الجامعه
التحرير
الأنتخابات
و حاجات كتير قوي
أيييييييييييييييييييه ( ده انا بتنهد )
أحداث كتير قوي حصلت فى الفتره الاخيره , ليّا و لكل الناس ... و ب التالى , الدنيا كانت مكهربه ( مباهج شعرها لسه واقف م الكهربا لحد دلوقتي ! ) ... و الواحد ما عرفش يكتب اي حاجه من اي نوع . سواء بقى كان بسبب الزحمه , او حالة الجمود القويه جدا اللى كانت مسيطره ع الواحد ( مع شلحه خفيفه من الغباء كده ) .
مش هانتكلم عن الأحداث , و مش هانتكلم عن الأنتخابات , و ان صوتك امانه و لازم تنتخب و مش عارف ايه .... لأن كده كده خلاص , كل الناس المفروض بقى عندها و وعي و رايحه تنتخب ( كده كده هاينتخبو غصب عنهم على شان الغرامه ! ) .... المهم بس ان الواحد سعيد ب النسبه فى المرحله الاولى اللى كانت اعلى نسبه من ساعة الانتخابات بتاعة تحتمس الرابع ايام الفراعين ( أكيد مش قناة توفيق غباشه ) , ده غير ان كل الناس زهقت من السياسه و الكلام فيها .
طيب يا عم تين ... قاعد تهزي من الصبح .... هاتتكلم عن ايه ؟؟
عن كتاب الوش , او زي ما هو معروف فى الاوساط " الرائيه " ب الـ Face Book .... الفايس "بؤ" موقع من مواقع التواصل الأجتماعي ( اللى هي المواقع اللى تلاقي فيها صحابك بتوع المدرسه و الناس اللى قطعت علاقتك بيهم ... بتضيف عليها صحابك و تقعد بقى تقولهم انت حاسس ب أيه و مِرتبط ولا لأ و كده ) . أم هند , ان الفايس بوك عقبال عندكو كده فتح فى 2004 و نقدر نقول انه ابتدى ينتشر فى مصر على 2007 ( عقبال بقى ما وصل من امريكا لحد هنا !! ) .
و مع السنين , الفايس بوك ابتدى يتغلغل و يتوغل فى حياة الناس ( زي ما اريال بيتغلغل فى النسيج و يشيل البقع الصعبه كده ) , و بقيت تمشي فى كل مكان , تلاقي كل واحد ماسك موبايله ولا لابه و مركز قوي , و لما تقوله بتعمل ايه ... يقولك : بشوف فيس بوكي ! . ده غير انه بقى علامه اساسيه فى حياة كل واحد بيستعمل النت ... فعلا ... أول حاجه بتتعمل اول ما تلمس الجهاز انك تفتح فايس بوكك و تشوف ايه الجديد . ده غير انك كل كام ساعه كده تروح تفتح و تاخدلك لفه سلريعه , ده ان ماكنتش سبت الكِمبيوتر و رحت فتحته من " المحمول " !! .
و يا سلام يا سلام ( الله يمسيكي ب الخير يا ست نانسي ) لما يكون ما عندكش فايس بوك .... بقت حاجه غريبه و مريبه ... كأنك ب الظبط ما عندكش مخ او هدوم او أكل ... و الناس تبتدي تبصلك بصه كده عجيبه و كأنك واحد من اناسين ( جمع انسان يعني للي ثقافتهم بابوغنياوي ) الكهف و جاي من قبل الميلاد . حتى بقى اول سؤال لما تتعرف على حد جديد , و هو بياخد رقم موبايلك كده : مايلك اللى ع الفايس ايه ؟؟ ( بيتكلم بثقه , كأنه مافيش اي احتمال انك ما عندكش فايس !! ) .
الفايس بوك يشبه قوي الشارع .... هتلاقي فيه كل انواع البشر اللى ممكن تتخيلها , اللى بيشتم , و المحترم , اللى بيشتغل , و اللى بيلعب , اللى بيصلي و اللي بيعاكس ... و غيرهم كتير . الفايس بوك بقى ليه 3 طرق مالهمش خامس ( ايوه خامس , في ايه !! ) ... يا اما تكون قاعد فى بيتكو ( يعني اوف لاين ) ... او تنزل الشارع على شان تروح الكافى ( او مركز الشباب تلعب كرة ماء ) ... او تنزل الشارع على شان تروح " مرّستك " او جامعتك او شغلك .اللى قاعدين فى بيتهم , مريحين دماغهم قوي . اما اللى بينزلو يروحو الشغل ف دول بيتعبو فعلا .
