فى كل سنه بتعدي عليك , هتلاقي ايام معينه كده ليها الوان
يوم اصفر ( ده تراب ) , يوم اسود ( نكد اكيد ) , يوم أزرق ( برد , مش محتاجه فكاكه )
و طبعا طبعا يوم أحمر ..... اللى بيقولو عليه " الفالنتاين "
يوم 14 من شهر " فأراير" من كل سنه , هتلاقيه يوم احمر فى احمر , دباديب حمرا , ورد أحمر , علب حمرا , هدايا حمرا , ناس حمرا , و حتى الأهلي بيلبس احمر فى اليوم ده !! . و لازم على الأقل تشوف 5 بني آدمين فى اليوم ده شايلين بوكيهات ورد او هدايا ( حمرا برضو ) و ماشيين بيها فى الشارع و على وشهم نظرة كسوف قويه جدا , او نظرة انشكاح تانيه مغزاها : ياترى هايجيلي ايه النهارده ؟؟ .... ما علينا من كل ده , المهم قوي فى اللحظه دي , اننا نعرف مين فالنتاين اللي احنا بنحتفل بيه ده !
14/2 فى الاصل كان عباره عن ذكرى لموت اتنين من القساوسه اسمهم فالنتاين , الاتنين كانو عايشين فى عصور اضطهاد المسيحيه ! , المهم فى كل ده ان حياة الاتنين مافيهاش ولا شلحة رومانسيه وحده !! . امال كم الرومانسيكيه دي جه منين !!! . الموضوع كله طلع لما جه راجل افتكس اسطوره , و الاسطوره قعد كل واحد يزود فيها حته و يظبط فيها حته , لحد ما انتهت على انه زمان الامبراطور قرر يمنع الجواز على شان كان شايف ان الجنود المتجوزين بيبقو جنود " نايتي" , ف جه القديس فالنتاين و بقى يجوز الناس من ورا الراجل . و لما الامبراطور (ابو جيش) عرف , سجنه ..... فى الفتره دي فالنتاين حب بنت الراجل اللى كان واقف يحرس الزنزانه , و يوم 14/2 فالنتاين اتعدم بطريقه شنيعه جدا ( بتجيب تعاطف اكبر ) , بعد ما ساب اول كارت "لامور" فى العالم لبنت السجّان بيقولها فيها انه بيحبها .... و طبعا ما ننساش الأمضه الشهيره : المخلص " فالنتاين " .
و بكده الست ام فالنتاين , بقت ام الشهيد ( شهيد الحب ) , و خدتلها شقه فى المساكن الامبراطوريه الجديده , و الفين حتة دهب و جاموسه صغيره , عملت بيها مشروع " البان ام فالنتاين " . بغض النظر ان المشروع نجح و الحاجه ام فيلو (دلع فالنتاين) فتحت اكتر من فرع و بقت غنيه , إلا ان اليوم بقى يوم الرومانسيه العالمي فى كل مكان تقريبا . و بقى اللون الاحمر رمز للرومانسيه , مع انه فى نفس ذات الوقت رمز للدم و الغضب و النازيّه و حاجات كتير حمرا فى الحياه فى الحقيقه ( انت و وجهة نظرك بقى ) .
و احنا صغيرين , ما كناش واخدين بالنا من اليوم ده , كان يوم عادي , احمر شويه , بس عادي ( حصبه او حملات تبرع ب الدم كتيره ) . و خاصة ان اليوم ده كان دايما بيبقى موقعه فى اول اسبوع من الدراسه فى التيرم التاني , ف كان يعني يوم غلس فى اسبوع اغلس ! . لكن بنكبر و بنخش المراهقه و بنكتشف انها مش حملات تبرع ب الدم , ولا حتى حصبه .... إنما ده عيد لحاجه اسمها حب ... و كمان عيد ناس مختلفه عليه .
الناس كانت مقسومه 4 انصاص ( آه , انصاص ... أقسم) ..... نص شايف انه مش عيدنا و مش بتاعنا و انه عيد الناس "النايتي" . و دول زي الامبراطور كده , رابطين حاجتين مالهمش اي علاقه ببعض .... رابطين بين تبلد المشاعر و الرجوله او الصلابه او ايّا كان و بين الفالنتاين . و غالبا لو اتكلمت مع حد فيهم , هتلاقيه شايف انه عيب انك تعبر عن مشاعرك , أو انك تجيب دبدوب او تشيل بوكيه ورد .
اما النص التاني , ف هما النص بتاع " Sorry Valentin's .... I am Muslem/a " . و دول برضو تبع الامبراطور , لأنهم رجعو تانى ربطو بين حاجتين بعاد عن بعض جدا , لو دورت مش هاتقدر تلاقي هي علاقه حقيقيه بين الدباديب و الورد و الإسلام او ايّا كانت الديانه ! . و كأن الناس يوم الفالنتاين بتروح تسكر و بعدين ترتكب " الفحشاء " ..... و بعدين يدو لبعض الدباديب و الورد و ياكلو شكولاته محشيه مخدرات !! .
