توجع فى القلب ........ و ما بتبانش
و افضل على طول حيرانه مابين
طب اقولللللللللللك ولا ما اقولكش ؟!
يا سلام يا سلام ع الكلام الجميل , الله يرحمك يا ست نانسي ( ونبي بتعجرم الجو برضو) ...... المهم , زي ما نانسي بتحس حاجات و ما بتقولهاش , برضو المراهقين عندهم حاجات كتشير كتشير كتشير تتحس و غالبا ما بتتقالش !!
و احنا صغيرين ايام ابتدائي كده , كنا دايما بنحب ان صحابنا يبقو من نفس النوعنا , و اكيد الانتشيم و الشله كذلك .... و تلاقى شلل الولاد و شلل البنات فى صراع مستمر و مظاهرات قوميه عنيفه اللى طبعا كان شعارها : البنات صراصير البلاعات .... لمونه لمونه , الولاد مجنونه ! , و اد ايه كنا بنلاقى سعاده غريبه و احنا بنتريق على بعض , او لما ولد يجيب عنكبوت بلاستيك و يجري بيه ورا البنات , و هما يصرخو و يصوتو ! , و دايما البنات يكونو واخدين فكره عن الولاد انهم كائنات مش مؤدبه , و متخلفه , و يانبعد عنهم يا نتريق عليهم ! .
غالبا شلل الواد بيبقى اتجاهها رياضي ( و الرياضي ده معناه الكوره و بس طبعا ) و خناقات و وقوف فى الشارع و الفرجه على افلام اميتاب " بشناب " , اما شلل البنات فبتبقى مختلفه جدا , عرايس و لعب بينك فى بينك , و طبعا حفلات الشاي و طقم المطبخ السعيد ( اللى بيعلم البنت ازاي تطبخ الهوا و الميه بطرق مختلفه و لذيذه !! ) , و اكيد الشلل دي بيبقى كلها لعب و ضحك و اسرار , و اكيد رغي و رغي ورغي ...... و رغي !
ونكبر , و تكبر مشاعرنا معانا ...... بنتغير , و مشاعرنا بتتغير معنا , و نخش مرحلة المراهقه ..... و الغريب جدا , ان مشاعرنا بتخش معانا برضو !!
زي ما احنا عارفين , اننا بنوصل لمرحلة المراهقه فى اوقات مختلفه , يعني مش كل اللى فى نفس السن بيبقو مراهقين فى وقت واحد , و هنا الصحوبيه و الأنتمه اللى بتبقى مابينا و احنا صغيرين بتختفي فى معظم الاوقات , فمثلا نلاقى ولدين او بنتين صحاب قوي و انتيم لدرجه غريبه , و فجأه يبعدو ع بعض , و هما مش فاهمين ليه ولا اللى حواليهم فاهمين ليه !
فى مرحلة المراهقه الميول بتختلف و بتتغير و التفكير ذات نفسه بيبتدي ياخد طريقه ( ايوه , ع الدائري ) فى انو يبقى تفكير منظم , مش مجرد تفكير طفولى و خلاص , و شلل الصحاب الحزبيه بتتفك و بتتكون شلل جديده فيها ولاد و بنات , فممكن قوي بنت تبقى مهتمه بالأشاعات و كل الاخبار الجديده ( هوايه منتشره عند البنات على فكره ) و بهدومها و الميك اب ( بيسمعو اغنية : ما تزوقيني يا ماما كتير جدا فى الوقت ده على فكره ) , و نجوم السينما و الطرب الاصيل :) , و صاحبتها الانتيم لسه بتلعب بالعروسه " الحربي " و شايفه ان نجوم السينما مكانهم الطبيعي التلفزيون و الجرنان و بس
و ممكن كمان نلاقي ولد ابتدى يسّرح ( و يستحمى ساعات ) و يظبط شكله و هدومه و يلمع " كاوتشه " و يبتدي يهتم بالبنات و يحاول يكون لطشيف معاهم , و يا سلام سلم بقى لو بنت احتاجته فى حاجه ولا اتكلمو مع بعض لمده طويله شويه , بيبقى فى قمة السعاده و الانشكاح ....... و برضو تلاقى صاحبه الانتيم لسه مهتم بالكوره و المصارعه و بس !
