الحب .......اه الحب , اللامور يعنى للى ثاقفتهم صيني !

زمان و احنا صغيرين , كان الولاد و البنات حزبين - ولا حزب المعارضه و الحزب الوطني كده - , و ده حال كل الاطفال فى كل مدرسه و فى كل شارع و فى كل بيت و تحت كل سرير و ترابيزه و كنبه ( مكان العيال المفضل اللى بيستخبو فيه , و ما بيطلعوش غير لما تشد شعرهم او تحدفهم بأي حاجه ! )

لو بيلعبو عسكر و حراميه , تلاقى الولاد هما العسكر و البنات هما اللى حراميه

او لو بيلعبو حرب , تلاقى البنات هما اسرائيل و الولاد هما جنود مصر البواسل

و فى كل الحالات , البنات هى اللى كانت غالبا بتكسب

و بينتهى الموضوع بخناقه عنيفه بين الصابونه و الليفه و الميه ضعيف !

و طبعا ماحدش ناسي الاغاني الشعبيه الشهيره

" البنات البنات صراصير البلاعات "

" لمونه لمونه , الولاد مجنونه , تفاحه تفاحه , البنات مرتاحه "

( رد البنات اطول , على شان يهزمو الولاد بالثلث ! )

اما فى سن المراهقه ....ف الوضع بيختلف

البنت بتحس بأنجذاب غريب ناحية الجنس الخشن - على شان كده بننصحك بأيفا بالصبار و الجلسرين - , و الولد بيحصلو انجذاب غريب ناحية البنات او الجنس اللطشيف عامة

و بيتحولو من اعدقاء - اعداء و اصدقاء يعني للى مش فاهمين :) - لأصدقاء و ساعات احباب

و تبتدي البنات تسمع اسامه منير و تعلق صور احمد عز و و عمرو دياب و تامر و حماقي فى الدولاب

او على مُلل السرير اللى فوق - لو كان السرير بدورين - او ممكن برضو لو السرير بدور واحد و بيناموا تحت السرير ساعات على شان يشوفو الصوره , او حتى تحت أزاز المكتب

اما الولاد فايبتدو يكرهو اسامه منير و احمد عز و باقي الشله و يحبو هيفا و نانسي و اليسيا

و برضو يحطو صورهم فى الدولاب او ساعات خلفيات للموبايل الصيني !

و ده غير طبعا ظاهرة الستيكر بتاع كاظم و فؤاد ع الكشاكيل و المساطر

و البنت من دول تلاقيها قاعده ساااعه بتسطر - و لحد دوقتي العلماء بيدرسو الظاهره دي ! - و ماحدش عارف ليه من المدرسين !

و ظاهرة العلامة بتاعة شريف مكاوي - الـ m و تحتها تلت نقط - اللى كل البنات رسمتها بالجاف على ايديها و شنطها و كشاكيلها

ده ان ما كانش فى علامه فى كل حته من دول بالأضافه انها على الهدوم بالألوان !

و بيتحول الولاد و البنات من توم وجيري - او ممكن اسماعيل يس و الشاويش عطيه - , لمهند و نور او ميرنا و خليل ( او حتى بكيزه و زغلول , مافيش مشاكل يعنى )

و بيظهر على اعتاب المرحله الثانويه - و ده اللى بقى دوقتى على اعتاب الأبتدائيه - ظاهره اسمها.....

الصحوبيه

و دي لينا فيها بوست اااااخر

D=