النص التالت هما اللى بيحتفلو ب الفالنتاين , و بيستعدو لليوم من السنه للسنه , و لازم يلبسو فيه احمر , و ياكلو فيه شوكالاته ( او بطاطا ..... و ياتجيبلي الشوكالاته يا بالاش يا ولا , روح رجع البطاطا يا بلاش يا ولا .... كده فاكس بطاطا , مماكن دره ! ) . بيستعدو ب الزرافه الحمرا ( الدبدوب موضة السنه اللى فاتت ) , و بوكيه ورد " الزنبق قاني الحمره " .... و البنات بيلبسو حلق احمر او شريطه حمرا او طرحه حمرا , او حتى لكلوك احمر ... اي حاجه و خلاص تحسسهم ب اليوم و ب جو الفالنتاين . و حتى لو كانو سينجل , ف لازم "يفلتنو" ( يعملو فالنتاين يعني للى ثقافتهم هندوسي ) و ينزلو يتمشو و يشوفو محلات الورد و الناس و يجيبو شوكالاته و ايس كريم ب الفراوله ( عم شندويلي عامل ايس كريم جديد ب اللحمه يجنن ) و يرجعو يكتبو انهم سينجل و براود و هابي سينجلز داي .
اما النص الرابع و الاخير , ف هو النص اللى ببساطه شايف اننا مش محتاجين يوم او وقت معين على شان نحتفل بحبنا , او اننا نعبر عنه بأي شكل ... مش محتاجين يوم مخصوص نجيب فيه ورده او شوكالاتيه كورونه ( حلوه و رخيصه ) للشخص اللى بنحبه .... يعني بمعنى ادق مش لازم ييجي عيد على شان نجيب حاجه "بالقهر" و ب العافيه . النص الرابع شايف ببساطه ان الهديه او التعبير عن الحب من غير مناسبه , و بـ"محض الإراده الحره " حتى و لو كان بجمجمه او حزمة جرجير ملفوفه بشريطه حمرا , بيبقى معبر اكتر و تأثيره اقوى بكتير . لأننا قادرين نخلي كل السنه فيها حب , بدل ما نحصره فى يوم واحد بس .
مع الوقت , و مع تأثير الاهل و البيئه اللى حواليك , هتاخد نص من دول , و تتعامل بيه فى حياتك . فى كل الاحوال , انت مش غلط , لأن ده رأيك الشخصي و انت حر فيه , أهم حاجه تخليه رأيك فعلا مش رأي غيرك , و أنك ماتسمحش لحد ابدا مهما اتريق عليك او حسسك بمدى تخلف رأيك ده , أنك تغيره لمجرد انه عايزك تغيره ! .
سؤال بيطرح نفسه بقى , احتفل ب الفالنتاين ازاي ؟؟ ..... اول ما بتيجي السيره اصلا , هتلاقي حد بيقولك ان مش ضروري تحب فى قصة حب على شان تحتفل ب الفالنتاين , ممكن قوي تحتفل بيه مع حد بتحبه حب من نوع تاني , حب اخوي , ابوي , امي , صداقه ... ايا كان نوع الحب بقى , كلام سمعناه كتير , و ما فيش اي مشاكل فى ده , لكن يفضل قدامنا السؤال : نحتفل ب الفالنتاين هااااااااااو ؟؟
ازاي يا واد يا تيييييييييييييييين ؟؟؟
لازم نركز على الأختلاف .... نخرج بره الصندوق كده ( بس تقلّو احسن يجيلكو نزله شعبيه ) و نبعد بقى عن الورد و الدباديب و كل الحاجات دي . ممكن قوي تعمل حاجه بأيديك , مهما كانت بسيطه او شكلها مش لطشيف , لكن خليك واثق ان تأثيرها فى اللي قدامك هايبقى مذهل و قوي جدا . و ده لأنك انت اللى عاملها بأيديك , تعبت فيها , و كل ما يبصلها هيلاقي فيها لمستك و روحك ( او ريحتك ! ) . ممكن كمان تعمل الكبل تي شيرت ... اللى هما تيشيرتين عليهم رسمتين او جملتين بيكملو بعض ( بحبك جوي جوي جوي .... يوه ! و اني قومان ) , ممكن تبقى خروجه فى مكان مختلف , او عشى فى مكان محترم , اي حاجه تكون مختلفه , او يكون اللى قدامك محتاجها فعلا , مش علبة شكاليطه هايخلصها فى لحظه . يعني ممكن قوي نحوش احنا الاتنين و بحق الهديه نجيب كاميرا ديجيتال محترمه .. اهو نتصور بيها بدل ما نقعد نشحت من الناس ! .