طبعا اختلاف ده بيخلى الاتنين يبعدو عن بعض , لأنهم بيبتدو يدورو على ناس جديده زيهم فى التفكير و الميول لحد ما الاتنين بيستقرو فى مرحلة المراهقه , و يا اما بيرجعو انتيم تاني , يا اما بيكونو لقو ناس متوافقين معاهم اكتر , و هنا الانتيم بيبقو صحاب عاديين و خلاص , حتى لو دخلو من باب المراهقه مع بعض , ساعات كتير برضو بيختلفو و ممكن ما يفضلوش انتيم !
حاجه زي كده ممكن تعملنا حيره جامده , و سؤال ييجي فى بالنا كتير : هو احنا ليه بعدنا عن بعض ؟؟؟ و نفتكر ايام زمان لما كنا ما بنبعدش عن بعض غير وقت النوم ( و ده بعد " عكشه " كبيره مع الاهل ) , احساس بيبقى غريب و رخم جدا لما اقرب الناس ليك يبقى مجرد حد عادي زيه زي اي حد تاني , و ممكن ساعات تشوفه اساسا و ماتسلمش عليه ... مش كده ؟
و كتير انفعالاتنا بتتغير بسرعه , يعني ممكن تحس بسعاده كبيره , لما تكون مع صحابك او فى لمه كبيره جميله , و فجأه تحس ان قلبك مقبوض و زعلان , و حاسس انك نفسك تقعد لوحدك ........ او ساعات تحس انك بتفكر و بتتصرف كأنك حد عاقل و كبير , و اللحظه اللى بعدها تتنرفز و تجنن زي العيال ( و يمكن يبقى نفسك فى مصاصه او جيلي كولا على شان تهدى ! ) .
غالبا ما بنعرفش ليه اللى بيحصل ده , و ليه فى وسط الفرحه نزعل او نتنرفز و نكتأب فجأه ........ اللى مانعرفوش ان معظم التينز بيحصلهم التقلبات " الموديه " دي , لأن ماحدش مشاعره بتتحول من الطفوله للنضج فى لحظه واحده , و هو ذات نفسه ما بيتحولش من مراهق لحد كبير فى " شلحه " من الزمن , فساعات نلاقي المواضيع ماشيه " بيرفكس " و ساعات تانيه كلو يخش فى بعضه و بتبقى لخبطه كبيره لطشيفه جدا ( زي لما تكون معدي من قدام ناس تعرفهم و هوووووووووب ! , تتكعبل و تتقلب على وشك زي الفطيره الحزينه )
و اكيد اكيد بنحس فى اوقات كتيره ان مافيش حد فاهمنا , و نحس بالوحده المطلقه و انو مكتوب علينا اننا نفضل كده وحيدين و ماحدش فاهمنا طول عمرنا , و لكن اللى مانعرفوش ان زي ما في ناس كتير فى نفس سننا بيمرو بنفس الاحساس ده , فى كمان وقت و هايعدي و التفكير و الاحاسيس هاتبقى مظبوطه و تمام جدا .
و بعدين الـ...... يوه ! , مين اللى رافع ايده هناك ده ؟! .......... بتقول ايه ؟؟ ........... اااااااااه , ونبي سؤال برضو بيفرض نفسيته كده اللى هو : يا ترى ممكن احب و اتحب ؟؟
كتير جدا بنبص فى المرايه و بنتمنى ( او بنتخض ساعات , عادي يعني ) حاجات كتير : ياه لو كانت مناخيري اصغر , شعري لونه اصفر ( زي مهند كده ) , عيني كانت اوسع او بشرتى اصفى ( و ممكن برضو الرموش تبقى اطول ... يعني هي جت عليها !! )
الامنيات دي بيبقى بس الهدف منها انك تبقى - من وجهة نظرك - احلى , على شان اللى حواليك ( و خاصة اللى عكس نوعك ) يعجبو بيك و يحبوك , و تعرف تكلم اى حد فى اى وقت بكل ثقه
امنيات كتير فى حياتنا , لو و لو و لو .....