ليه يا واد يا تيييييييييييييييييين ؟؟
الناس دي بتعتبر الفايس وسيلة دعايه مجانيه ... ببلاش ... و على رأي المثل : ابو بلاش كتر منه ..... بيعملو بقى بايدج و يحطو صور و عروض و حاجات , ده حتى يمكن تلاقي ناس شغلهم كله ع الفايس ... كل حااااااجه .... و هنا المشكله , ان الفايس ممكن قوي يقفل فى اي لحظه ( بنسبه كبيره على فكره ... 0.1 % كده ) ... و هنا , هايخسرو كل شغلهم و البيزنس اللى كانو عاملينه . ده غير انهم بقى محتاجين اول ما يعملو البايدج يشدو الناس ليها و كده , و طبعا ده محتاج عروض و حاجات قويه جدا . ناس تانيه مش بتشتغل , إنما بتكتب او بترسم او اي حاجه ( ممكن تلاقي فيديوهات رقص حلزوني ساعات ) ... و بيعتبرو الفايس " المرسح " اللى بيطلعو فيه مواهبهم الفذه للناس اللى بيسيبولهم كومنتات حلوه ساعات ... و ساعات تانيه وحشه قوي !
الطريق التاني هو اللعب ... ناس بقى بتحط صورها و ب تعمل شير طول النهار لفيديوهات و كليبات و كلام من الجروبات ... و يكتبو 100 ستاتس فى الساعه و الف و 500 كومينت فى الدقيقه ... ده غير اللعب طبعا ( بيزعو طماطشيم فى الفارم فيل ) .. و ما ننساش الريليشن ستاتس اللى كل شويه بتتغير ... معقده , سينجل , مرتبط , متجوز , بيفكر يتجوز ... كده يعني . الناس دي بقى صحيح ما بتتعبش , لكن ممكن قوي تتعب لو الفايس قفل . لأن حياتهم ببساطه مطلقه هاتتوقف ... و كل صحابهم بتوع الفايس ( اللى الفايس هو الطريقه الوحيده للتواصل معاهم ) هايروحو باي . مش هايلاقو حاجه يعملوها !
و زي ما الشارع فيه حاجات مستفزه , الفايس كمان بقى فيه حاجات مستفزه قوييييييييي , قويييييي , قوييي , قوي ( ده صدى صوت ) ..... زي مثلا انك تلاقي واحده اسمها مثلا Lma و بين قوسين (Miss Mody ) اللى هو صاحبها , او ممكن اسمه من غير ميسز اصلا ... ده غير طبعا موضوع In Relationship With , فى علاقه مع ابو العلى ! .... و يا حلاوه بقى لما تكون كومبليكايتد و صاحب الريليشن عنده 15 سنه ( الله يرحم ايام النحله ام فتله حمرا ! ) . من الحاجات المستفزه على الفايس برضو البروفايلات بتاعة الناس اللى ما تفهمش نوعهم ايه دول ... لولو الخطشير , فيفي الرومانسيه.... اللى بيحبو الحب , و حساسين و رقيقين ( و لذوذين و طعمين ! ) ... ما تفهمش هما عايزين يوصلّولك ايه ب الأسم و كم الإنفو اللى تجيب حول و شلل رعاش دي ! .
من الحاجات المستفزه برضو القلوب , كم قلوب رهيب و بوس و " بحبك قوي "قلبين" موااااااااااه " . و كمان كم الستاتس المهول اللى الناس بتكتبها ... انا فى المكروباص و زهقان ... انا باكل .... انا زعلان .... انا عيان و مناخيري سايبه ... و الاغرب انك تلاقي مثلا واحد كاتب انه عيان ولا عنده حالة وفاه و ناس عملاله لايك !! ( يكونشي ده نوع من الشماته المخفيه ؟؟؟ ) .
بغض النظر عن الحاجات دي , إلا ان الفايس مفيد جدا فى حاجات تانيه ... لو بصيت فى لستة " الفرندس " اللى عندك , هتلاقي فى ناس كتير علاقتك بيهم فايس بوكيه بحته ... ممكن يكون بقى صحاب من ع النت او من المدرسه او اى حاجه ... ناس بس عندك ع الفايس , بتعرف اخبارهم من عليه و كل جديد , تقولهم كل سنه و هما طيبين فى عيد ميلادهم , و تسلم عليهم مره و 2000 لأ . كمان سهل قوي انك تبعت من عليه حاجات , تشارك الناس موهبتك , تتكلم و تتناقش , تلعب , او تعمل بيزنس معين . ده غير انك بقى ممكن تعمل ثوره من عليه , تظبط خروجه , تبقى على تواصل مع حد مشهور ... حاجات حلوه كتيشييييير .
ما عينا من كل ده ...... المهم صورة بروفايلك تكون حلوه ... يعني جمله من نعيم برذرز , أو صوره سوده خالص لما تكون حزين ( و تنكد علينا ) ... او تمشي مع التقاليع . وحده وطنيه , هلال و صليب ... ثوره , علم مصر ( اسد قصر النيل ابو عين واحده حاليا ) .... رأس السنه , بابا مجدي ( اصل نويل عيان ) ... و غيرهم . و لما بقى حد يلاقيك حاطط صورة ممثل تركي ..... تبقى سنتك سوده , و تبقى عيل توينكز و هوهوز و كمية شتايم مختلفه ... كأن الممثل التركي ده مش زيه زي احمد السقا و شاروخان و برعي الروش ( ده وجه جديد ) ... ممثل عادي عاجبك تمثيله ! .
