فى مرحلة المراهقه ....المراهق بيسيب وراه كل الحاجات الطفوليه اللى كان بيعملها , من لعب و كروت يوجي و التازو بتاع البوكيمون - اللى الناس قالو ده من اسرائيل و العيال ولعو فيه و حصل 500.5 حالة حريق فى مناطق مختلفه من الجَمهوريه - ....بيسيب وراه الكارتون و بوجي و طمطم و الآنسه بيجي و المغامرون الخمسه - لكن بعد ظهور سبيس توون , ما بقاش يسيبهم و بيتفرج عليهم فى الدِره من غير ما حد يشوفه ل يقولو عليه عيل - ......و بيسيب وراه اللعب فى الشارع و البلى و النحل و صيادين السمك و العسكر و الحرميه , و الأغلبيه بتسيب وراها كمان الخيال و الاحلام !!

مع كل الحاجات اللى بتروح دي , المراهق بيلاقى فراغ كبيييير جدا فى حياته, لأن كل حاجه كان بيعملها - تقريبا - راااحت و بقت تندرج تحت مسمى " للأطفال فقط " ( اشمعنى يعني فى للكبار فقط ! ) , و هنا....المراهق بيبقى عامل زي الورقه البيضه , اللى فى حد مسك الاستيكه و مسح كل الرسومات و الكتابات اللى بالرصاص من عليها .....

و بيمسك المراهق القلم الجاف , و بيبتدي يكتب تاني , بس المره دي بتختلف ورقة كل واحد عن التاني , فيه الورقه اللى كلها كتابه , و فى اللى كلها رسومات , و فيه الفاضيه خالص , و فى اللى كلها شخابيط , و فى اللى بتجمع بين اللى فات كله ....و اخيرا , فى اللى بيكورها و يرميها ورا ضهره !

طيب...المراهق بيملى الفراغ ازاي ؟

الحالات بتختلف و تتعدد و تتنوع , بس الاساس ان فى حد بيملاه صح , و حد بيملاه غلط

فى اللى بيملى الفراغ ده بالتلفزيون . و غالبا بتكون البنات , اللى تلاقيها عارفه كل فيلم و كل مسلسل و كل اعلان ب الحرف , و بتنزل كل شهر تجيب مجلة mbc 2 من دومينوز بيتزا

فى اللى بيملى الفراغ ده بالكمبيوتر و الأنترنت , ويقعد يعمل " surfing " ع النت طول النهار و الليل لحد ما بيغرق نفسه و اللى حواليه بمية البحر !

كمان فى اللى بيملى الفارغ ده بالمذاكره او القرايه او النشاط المدرسي , و نرجع نقول ان اغلب اللى بيعملو كده من البنات برضو على شان بيبقو عارفين مصلحتهم فين , ده غير ان الروتين الشرقي بيفرض عليهم كده

و فى اللى بيملى حياته رياضه ثم رياضه ثم رياضه , سباحه و جيم و كوره , و باسكيت و هاند , و بلى و جري من كلب الجيران ( ايه ؟؟ مش الجري رياضه ؟ )

و فى اللى بيتجه انو يملى الفراغ ده بالحب , او زي ما قولنا البوست الى فات " الصحوبيه "

و اخيرا فى اللى بيسيب حياته فاضيه و ما بيبقاش عارف يعمل فيها ايه , و ده غالبا اكثر المراهقين عرضة للأنحراف و الضياع

طيب يا عم تيييين ؟ انت رغيت كتير البوست ده , نخرج من الفراغ ازاي ؟؟

لازم كل واحد يكتشف هوايته , الرسم , الموسيقى , العربيات او الموبايلات , او التكنولوبيا عامة

رياضه معينه , عمل المقالب , الغنى فى الحمام , حرق دم الناس , التناحه - و دي اكتر هوايه منتشره فى مصر - او التمثيل قدام اى مرايه بصوت عالى

فى ناس كتير , بيكونو مش عارفين موهبتهم ايه ! , و من هنا بنقولكو ما تقلقوش ...عندنا الحل الأكيد , الواحد بيعمل اكتر حاجه هو بيبرع فيها و هو زعلان , بص كده و انت زعلان ...هتلاقيك بترسم , تكتب , تعزف , او حتى بتتريق على خلق الله ( كل واحد و موهبته بقى ) , و يمكن ساعات بنبقى محتاجين زقه - صغيره , على شان الناس اللى بتروح الجيم - و بنبقى محرجين نطلب من حد يزقنا الزقه دي " ادي زوبه زقه يا جدع " , و لكن اسلم حل اننا نطلبها من حد قريب و بنستريحله و بنثق فيه ....أخ , صديق او قريب " او حتى عم شندويلى البواب "

كمان لازم نجدد و نغير , نتعلم حاجه جديده , ازاي نطبخ اكله - و ده السبب فى ارتفاع حالات التسمم فى مصر - , ازاى نلعب لعبه معينه

لغه جديده , نغير نظام الأوضه ...نجيب ده هنا و ده هناك , نلزق بوستر هنا ولا هنا , نغير من الروتين اليومي - اللى هو البروجرام اليومي يعني للى ثقافتهم الماني - , اى حااااااااااااجه فى اى حااااااااااجه

و اهم حاجه , اننا ما نحبسش نفسنا فى قمقم - اللى انا مش عارف يعني ايه لحد دوقتي !! - و نختار صحابنا كويس

لأن زي ما انتو عارفين , الصديق هتلاقيه ع الطريق ( فى " شون ذا رن " )

لأن الصداقه عبـ......

ولا اقولكو

لينا فى ده بوست آخررررررررر

D=