الشتا قرب خلاص
و ابتدى كو الكآبه الدراسي
يرررررجع تاني
!
تفتكرو ليه اغلبنا بيكره الدراسه عامة ؟؟؟ .... سواء كانت مرّسه او يونيفرسا او حتى تعليم مفتوح ( بنص جنيه الحصه عند كوبري الخشب ) .... لأن الدراسه بتيجي ف الشتا .... أو المفروض يعني ( الشتا مزنوق ع المحور بقاله فتره ) ... الشتا , الليل فيه طويل .... الشتا , الدنيا فيه برد .... الشتا , الناس فيه قاعده ف بيوتها بياكلو شندوتشات مفتقه ! ..... بس بيستحمو بعدها يعني ( بمية نار تقريبا ) . و طبعا " بما إن " المعطيات اللى فوق .... ف " إذن " الشتا بيبقى الجو فيه كأيب .... و الكآبه ارتبتط ب الدراسه .
صحيح مع الوقت بناخد ع الدراسه ك روتين سنوي , إلا اننا برضك بنتخنق لما بتيجي , بعد الأجازه " المرحه " اللى اغلبنا قضاها ! . ايّا كان ... مع بدايات الدراسه ممكن قوي تكون ناس كتير فينا رايحه مدارس جديده , او رايحين على اول سنه ليهم فى الجامعه .... و مع المكان الجديد بييجي الخوف و القلق ( مع كركره بسيطه ف المعده ) من انك رايح مكان جديد فيه ناس جديده و جو مختلفه .. و بييجي نوع من اللخبطه و التوهان , و منكن بعد كده نخش على إكتئاب لو الحاجات دي طولت .... لكن لا تقلقو , و حطو فى بطنكو برتقان شتوي ( البطيخ ف الصيف بس ) , لأن الحلول الأكيده , و الحاجات المفيده تحت .
أيه هي يا واد يا تيييييييين ؟؟؟؟
الاول ..... أزاي نتعرف على ناس جديده ؟؟؟؟ ..... لو كنت من اللي راحو مدرسه جديده , ف الموضوع سهل قوي ب النسبه ليك . ب العكس قلبا و قالباَ يعني ... موضوع انك تكون الطالب الجديده ده بتبقى حاجه ممتعه قوي . ليه ؟ , لأن المدرسه غالبا بتبقى بنفس طلّابها كل سنه , ف لما بييجي حد جديد , بيبقى ملحوظ قوي , و كل الناس بتبقى عايزه تكلمه , و تعرف منه كل تفاصيل حياته ايّا كان نوعها .
و مش بعيد كمان تقع فى واحد ( غالبا اللى بتبقى قاعد جمبه , او هو قاعد جمبك ) يديك جوله في المدرسه و يبقى هو التور جايد ( دليل اللفه يعني للأجانب ) بتاعك فى السكولا .... و مع الوقت بتتعرف على فصلك , و من صحاب فصلك , بتعرف صحابهم اللى ف الفصول التانيه , و من الفصول التانيه تعرف صحابهم من السنين التانيه .... و بكده تكون انتشرت انتشار قوي و تلقائي , مش محتاج فيه اي حاجه غييييييرررر ......
غير انك بس تسيب نفسك , و ترحب بأي حد يكلمك , و تتكلم و ترغي .... لأن الناس بتوع " الرد على قد الجواب " , بيفضلو لوحدهم لحد ما يتخرجو من الدنيا .... اتكلم و رد و ارغي , و واحده واحده , هوووووووب هاتحس انك فى مدرستك القديمه .
أما لو كنت فى الجامعه , ف الوضع مختلف قوي , و ده لأن كل الناس جديده , و م حدش بيلاحظ حد ! ..... طب تعمل يه ! .... زي المدرسه كده , لازم اول حاجه تكون شخصيه متكلمه , رغايه , ممله :) ..... ثانيا , اوعى تعمل متفوق و تقعد قدام فى الاول ..... قدام , البشر ما بتتكلمش اشاسا , اقعد ورا بس اول اسبوع , اتكلم مع اللي جمبك فى البنش فى اي حاجه .... الدنيا حر قوي ؟ , هو الدوك اتأخر ليه ؟ , أيه الزحمه دي ؟! .....