يا ترى ليه ربنا خلق : الشر , المرض , الحزن , التعاسه , الحروب و كل الحاجات اللى مش بنحبها ؟
تخيلو معايا لو الدنيا خير بس , لو كل حاجه من حولينا حلوه من يوم ما اتخلقنا
هايبقى الموضوع عادي ولا هانحس اساسا يعني ايه خير ........ مممممممممم , مش واضحه الفكره ...... طيب ....
احنى فى الشتى صح ؟؟
تخيل لو فتحت التلاجه و وقفت قدامها ........ عادي مافيش فرق , الدنيا ساقعه اساسا
طيب لما تنزل تحت الغطى ؟؟ ........... امممممم امممم , احساس جميل جدا جدا
بجد اجمل احساس لما تكون سقعان و تدفى , و الغطى تحسه دافى و ناعم على وشك
لما تكوون حرااان , و تشرب كباية ميه ساقعه مشبره ( او كوكاكولا من بتاعة نانسي اللى بتزغزغ المناخير ) ياااااااااااه
بجد بيكون احساس حلو قوي و غريب جدا , الواحد بيكون فى قمة السعاده فعلا
استحاله تعرف يعني ايه حر , غير لما تحس بالسقعه
استحاله تعرف يعني ايه أمان , غير لما تحس بالخوف
استحاله تعرف يعني ايه خير , غير لما يكون في شر
استحاله تعرف يعني ايه سلام , غير لما يكون في حرب
استحاله تعرف يعني ايه صحه , غير لما يكون فى مرض
استحاله تعرف يعني ايه فرح و سعاده , غير لما يكون فيه حزن و تعاسه
حلووووووووا ووووووووووووووى يا دوووووووووووووومى
goooooooooooooo a heeeeeeeeeeead ;)
ويلكم باك يا أدهم :D
----------------
اللى بيتحس ومبيتقالش كتير يا ادهم والله :D
بوست النهارده حسيت انه قالب ع اسامة منير شوية :]
-------------
يمكن بجد من الاسباب اللى بتخلى الواحد نفسه يكبر انه يعدى المرحلة دى مش علشان اى حاجة غير فكرة انك مش ثابت ع حال ,, الموضوع لو ع قد انه تغيير ف المود مش اكتر فده سهل الواحد يتعايش معاه
لكن الفكرة ان الافكار او المعتقدات نفسها بتتغير من حال لحال ومن موقف لموقف
بالنسبة للاصحاب فتقريبا من بداية فترة ثانوى والواحد اصحابه هما هما ,, التغيير بدأ يحصل الايام دى او الفترة دى ... ف تغييرات جامده اوى بتحصل ف الشخصيات
زى ما بقولك الواحد نفسه يوصل لمرحلة يكون فيه ثبات او شبه ثبات ع الاقل
-----------
مرسي يا رباااا بجد
ع التشجيع القوي و المستمر ده
.................................
امل
امال بقى لما تشوفى البوست الجديده هاتقولى ايييه ؟؟
هيهيهيهيهييييي
هو عامة الحب و المشاعر شئ لابد من الحديث عنه لو جبنا في سيرة المراهقه يعني
و بعدين يا امل
احنا طول عمرنا بنتغير و هانفضل بنتغير لحد ما نموت
سواء من تجاربنا او معرفتنا بحد او موقف ما
بس التغيرات دي بتختلف فى كونها كبيره او بسيطه
هي غالبا طول الحياه بتبقى بسيطه
ما عدى فى فترة المراهقه دي
الواحد بيتحول تماما
اما المود فده حاجه يعني تعتبر من العوامل المساعده مش اكتر
و صدقيني
مش بحبطك يعني
بس مافيش مرحلة استقرار
و انما هي شبه ثبات
اول ما الواحد يشتغل و يبتدي ياخد خطواته فى انشاء حياه مستقله مستقره خاصه بيه
و بجد
كان كومينت جميل قوي
:)
ماهو ده تقريبا بالظبط اللى الواحد خايف منه :D
هو تقريبا حتى الان الواحد بيبص برده ع ان لو كده كده المعتقد الاول صح - وان كان ف لبس كبير اوى دلوقتى - بعد المرحلة دى هثبت عليه
مش عارفه اعتقادى ده صح ولا غلط الصراحة
يعنى دينا مثلا الواحد طالع ونازل ممكن تكون دى حاجة فعلا مش مرتبطة ان الواحد لسه ف فتره مراهقة بس اكيد ليها تاثير ,,
نظرة الواحد لحاجات كتير كانت شبه ثابتة اوى مع التغيرات اللى بتحصل ف الفترة دى بيحصل فيها لبس وكتير اصلا الواحد بيحس انه تايه
ما بين رأيك ورأى حد تانى ,,, ما بين ان مين فينا اللى صح
هقلب ع اسامة منير انا بقى شوية :D
مشاعرا برده الدنيا مش ثابته ,, اتسألت انا قبل كده انى ممكن اخد قرار خطوبة ف وقت زى ده او لا ؟؟ تلقائيا قولت لا ...
