فى كل وقت و كل مناسبه و كل ساعه و كل دقيقه و كل لحظه , بتظهر بين الناس - و خاصة المراهقين - تقليعه جديده .... يوه ! يعني بيقلعو يا واد يا تين ؟! و دي تشيجي برضك ! ....... تؤ تؤ , مش بيقلعو ولا حاجه ! , التقليعه حاجه الناس بتقلدها او مجرد تيمه لفتره معينه .... قصة شعر , ستايل لبس , اعلام , موبايلات .... او حتى طريقة كلام معينه و شويه و بتختفي و بتظهر مكانها تقليعه جديده .
يعني فى الفتره الاخيره طلعت تيمة الثوره , اعلام , بوستارات , ستيكرات , صور , اغاني , كوفيات و شوية " حبشتكنات " كده بقت موجوده فى كل مكان و كل حته . ولازم فى كل محل تلاقي منها شويه ... ده حتى طلعو " اصنص " الثوره !! , اما رحلات الثوره , فحدث ولا حرج .... كله دلوقتي بقى بيعتبر المرواح للتحرير مجرد فسحه وخلاص ... بصو الحوار ده كده :
- مش ناوي تخرجنا بقى يا ابو سريع
- ولله فكره , انا زهقت و بقالي فتره ما نزلتش
- طب نروح فين ؟ كل الحتت بقت ممله .... تجيش نروح التحرير
- يا سلام على افكارك يا ام سريع , اهو فرصه نتفرج و نشملنا شوية هوا و يمكن ناخدلنا شندوتشين و كانزي بيبس ولا كاكولا من اللى ولاد الحلال بيفرقوهم هناك
- طب انا رايحه البس العيال
اغلب الناس دلوقتي , بقت بتتكلم فى السياسه ... تقليعه جديده برضو ... لكن " للأفس " برضو الناس بتسمع من هنا و تردد من هنا , من غير ما يكون ليها رأي " مستأل " لنفسها . شويه مع الثوره , و شويه ضدها , و شويه مع ده و شويه ضد ده ! . و تلاقي الكل بينادي بالديموقراطيه ... بس مع الاسف مع الندم برضو , احنا محتاجين نعرف يعني ايه ديموقراطيه ... الديموقراطيه مش مجرد حاجه او كلمه احنا عايزينها و خلاص , المفروض يعملو كورسات ديموقراطيه وللا حاجه على شان نبقى عارفين نتعامل مع الحاجه الجديده اللى " طبت " علينا على حين غره دي ( حلوه على " حين غره " مش كده ؟ ) .
الديموقراطيه كمان بقت تقليعه , الكل بينادي بيها ... بس ييجو و يقولو : لازم نمنع فولان من الترشح للرئاسه .... علان خاين و عميل على شان بيشرب بيبسي مش كولا .... ترتان غبي و ما بيفهمش على شان متعاطف مع اليهود ...... منين بس احنا بننادي بالديموقراطيه و احنا بنهاجم كل واحد رأيه و افكاره ضدنا . من حقه يترشح و من حقنا ما ننتخبوش , من حقه يشرب و احنا ما نشربش و من حقه يتعاطف و من حقنا ما نتعاطفش .... عجيييييبه !
طب ليه التقاليع بتنتشر اسرع من " الفنتو ساميه " يا واد يا تين ؟
فى اسباب كتير للموضوع ده , و يمكن منها اننا كـ" إنسانات " بنحب نعيش نفسنا فى جو الأحداث اللى بتحصل , يعني ثوره , نضرب الاعلام و الستيكرز و صور البروفايلات تتغير .... ماتش من اي نوع , هوووب ... نلون وشنا بأي حاجه و نجري ع الاستاد ! . مجرد بس ما يكون " الاتموسفير " من حولينا ماشي مع الاحداث , ده بيخلينا نحس بأننا مشاركين فيها و بشده , حتى لو كنا قاعدين فى البيت .... بيدينا كده احساس معين بنحبه و حالة من " الإنشكاح " اللامتناهي .