ازاي يا واد يا تيييييييييييييييين ؟؟؟
لازم نركز على الأختلاف .... نخرج بره الصندوق كده ( بس تقلّو احسن يجيلكو نزله شعبيه ) و نبعد بقى عن الورد و الدباديب و كل الحاجات دي . ممكن قوي تعمل حاجه بأيديك , مهما كانت بسيطه او شكلها مش لطشيف , لكن خليك واثق ان تأثيرها فى اللي قدامك هايبقى مذهل و قوي جدا . و ده لأنك انت اللى عاملها بأيديك , تعبت فيها , و كل ما يبصلها هيلاقي فيها لمستك و روحك ( او ريحتك ! ) . ممكن كمان تعمل الكبل تي شيرت ... اللى هما تيشيرتين عليهم رسمتين او جملتين بيكملو بعض ( بحبك جوي جوي جوي .... يوه ! و اني قومان ) , ممكن تبقى خروجه فى مكان مختلف , او عشى فى مكان محترم , اي حاجه تكون مختلفه , او يكون اللى قدامك محتاجها فعلا , مش علبة شكاليطه هايخلصها فى لحظه . يعني ممكن قوي نحوش احنا الاتنين و بحق الهديه نجيب كاميرا ديجيتال محترمه .. اهو نتصور بيها بدل ما نقعد نشحت من الناس ! .
هو ده بأختصار الفالنتاين
و هما دول الناس و نظرتهم للفالنتاين
فى اللى احتفل بيه
و فى اللى ما احتفلش السنه دي
حزنا او احتراما او تقديرا للشهداء
و الاسر اللى الفتره دي بقى لونها اسود بالنسبالهم
و ناس تانيه قالتلك لأ ده حرام
و ده اللى هايودينا على البوووووست الجديدD=
و هما دول الناس و نظرتهم للفالنتاين
فى اللى احتفل بيه
و فى اللى ما احتفلش السنه دي
حزنا او احتراما او تقديرا للشهداء
و الاسر اللى الفتره دي بقى لونها اسود بالنسبالهم
و ناس تانيه قالتلك لأ ده حرام
و ده اللى هايودينا على البوووووست الجديدD=
|
Braaaavo..لميت الموضوع من كل ناحية..بس أنا عايزة أضيف إضافة أنا بتهيألى و الله أعلم إن اللى بيقول بلاش نحتفل بيه عشان ده مش اسلامى..يقصدوا إننا المفروض منتشبهش بأهل الأديان الأخرى و إن الناس بره هما أصلا اللى بيحتفلوا بيه.
النص الأخير ده فكرة حلوة........أنارأيى الناس تحتفل قبله عشان ميبقاش تقليد و متحوطش فى نيتها إنها بتحتفل عشان مناسبة معينة لكن عشان بتبسط نفسها و تبسط اللى بتحبه ..لوحدهم و تحتفل طول السنة برده
تييين :D مش عارفة اقولك ايه بصراحة :D
كل مرة بقولك نفس الكلام انك جبت من الاخر
اولا انا عجبانى موووووت الحتة الاخيرة بتاعت نحتفل بيه هااو :D لان انا شايفة كده بردو بالظبط :D
بس انا عايزة اضيف حاجة على ان الفلانتين مش بس للــ couples لان انا وصحابى بنعمل اهبل حاجة فى الحياة (( معرفش فى حد بيعمل كده غيرنا ولا لا :] ))
احنا بنجيب هدايا لبعض فى الفلانتين
مش لازم تكون دبدوب او قلب او ورد عشان الناس هيفهمونا غلط :D
بس بجيبلها حاجة مثلا هى كان نفسها فيها حتى لو حاجة بسيطة اوى ( قلم - محفظة ... ) ممكن اكتبلها كارت مثلا كده يعنى
و فى بردو فكرة حلوة اوى بنعملها انا وصحابى اننا بنجيب 3 حاجات شبه بعض ( عشان احنا 3 انتيم :P ) يعنى 3 اقلام زى بعض مثلا او كده !
انا كل مرة برغى كتيييير جدا :D بس المرة دى مش هقولك سورى رغيت عشان انت اكيد اتعودت :D
و يا رب متتاخرش بقى فى البوست الجديدة !
قرأت الموضوع متأخر شوية، بس أنا متفق معاك جدًا..
أحييك على حسّك الساخر، العالي دائمًا :)
ايه يا تييين فين البوست الجديد
روزي
فييييييييينك ؟؟
المذكرات نورت بكومينتك و ظهورك تاني :)
انا معاكي فى كلام
لنك فى فرق بين الاحتفال ك إحتفال
و التشبه فى طريقة الإحتفال
[ره بيسكرو و بيعملو حاجات عجيبه
هنا آخرنا دبدوبين و شمعه
ف ب التالى مافيش يعني
حاجه تخليه حرام او كده
و الله اعلم برضو
:)
...........................
نور
عايز اقولك ان كل بنات مدرستي
كانو بيعملو كده , و كنت بقف
اتفرج عليهم و استعجب من الموضوع
لكن مع الوقت حسيتها حاجه حلوه جدا
و فكرة الهاند مايد دي تحفه قويييي
بجد أحييكي و بشده
صحيح انا أتأخرت ... قوي
لكن البوست الجديد
كان محتاج التأخير ده مع الأسف
:)
...........................
ع.سالم
منورنا ك العاده
و التحيه ليك يا باشا
على متابعتك دي
:)
.......................
غير معرف
أهو جه
معلش اتأخرت
لكن كان لازم الواحد يلف لفه كده
قبل ما يعمل البوست ده
:)
شكراااااااااااااااا
ممتاااااااااز
موضوع مفيد
مفيد جدا