اللى لازم نكون عارفينه
ان المسلسلات التركي دي
ان المسلسلات التركي دي
ليـ ...............
ولا اقولكو
لينا بووووووست آآآآآخر
D=
لينا بووووووست آآآآآخر
D=
|
لالالالالا !!
مش مصدقة !!
دة بجد ولا حقيقة !! :D
اخيراااااااااا :)
عادت المذكرت ..و بقوة ^^
بص
هو الفيس بوك حاجة كدة وليدة الفراغ
انا اول واحدة بقولك لو مكانش عندى وقت فاضى كتير مكنتش فتحته خالص
بس الفكرة انه بيبفى المفر الوحيد المتاح من مرض مزمن و معدى اسمه الملل
و غير كدة
بتبقى طريقة التواصل مع غيرك على الفيس بوك
اسهل كتيـــر من التواصل معاهم فى الحقيقة
مريحة اكتر يعنى
و دة غير انه عنده options كتيـــــــــر مش متاحة عندنا فى الحياة الحقيقية..زى مثلا لما تبقى زهقت من حد خلاص بدوسة زرار اسمه block تقدر تستريح منه
و دة مع الاسف الشديد مش موجود فى حياتنا :)
بس دة ميمنعش ان الفيس بوك سلاح ذو حدين
زى اى حاجة فى حياتنا :)
و متبقاش تتأخر علينا تانى ياما هسلط عليك اسد قصر النيل اللى بعين واحدة..هو اه بعين واحدة بس اسمه اسد بردة :D
I liked it awiiiii :D:D
it is so funny ya Teen :D
keep it up , we ekteb kteer ba2a :)
ياااااااه انا مش مصدقة ان فى بوست جديدة :D
انا فتحت البلوج صدفة اصلا !!
المهم
الفيس بوك ده حيااااتى انا مش متخيلة يعنى ايه حد عايش كده من غير فيس بوك :D
لو مفيش فيس بوك ازاى هعرف كل حاجة جديدة عن صحابى اللى مش معايا فى المدرسة ؟
او ازاى هعرف اى حاجة جديدة عن اى حاجة تانية ؟
بجد الفيس بوك ده اجمد حاجة فى الحياة
صحابى بقالى مليون سنة مش شوفتهم و لقيتهم على الفيس بوك و اتفقنا و اتقابلنا
يعنى كانت فرحة الدنيا يومها هههه :D
بس بردو الفيس بوك خصوصا و النت عموما (( شايف مصطلحات كتاب القراءة دى :] ))
من اكتر الحاجات اللى بتضيعلى وقتى
انا بقعد على الفيس اكتر من 12 ساعة فى اليوم :D مش بقدر اقوم و اسيبه
ده عالم كبيييييييييييير فى كل الناس حتى الناس اللى انت ممكن عمرك ما تشوفهم فى حياتك الواقعية هتلاقيهم على الفيس بوك
و بليز متتأخرش بقى فى البوست اللى جاية !!
مش زى المرة اللى فاتت هاا !!
سمر
ده مش بجد
إنما حقيقه
:))
و انا معاكي جدا فى موضوع الاوبشنز ده
يا ريت فعلا الحياه كانت زي الفايس
ولله كانت بقت اسهل بكتير جدااااا
و اوعدك مافيش تأخير تاني
كله إلا الأسد :)
و منورانا دايما يا سمرررر
............................
سهر
ثانكس قوي بجد
و اوعدك ان شاء الله اكتب اكتر
طول ما فى ناس بتقرى و بتشجع
:)
..........................
نور
معلش بقى ع التأخير
بس الظروف ولله
:)
منورانا يا نور أكيد طبعا
و أحب اقولك انا كل كلمه قولتيها
تنطبق عليا ب الحرف
أنا كده فعلا
فايس بوكي حياتي
ولما باظ فى رمضان
ما اقولكيش ... آه حسيت اني استريحت
بس فتره و ابتديت احقد على كل اللي عندهم فايس
و عملت واحد جديد , عقبال ما القديم اتصلح
!
بس اوعدك
مش هاتأخر ان شاء الله تاني
:)
sure kal3ada post gonan
al fsce da 2ktr 7aga btday3 w2ty bs m4 23rf 2sebo 5ales ^_^
w d7kt kteeer 2wy
isa ydom 8lmk w m4 t3'eb
t7yaty leek ^^
سوووويييييت
ربنا يخليكي على الكلام الجميل
صدقيني , انا كمان بيضيع وقتي قوي
زي ما يكون فى سحر !
:))