفه بتاعتك ولا لا :D
لوووووووول
بصي
انا عيني زرقا بتقلب على موف ساعات فى النور يعني
لو العين دي كده ابعتهالى فى ميل ونبي
هاهاهاااااا
و مرسي بجد على اهتمامك
دايما كده مشجعاني
المهم
زي ما قولتى
فعلا
الموضوع بقى سخيف جدا جدا
زي ما يكون بقينا لازم نشتم و خلاص
و بقى نوع من الكلام العادي بتاعنا مع بعض
و زي ما قولتى
الموضوع بيتوقف ع المستوى الفكري و بس
لأن ياما تلاقى ناس من طبقات راقيه و بيشتمو !!
و بجد مرسي ليكي جداااااااا
:)
تحفة اوى يا ادهم البوست دى :))
و فعلا الشتيمة بقت منتشرة جداااا :(
بس انت قدرت تناقش الموضوع ده بخفة دم جامدة جدا :)
..............
مستنيييين البوست اللي جاى هو و المفاجاة بفارغ الصبر :)
مرسي يا نورهان بجد
و استنيى بقى
فى فجأه هاتعجبك قوي
:))
:))
حلو البوست دة مع ان الموضوع دة بينرفزنى بس البوست خلانى اضحك عليه
طب انت بتتكلم عالهزار بالشتيمة
ما بالك بقى بالهزار بالايد!!! :D
ما تعرفيش يا سمر الموضوع ده بيبقى مستفز قد ايه
لما تلاقي حد بيقول
للتاني : صباح الخير يا ابن الـ...... , و يرد و هو بيبتسم قوي : ايه يا مان , وحشتني قوي يا ابن الـ ........
حاجه عيجبه موت
الاب و الام اللى تعبو و ربو
مالهم
عملو ايه
دول قاعدين فى البيت بيتفرجو على منى الشاذلى !!
ذنبمهم انهم جابو واحد يتسبب فى شتيمتهم
!
اما الهزار بالأيد
فده اكيد امتداد طبيعى للهزار بالشتيمه
مع نو مش منتشر قوي يعني
و مرسي ليكي كتييييييير
:)
ادهم فيه كمان ميرسى بالايطالى دى تبع الشتيمه
البووست ده حلووو اووى اووى :)
هيهيهيهييييي
مرسي ع الاضافه يا رباااااااا
و مرسي بجد جدي
لووول
:)