اي سؤال او ملاحظه زي كده , الطبيعي اللى جمك ( لو مش سخصيه تنحه ) , هايرد عليك , و رد يجر رد و تقوم مادد ايدك .... تين ... هايمدي ايده و يسلم عليك و يقول : زُقليط .... خلاص , عرفنا الأسامي , نمشي مع بعض , لو ليه صحاب , هايصاحبك عليهم , و هما هايصاحبوك على صحابهم ... لحد ما هايبقى عندك جروب فى سنه اولى ( 20 واحد مثلا ) .... و بعد كده هايقعدو يتساقطو بقى لحد ما تتصفو على 10 مثلا او 5 , و هما دول هايبقو جروبك الأساسي ف سنينك الجامعيه كلها .
بس انا حاسس بتوهان و ضياع يا تين ........ اعمل ايه يا منيل ؟!
ما تقلقش , اي بدايه فى اي حته كده ..... فاكر و انت فى الحيضانه .... لما كنت طفل لطشيف , المدرسه كانت كبيره قوي ب النسبالك , و مع الوقت عرفت كل مكان فيها و عرفت كل البشر .... اولى جامعه , زي اولى حضانه .... هاتحس انها كبيره , و هاتّوه فى الأول ..... محاضرات و سكاشن و جداول و ملازم و كتب ( و ماننساش الكافيتيريات ) .... ده غير كم بيبان الجامعه المهول .... الطبيعي انك تتعب فى الأول , لكن بعد اول شهر , خلاص .... هاتكون عرفت مكان كل حاجه تقريبا , محاضراتك و مدرجاتك و دكاترتك ... و النظام بتاع كل حاجه .... الفكره بس انك ما تكتأبش , أو تتخرع ( تنّخض يعني للى ثقافتهم كلاكوتّي ) ... و زي ما الراجل الحكيم قال : اصطُبر على الرز ... لحد ما يستوي ...... أكتب ورا الدوك لو ما بيكتبش , و ارجع بيض اللى كتبته ... يعني اكتبه تاني بخط نضشيف ... و بكده تكون عملت " مزلمه " لنفسك , تذاكر منها وقت ما تحب ( يوم الأمتحان الصبح يعني )
طب يا ياخويا - الله يستر طريقك - اذاكر ازاي و انا فى الثانويه ؟؟
كل واحد فينا ليه طريقه شكل فى المذاكره .... فى اللى بيذاكر ب الكتابه , و فى ب الحل , و فى ب القرايه , أو ما بيذاكرش خالص ! ... لكن الفكره هنا , أنك لازم تعمل لنفسك نظام تمشي عليه , لأن الثانويه مش بتاعة اذاكر قبل الامتحان بشهر ! . و زي ما انت عارف , المواد نوعين .... حفظ و حفظ و فهم ( مافيش فهم بس هنا )
عندك الرياضه و الفيزيا .... قوانينهم تتحفظ , و كل اللي يقع تحت ايديك , حله . لأنهم عباره عن قوانين و افكار مسائل , ف كل ما تحل اكتر , كل ما تعرف افكار اكتر . و الكيميا زيهم .... احفظ المعادلات و الحاجات ... و قوم حل يا افندي .
العربي .... ماده جواها الف و 500 فرع , بس ايّا كان .... كل اللى عليك برضو انك بعد ما تحفظ النص او الدرس او فصل القصه , تحل عليه , و تشوف الامتحانات و تحل السؤال بتاعه فيها , اوعى تستنى لآخر السنه على شان تحل امتحانات العربي لأنك مش هاتلحق تحلها .... و النحو , استحاله تحفظه او حتى تفهمه , غير لما تحل عليه ... , و ممكن قوي تسيب درس و فصل و نص فى آخر السنه على شان ما تذاكرش الكم المهول ده
اللغات .... بسيطه , كلمات و جرامر .... حفظتهم و فهمتهم ... هاتقدر تحلهم .... ( مع تحيات الشاعر المبجل .... انا .... هيهيهييي ) .... و الستوري , اسئله تحفظها و كوتيشنز تعرفها , كله ب الحل هايبقى " اليسطى "
علم نفس بقى و جلوجيا و تاريخ .... احفظ , اعمل نقط , و أكتب ب أستفاضه ... ما تبخلش ب معلوماتك على شان تاخد درجاتك ... ( لسه مع الشاعر برضك )
أما الاحياء , نصها الاولاني حفظ .... و بعد كده فهم و حل .... اعمل زي ما قولنا فوق . و خلى بالك , ان مهما حسيت فى اي ماده انك كل ما تحفظ حاجه تنسى الباقي , ده عادي جدا , مع التكرار و الحل طول السنه , هتلاقيك لميت كل ده , و حافظ صم كمان