و اخيرا اننا كمراهقين - سواء كنا ولد او بنات - بنبقى دايما عايزين الجنس التاني يعجب بينا و بشياكتنا و روشنتنا و " طقطقتنا " و الحركات اللى احنا عاملينها , و يا سلام سلِّم ( المعزه بتتكلم :) ) لو سمعنا جملة : ايه الشياكه دي ؟ . و بالتالى بنحب نكون فى قمة الاناقه و الحداقه و اللياقه , و مافيش احسن من اننا نعمل ستايل حد مشهور .... هووووب ستايل عموره نزل السوق , اديها بلوفر كمامه طويله و آيس كاب .... كلووو يلحق ستايل تموره وصل يا رداله , الدقن اللي مش محلوقه , قميص اول سبع زراير فيه مفتوحين , و نضاره شمس و تسريحة " رجل الديك " على كام " شنسله " و حظاظه ..... يييياااا بنات كاب " الكمسري " بتاع نانسي نزل كلو يشتري بسرعه ..... شريطة هيفا اللى بدل التوكه مولعه الدنيا , و بكل الألوان الممكنه ( نزل منها الشفاف و اللى بينور فى الضلمه امبارح ) .... و كلها كام يوم و تلاقي كل الشارع ناس رابطه دماغها بشرايط و ناس فاتحه قمصانها ما تفهمش ليه !
يعني لا سبايكي ولا " فلّنات " كريم عبد العزيز ولا بنطالونات سكيني و تيشرتات بترتر !!
الله عليك
عندك حق طبعا فى كل كلمة قلتها
و بيبقى شكل الناس غريب اوى و كله ماشى لابس زى بعض كدة بس زى ما قلت ساعات الواحد بيحب يحس انه ماشى مع الاحداث و اللى بيحصل يعنى انا مثلا تقريبا كل هدوم الخروج اللى بلبسها اليومين دول احمر و اسود و ابيض بس :)
بس تقليد لأ مش معاه خااالص
بس جااااااااامد البوست يا ادهم بجد :)
مرسي يا سمر بجد على كلامك
و ما اقولكيش على موضوع الناس شبه بعض ده
بيفكرني بافلام الخيال العلمي و المستنسخين و كده !!
و عامة , اغلب الناس بتلبس دلوقتي الوان مصر
بس مافيش مشاكل يعني
اهو نوع من دعم الوطنيه
:)
ادهم انا عملت بوست وراح D:
نبدأ م الاول تانى D:
اولا ناسف للتاخير والانقطاع لمده طويلة شوية D:
المهم بقى ياسيدى بيقولك الراجل اللى بيمسك خشبه ف مجلس الشعب ده - فتحى سرور - لقو عنده فيلا مش فيلا لا ده قصر 3 ادوار ,, الدور الاول فيه اثارات - اثار سابقا - والدور التانى رزم فلووووس بس ايه باليوووروووو
الكلام ده اتقالى من سواق تاكسى كنت راكبة معاه من غير طبعا الجمل الاعتراضية دى
انا كل اللى جه ف دماغى ساعتها اعلان كوكا الفتاييين بيشجعوا واحنا معاهم
للاسف الناس خيالها وسع اوى الايام ده وقدره ألتاليف بقت عاليه ,, الشعب المصرى طلع عنده مواهب جامده والله D:
معلش يا أمل
بتحصل معايا كتيييير جدا
و لا نأسف ولا حاجه
المهم انك هنا
و ما طوليش بقى تاني :)
لوووول
اعلان كوكا ده كنت بضحك عليه جداااااااا
طبعا يا بنتي طول عمرنا عندنا مواهب
بعدين هي تلاقيها اشاعه
و تلف من هنا اهنا
و كل واحد يسمع حاجه لام ينشرها
و كأنها واجب وطني او قومي
و لو ما عملهوش
هايروح النار
!!!