بس بجد لما الواحد فكر ف ايه الاسباب اللى متخليش الواحد يعرف ياخد قرار مصيرى زى ده ان الواحد تقريبا برده مش ثابت ع حال
يعنى ممكن الواحد يبقى معجب بشخصية ما مجرد اعجاب مش بيتعدى الحدود دى ومن بعيد مش اكتر بس ف وقت ما انت مثلا حاسس بالاعجاب اووى بحد معين مجرد ان حد تانى يلفت انتباهك ممكن تنسى اصلا
دى اقدر اقول عليها حاجة من الحاجات اللى مخاوفانى انها متتغيرش ,,, اعتقادا منى انها اكيد هتتغير وان الواحد اكيد مش هيفضل واكيد برده هيقدر ياخد قرار ان يكمل حياته مع حد واحد بس ويكون قد المسئولية ويقدر يحافظ عليه
عايزه اعرف رأيك ف النقطة دى ع فكرة ؟؟ شايفها فعلا مجرد مراهقة وهتعدى ولا حاجة ف الشخصية نفسها ؟؟
طوووووولت انا اوى المره دى بس سماح بقى :D
وورايا بوست تانى يتقرا بقى ,, سلام :D
عاارف احلى حاجة فى البووست دة ايه؟؟
انك بدأت باكتر اغنية لنانسى بحبها :D
لالالا بهزر بهزر
البوووست تحففففففففففففة بجد
و كل اللى قلتوا صح مية فى المية
و حكاية الاصحاب اللى بيبعدوا عن بعض فجاة من غير ما يحسوا و كل الخطوات اللى قلت عليها حصلصتى بالظبط و يمكن لما احنا الاتنين بقينا فى سن المراهقة قربنا لبعض اكتر من قبل ما نبعد
امل
طولي براحتك ولا يهمك
انا بحب الطومينتس الطويله اساسا
و بعدين انا بتفق معاكي فى الكلام اللى قولتيه ده
لأن الانسان عامة بطبعه متقلب و متغير
و لكن بتختلف درجة التقلب من واحد للتاني
و بتوصل لأقصاها فى مرحلة المراهقه
و بعدين بترجع تاني و تهدا
اما اخر نقطه
فزي ما قولت فى البوست اللى جاي
ان الحب فى سن المراهقه جامح , مالوش قيود
و مع الكبر و النضج بيهدا و بيتحطله قيدين
هما العقل و الاخلاق
اللى لو توافرت التلت شورط دي فى اي حب
ممكن قوي ينجح
لأنك اساسا مش هاتشوفي حد غيره على شان يشدك
و ما تقلقيش ابدا ابدااااااااااا
و بعدين عايز اعرف رأبك فى آيسل
اكمل ولا لأ ؟؟؟؟
..................
سمرررررررررر
منوره ولله
عاش مين شافك
على فكره
انا اساسا بعشق اغنية نانسي دي
و بعدين احرجتيني ولله بكلامك ده
و الحمد لله ان كلامي فادك و طلع صح
و ربنا يخليلك صحبتك دي دايما و ابدا
:)
ميرسى ياادهم ع ردك
ايسل معلش والله انا مقرتهاش من فترة كبيرة اوى
اوعدك ف اقرب فرصه ان شاء الله
اللى هى ممكن تكون دلوقتى يعنى اروح اجيب كل اللى فاتنى :D
ولا يهمك يا امل اكيد
و مستني كومينتك بفارغ الصبر
:)