و ما تنساش بقى تبقى تقضي وقتك كله على كتاب الوش
الفيس بوك ده ..... لينا فيه
بووووست آخر
D=
الفيس بوك ده ..... لينا فيه
بووووست آخر
D=
|
المفروض البوست ميكونش اسمها باك تو سكولا
تكون باك تو نفخ باك تو ملل :D
عجبتنى طبعا يعنى زى باقى البوستس ^_^
و اللى انت كاتبه على طريقة المذاكرة فى الثانوية ده فانت جبت من الاخر فعلا يعنى
بس عشان حق ربنا بقى
اخر جملتين اللى بالاحمر دول هما اهم حاجة :D
انى اقضى وقتى على كتاب الوش :D
مذاكرة ايه و كلام فاضى ايه بس ما الكتب مالية البلد :D
و اه انا قريت الكومنت بتاعك ليا على البوست اللى فات
والله ادتنى امل بتجربتك السخصية دى :D
خصوصا ان انا كمان بعمل برامج و كلام من ده
دول كانو مسمينى ابو حفيظة :P
بس مش عشان شبهه هههههه بس عشان كنت بعمل برامج كوميدى بقى و كده ^^
و طبعا يعنى كالعادة مستنية البوست الجديييدة
بس مش تتأخر علينا فيها بقى ^_^
شكراااا جدا جدا جدا عالنصايح دى...هى فعلا كلمة السر فى انك تتعرف عالناس بسرعة هى انك متقفلش الكلام مع اى حد
انا السنة دى عرفت الفصل كله فىاول اربع حصص بالظبط :D
و دلوقتى اهو تقريبا تالت اسبوع فى الدراسة و خلصت ثانوى كله
اجتماعية زيادة عن اللزوم مش كدة ؟؟ xD
اما عن الثانوية
فهى صدمــــة
بتكتشف انهم كانوا بيضحكوا عليك السنين اللى فاتت دى كلها و مفهمينك ان اللى كنت بتاخده دة تعليم
كــل حاجة فيه مختلفة
باختصار
ثانوى (ادب و اصلاح و تهذيب) ^^
ربنا يستر بقى :)
متبقاش تتأخر علينا كدة تانى يا تين ^^
نور
هو من ناحيه الملل و النفخ
ف ده طبيعي ولله فى اي نوع من الدراسه
بس الثانوي قيوده اكتر من الجامعه
:)
بعدين ماله كتاب الوش
يعني اللى اتخرجو خدو ايه
لووووول
:))
اهاااااااا
طب كنتي بتعملي برامج فين ؟؟ و اسمها ايييه ؟؟
و ان شاء الله لا تأخييييير
:)
.....................................
سمرررر
العفو يا افندم
ده اقل واجب
انتي بس اطلب و احنا نكتببببب
و برافو عليكي
الاجتماعيين الزياده عن اللزوم دول
هما اللى بيمشو فى البلد دي
:)
صدقيني
فى العام كمان
هاتحسي ب أختلاف
و الجامعه اختلاف اكبر
الطبيعي بتاع نام تعليمنا المصريييييي
و ان شاء الله لا تأخيييييييييير
:)
دى كانت برامج كده بينى وبين صحابى فى المدرسة :D
بس فى حدود الفصل يعنى او الدور بس :P
كنت مسمياهم البحث عن فضيحة
و نشرة اخبار الـ 9.53
و من قدام منشر الغسيل
:D :D
يااااه، إيه اليوستس اللي بترجعني لورا دي ؟! :D مش ورا أوي يعني :D
بس موضوع جميل كعادتك يا تيين، معلش معرفتش أسمع برنامج "من 13 وانت طالع" عشان ظروف بأه ومشاغل، هحاول إن شاء الله المرة الجاية على طول :))
teeEeEeEN 2NTA BGD 3soOol 5ALS
>> KOL AL POST'S YGNNO
B7YEK 3la klamk ely bgd bstafed mno kteer
w bd7k mno 2ktr
t8bl t7yati ^^
نور
:))))
حلوه قوي من قدام منش الغسيل ده
عامة انا من موقعي هذا
بشجعك و بقولك
استمريييييي
...............................
ع.سالم
ولا يهمك يا باشا
المهم انك تمام و عال العال
بعدين البوستس اللى بترجع ورا دي
مهمممممممه جدا
لأن اللى ورا فى زحمة الحياه دلوقتي
بقى بيتنسي بسهوله
:))
...........................
سويت
الف شكر على كل الكلام الجميل ده
أحرجتم تواضعنا ولله
و يا رب نقدر نفيدك على طول
و يا ريت تتقبلي مننا بقى اقوى تحيه و سلام
على شان نورتي المذكرات كلهااا
:)